Leviticus 11

Pitanaki dalo no pitanaki kama dalo vo

1Iaova savoy te kue Mosese no Eroni, 2Soynani oyra boysi ni Izireli: Zoylalae doyra oyra pita pupura ka kuo te vodu, goyti oyra pita pupura ram kam majala oyke: 3Ram kam majala oyke ka pita pupura sa tavoylaka keri kokoreke no sa oyke sisiu seva bulumakao.

4Ka kuo kavia pita pupura ka oyke sisiu seva bulumakao ba kama tavoylaka keri vo kokoreke doyra no ka kuo kavia pita pupura sa tavoylaka keri kokoreke doyra ba kama seva doyra bulumakao sa oyke sisiu, ba ram moyna kam oyke oyra pita pupura ka seva ta. Kamele sa oyke sisiu seva bulumakao ba kama tavoylaka keri vo kokoreke; kama dalo vo te kue ram mam oyke. 5Koni sa oyke sisiu seva bulumakao, kama tavoylaka keri vo kokoreke; kama dalo vo te kue ram mam oyke. 6Rabiti sa oyke sisiu seva bulumakao, kama tavoylaka keri vo kokoreke; kama dalo vo ram mam oyke. 7No buko, sa tavoylaka kokoreke, kama seva vo bulumakao sa oyke sisiu; kama dalo vo te kue ram mam oyke. 8Ram moyna to kam oyke zioa doyra ba tebe senini doyra oyra pita pupura ta; kama dalo doyra te kue ram.

9Te tabae doyra oyra pita tu ka kuo te masi no te bi, ram kam majala oyke ka pita sa kuo to sisioroa no senea. 10Ba taba pita tu ka kuo te masi ba te bi kama zari vo sisioroa doyra no senea doyra, moyna ka soi ba poyu ram moyna to kam oyke. 11No bati ram kama mao vo mina tebe oyra, ram kasi mina oyke zioa doyra no kasi mina tebe lenae doyra. 12Ka pita sa kuo te luka sa kareo sisioroa no senea kasi mina oyke.

13Goyti oyra roroko ram kasi mina tebe no oyke bati kama dalo doyra te tamana: kamaqa, puqeqe, puqeqe poto 14kaiti mesiri, ka adoa to kaiti poto, 15ka adoa to qaqava, 16kotukoturu sa tutuji boytu, ka adoa to kotukoturu, qali, ka adoa to aka, 17kotukoturu soi, komoreniti, kotukoturu poyu, 18qaqava sile, qaqava te kadalesana, osipere, 19Sitoki, ka adoa to su, upoe, no baku.

20Oyra pita ka reri no ka qaqara te vati nikini doyra sa taboyna ram mam oyke. 21Ka kuo vele kavia pita tu sa kuo boyloykurua doyra ka reri no ka qaqarae vati nikini doyra ram kam majala oyke: oyra sa tapiluku nikini doyra ka suqasuqa te lua. 22Goyti oyra pita ram kam majala oyke, ka adoa to nupi, katididi, kiriketi. 23Ba taba vele pita rerireri sa kuo vati nikini doyra kasi mina oyke.

24Ram mam vapoto noypo tanamina sada kam tebe oyra pita rerireri goyti; ka oye sa tebe lenae doyra oyra pita rerireri ta ne, kama dalo vo doka te vilu. 25Ka oye sa joke poka lenae doyra oyra pita rerireri ta ne, oye me tobo poae, no oye kama dalo vo doka te vilu.

26Susupae pita pupura kama tavoylaka vo kokoreke ba kama oyke vo sisiu seva bulumakao kama dalo vo te kue ram; ka oye sa tebe lenae doyra oyra pita ta ne, oye kama dalo vo. 27Tabae pita pupura ka kokobia vati nikini doyra, oyra pita pupura ka kokobia teteparae doyra sa taboyna ram mina oyke; ka oye sa tebe lenae doyra kama dalo vo doka vilu. 28Ka oye sa pale poka lenae doyra oyra pitapupura ta ne, me tobo moyna to ona pua, no oye kama dalo vo me doka vilu. Oyra pita ta kama dalo doyra te kue ram.

29Oyra pitapupura ka zozo te lua, oyra goyti kama dalo doyra te kue ram: vosala, komo, ka adoa to royka poyu, 30ka adoa to kurukana no ka adoa to royka. 31Te tabae doyra oyra pita ka zozo te lua, goyti oyra pita kama dalo doyra te kue ram. Ka oye sa tebe seninia doyra oyra te sada oyra ka lie kama dalo vo me doka te vilu. 32Sada kieke te oyra sa lie no sa suru puke ka pita, pita ta, ata ka pita ka vajaju ni, kama dalo vo, moyna ka joyjuni ni azu, pua, koypae pitapupura ba pua baeke. Mam toyro te bi; kama dalo vo me doka te vilu, sinani me dalo. 33Sada kieke te oyra sa suru te sireke lua, tabae pita sa kuo te luboro kama dalo vo, no ram mam piso sia sireke lua. 34Ka pitanaki ka qoluni bi sa kuo te sireke ta kama gae vo mara oyke kama dalo vo, no ka bi sa kuo te sireke ta kama gae vo mara turepe kama dalo vo. 35Ka pita sa suru puke senini doyra oyra pita ta ka lie kama dalo vo; raka ba siereke mara varoka sia. Oyra pita ta kama dalo doyra, no ram moyna kam vajaju noypo vele. 36Bi vuvuala ba bi quara ngoyni sosopona sa dalo. Ba ka oye sa tebe senini doyra oyra pita ta ka lie te keri bi sosopona ta kama dalo vo. 37Sada kieke pita sa zozo te lua sa lie sa suru puke ka poytu mara teba ne, poytu ta aba sa dalo to. 38Ba sada bi ka toyro la te poytu no lenae pita sa zozo te lua sa suru puke ne, poytu ta kama dalo vo.

39Sada kieke pita pupura sa taveni ram mam oyke sa lie, ka oye sa tebe seninia pita pupura ta ne kama dalo vo me doka te vilu. 40Ka oye sa oyke zioa pitapupura ta ne me tobo ona bubute, no oye kama dalo vo me doka te vilu. Ka oye sa tebe seninia pitapupura ta ne me tobo ona bubute, no oye kama dalo vo me doka te vilu.

41Susupae pita sa zozo te lua kama dalo vo; kama maovo ram mam oyke. 42Ram kama maovo mam oyke ka pita sa zozo te lua, moyna sa zozo te seae, ba sa zozo te vati nikini ba sa zozo te taba koykoyqarae. 43Kasi varokani noypo tanamina te ka pita sa zozo te lua. Kasi vapotoni noypo tanamina te ka adoa pita sa zozo te lua. 44Aro Iaova mina Bangara; vatoybo noypo tanamina no mina kuo tataboyna, bati Aro ko tataboyna. Kasi vapotoni noypo tanamina te ka adoa pita sa zozo te lua. 45Aro oye Iaova ko koype kesini ram Ijipi ko mina Bangara; sa voy ta si ram mina kuo tataboyna, bati Aro ko tataboyna.

46Goyti oyra tamanae doyra oyra pitapupura, roroko, oyra pita ka tu ka zozo te luka, no oyra pita taba ka zozo te lua. 47Ram mam mia velese oyra pita kama dalo doyra no oyra pita ka dalo, mam mia velese oyra pita sa gae mara oyke no oyra pita kama gae vo mara oyke soy.

Currently Selected:

Leviticus 11: BAA

Highlight

Copy