Genesis 17

Vato- Arapokitini Te Arapoti

1Sada Abarami sa ziangulu zia avea, Iaova sa takabula te kue oye no sa voy, <<Aro Bangara varavaranga; re mo arakitaki koype aqo ro te ngavae mo tu no me kareo to mo zaqala. 2Sinani aro me vavoto qo vato-arapokitini te kue taqo no te kue re no me vazadeve oyra sokutu arasumam re,>> sa voy.

3Abarami sa kapata juolo la te lua, no Bangara sa voy te kue oye, 4<<Te kue ro, goyti qo vato- arapokitini ro te kue re: Re mo tamae doyra oyra taba tubia boysi. 5Kama taritengeni vele doyra amo re Abarami; ba taritongom re Ebarahami, bati aro ko vene amo re mo tamae doyra oyra taba tubia boysi. 6Aro me vavere vataba amo re; Aro me vaporo me oyra tubia boysi te kue re, no oyra buoe lata moyra tae me te kue re. 7Aro me vadere qo vato- arapokitini me seva keike vato- arapokitini me kuo sua tabasadasada te arakaluboro qu ro no re no oyra sokutu arasumam re te taba oyra sapoko aba kala kuo me, aro to me mo Bangara re no Bangara te oyra sokutu arasuma te rokusum re, sa voy. 8Totongonia vodu ni Kenani, ngoyni re ko kuokapae sinani, Aro me koyna amo re no oyra sokutu arasumam re mina tungene taba sadasada, no aro me doyra Bangara,>> sa voy.

9Sa voy goyti Bangara te kue Ebarahami, <<Re mo sute qo vato- arapokitini, re no oyra sokutu arasumam te oyra taba sapoko aba kuo me. 10Goyti qo vato- arapokitini te arakaluboro qu ro, re no oyra sokutu arasumam re, vato- arapokitini ram mam sute: voduvua doyra oyra leike te kue ram moyra pote koykoypa kopikae doyra. 11Ram mam pote koykoypae takodeke senini kupikae mina, no goyti me lalae vato- arapokitini te arakaluboro qu ro no ram. 12Te oyra sapoko aba ka kuo me, taba oyra soleike sa viu tavae doyra moyra pote koykoypa kopikae doyra, mam pote koykoypa kopikae doyra oyra toytu doyra oyra sika ka puodo te mina toke, no oyra sika kam ngota tanamina te kue oyra boysi veke- oyra kama sokutu tae me doyra te kue re. 13Tabae doyra oyra leike ka puodo me te mina toke no oyra kam ngota ni mina kisa, moyra pote beito koykoypa kopikae doyra. Qo vato- arapokitini me kuo te senini mina, vato- arapokitini me kuo sua taba sadasada. 14Ka leike kama pote vo koykoypa kopikae, oye kama pote vo koykoypa kopika te senini, oye sa vaikuodoko te kue oyra ona boysi; bati oye sa voye qo vato- arapokitini ro,>> sa voy.

15No sa voy vele goyti Bangara te kue Ebarahami, <<Re kasi keilikini vele mo quolekutae Serai; ba taritongoa oye me Sera. 16Aro me manani oye no oye me vapuodo te kue re keike tomleike. Aro me manani Sera, no oye me sinae doyra oyra tubia boysi; no oyra buoe lata te tubia boysi moyra tae me te kue oye,>> sa voy.

17Ebarahami sa kapata joulo la te lua; oye sa biere noypo tani no sa voy, <<Be sa voy keike valaka sa majala vapuodo keike toytuleike sada oye sa keikeubi avea ba? Be sa voy Sera sa majala vapuodo keike so sada oye sa ziangulu avea?>> 18No Ebarahami sa voy goyti te kue Bangara, <<Aro ko leni Isimeli me kuo te aramitaki te re!>> sa voy.

19Ba sa voy goyti Bangara, <<Sa tunato, mo quolekutae Sera me vapuodo koyna amo re keike tomleike, no re mo vataritingini oye Aisake. Aro me vadere qo vato- arapokitini te kue oye, vato- arapokitini me kou sua tabasadasada te kue oyra sokutu arasumae te rokusua oye. 20Te kue Isimeli, Aro ko vanata amo re: Vanata! Aro me manani oye; no me vavere vataba oye no me vazadeve oye. Oye me tamae doyra oyra manokeri buoe, no aro me vaporo oye te kieke tubi poyua boysi. 21Ba aro me vadere qo vato- arapokitini te kue Aisake, oye Sera me vapuodo te kue re te sada sa seva goyti ave sa me.>> 22Sada oye sa bito ngeoro te kue Ebarahami, Bangara sa kesini oye no sa zo puka.

23Te tava noyene Ebarahami sa koype toytuleike oye Isimeli no taba oyra ka puodo te ona pupu, no oyra sa ngotani ona kisa, oyra leike taba te ona pupu, no oye sa pote koykoypa kopikae doyra, sa seva Bangara sa soynani oye. 24Ebarahami sa ziangulu zia avea sada oye sa pote koykoypa kopikae, 25no toytuleike oye Isimeli sa manotulu avea sada oye sa pote koykoypae takodeke senini kopikae; 26Ebarahami no toytuleike oye Isimeli kuru pote koykoypa kopikae doyru keike to tava. 27No taba oyra leike ka kuo koype oye, no oyra ka poudo te ona pupu, no oyra boysi veke oye sa ngota oyra no Ebarahami soy, ka vakieke pote koykoypa kopikae doyra.

Currently Selected:

Genesis 17: BAA

Highlight

Copy