Luka 14

Brah Yêsu ƀư bah bunuyh ji môr. – Ntĭm ma nau dêh rhêt jêh ri nau ueh

1Du nar saƀat, Brah Yêsu lăp tâm ngih du huê kôranh chiă uănh tâm mpôl Pharisi gay sông sa; bu njrăng kâp uănh Păng. 2Nôk nây, tanăp Păng geh du huê bunuyh geh nau ji môr ndŭl. 3Brah Yêsu lah ma phung nơm nti nau vay jêh ri ma phung Pharisi pô aơ: “Tâm nar saƀat, dơi vay ƀư bah nau ji mâu lah mâu dơi?” 4Ƀiălah khân păng gŭ rklăk da dê. Brah Yêsu sâm rdâk an ma bunuyh ji, ƀư bah jêh nây ăn păng sĭt. 5Păng lah ma khân păng: “Mbu nơm tâm phung khân may geh kon mâu lah ndrôk tŭp tâm ntu dak tâm nar saƀat ƀiălah mâu sŏk mphâk ăn păng hao klơ ro?”#Mat 12:11. 6Khân păng mâu hôm dơi plơ̆ lah nau nây.

7Tơlah saơ phung bunuyh dơi jă săch ntŭk nau khưm, Păng ngơi du nau hôr ma khân păng: 8“Tơlah bu jă may râng sông sa nau tâm nkol ur sai, lơi may gŭ ôh ta ntŭk dŭt prêh, klach lah tâm phung bu năch geh du huê yơk lơn ma may.#Hôr 25:6-7. 9Nơm kôranh nau song sa lah đah may: ‘Ăn hom ntŭk ma bunuyh aơ gŭ,’ nôk nây may mra prêng yorlah mra hăn gŭ ta ntŭk nglĕ dŭt. 10Ƀiălah tơlah bu jă may, gŭ hom ta ntŭk nglĕ dŭt, nôk kôranh nau sông sa tât lah ma may: ‘Hơi mĭt jiăng, jă may gŭ ta ntŭk prêh lơn’ ri mơ bu mra yơk ma may tanăp lĕ rngôch phung gŭ sông sa ndrel ma may. 11Yorlah mbu nơm n'hao êng păng nơm bu mra ntrŭnh, ƀiălah mbu nơm ntrŭnh êng păng nơm bu mra n'hao păng.”#Mat 23:12; Luk 18:14.

12Păng lah lĕ ma nơm jă Păng sông sa: “Tơlah may nkra nau sông sa n'gul nar mâu lah nau sông sa kêng măng, lơi jă ôh phung mĭt jiăng, nâu oh, ndŭl mpôl mâu lah bunuyh chiau meng ndrŏng, klach lah khân păng mra jă tay jêh ri mplơ̆ nau yô̆ ma may. 13Ƀiălah tơlah may ndrăp nau sông sa, jă hom phung o ach, phung lŭt jâng ti, phung rvĕn, phung chieh măt 14ri mơ may mra geh nau ueh maak, yorlah khân păng mâu dơi ôh mplơ̆ sĭt nau yô̆ ma may; tât nar bunuyh sŏng srăng dâk rêh tay, mra mplơ̆ sĭt nau yô̆ ma may.”

Nau hôr ma nau nhêt sa toyh

(Mathiơ 22:1-10)

15Du huê nuyh gŭ sông sa ndrel ma Brah Yêsu, jêh tăng nau ngơi nây, lah ma Păng: “Ueh maak yơh mbu nơm mra dơi sa piăng let tâm ƀon bri hađăch Brah Ndu!” 16Ƀiălah Păng plơ̆ lah: “Geh du huê bunuyh ndrăp nau sông sa toyh, jêh ri jă âk bunuyh. 17Tât mông sông sa, păng njuăl oh mon păng lah ma phung păng jă pô aơ: ‘Văch hom, lĕ rngôch ndơ ndrăp jêh.’ 18Ƀiălah lĕ rngôch dun da dê. Nơm tal nguay lah: ‘Gâp mhe rvăt mir lŏ, jêh ri gâp ŭch hăn uănh. Dăn ma may yô̆ an ma gâp.’ 19Bunuyh êng lah: ‘Gâp mhe rvăt jât mlâm ndrôk gâp hăn uănh păng. Dăn ma may yô̆ an gâp!’ 20Geh bunuyh êng lah: ‘Gâp mhe nđăp ur, yor ri gâp mâu dơi hăn.’ 21Oh mon nây plơ̆ sĭt mbơh nau nây ma kôranh păng. Kôranh ngih hao ji nuih, lah ma oh mon: ‘Hăn hom ro luh padih trong sâng jêh ri lĕ trong jê̆ tâm ƀon djôt leo phung o ach, phung lŭt jâng ti, phung chieh măt jêh ri phung rvĕn lăp ta aơ.’ 22Oh mon lah tay: ‘Hơi kôranh, nau may ntăm, gâp ƀư jêh, ƀiălah ăt hôm geh ntŭk rmeh.’ 23Kôranh ngih lah ma oh mon: ‘Hăn luh hom padih trong jêh ri rgŏ n'gar nchâp jă bu lăp ăn bêng ngih gâp. 24Yorlah gâp lah ma khân may, tâm phung bunuyh gâp jă jêh kăl e ri, mâu mra du huê bunuyh dơi chiăm sông sa ndơ gâp!’ ”

Nau di jêng oh mon Brah Yêsu

(Mathiơ 10:37,38)

25Geh âk bunuyh hăn ndrel ma Brah Yêsu, Păng n'gĭl uănh jêh ri lah ma khân păng: 26“Tơlah mbu moh văch gay tĭng Gâp ƀiălah mâu tâm rmot ma mbơ̆ mê̆, ur kon, phung nâu oh, yuh oh păng jêh ri nđâp ma nau rêh păng nơm, ndri mâu dơi jêng oh mon Gâp.#Mat 10:37. 27Mbu nơm mâu tuy si tâm rkăng păng nơm tĭng Gâp, mâu dơi jêng oh mon Gâp ôh.#Mat 10:38; 16:24; Mark 8:34; Luk 9:23.

28Mbu nơm tâm phung khân may ŭch ndâk du ngih prêh, lor lơn mâu gŭ gay kơp rnoh huach gay gĭt păng nơm geh tŏng prăk ƀư lôch păng mâu lah mâu? 29Lah, nôk hŏ ndâk mbon jêh ƀiălah păng ƀư mâu dơi jêh ôh, lĕ rngôch bu saơ, mra gơm mưch 30jêh ri lah pô aơ: ‘Bunuyh aơ ntơm ƀư ngih ƀiălah păng mâu dơi ƀư lôch jêh ôh.’ 31Mâu lah geh du huê hađăch hăn tâm lơh đah hađăch êng, ƀiălah lor lơn mâu gŭ tâm nchră gay sek uănh păng djôt leo jât rbăn tahan klăp lah tâm rdâng đah hađăch ri geh bar jât rbăn tahan? 32Tơlah mâu tâm rdâng dơi, dôl hađăch ri hôm gŭ ngai, păng njuăl nơm mbơh gay dăn ƀư nau đăp mpăn, 33Pônây lĕ, tơ lah mbu nơm tâm khân may mâu chalơi ma lĕ ndơ păng geh, păng mâu dơi jêng oh mon Gâp ôh.

34Boh jêng ndơ ueh, ƀiălah tơlah boh lĕ roh nau kah, mâm ƀư ma păng ăn plơ̆ kah? 35Boh nây mâu hôm dŏng sui ta lŏ ôh mâu lah tâm pot ma buh sui, bu mƀăr lơi păng padih. Mbu nơm geh tôr gay iăt, ăn iăt hom!”

Currently Selected:

Luka 14: CMO2023

Highlight

Copy