Popodalaina 8
8
Sa Makogore Na Popogoso Kolo
1Ego na Tamasa sa roqu kamua si Noa beto doru mamanugu mamade nene pirudi beto doru mamanugu papausu qai koi tavitia isa pa aka, ko sa ipa gorenia isa pa peso sa na gava ko sa makogore sa na kolo. 2Ego ira na vuvugu pa kolo lilisi beto na toba pie pa oka sa qai tajojongo suqutu ko sa taaru vanogoto sa na okoro pa vavagalo eqa. 3Na ovuluna na kolo pa are peso sa mate vaituti gore, ko pa liguna kai gogoto lima ngavuluputa rane poni sa sa vukele gore mate sa na kolo, 4ko pa vina manoga vitu rane na popu vina vitu sa sa gore toqo makele pa batudi na kukubo pa Ararati sa na aka. 5Na kolo sa vukele vaituti gore tinganai sa kamua na vina manogaputa popu, ko pa rane momoe na vina manogaputa popu sa qai podaka votu gu sira na batudi na kukubo.
6Ego pa liguna ka made ngavuluputa rane sa revangia i Noa sa na vuidana na aka sa roitinia isa 7ko sa garunu variua sa kai belama, ba sa riu kole gu tatava lelekogona ko tinganai sa pidili betona sa na kolo pa peso. 8Poni sa garunu variua mule isa sa kai kuru ko mi gigilai sa vei bi na vukele gorena na kolo sa tei kamu tu pa peso ba dai sau. 9Ba na kuru sake isongo batia kai ia ketakoi bi boka toqonia na nenena ura na kolo sa korapa amua sa doru arena na peso, ko sa tatava muleona gu tai Noa pa aka. Ko i Noa sa kaqama votunia na limana ko sa teku vatomea pa aka sa na kuru. 10Ko sa vera kai vitu rane mutu si Noa beto sa kai garunu vavotu riua mule koko pa aka sa na kuru. 11Totonai sa tatava mule kamu na vevelu poni sa sa garatia pa mangana isa sa kai equru olive na koni tapudokona! Poni sa gigilai i Noa sa sa tei vukele gore tu pa arena na peso sa na kolo. 12Ego ko sa verania pa liguna kai vitu rane mutugu beto sa garunu variua mutu isa sa na kuru, ba kopira sake gabala mule kamu ligu sa na kuru.
13Ego pa rane momoe na popu momoe pa vina vonomo gogoto kame aorona i Noa sa sa pidili beto sa na kolo pa arena na peso. Poni sa teku pale i Noa sa na pateina na aka beto mi doro sau poni sa batia sa sa pidili beto sa na arena na peso. 14Ko pa vina rabete vitu rane na vina rua popu sa sa pidili gagapu gu sa na peso.
15Poni sa parangia na Tamasa si Noa, pira sau, 16<<Mu votu pa aka ao beto na maqotamu beto ira na tumu marene beto na maqotadi. 17Mu toni votuniria doru okokoto puku mamanugu masa toadi qai koi tavitigo- ira na mamanugu tatava, na mamanugu mamade nenedi, beto doru mamanugu gavere qai gaveria na are peso- ko mai miminete pa peso beto mai vua beto mai soku pa peso>>, sau sisa.
18Ko sa votu si Noa beto na maqotana beto ira na tuna marene beto na maqotadi. 19Doruna mamanugu mamade nenedi beto doru mamanugu gavere pa peso beto doru mamanugu tatava- doruna qai gaveria na peso sa qai votu pa aka vaituti pa okokoto dia pukuna.
I Noa sa Vavakukuvu Lao Tai Iahova
20Ego pa liguna isa sa roitinia i Noa sa kai idi patu vavavakukuvuna tai Iahova beto sa tekuria sa kaki mamanugu mamade nene liosodi beto kaki mamanugu tatava liosodi ko sa vavakukuniria pa idi vavakukuvuna. 21Poni sa umanga jongai i Iahova sa na umanga jongana na vavakukuvu ko pira sau pa bulona, Maneke leve ligunia ara sa na peso pa ginuguana na tinoni, nake savana doru nyorogua pa bulona na tinoni sa na ikerena podalai tu na koburuna, beto maneke koti liguria ara sa doru mamanugu toadi qa roitiniria.
22<<Ai mina kakasana vei sa na totoso tana peso, sa
Na totoso vavuvusu kiko beto na totoso papaduku,
Na lomoso beto na mangini
Na totoso tapo beto na totoso okoro
Na rane beto na bongi
Sa maike minere kokoroto,>> sau.
Currently Selected:
Popodalaina 8: LGA
Highlight
Share
Copy
Want to have your highlights saved across all your devices? Sign up or sign in
© 2024, Islands Bible Ministries. All rights reserved.
