Leviticus 6

1Iaova savoy te kue Mosese: 2Sada kieke boysi sa zaqala no kama tutuna vo te kue Iaova bati oye sa vaqoylo udinia te oyra pita sa vasoypani moyna oye no sa kuo te aramitaki te oye ba sa soko, no sa vaquqo oye, 3ba sada oye sa joke kieke pita boysi sa vaja no sa aravaqalo te zozoa pita ta, ba sada oye sa maulu sosolaka, ba sada oye sa joyjuni ka zaqala sa seva goyti, (zaqala oyra boysi ka majala joyjuni) - 4sada oye sa zaqala no sa noyneutini ona zaqala, oye me kea vavelini ka pita oye sa soko ba sa pale te ona tatakiu, ba ka pita ka vasoypani sa kuo te kue oye, ba ka pita sa ja oye sa joke, 5ba ata ka adoa vele pita oye sa maulu sosolakani. Oye me kea vavelini bieto, no me kea poka vele la kieke loyma te kue boysi sa tungene te tava oye me iro la ona vavakatu supaka. 6No sa seva kieke supaka oye me iro moyna la to te kue boysi sisiama, ta ne, te kue Iaova, ona vavakatu supaka, kieke sipi lieke, kama makomako vo no me voto te pada sa gae. 7Te zoka goyti boysi sisiama me siereni oye te vakomamanae Iaova no Iaova me marovelini oye te kieke te oyra pita goyti oye sa joyjuni sa vazaqele oye.

Vavakatu Katunuro

8Iaova savoy te kue Mosese: 9koyna Eroni no oyra toytulieke tamana goyti: Goyti oyra tamanae vavakatu katunuro. Vavakatu katunuro me kuo te sara barasi te ngavae kose, me doka te saruku, no nako me katu taru te sara barasi. 10Bieto ta boysi sisiama me vapoka bubute lineni, no bubute luoboro lineni vatanga te senini, no me palekesini kaua vavakatu katunuro sa kuo sua te sara barasi no me toyro la te tavele sara barasi. 11Sinani oye me jupe oyra ona bubute no me vapouka oyra bubute veke vele, no me iro la kau te paqarania ngoyni ka toypakae, te ngoyni sa dalo te tamana. 12Nako te sara barasi me katutaru; kasi vo liele julo. Susupae saruku boysi sisiama me soyle toyro nako no me pulete vavakatu katunuro te nako no me noyko toringini voae vavakatu arakitaki. 13Nako me katutaru te sara barasi; kasi vo liele juolo.

Vavakatu vere

14Goyti oyra tamanae vavakatu vere: Oyra toytu lieke Eroni mara iro me vavakatu vere te vakomamanae Iaova, te tarakenakae sara barasi. 15Tabae vavakatu vere ona Iaova ba boysi sisiama me pale kieke puda koyrisi palava no oela olivi, no tabae pita nanabu noyi te vavakatu vere, no me noyko tautae keke nanataru te sara barasi, kakaurua sa vakima Iaova. 16Eroni no oyra toytulieke mara oyke sikia vavakatu vere, ba pitanaki oyra mara oyke te ngoyni taboyna ne me kareo isitia; oyra mara oyke pitanaki goyti te matararangae toypaka variere. 17Palava mara joyjuni ne kasi doyra valaeni isiti; Aro ko koyna oyra sa doyra kenakena te oyra vavakatu oyra ka joyjuni te kue ro te nako. Sa seva to vavakatu zaqala no vavakatu supaka, sa tataboyna sua. 18Ka lieke te juojulo te Eroni sa majala oyke pitanaki goyti. Kenakena goyti sa taveni moyna to te kue oye te oyra vavakatu ka joyjuni te nako te kue Iaova, me soma la oyra sapoko aba kala kuo me. Ka boysi ba ka pita sa tebe oyra vavakatu goyti ne me tataboyna.

19Iaova savoy te kue Mosese, 20goyti keke me iro me Eroni no oyra toytu lieke te kue Iaova te tava ka vatoybo oye: kieke kiloqaramu palava sa seva ka kea susupae tava te vavakatu vere, takodekea me kea te saruku no takodekea te vilu soy. 21Oye me joyjuni toringini palava oela te sireke tepatepa, no me aralomirini vanoyi no me kea vavakatu vere sa momuru, kakaurua sa vakima Iaova. 22Toytu lieke Eroni oye sa taveni me soka oye sa seva boysi sisiama taboyna me vanama vavakatu vere. Vavakatu goyti sa kenae Iaova no mara noyko vanuro. 23Susupae vavakatu vere sa joyjuni boysi sisiama mara noyko vanuro; kasi doyra oyke.

Vavakatu zaqala

24Iaova savoy te kue Mesese, : 25Soynani Eroni no oyra toytu lieke: Goyti oyra tamanae vavakatu zaqala: Vavakatu zaqala mara voyevale te vakomamanae Iaova te ngoyni ka voyevale ni vavakatu katunuro; vavakatu zaqala sa tataboyna sua. 26Boysi sisiama sa vavakatua pita pupura goyti sa majala oyke; oye me oyke te ngoyni tataboyna, te matararangae toypaka variere. 27Ka boysi ba ka pita vele sa tebe senini pita pupura goyti me tataboyna, no sada ka bubute sa bele madaka ne, mara tobo te ngoyni taboyna. 28Siereke lua ka siereke ni zioa pita pupura mara peseke; ba sada ka siereke te siereke barasi, mara samere no mara qoulu ni bi. 29Ka boysi te pupu te oyra boysi sisiama sa majala oyke keke goyti; keke sa tataboyna sua. 30Ba ka vavakatu zaqala ka iro me madakae te toypaka variere me sioroa ngoyni tataboyna kasi doyra oyke; mara noyko moyna to.

Currently Selected:

Leviticus 6: BAA

Highlight

Copy