Genesis 23

Lenae Sera

1Sera sa tu sa doka te keike ubi karabite vetu avea 2Sera sa lei Kiriati Aba (ngoyni ni Heboroni) te vodu ni Kenani, no Ebarahami sa la neqitini Sera no sa qile oye.

3No sinani Ebarahami sa tapadeire me te tavelea momoqutua ona quolekutae no sa soynani la oyra boysi ni Hiti. Sa voy goyti oye, 4<<Aro ko me kuo koype ram sa seva boysi kuokapa ko tae me te ngoyni veke. Ram mina ngungutae te kue ro oyra mina ngoyni tutungono me ngoyni luludona te ro te ngoyni goyti,>> sa voy.

5Sinani oyra boysi ni Hiti ka vatavele la te kue Ebarahami, 6<<Buoe, mo vanata rami. Re ko keike buoe poyu te Bangara. Mo luodo mo balava te keike te oyra mami kokobo sa noyi sua. Kareo to ka oye te kue rami me korini amo re ona kokobo mo luodoni mo quolekutae,>> ka voy.

7Sinani Ebarahami sa diere sa kapata la te tarakenakae doyra oyra boysi ni Hiti. 8Sa voy goyti oye te kue oyra, <<Sada ram kam vamoyuni aqo me luoduni qo quolekutae te ngoyni goyti, mam vanata me no mam pipini koyna aqo ro te kue Eporoni toytuleike Zoha 9soy oye me ngungutae te kue ro lenga sa kuo Makapela, ngoyni oye sa tungene no sa kuo te tomanasuae ona lua. Mam pine oye me ngungutae te totongonia nguta sa gae te kue ro soy aro me tungene ngoyni luludona te kue ram,>> sa voy.

10Tani Eporoni boysi ni Hiti sa tongunu una moyna oyra ona boysi no sa vatavele ni la Ebarahami te tarakenakae doyra oyra boysi ni Hiti ka kuo una te mataqamanae ona kumala lata. 11Oye sa voy, <<Kareo qo buoe, vanata me aqo; Aro ko koyna amo re lua no aro me koyna vele amo lenga sa kuo te ngoyni noyene. Aro me koyna amo re ngoyni goyti te tarakenakae doyra oyra qo boysi mo luodoni mo quolekutae,>> sa voy.

12Vakeria sada Ebarahami sa kapata la te tarakenakae doyra oyra boysi ni te vodu noyene 13no sa voy goyti oye te kue Eporoni te doyra toritori, <<Vanata me aqo ro, sada re ko tuqe. Aro me ngota beito to lua ta. Re mo tuqe mo pale nguta aro me koyna amo, soy aro me luoduni qo quolekutae te ngoyni gei>> sa voy.

14Eporoni sa tuqeni la Ebarahami, 15<<Vanata me aqo ro, qo buoe; lua noyene sa gae 400 menea siliva, nguta goyti sa kareo zozoa te arakaluborom re no aro soy! Re mo ludoni to mo quolekutae,>> sa voy.

16Ebarahami sa tuqini dongae kisa Eporoni sa soyna, te tarakenakae doyra oyra boysi ni Hiti: 400 menea siliva, sa seva pada ka vajaju oyra boysi ngungutoyna.

17Sa voy ta oye lua te Eporoni sa kuo Makapela vatagna mamare- oye sa pale lua no lenga sa kuo ta, no oyra taba azu ka kuo te arapasenae lua ta soy. 18Oyra taba boysi ni Hiti ka me una te toritori te mataqamanae kumala lata, ka utini una lua noyene sa ona lua vatasuku to Ebarahami sinani. 19Beito soypa ta, Ebarahami sa luodo ona quolekutae oye Sera te lenga te lua ni Makapela vatanga Mamare (sa kuo Heboroni) te vodu ni Kenani. 20Sa voy ta oye, lua no lenga sa kuo te ngoyni noyene sa tungene Ebarahami sa pale te kue oyra boysi ni Hiti me ona ngoyni luludona.

Currently Selected:

Genesis 23: BAA

Highlight

Copy