Popodalaina 42

Ira Na Tugana Marene i Josepa qai Gore Pa Ijipi

1Ego totonai sa gigilai i Jekopi sa na kiko sa sa kole pa Ijipi poni, sa pira sauniria sira na tuna marene, <<Ai sa vei ko qu kole gu toqo vaidoke tari lana?>> sauniria. 2Beto sauniria mule, <<Qa nongoria sa na kiko sa kole pa Ijipi qarigu. Ko mu gore vai vanigita kaki kiko ketakoi, ko ta toania ko take mate,>> sau.

3Poni sa ira ka manogaputa tugana i Josepa sa qai gore ko mai vai kiko pa Ijipi qarigu. 4Ba i Jekopi sake vatutiniria ira si Benisimani isa na tasina i Josepa ura kita vei ko mi gosoro tapata sau. 5Ko ira na tuna marene i Izireli sa qai somana tutiiria sira kaki goto tinoni qai gore vai kiko pa Ijipi ura pa ia pa Kenani ba sa raja tugu sa na songe.

6Ego i Josepa sa na tinoni mamata pa ia pa Ijipi, ko isa sa vavainiria tadira doru na tinoni pa ia sa na kiko. Ko totonai qai kamu pa Ijipi sira na tugana i Josepa, poni saqai lao titi opo gore pa peso pa moena isa. 7Isa tugu sa batiria na tugana si Josepa sa, sa gigalariaona ba sa roiti vei kai tinoni karovona sisa ko sa paranga sasasururia, pira sau, <<Pai qu koko lame vei sagou?>> sauniria.

Poni pira qarigu sira, Koi! <<Agei na koko lame vei mei pa ia pa Kenani,>> <<Ko me vai kiko qeu,>> qarigunia.

8I Josepa sa gigalariaona sa na tugana goto ira sa qaike gigalia sisa.

9Beto isa sa sa roroqu kamua i Josepa sira nona putagita veveidi ira na tugana ko pira sauniria, <<Na tinoni qu tome golomo sagou. Mu tome ko mu doro poaria gu ketakoi mina boka pururu tome vei na kana qugu,>> sauniria.

10Poni qai oea sisa, pira qarigu, Koi <<Dai! mei tinoni lavata.>> <<Agei na mua nabulu aipira sa qe kamu ko me vai kiko gu qeu sa. 11Agei doru pira sa na tuna marene beto gu kai tinoni. Na sosotona sa qe pojanigo api ko nake tinoni me lame tome golomo doro poai na miu ia qeu,>> qarigunia.

12Ba pira sauniria mutugu sira, <<Dai!>> <<Qu seke. Qu lame ko mu batia ketakoi mina boka pururu tome vei na kana qugu,>> sauniria.

13Ba pira qarigu mutugu sira, <<Agei na mua nabulu aipira sa ka manogarua tamatasi na tuna marene beto gu kai tinoni sa suvere pa Kenani. Isa pa ligu bebeto sa sa korapa suvere tana tamamei goto kame sa tei kepore tu,>> qarigunia.

14Sa pira sauniria i Josepa sira, <<Isa tugu vei qa tei pojanigou tu ara. Na tinoni qu tome golomo tugu sagou. 15Ba jongana, pira mana podeke veinigou ara sagou: Pa isongona i Pero na bangara toana sa, munake isongo taloa lani sagou tinganai mina kamu tu lani sa na tasimiu pa ligu. 16Ko mu garunia sa kame agou ko mi riu toni vakamua sa na tasimiu goto agou doru mule sa muna takopu pa ruma vaipiu ko ta doria vei sosoto tugu sa na paranga qu pojaria ba dai, sauniria. Vei munake vei sa pa isongona i Pero na bangara toana sa, na tinoni qu tome golomo tugu sagou.>> 17Beto ko sa vatomeria pa ruma vaipiu ka ue rane.

18Pa vinaue rane poni sa pira sauniria i Josepa sira, Jongana, <<Mu roitinia gu agou sa na sakasava ma pojanigou ara api qau ko mu toa ura ara ba qa matagutunia na Tamasa. 19Vei mina tinoni tarangemiu sosoto sagou sa kame agou sa mina suvere jola pa ruma vaipiu goto agou doru mule sa mu pogoso muleniria na kiko pa miu gusu tadira na miu tatamana qai korapa burana vaivasevi. 20Ba muna isongo toni kamunia taqu sa na tasimiu pa ligu bebeto soni vei tu sa na sosotona tugu sa na miu vavakato managu sara beto vei tu sa munake tavamate,>> sauniria. Poni qai vaegoa gu ira sa na sakasava sa pojaniria isa.

21Beto qai kole vaipaparanga mekadi sira ka manogaputa tamatasi, pira qarigu, <<Inana sa, taqe tekua na vinakilasa sa gita pa laena na tasida. Taqe batioda sa ai sa vitigi veinia isa sa na tapata taqe roiti laonia gita tana totonai sa tepa vivitigi gita ko take vaia sau, ba taqeke vainongoro ko sa vei sa taqe gosoronia na tapata gita sa na ginugua isa,>> qarigu mekadi.

22Poni sa oeria i Rubeni sira, pira sauniria, <<Qa pojanigou tugu sara boko tasiqu, pira qaunigou, muke kotia na koburu qaunigou. Ba agou quke vainongoro. Ko kopira sa tana isongo laea tugu gita sa na orunguna isa,>> sau sisa. 23Qaike gigilai ira sa i Josepa sa sa korapa nonongoriaona sa na sa qai korapa pojai ira ura isa sa kai goto tinoni tu sa sa ruruvata vakarovo vania.

24Ko sa rijo vasou tadira ko sa podalai lukana, beto sa gabala muleria ko sa parangaria. Beto sa tekua si Simioni ko sa piua pa moedi ira.

25Ego beto sa vaigarunu si Josepa ko qai vapugeleni kiko sa na baiki tadira, qai kura muleniria pa leo baiki sa na dia poata siliva beto qai vatana vaniria na besa pa dia rerege mule. Pa liguna sa roiti veiniria isa inara, 26poni sa qai vamakeleria pa dia dongiki sa na dia kiko beto ko qai taloa riu.

27Pa kai ia ketakoi qai vajola bongi, poni sa kame ira sa sa revangia nona baiki ko mi vagagania nona dongiki sau sa, sa batia sa nona poata siliva pa mangana nona baiki.

28Ko pira sauniria sira na tugana na tasina, Koi! <<Sa tavamule sa na poata siliva taqu.>> Dotu! <<Pa leo qua baiki api,>> sauniria.

Poni sa tadungana na bulodi ko qai matagutu neneqere ko pira qarigu, <<Na sa pu vei pira ko na Tamasa sa roiti veinigita tu pira?>> qarigu.

29Totonai qai mule kamu tai Jekopi na tamadi pa ia pa Kenani sa, qai vavakato vania sa doru sakasaa sa taroiti tadira. Pira qarigu, 30<<Na tinoni isa sa bangarania na ia isa sa sa paranga sasasurugei beto sa roiti veinigei tu kale agei qe korapa lao tome golomo doro poai na dia ia sau. 31Ba pira qeunia, Na sosotona sa agei nake tinoni qe korapa tome golomo pa ia tamugou. 32Ka manogarua tamatasi sagei na tuna beto gu kai tinoni. Kame sa tei kepore tu goto isa pa ligu bebeto sa sa korapa suvere tana tamamei pa ia pa Kenani qeunia,>> qarigu.

33<<Beto pira saunigei sa na tinoni sa bangarania na ia isa, <Ego pa soana vei api sa mana gigilai ara sa na tinoni tarangemiu sagou: Kai tasimiu sa muna loai taqu goto agou doru sa mu pogoso mule vaniria na gagani na miu tatamana qai korapa burana vaivasevi. 34Ba muna tonia lame taqu sa na tasimiu pa ligu bebeto ko mana vasosotoa ara sa na tinoni tarangemiu sosoto tugu sagou beto nake tinoni sa tome golomo doro poai na ia. Poni mana ruvata vamule vanigou sa na tasimiu, beto muna boka rijo lao lame pa ia lani sau>,>> qarigu.

35Totonai qai kole vuvaniria na dia baiki sa, korapa kura koledia pa okoto dia baiki sa na kukurani poata sa kolea na siliva. Ko totonai qai batia ira beto na tamadi sa na kukurani siliva, poni sa qai matagutu. 36Poni sa parangaria i Jekopi na tamadi sira, pira sau, <<Qu tei teku beto paleniria tu sira na tuqu. I Josepa sa tei kepore tu, i Simioni sa tei kepore tu ko kopira mu tekua mutu si Benisimani qugu. Doru tapata sa qai raja gu taqu,>> sau sisa.

37Poni sa parangia na tamana si Rubeni, pira sau, <<Vei maneke toni mulenia tamu sa na koburu sa muna boka vairia gu sa karu tuqu marene ara inara. Mu vakolea pa limaqu ara sisa beto kode ara mana toni mulenia tamu,>> saunia.

38Ba pira tu sau si Jekopi, <<Na tuqu sa minake gore tavitigou ura na tugana ba sa tei mate tu ko mekana gu isa kopira sa suvere. Ko vei mina gosoro kalea kaki tapata pa soana totonai qu korapa gore sa, na takulanga gu sa kode muna vagorenisiu pa leo pou ara sagou,>> sauniria.

Currently Selected:

Popodalaina 42: LGA

Highlight

Copy