Popodalaina 28

1Ego i Aisake sa kukua si Jekopi ko sa manania beto sa garunia pira saunia sisa: <<Muke alava rereko Kenani. 2Goto mu qaqiri ko mu riu pa Padani Arami, pa tatamana tai Betueli isa na tamana na tinamu ko mu tekua kai maqotamu ketakoi tadira na tuna rereko i Lebani isa na luluna na tinamu. 3Na Tamasa neqina jola mi mananigo beto mi vavuago beto mi vasokugo ko mu vaiminetai soku tinoni. 4Ko isa mi vanigo sa na mana tai Ebarahami, ao beto na tutimu ao ko mu isongia sa na ia ketakoi qu korapa suvere vei na tinoni karovomu, na ia isa na Tamasa sa vania i Ebarahami,>> saunia. 5Ko sa garunia i Aisake si Jekopi ko sa riu pa Padani Arami, tai Labani na tuna marene i Betueli na tinoni Arami, isa na tasina marene i Ribeka na tinadi ira Jekopi i Isoa.

6Ego sa batia i Isoa sa I Aisake sa manania si Jekopi beto sa garunu variua pa Padani Arami ko mi tekua kai maqotana ketakoi saunia. Totonai sa manania sisa sa sa garunia, pira saunia, Munake tekua kai maqotamu tadira na rereko Kenani sao, saunia. 7Ko sa nongoria i Jekopi sa na tamana beto na tinana ko sa riu pa Padani Arami. 8Ego sa batia i Isoa sa ira na rereko Kenani sa qaike vatavaraguai si Aisake na tamana, 9ko sa lao tai Isimeli si Isoa ko sa tekuni maqotana si Mahalati na luluna i Nebaioti beto na tuna rereko i Isimeli isa na tuna marene i Ebarahami, ko sa tamo laonia tadira na maqotana sa tei tekuria tu perangana.

Na Putagita Tai Jekopi Pa Beteli

10Ego ko sa taloa pa Biaseba si Jekopi ko sa riu pa Harani. 11Totonai sa kamu pa kai ia isa, poni sa mi vajola bongi mai ketakoi sau ura sa tei suvu tu sa na tapo. Ko sa tekua sa kai patu pa ia isa ko sa tarubatunia beto sa gona kole puta sa pa ia isa. 12Ko sa putagita sisa, sa batia sa kai kekesana sa turu pa peso beto na batuna sa kamu tu pa noka, beto ira na mateana tai Tamasa sa qai korapa saea beto gorea sisa. 13Ko pa narena isa sa turu si Iahova beto pira sau, <<Ara si Iahova, na Tamasa tai Ebarahami na tamamu beto na Tamasa tai Aisake. Na peso qu korapa kolea ao sa mana vanigo ao beto ira na tutimu ao. 14Na tutimu ao sa mai vei na kavuruna na peso, beto muna qaqatia doru eqa lao vei pa kale suvu tapo, pa sagere tapo, pa kale saena beto pa kale gorena. Ko doru miminete tinoni pa nabana sa mai tamanadia tamu beto tadira na tutimu ao. 15Ko ara mana vavaburogo beto mana kopunigo pai eqa muna lao vei, beto mana toni mule kamunigo tugu pa peso api. Ura maneke loago ara sao tinganai mana roiti votunia ara sa vei qa pojanigo ao,>> sau sisa.

16Tonai sa dorava pa ona puta si Jekopi sa, pira sau, <<Koi sosoto! I Iahova sa pa ia lani, ba ara qake gigilai,>> sau. 17Ko sa matagutu ko pira sau, <<Na ia vaivamatagutuna jola sa na ia api! Ko nake goto ia goto na ruma tai Tamasa sa lani ko api sa na atakamanana pa noka,>> sau.

18Ego sa turu vuvugei jonga si Jekopi, sa tekua sa na patu sa tarubatunia beto ko sa vaturu veinia na babara beto sa vuvani oela sa na batuna na patu. 19Beto sa vakukunia Beteli na isongona sa na ia isa ba Luzi tu sa na isongona sa na gugusu isa perangana.

20Ego ko sa maulunia i Jekopi sa kai maulu, pira sau, <<Vei na Tamasa sa mina vavaburosiu beto mina kopunisiu pa qua rererege qa korapa lekogonia api beto vei mina vanisiu na tetekuna ko mana teteku beto na poko ko mana vasaea, 21beto ko mana gabala mule pa bule pa ruma tana tamaqu, poni sa I Iahova sa mina Tamasa taqu 22ko na patu alepi isa qa patubiti vaturu veinia na babara sa mina na ruma tai Tamasa beto pa doruna na sakasava qu vanisiu sa kame pa manoga sa mana valao vanigo ao ara,>> sau sisa.

Currently Selected:

Popodalaina 28: LGA

Highlight

Copy