Popodalaina 25

Na Mate Tai Ebarahami

1Ego sa teku sogai i Ebarahami sa kai maqotana nisongona i Ketura. 2Ko i Ebarahami sa vaporenia tai Ketura sira Zimirani, I Jokosani, I Medani, I Midiani, I Isibaki beto I Sua. 3I Jokosani sa vaporeria sira Seba i Dedani ko na tutina i Dedani sira na tinoni Asurai, na Letusae, beto na Leumai. 4Ira na tuna marene i Midiani sira Epaha, I Epe, I Hanoki, I Abida beto i Eleda. Ira doru aipira sa na tutina i Ketura.

5Ego i Ebarahami sa sa loa beto vania i Aisake sa doru sakasava sa isongoria. 6Goto ira na tuna marene sa vaporeniria tadira na goto maqotana sa i Ebarahami sa vaniria na vaivana beto ko totonai tu sa korapa toaona sa sa garunu vasou riuria keta pa kale sagere tapo ko mai sou tai Aisake sau.

7Ego i Ebarahami sa sa suvere kamua kai gogoto vitungavululima aorona. 8Beto sa, sa vasaenga bebeto ko sa mate si Ebarahami totonai sa baragoso vapaparoi vatale sisa ko sa tagolomo tavitiria ira nona tinoni sisa. 9Ira Aisake i Isimeli karu tuna marene sa qai golomonia pa leo bevi pa Makapela tata pa Mamiri pa kobu ia ti Eporoni na tuna marene i Zoa na tinoni Hitai. 10Na kobu ia isa si Ebarahami qi pajukia tadira na tinoni Hitai ko ketakoi sa golomonia i Sera na maqotana. 11Pa liguna sa mate i Ebarahami sa, na Tamasa sa manania si Aisake na tuna marene isa ko pa totoso isa sa sa suvere tata pa Bia Lahai Roi.

Ira Na Tuna Marene I Isimeli

12Alepi sa na vavakatona na tuna marene i Ebarahami i Isimeli isa i Haqa na rereko Ijipi isa na nabulu rereko tai Sera sa vapore vania i Ebarahami.

13Aipira sa na isongodi ira na tuna marene i Isimeli qai takuti vagore tutia tugu na vaitutidi na dia podo. I Nebaioti na tuna pa moa i Isimeli beto si keda, i Adibili, i Mibisami, 14i Misima, i Duma, i Masa, 15i Hadadi, i Tema, i Jetu, i Napisi beto i Kedema. 16Ko aipira sa na tuna marene i Isimeli qai kopuniria ka manogarua bubutu pa okokoto dia gugusu beto na dia susuverena. 17I Isimeli sa suvere kamua kai gogoto uengavuluvitu aorona beto sa vasaenga bebeto ko sa mate ko sa tagolomo tavitiria ira nona tinoni sisa. 18Ira na tutina isa sa qai suvere pa ia koko pa Havila ko mi lao kamu pa Sua tata pa voloso pa Ijipi vei muna lao vei pa Asu. Ko qai kole suvere kanaria sira doru na tavitidi.

Ira Jekopi i Isoa

19Alepi sa na vavakatona i Aisake na tuna marene i Ebarahami.

I Ebarahami sa vaporea si Aisake, 20beto i Aisake sa ka made ngavuluputa aorona sa totonai sa tekua ko sa maqotana si Ribeka na tuna rereko i Betueli na tinoni Arami pa Padani Arami isa na luluna i Labani na tinoni Arami tugu.

21Ego i Aisake sa vavara lao tai Iahova tokania sa na maqotana ura na egoro sisa. Poni sa oea i Iahova sisa ko sa pore iapana si Ribeka na maqotana. 22Qai vaijupe laolame pa iapana isa sa na koburu ko pira sau, <<Ai sa vei ko pira tu sa vei sa na iapaqu ara?>> sau. Ko sa lao nanasia si Iahova.

23Poni pira saunia i Iahova sisa,

<<Karu puku tinoni sa pa leo iapamu ao ina,

Beto karu puku tinoni ira sa mai tapikata;

Kai puku tinoni sa mina neqi jolania kame,

Beto isa pa moa sa mina nabulunia isa pa ligu,>> sau.

24Ko totonai sa kamua na totoso okotona ko mina vaivapodo sisa sa, na pata marene sa sa vapodoria. 25Na koburu sa podo votu lame momoe sa, sa jijimiri betona na tini doruna sa vei na poko vuvulu ko qai vaisongonia i Isoa. 26Liligu sa podo votu lame sa na tasina marene, na limana sa korapa aru tamania sa na kikijulu nenena i Isoa, ko qai vaisongonia i Jekopi. I Aisake sa ka vonomo ngavuluputa aorona sa totonai sa vapodoria ira karu i Ribeka.

27Totonai qai lavata sae sa karu koburu marene sa, i Isoa sa kai tinoni bobokana pa ropa, na tinoni lelekogo pa mumuqu, goto i Jekopi sa na tinoni nonosona, susuverona gu pa aqaqo. 28I Aisake sa roroqua si Isoa ura sa teteku jongai na masadi na mamanugu goto i Ribeka sa roroqua si Jekopi.

29Kai totoso totonai sa korapa vatunua i Jekopi sa kaki masa vaisomanai eqequru pa aqaqo, sa mule kamu si Isoa koko pa mumuqu sa vaia na agoso. 30Ko pira saunia si Jekopi, <<Kei tasiqu! Mei ko ma ponyoloria gaqu kaki gagani jijimiri inara ura sa vaisiu na agoso.>> (Ko sa vei sa qai vaisongonia I Edomu sisa.)

31Poni pira sau si Jekopi, <<Ego mu vavai lamenia mai taqu pa ngeni api sa na mua neqi podo moa,>> saunia.

32Sa paranga si Isoa, pira sau, Doro!, Ara korapa ala lao vei gu pa mate. <<Ko na sa laona taqu sa na neqi tana podo moa api,>> sau sisa.

33Poni pira sau si Jekopi, <<Ego mu maulu lame taqu pa ngeni api,>> saunia. Poni sa maulu tana sisa ko sa vavainia tai Jekopi sa nona neqi podo moa.

34Ego beto sa i Jekopi sa vania sa kaki bereti beto kaki masa vaisomanai eqequru sa vatunua si Isoa, ko i Isoa sa tetekugana, sa bukugana beto sa tavaturu ko sa taloa riuona.

Ko sa kilu palenia i Isoa sa na ona neqi podo moa.

Currently Selected:

Popodalaina 25: LGA

Highlight

Copy