Popodalaina 32

I Jekopi Sa Vananama Ko Mina Gosoria I Isoa

1Ego i Jekopi ba sa rerege riuona tugu, poni ira na mateana tai Tamasa sa qai gosoria. 2Totonai sa batiria i Jekopi poni, sa pira sau, <<Na ia susuverena tai Tamasa sa lani,>> sau. Ko sa vaisongonia Mahanaimi i Jekopi sa na ia isa.

3Ego i Jekopi sa garunu lao momoeniria tai Isoa na tugana pa ia pa Seia pa gugusu pa Edomu sira na tinoni pogoso nongoro. 4Pira sauniria, <<Pira munagunia si Isoa na qua iviva lavata; Na mua nabulu i Jekopi sa pira sau, Qa kole suvere tai Labani kamua tu kopira sara. 5Qa isongo bulumakau beto na dongiki, na sipi, na qoti, na nabulu marene na nabulu rereko. Kopira qa korapa vanongorigo sao na qua tinoni lavata, ai vei ko ao mu qeranisiu qau,>> sau.

6Totonai qai mule kamu ti Jekopi sira na tinoni pogoso nongoro, sa pira qarigunia si Jekopi, <<Qe lao kamua si Isoa na tugamu, ko kopira sa korapa lame ko mi gosorigo ao sau, tavitiria ira ka made gogoto ona tinoni,>> qarigu.

7Poni sa matagutu neneqere beto sa mamata si Jekopi ko sa pikataria sa nona tinoni pa karu pukuna beto vei tugu ira na gogodo sipi, na bulumakau beto na kameli. 8Sa rovea sa, <<Vei mina lame si Isoa ko mina rapatia kai pukuna poni sa kai pukuna sa kole sa mai boka ukudia,>> sau.

9Beto sa vavara si Jekopi, pira sau, <<Ao na Tamasa tana tamaqu i Ebarahami beto na Tamasa tana tamaqu i Aisake, Kei Iahova, Ao pira qugunisiu, Mu mule lao pa mua gusu beto tadira na tavitimu beto ara mana roiti veinigo kai tinoni puramu qugu. 10Ara sa nake garoqu ko ba isongia sa na vairoqu jongadi beto na uana tarangena qu roitinia ao taqu na mua nabulu. Na qua opata gu sa qa isongia totonai qa karovia ara sa na ovuku pa Jodani api, ba kopira sa karu pukuna tu sa qa isongia ara. 11Ko mu alosiu, qa tepago, pa limana na tugaqu i Isoa ura qa matagutunia ara sisa kita mi lame rapatasiu sara beto ira na tamatina. 12Beto pira qugu tugu vei, Mana veinigo kai tinoni puramu ara sao beto na tutimu ao sa mana veinia na nagasa pa poanana qaike boka taanye na sokuna qugu,>> sau sisa.

13Ego ko sa vajola bongi ketakoi sa na bongina isa, beto sa vileria pa sakasava sa isongoria sa na vaivana tai Isoa na tugana: 14Karu gogoto qoti rereko beto ka rabeteputa qoti marene, karu gogoto tuni sipi beto ka rabeteputa sipi marene, 15ka uengavuluputa kameli rereko taviti tudia, ka made ngavuluputa bulumakau marene beto ka manogaputa bulumakau rereko, beto ka rabeteputa dongiki rereko beto ka manogaputa dongiki marene. 16Beto sa vakopuniria nona nabulu, pa dia okokoto papausu, beto pira sauniria sa nona nabulu, <<Mu lao momoe pa moequ, goto mu vaisouniria ko mi kole sa na lolomo pa vaikorapaidi na okokoto gogodo papausu,>> sau.

17Beto pira saunia sa na tinoni pa momoe, <<Totonai mina gosorogou si Isoa na tugaqu ko mina nanasa, <Na tinonimiu tai sei sao, pai qu korapa lao vei beto I sei sa isongoria sa doru papausu pa moemu inara?> minagu sa 18pira munagunia, Koi! Na papausu tana mua nabulu i Jekopi sa aipira. Na vaivana sa garunu lamenia tana qua bangara i Isoa sau goto isa sa korapa lalameona pa ligumei munagu,>> sauniria.

19Na tinoni vinarua, na vinaue beto doruna tugu qai tutiria na papausu ba sa vavanau veiniria tugu inara, pira sau, <<Kai muqisi paranga tugu api sa muna pojania si Isoa sa totonai muna gosoria, sauniria. 20Beto pira tugu muna poja veinia vei, Na mua nabulu i Jekopi sa korapa tututiona pa ligumei,>> munagu. Ura sa rorovea sa pira sau, <<Mana vabulenia na roquna ara sira na vaivana qa korapa garunu lao momoeniria aipira ko pa liguna tonai mana batia ara sa na isumatana sa palu mina tavaragua batia na isumataqu ara,>> sau. 21Ko ira na vaivana tai Jekopi sa qai tagarunu lao momoe, goto isa sa vajola bongi pa ia ketakoi qai suvere vaikamu sa na bongi isa.

I Jekopi Beto Na Tamasa Qai Vaituaragadia

22Ego na bongina isa si Jekopi sa sa qaqiri beto sa toniria sa karu maqotana, karu ona nabulu rereko, ka manogameka tuna marene beto ko sa karovia na nyonyola pa Jaboki. 23Pa liguna sa toniria ko sa vakarovoria pa kai kalena na nyonyla poni sa sa vakarovoria mule sa doru sakasava sa isongoria. 24Ego ko sa taloa vamekaina si Jekopi. Beto sa lame kai tinoni ko qai vaituaragadia sira karu tinganai ko sa sae tu na vovola rane. 25Totonai sa batia na tinoni isa sake boka vagorea si Jekopi sa, sa majai sa na vaijokele pa sisikirina isa ko sa vaisela tu sa na vaijokele pa sisikirina i Jekopi totonai qai kole vaituaragadia. 26Beto pira sau sa na tinoni, <<Mu loasiu ura sa tei sae tu sa na vovola rane,>> saunia.

Poni pira sau si Jekopi, <<Maneke isongo loago tinganai ko muna mananisiu mai tu,>> saunia.

27Poni sa nanasa sa na tinoni isa, <<I sei na isongomu sao?>> saunia.

Poni pira sau sisa, <<I Jekopi,>> sau.

28Poni pira saunia na tinoni isa, <<Kopira nake i Jekopi na isongomu sao goto i Izireli tu, ura qu rajai na Tamasa beto qu rajaria ira na tinoni ba qu kilasa kare sao,>> saunia.

29Sa pira saunia i Jekopi, <<Mu ule vanisiu na isongomu,>> saunia.

Poni sa nanasia i Jekopi sisa, pira saunia, <<Ai sa vei ko qu nanasania tu na isongoqu?>> sau. Beto sa sa manania tugu ketakoi.

30Ego ko sa vakukunia Peniele i Jekopi sa na ia isa, <<ura qa batini isumataqu ara sa na isumatana i Tamasa ba sake apulia kai sa na qua toa,>> sau.

31Ego sa sagere sae pa nulu sa na tapo totonai sa jola pa Peniele si Jekopi, ko sa rerege qiqiqe gu sisa ura sa vaisela na sisikirina. 32Ko sa vei sa, kamua pa rane pa ngeni alepi ira na tinoni Izireli sa qaike gania sa na masa sa vaijokelai lao pa pupuda pa kale sisikiri ura pa masa tugu pa kale sisikirina i Jekopi sa sa tamaja.

Currently Selected:

Popodalaina 32: LGA

Highlight

Copy