Genesis 6

Aqe Poyu

1Te sada oyra boysi ka toto zadava te lua no oyra ka vapuodo me oyra toytuquolea doyra, 2oyra toytuleike Bangara ka mia toytuquolea doyra oyra boysi ka miminoyi, no oyra ka me no ka me vene ka oye te oyra no ka pale oyra me doyra quole. 3Sinani Iaova sa voy goyti, <<Potaqu ro kasi vo kuo vanadu te kue boysi taba sadasada, bati oye sa senini zio; oye me doka to keikeubi karabeite avea,>> sa voy.

4Oyra Qeli kame kuo te vodu ni te lua te oyra sada noyene- no te rokusua soy- sada oyra toytuleike Bangara ka me pam koype oyra toytuquolea doyra oyra boysi no ka vapoudo oyra toytua doyra te kue oyra quole. Oyra to ka boysi palata, toritongoa doyra sa varanga majalae te oyra sada tori.

5Iaova sa mia jaju roka te boysi te vodu ni te lua sa poyu varoka, no zelalae oyra vatovato piruku sa kuo te pongoa sa zaqala tabasada. 6Iaova sa nanana vele bati oye sa vaporo moyna boysi te vodu ni te lua, no pongoa oye sa pudae voyra. 7Si Iaova sa voy, <<Aro me siro sia oyra boysi aro ko vaporo moyna te lua- oyra boysi no oyra pitapupura, oyra pita tu ka qaqara te lua no oyra roroko te maloykanae, bati aro ko nanana vele ko joyjuni moyna oyra.>> 8Ba Iaova sa kemani Noa.

9Goyti toritoria Noa.

Noa sa boysi tutungono, kareo ka pita me vazaqele te sapoko noyene, no oye sa arakitaki koype Bangara.

10Noa sa tungene tulu toytuleike: Semu, Hamu no Japeti.

11Sinani vodu ni te lua sa arakaneqiri te tarakenakae Bangara no sa puodae vato roka. 12Bangara sa mia vodu ni te lua no sa pulisini arakaneqiria, bati taba pita ka pale tu te vodu ni te lua sa arakaneqiri oyra doyra vato. 13No sa voy goyti Bangara te kue Noa, <<Aro me vaupu bito tabae doyra oyra pita ka pale tu, bati vodu ni te lua sa puodae oyra doyra vato roka. Aro me vaupu beito oyra no vodu ni te lua soy. 14Si, re mo joyjuni kieke vaka te azu saeparasi; Re mo joyjuni oyra kuqulumo no mo mokini moki luoboroa no paqarania. 15Goyti me voy adoa vaka re mo joyjuni. Ngavae vaka me 140 mita, depae me 23 mita no zakae me 14 mita. 16Mo joyjuni keike boyboyo te vaka, te sarajuoloa boyboyo me taqala, zakae me takodeke mita. Mo joyjuni keike mataqamana te bakatae vaka no mo joyjuni tulu korojale, kieke suka, arakaluoboro no zaka. 17Mia! aro me vame aqe poyu te vodu ni te lua me vaupu beito taba oyra pita ka pale tu no oyra pita ka ngasapua ka tu soy. Taba oyra pita ka tu te vodu ni te lua me beito doyra ngasapua. 18Ba aro me vadere qo vato- arapokitini te kue re, no re mo paru te vaka- re no oyra ka kuo una amo re saseva oyra tomleike no mo quolekutae no oyra quolekutae te oyra tomleike. 19Re mo koype poka te vaka keike leike no keike quole soy taba adoa doyra oyra pita ka tu soy oyra moyra tu una amo re. 20Keri te susupae adoa doyra oyra roroko, keri te susupae adoa doyra oyra pita peru no keri te susupae adoa doyra oyra pita ka qaqara te lua moyra me te kue re soy moyra tu. 21Re mo pale taba adoa pitanaki sa gae moyra oyke no mo quqene no pitanaki ta me mo pitanaki re no oyra soy,>> sa voy.

22Noa sa joyjuni pisipita taba Bangara sa voytuni oye me joyjuni.

Currently Selected:

Genesis 6: BAA

Highlight

Copy