Popodalaina 17

Na Vinaegona Na Tapobe

1Totonai sa kamua ka sia ngavulu ka sia aorona si Ebarami sa, sa votu tana si Iahova beto sa paranga, <<Ara sa na Tamasa neqiqu jola, mu tutia na qua paranga beto mu toania na toa tuvisina. 2Mana vatoqonigo ara ao sa na qua vinaego beto mana vavua vasosokugo ara sao,>> sau.

3Poni sa vukele opo gore si Ebarami, beto pira saunia na Tamasa sisa, 4<<Ara sa na qua vinaego qa vatoqonigo sapi, Ao sa muna tamadi ira doru na bubutu tinoni. 5Minake takuku ligunia i Ebarami sa na isongomu ao, gotona isongomu kopira si Ebarahami tu, ura muna tamadi soku bubutu tinoni mana veinigo ara. 6Mana vavua vasosokugo ara sao, tamu mai pidoko votu lame sa na bubutu tinoni beto ira na babangara. 7Mana vatoqonigo ara ao sa na qua vinaego kole jolana, beto ira na tutimu vuka risa tadira na sasae tinoni korapa lame, ko ara sa mina mua Tamasa ao beto tadira na tutimu ao pa ligumu. 8Na ia doruna pa Kenani, ketakoi qu korapa suvere kopira vei na tinoni karovomu sa, mana vaisongonigo ao beto ira na tutimu ao vuka risa kamua na kamua beto ara sa mina dia Tamasa ira,>> saunia.

9Beto poni sa paranga mutu sa na Tamasa lao tai Ebarahami, <<Goto ao sa, muna kopunia sa na vinaego taqu, ao beto ira na tutimu pa liguna lao tadira na sasae tinoni korapa lame. 10Ko alepi sa na vinaego taqu qa vatoqonigo ao beto ira na tutimu ao ko muna kopunia agou pa liguna lao: Doru marene korapa suvere tavitigo ao sa mai isongo tapobe beto. 11Muna pobea sa na vulitina na batu nonoimiu ko isa sa na vinagigilana na vinaego pa vaikorapaida gita karu. 12Pa dorudi na sasae tinoni korapa lame sa, doru marene sa mai isongo tapobe pa vinavesu rane liguna mai podo, tavitiria tugu vei ira mai podo lame pa miu tatamana babi mai tavai pa poata tadira na tinoni karovodi ira nake tavitimiu. 13Bai podo lame tu pa miu tatamana babi tavai tu pa miu poata ba mai isongo tapobe tugu. Na qua vinaego qa roitinia pa tinimiu sa mina kole jola kamua na kamua. 14Na marene sake tapobe na vulitina na batu nonoina sa mina tapikata pale tadira na bubutu tinoni ura sa majai na qua vinaego ara,>> sau sisa.

15Na Tamasa sa parangia si Ebarahami, Pira saunia, <<I Serai na maqotamu sa munake kuku ligunia na isongona i Serai ura i Sera tu sa na isongona isa kopira. 16Mana manania ara sisa ko sosoto jola sa mina vapore vanigo ao kai koburu marene. Mana manania ara sisa ko mina tinadi na bubutu tinoni beto na babangaradi na tinoni sa mai koko lame vei tana,>> sau.

17Poni sa vukele opo gore si Ebarahami, sa avu beto pira sau mulenia mekana, <<Mina vaporea tu kai koburu marene sa na tinoni kai gogoto aorona? Mina vapodoa tu kai koburu si Sera ka sia ngavuluputa aorona?>> sau. 18Beto sa paranga lao tai Tamasa si Ebarahami, <<Ai Vei i Isimeli gu sa bi toania na tavaragua tamu,>> sau.

19Poni sa paranga na Tamasa tai Ebarahami, <<E, ba i Sera na maqotamu mina vapore vanigo tugu kai koburu marene ko muna vakukunia i Aisake. Mana vatoqonia ara i Aisake sa na qua vinaego, isa mina kole jola kamua na kamua tadira na tutina isa vuka risa. 20Goto pa kalena tai Isimeli sa, qa tei nongorigo tu: ko sosoto jola kode mana manania tugu ara sisa, mana vavua vasosokua beto mina mota tu lalaona sa na tutina isa. Isa sa mina tamadi ira ka manogarua bangara bubutu beto mina taroiti tana sa kai bubutu tinoni lavata. 21Ba na qua vinaego sa mana vatoqonia tai Aisake isa mina vapodo vanigo i Sera pa totoso vei api pa aoro lame ina,>> saunia. 22Pa liguna qi kole parangia i Ebarahami, sa taloa saeona sa na Tamasa.

23Pa vagigila rane tugu isa sa, i Ebarahami sa tekua si Isimeli na tuna marene beto dorudi ira qai podo pa nona tatamana babi sa vainiria nona poata, doru marene pa ruma tai Ebarahami beto ko sa poberia na batu nonoidi vei sa garununia na Tamasa. 24Ka sia ngavulu sia aorona si Ebarahami totonai sa tapobe na vulitina na batu nonoina, 25goto i Isimeli na tuna marene sa ka manoga ue aorona sa tonai sa tapobe na vulitina na batu nonoina. 26Ko pa kai muqisi rane tugu isa sa qai tapobe beto sira Ebarahami beto i Isimeli na tuna marene. 27Beto doru marene qai suvere tana tavitiria ira qai podo pa ruma tana babi qai tavai poata tadira na tinoni karovodi sa qai somana tapobe tugu tonai tavitia isa.

Currently Selected:

Popodalaina 17: LGA

Highlight

Copy