Genesis 37

Oyra Parika te Josepa

1Jikope sa kuo te vodu ni Kenani vodu sa kue tamae.

2Goyti toritoria Jikope.

Josepa sa keike boysi varoqa sa manovetu avea, oye sa miatoyke sipi no qoti una oyra likae, oyra toytuleike Bila no Zilipa, keri quolekutae te tamae.

No oye sa soynani tamae doyra oyra pita roka ka joyjuni oyra likae.

3Sinani Izireli sa noyne Josepa koyni oyra toytuleike vele, bati oye sa puodo te sada oye sa valaka; no oye sa joyjuni koyna Josepa keike bubute malemale ngava. 4Sada oyra likae ka mia tamae doyra sa noyne Josepa sa koyni noynea tanadoyra, oyra ka kolini oye, no ka pejae doyra ngeoro vanoyi te kue oye.

5Keike sada Josepa sa parika, no sada oye sa soynani oyra likae zozoa ona parika, oyra ka kolini varoka vele to oye. 6Sa voy goyti oye te kue oyra, <<Vanata me parika goyti ko pareka ro; 7Mia! Ita kata uke vuiti te barue, no da soy! qo uke ro sa deire tutungono, no oyra mina uke ram ka kuo kuolekuole no ka kapata juolo te qo uke ro,>> sa voy.

8Ka voy goyti oyra likae te kue oye, <<Be sa voy re ko noyne mo buini rami ba? Re mo kinikini rami ko voy ba?>> Oye si, oyra ka kolini varoka vele oye te pita oye sa soynani oyra, zozoa ona parika.

9Sinani, Josepa sa parika napu vele, no sa soynani noypo oyra likae, <<Vanata me aro ko parika napu vele, no da soy! gnada no ukene no manokeike sisiriputu ka kapata joulo te kue ro,>> sa voy.

10Sada oye sa soynani tamae no oyra likae, tamae sa poyini oye no sa voy <<Ata zozoa parika goyti? Re ko nanana sinam no aro no oyra likam soy mami me kapata joulo te lua te tarakenakam re ba?>> sa voy. 11Oyra likae ka nanaqorani oye, ba tamae sa noyne qoylo te ona nanana pita goyti.

Oyra Likae ka Ngungutae Josepa

12Keike sada oyra likae kala miatoyke vaua ona pitapupura tamae doyra vatanga Sekemu, 13no Izireli sa voy goyti te kue Josepa, <<Oyra likam kala miatoyke oyra vaua pita pupura vatanga Sekemu. Aro me peqani la amo re te kue oyra,>> sa voy.

<<Sa noyi to,>> sa voy.

14Sa voy goyti oye te kue Josepa, <<Zola no mo la mia oyra likam moyna oyra ka kuo vanoyi no sa seva to oyra pita pupura soy, beito ta mo vele napu me, mo soynani aqo ro.>> Sinani tamae sa peqani la oye sa kesini malaku ni Heberoni.

Sada Josepa sa doka Sekemu, 15mia! keike boysi sa mia oye sa tilo vaga te ngoyni ta, no sa tanani oye, <<Ata pita ko poyta re ne?>> sa voy.

16Sa voy goyti Josepa, <<Aro ko poyta oyra likaqu. Be sa voy ko majala soynani aqo ro ngoyni oyra ka miatoykini vaua oyra doyra pita pupura ba?>> sa voy.

17Sa voy goyti boysi noyene, <<Oyra ka kesini moyna ngoyni goyti. Aro ko ase oyra ka soyna moyra la Dotani,>> Oye si, Josepa sa rokisini la oyra likae, no sa la mia oyra vatanga Dotani.

18Ba oyra likae ka mia vakoyu la oye, no korovita oye me doka te kue oyra, oyra ka aravatovato moyra voyevale oye.

19Oyra ka arangeoro napu tanadoyra, <<Sa me goyti boysi ne,>> ka voy 20<<Aria me mata voyevale oye, no mata sia la oye te keike te oyra bi quara no mata soyna pitaperu sa voyevale oye mata voy. Sinani mata mia pita me doka te ona parika>> ka voy.

21Sada Rubeni sa ase pita goyti, oye sa vasevapada vakavele Josepa te koyrisia doyra oyra. <<Kasi dia voyevale oye. 22Kasi vajele ka madaka. Mata sia la oye te quara bi te kadalesana, ba moyna kam voye oye,>> sa voy. Rubeni sa soyna pita goyti sa noyne me vakavele Josepa te kue oyra no me peqani vavelini la oye te kue tamae.

23Sada Josepa sa doka te kue oyra likae, oyra ka zadeke jupe ona bubute malemale oye sa vapoka 24no oyra ka kinikini la oye no ka sia la oye te quarae bi. Sinani quarae bi sa pasa; kama kue vo ka bi.

25Sada oyra ka tongunu ka aki, oyra ka mi la no da soy oyra ka mia oyra boysi ni Isimeli ka tae me Qileadi no moyra zo voy la Ijipi. Oyra doyra kamele ka vagoye ni oyra pita sa vangengeli noyi pitanaki, poporae azu no oyra basa nanabu noyi.

26Sa voy goyti Juda te kue oyra likae, <<Ata pita noyi mata pale sada kata voye peka likaedia no kata peka madakae oye ne? 27Aria, Ita mata ngungutae oye te kue oyra boysi ni Isimeli no kasi dia voye oye; bati oye sa likaedia, sa keike to senini dia no madakae dia,>> sa voy. Oyra likae ka tuqini pita oye sa soyna.

28Sada oyra boysi ngunguta ni Midiani kame doka te ngoyni noyene, oyra likae ka doe poka Josepa te quara bi no ka ngungutae oye te kue oyra boysi ni Isimeli te karabite menea siliva no oyra ka kinikini la oye te vodu ni Ijipi.

29Sada Rubeni sa vele me te quarae bi no da soy oye kama mia vo Josepa te ngoyni gei, oye sa reka ona bubute. 30Oye sa vele la te kue oyra likae no sa voy goyti, <<Soleike kama kuo vo te quara! Ata pita me joyjuni ro sinani?>> sa voy.

31Sinani oyra ka pale ona bubute Josepa, ka voyevale keike qoti no ka tuobuni la bubute te madaka. 32Oyra ka iro la bubute te kue tamae doyra no ka voy, <<Rami kami joke pita goyti. Mia vanoyi moyna ona bubute tomleike re,>> ka voy.

33Oye sa mia utini bubute no sa voy, <<Goyti ona bubute toquleike ro! Kavia pitaperu ka voyevale oye. Josepa sa tadali to senini,>> sa voy.

34Sinani Jikope sa reka ona bubute, sa vapoka pua puripuri no sa neqitini toytuleike taba tava. 35Taba oyra toytuleike no oyra toytuquole ka vasevapada vasisivele oye, ba oye sa pejae moyra vasisivele, sa voy goyti oye, <<Kareo, te noyqata aro me juolo una toquleike te vongene.>> Oye si tamae sa neqitini Josepa.

36Te sada ta, oyra boysi ni Midiani ka ngungutae la Josepa Ijipi te kue Potipa, keike te oyra boysi matamata te Pero, buoe te oyra palata.

Currently Selected:

Genesis 37: BAA

Highlight

Copy