Genesis 15

Ona vato-arapokitini Bangara te kue Abarami

1Te rokusua doyra oyra pita goyti, ona ngeoro Iaova sa me te kue Abarami te miamado:

<<Kasi isi re Abarami.

Aro me mo bako,

Re mo pale porae poyu sua,>> sa voy.

2Ba sa voy goyti Abarami, <<Ke! Iaova Buoe, aro kama zari vo qo so, ata pita re mo kea aqo ro, boysi me matani qo tutupari ro, Elieza boysi ni Damasikasi?.>> 3No sa voy goyti Abarami, <<Mia! Re kama kea mo aqo ro ka so, qo sokakakoso me matani qo tutupari,>> sa voy.

4Sinani ngeoro te Iaova sa me te kue oye: <<Sokakakoso goyti kama voyae matani tutupari te re, ba keike tomleike vatasuku me tae me te seninim tamo, me matani mo tutupari>> sa voy 5Iaova sa koype vajele la oye te paqaroyni no sa soynani oye, <<Mo kadika puka la te rani no mo ngea oyra sisiriputu sada re ko majala ngea tabae doyra.>> Sinani sa voy goyti Iaova te kue oye, <<Dongae doyra oyra sokutu arasumam re moyra seva to ta,>> sa voy.

6Abarami sa vatuna Iaova, no oye sa tuqini oye sa boysi tutungono sua.

7No sa voy vele goyti Iaova te kue oye, <<Aro Iaova, ko koype kesini amo re te kumala ni Ora te vodu ni Babiloni soy me koyna amo re vodu goyti, soy re mo pale no tungene,>> sa voy.

8Ba sa voy goyti Abarami, <<Kei! Iaova Buoe, be me voy oye aro me utini te me pale no tungene vodu goyti ne?>> Sa voy.

9Sa voy goyti Iaova te kue oye, <<Mo iro me te kue ro keike bulumakao sa tulu avea, keike qoti sa tulu avea, no keike sipi sa tulu avea, no keike kokoru kau no kokoru qutuni varoqa,>> sa voy.

10Abarami sa iro beito me te kue Iaova oyra pita goyti, no oye sa lipeke vakeri oyra pita pupura no sa loypo te keri kua kuru aramatae; ba oye kama lipike vakeri vo roroko. 11Sa voy ta oye, oyra qaqava ka juolo me te kue oyra pita pupura lie, ba Abarami sa koyle vazo oyra.

12Sada ngada sa jolupu, Abarami sa pam sua, no remini aravaisi poyu sa me sapene oye. 13Sa voy goyti Iaova te kue oye, <<Re mo utini vanoyi, oyra sokutu arasumam re moyra kuo seva boysi zulezule te vodu veke, oyra boysi moyra vaseka no vatakani oyra te vatiubi ave. 14Ba aro me aratanaeni tubia boysi oyra ka kuo sikae, no sada oyra moyra kesini vodu noyene, oyra moyra iro taba tutupari poyu. 15Ba re, mo la te ngoyni ka lae oyra kajim, mo valaka varoka, mo lei te luoboro bole, moyra ludo amo. 16Te vavatia sapoko oyra sokutu arasumam re, moyra vele me te vodu goyti bati zaqalae doyra oyra boysi ni Amori korovita doka vo te bebetoa,>> sa voy.

17Sada ngada sa jolupu soypa la no remini sa me, da soy sa takabula me keike sireke sa kanua me nako sa kue paji sa qala sa paqolo te arakaluoboroa doyra oyra takutia pita pupura. 18Te tava noyene Iaova sa vadere ona vato-arapokitini te kue Abarami no sa voy goyti oye, <<Te kue oyra sokutu arasumam re aro me koyna oyra vodu goyti, pasi te vuru lata te vodu ni Ijipi, me doka te vuru lata ni Iuparetesi- 19vodu te oyra boysi ni Kena, oyra boysi ni Keniza oyra boysi ni Kadomoni, 20oyra boysi ni Hiti, oyra boysi ni Perizi, oyra boysi ni Repemu, 21oyra boysi ni Amori, oyra boysi ni Kenani, oyra boysi ni Qiqasi no oyra boysi ni Jebusi,>> soy sa voy.

Currently Selected:

Genesis 15: BAA

Highlight

Copy