Popodalaina 14

I Ebarami Sa Aloa Si Loti

1Pa totoso api sa i Amarapele na bangara pa Sina, i Arioki na bangara pa Elasa, i Kedolaoma na bangara pa Elami beto i Tidali na bangara pa Qoimi 2sa qai rajai i Bera na bangara pa Sodomu, i Bisa na bangara pa Qomora, i Sinabi na bangara pa Adama, i Semeba na bangara pa Zeboimi beto na bangara pa Bela (isa pa Zoa). 3Ira doru na babangara qai tapoja liligu aipira sa qai vaikamuniria sira na dia tinoni vaipera pa lolomo pa Sidimi (na solo ivere). 4Ka manogarua aoro sa i Kedolaoma qi bangaraniria sira ba pa vina manogaue aoro sa qai daidia tutia sisa.

5Pa vina manogamade aoro sa, i Kedolaoma beto ira na bangara qai vaivaego ko mai mekarai vaitokai qarigu sa qai riu ko qai vakilasaria sira na bubutu tinoni Repai pa Asiteroti Kanaimi, na bubutu tinoni Zuzi pa Hami, na bubutu tinoni Emai pa Save Kiritaimi 6beto na bubutu tinoni Hori pa kukubo pa Sei, ko lao kamu tu pa Eliparani tata pa qega. 7Beto poni sa qai vidulu mule ko qai lao pa Enimisipati (isa pa Kadesi) ko qai vakilasaria sa na pikata ia doruna tadira na bubutu tinoni Amelekai beto vei tugu ira na bubutu tinoni Amorai qai korapa suvere pa Hazazoni Tama.

8Poni na bangara pa Sodomu, na bangara pa Qomora na bangara pa Adama, na bangara pa Zeboimi beto na bangara pa Bela (isa pa Zoa) sa qai mekarai riu ko qai vaturu nanamaria sa na dia tinoni vaipera pa lolomo pa Sidimi 9ko mai rajaria qarigu sira Kedolaoma na bangara pa Elami, i Tidali na bangara pa Qoimi, i Amirapele na bangara pa Sinar beto i Arioki na bangara pa Elasa- ka made bangara qai taleria ira ka lima. 10Ego na lolomo pa Sidimi sa sa pugelia na baongo oqili nyelaka tapa ko totonai qai uku tatagara riu sira na bangara pa Sodomu beto pa Qomora sa, kaki dia tinoni vaipera sa qai vukele joloponiria pa baongo oqili goto ira doru sa qai tula riu pa kukubo. 11Qai aru tekuria ira ka made bangara sa doru isisongo tadira pa Sodomu beto pa Qomora beto na gadia gagani beto ko qai riudia. 12Qai teku riunia tugu vei si Loti na vabuguna i Ebarami beto nona isisisongo ura na suverena pa Sodomu sisa.

13Kame isa sa uku sa sa kamu ko sa vavakato vania si Ebarami na tinoni Hiburu. Ego i Ebarami sa na suverena tata pa gogou lalavata tai Mamiri na tinoni Amorai, na tasidi marene ira Esikolo, i Ane, ira doru vei qai baere lame taii Ebarami. 14Totonai i Ebarami qi nongoronia qai teku riu vapinausia sa na vabuguna, poni sa sa kukuria sira ka ue gogoto manoga vesu tinoni bobokadi pa vaipera qai podo lavata sae pa nona tatamana beto ko sa riu adu tututiria kamu tu pa Dani. 15Na bongi sa pikataria i Ebarami sira nona tinoni vaipera ko qai rapataria ko qai vakilasaria beto qai adu vatatagararia kamu tu pa Hoba, kale saena pa Damasikasi. 16Sa teku muleniria i Ebarami sa doruna na isisongo beto vei tugu i Loti na vabuguna beto na sakasava sa isongoria, beto tavitiria na rereko beto ira na tinoni mai tavapinausu qariguniria.

17Pa liguna sa vakilasia i Kedolaoma beto ira na bangara qai tokania isa sa, na bangara pa Sodomu sa lame gosoria si Ebarami pa lolomo pa Save (isa na lolomo tana bangara) totonai sa mule.

18Poni i Melekizedeki na bangara pa Salemi sa pogoso kamu bereti beto na vaini. Na iama tana Tamasa ululuna jola sisa, 19ko sa manania isa si Ebarami, pira sau,

<<Mi tamana tana Tamasa ululuna jola si Ebarami,

Na Tamasa sa vapodakia na oka beto na peso.

20Beto mi tavatarasae sa na Tamasa ululuna jola,

Isa sa vakole laoria pa limamu ao sira na mua kana,>> sau sisa.

Beto poni sa vania i Ebarami kame pa manoga pa doru sakasava sisa.

21Sa paranga sa na bangara pa Sodomu lao tai Ebarami, <<Ira na tinoni sa mu valame vanisiu ara goto ira na sakasava sa mu kopuniria mua,>> saunia.

22Ba sa paranga tu si Ebarami lao tana bangara pa Sodomu, <<Qa tei alaka saenia tu na limaqu ko qa maulu tai Iahova, na Tamasa ululuna jola, isa sa vapodakia na oka beto na peso 23ko manake isongo tekua kai sakasava tamu, bi na loji gu sa babi na gasoro buti gu, kita vei ko ao mu paranga, <Ara qa vaisisongia si Ebarami> mugu. 24Ko manake tekua tugu kai sa goto na sa vei ira na tinoni taqu qai tei gania tu beto na iadi ira na tinoni qai tutisiu ara- ira Ane, i Esikolo beto i Mamiri sa mai tekua tugu sa na iadi,>> sau sisa.

Currently Selected:

Popodalaina 14: LGA

Highlight

Copy