Kan Kôranh Oh Mon 7

Nau Y-Êtiên nti lah

1Kôranh ƀư brah toyh lơn ôp Y-Êtiên: “Di tâm ban pônây lĕ?” 2Y-Êtiên plơ̆ lah: “Hơi phung oh nâu, phung mbơ̆, gŭ iăt hom gâp lah! Brah Ndu tâm nau chrêk rmah hŏ tâm mpơl jêh ma chô yau he jêng Y-Abraham, dôl păng gŭ tâm n'gor Mêsôpôtami, lor ma păng hăn gŭ ta ƀon Charan,#Ntơm 12:1. 3jêh ri Păng lah pô aơ: ‘Du luh hom tă bơh ƀon tơm jêh ri ndŭl mpôl may, jêh ri hăn tât ta n'gor Gâp mra ntĭm an ma may.’ 4Pôri, păng du luh tă bơh n'gor Kaldê jêh ri gŭ ta ƀon Charan. Jêh mbơ̆ păng lăn khĭt, Brah Ndu ƀư ăn păng hăn rsong ntơm bơh ntŭk nây rgăn n'gor khân may gŭ aƀaơ aơ.#Ntơm 11:31; 12:4. 5Brah Ndu mâu ăn drăp ndơ ma păng ôh tâm n'gor aơ, nđâp lah du nđam neh lum mpang jâng mâu geh lĕ, ƀiălah Păng ton ma păng jêh ri noi deh păng mra pit sŏk n'gor aơ,#Ntơm 17:8; 48:4. nđâp tơlah nôk nây Y-Abraham ê hŏ geh kon. 6Brah Ndu lah ma păng gĭt pô aơ noi deh păng mra jêng bunuyh bu năch tâm n'gor bu êng, bu mra njêng khân păng jêng dĭk jêh ri tŭn jot khân păng tâm puăn rhiăng năm.#Ntơm 15:13-14. 7Brah Ndu lah: ‘Ƀiălah Gâp mra phat dôih phung mpôl băl hŏ njêng khân păng jêng dĭk; pakơi taơ khân păng mra du luh bơh ntŭk nây jêh ri yơk mbah Gâp tâm ntŭk aơ.’#Ntơm 15:13,14. 8Brah Ndu ăn ma Y-Abraham nau tâm rnglăp bơh nau rƀŭn koh ntâu. Pôri, nôk Y-Abraham hŏ geh du huê kon bu klâu, amoh păng Y-Isăk, păng koh ntâu ma kon păng tâm nar rơh pham. Y-Isăk koh ntâu ma Y-Yakôp jêh ri Y-Yakôp ƀư đŏng tâm ban pônây ma jât ma bar nuyh chô yau ma phung Israel.#Ntơm 17:10-14; 21:2-4; 25:26; 29:31–35:18.

9Phung chô yau keh nach ma Y-Yôsep, yor ri bu tăch păng njŭn leo tât ta n'gor Êjipt; ƀiălah Brah Ndu gŭ ndrel ma păng.#Ntơm 37:11,28; 39:2,21. 10Brah Ndu rklaih păng bơh lĕ rngôch nau mhĭk, ăn nau yô̆, jêh ri nau blau mĭn ma păng tanăp Pharaôn, hađăch n'gor Êjipt; hađăch sâm dơm păng jêng kôranh chiă uănh n'gor Êjipt jêh ri lĕ phung ta ngih hađăch.#Ntơm 41:39-41. 11Rnôk nây, geh nau ji ngot tâm n'gor Êjipt jêh ri n'gor Kanaan, jêng du nau rêh ni toyh ngăn ƀư ăn phung chô yau he mâu dơi geh ndơ sông sa ôh.#Ntơm 42:1-2. 12Dôl Y-Yakôp tăng lư geh ba ƀlê tâm n'gor Êjipt, păng njuăl phung chô yau he hăn tât ta nây tơ̆ tal nguay. 13Tât tơ̆ rơh bar, Y-Yôsep mpơl ma phung oh nâu gĭt năl păng; Yor nây, Pharaôn gĭt rnăk vâl Y-Yôsep đŏng.#Ntơm 45:1,16. 14Y-Yôsep njuăl bunuyh chuă Y-Yakôp jêng mbơ̆ păng jêh ri lĕ phung tâm ngih păng, lĕ rngôch geh pơh jât ma prăm nuyh.#Ntơm 45:9-10,17,18. 15Yor ri, Y-Yakôp jŭr hăn ta n'gor Êjipt jêh ri khĭt ta nây, phung kôranh mpôl he tâm ban lĕ;#Ntơm 46:1-7; 49:33. 16bu djôt leo săk jăn khân păng plơ̆ sĭt ta ƀon Sichem, jêh ri tâp tâm môch Y-Abraham hŏ rvăt jêh ma prăk tă bơh phung kon bu klâu Y-Hamôr ta ƀon Sichem.#Ntơm 23:3-16; 33:19; 50:7-13; Yôs 24:32.

17Nôk dăch tât tâm rnôk Brah Ndu ƀư tât di ngăn nau ton jêh ma Y-Abraham, rnoh bunuyh he ăt bĭk rơ̆ âk râk ta n'gor Êjipt,#Ngluh 1:7-8. 18ma tât nôk geh du huê hađăch êng hao klơ sưng hađăch chiă uănh n'gor Êjipt jêh ri mâu gĭt năl Y-Yôsep ôh. 19Hađăch nây dŏng nau ndơm đah phung mpôl băl he jêh ri tŭn jot phung chô yau he, gay nchâp khân păng mƀăr lơi phung kon mhe deh, mâu ăn khân păng gŭ rêh.#Ngluh 1:10-11,22. 20Tâm rnôk nây, bu deh ma Y-Môis, păng ueh jêh rom ray tanăp Kôranh Brah jêh ri bu rong păng pe khay tâm ngih mbơ̆ păng.#Ngluh 2:2. 21Tơlah bu cha lat păng, kon bu ur Pharaôn dơn jêng kon jêh ri mât siăm tâm ban ma kon păng nơm.#Ngluh 2:3-10. 22Y-Môis nti lĕ nau blau mĭn phung Êjipt; păng geh nau dơi tâm nau ngơi jêh ri tâm kan.

23Tât păng geh puăn jât năm, păng geh nau mĭn hăn khâl phung oh nâu păng jêng phung kon Israel.#Ngluh 2:11-15. 24Dôl saơ bu gŭ ngao mâu di ma du huê tâm phung khân păng, Y-Môis ngơi n'gang nơm bu tŭn jot jêh ri păng dong bunuyh Êjipt nây gay ma tâm plơng bôk. 25Păng mĭn ma phung oh nâu păng mra gĭt rbăng ma Brah Ndu dŏng ti păng nơm tâm rklaih khân păng, ƀiălah khân păng mâu gĭt rbăng ôh. 26Nar ôi taơ, dôl khân păng tâm nhăt ndrăng khân păng, păng văch dăch jêh ri gay ma gŭ đăp mpăn: ‘Hơi khân may, jêng oh nâu, mâm ƀư khân may ƀư mhĭk ndrăng oh nâu nơm?’ 27Nơm ƀư mhĭk ma phung chiau meng păng nơm nklơ̆ Y-Môis jêh ri lah: ‘Mbu hŏ ăn may jêng kôranh chiă uănh jêh ri kôranh phat dôih hên? 28May ŭch nkhĭt đŏng gâp nâm bu hŏ nkhĭt jêh du huê Êjipt lĕ ƀơh?’#Ngluh 2:14 (LXX). 29Y-Môis tăng jêh nau nây pô ri nchuăt du jêh ri tât gŭ tâm n'gor Madian. Ta nây păng geh bar hê kon bu klâu.#Ngluh 18:3-4.

30Puăn jât năm jêh nây, du huê tông mpăr tâm mpơl ma păng tâm mpiăt ŭnh tâm pŭm lok dôl ŭnh hit ta bri rdah yôk Sinai.#Ngluh 3:2. 31Saơ pônây, Y-Môis saơ jêh ri hih rhâl ngăn ma nau tâm mpơl nây, yor ri păng hăn dăch gay ma uănh rah vah lơn, pô ri păng tăng bâr Kôranh Brah ngơi: 32‘Gâp jêng Brah Ndu ma phung chô yau may, Brah Ndu Y-Abraham, Y-Isăk, jêh ri Y-Yakôp.’ Y-Môis râm sâr, mâu janh uănh ôh. 33Kôranh Brah lah tay: ‘Ăn may doh hom ntâu jot tă bơh jâng may yorlah ntŭk may dôl dâk nây jêng neh kloh ueh.#Ngluh 3:5. 34Gâp saơ jêh nau rêh ni phung ƀon lan Gâp tâm n'gor Êjipt jêh ri hŏ tăng jêh nau khân păng nter rĭ dĭng Gâp jŭr văch gay ma tâm rklaih khân păng. Aƀaơ aơ, văch hom, Gâp mra njuăl may hăn tât ta n'gor Êjipt.’#Ngluh 3:7-10. 35Y-Môis nây jêng nơm khân păng dun jêh ri lah: ‘Mbu hŏ ăn may jêng kôranh chiă uănh jêh ri kôranh phat dôih hên?’, ƀiălah nar aơ Brah Ndu hŏ njuăl păng jêng chiă uănh jêh ri nơm sâm rklaih tă bơh du huê tông mpăr tâm mpơl jêh ma păng tâm pŭm lok.#Ngluh 2:14. 36Păng hŏ njŭn leo khân păng luh, ƀư lĕ nau khlay, nau mbên khlay tâm n'gor Êjipt, ta Dak Mƀŭt Chăng, jêh ri ntŭk bri rdah tâm puăn jât năm.#Ngluh 7:3; 14:21; Kơp 14:33. 37Y-Môis aơ ngơi jêh ma phung kon Israel: ‘Brah Ndu mra n'hao tâm phung oh nâu khân may du huê nơm mbơh lor tâm ban ma gâp.’#Nkah 18:15. 38Păng yơh jêng nơm hŏ gŭ jêh ta nklang phung tâm rƀŭn ta bri rdah ndrel ma tông mpăr, nơm ngơi ma păng ta yôk Sinai jêh ri ma phung chô yau he; păng sŏk dơn jêh lĕ nau ngơi rêh gay ăn ma he.#Ngluh 19:1–20:17; Nkah 5:1-33. 39Ƀiălah phung chô yau he mâu tông bâr păng, dun păng jêh ri rle nuih n'hâm khân păng nơm plơ̆ ma n'gor Êjipt. 40Khân păng lah ma Y-Arôn: ‘Ƀư hom phung rup brah hăn lor hên, yorlah Y-Môis nây nơm leo hên luh bơh n'gor Êjipt, hên mâu gĭt ôh moh nau tât jêh ma păng.’#Ngluh 32:1. 41Tâm lĕ nar nây, khân păng tŏ rup du mlâm kon ndrôk, nhhơr ndơ ƀư brah ma rup brah nây jêh ri khân păng răm maak ma nau kan tă bơh ti khân păng ƀư.#Ngluh 32:2-6. 42Pôri, Brah Ndu mâu hôm n'gĭl măt ma khân păng jêh ri jao khân păng ăn yơk mbah ma phung tahan tâm trôk,#7:42 Mlr: lĕ mănh mbing klơ trôk. tĭng nâm hŏ nchih jêh tâm lĕ ndrom samƀŭt phung nơm mbơh lor pô aơ:

‘Hơi phung Israel, di lĕ khân may hŏ nhhơr mpa ƀư brah jêh ri ndơ nhhơr ma Gâp

Tâm puăn jât năm gŭ ta bri rdah?

43Lŏng aƀaơ ri khân may sŏk rnung tung brah Môlok,

Jêh ri mănh brah Rêphan,

Jêng phung rup brah khân may ƀư gay ma yơk mbah.

Yor ri, Gâp mra njŭn leo khân may hăn đah ri ƀon Babilôn.’#Amôt 5:25-27 (LXX).

44Phung chô yau hŏ geh jêh Vâl Bok Nau Tâm Rnglăp tâm bri rdah, tĭng nâm Brah Ndu hŏ ntrŭnh nau ntăm ma Y-Môis ƀư di tĭng nâm rup ngih păng saơ jêh.#Ngluh 25:9,40. 45Phung chô yau he sŏk dơn jêh ngih bok nây jêh ri ndrel ma Y-Yôsuê djôt leo păng lăp tâm n'gor khân păng hŏ pit sŏk tă bơh phung mpôl băl Brah Ndu mprơh du jêh tanăp khân păng. Ngih bok nây hôm e tât ta rnôk rô̆ Y-Đavit,#Yôs 3:14-17. 46bunuyh geh nau yô̆ tanăp Brah Ndu, jêh ri păng dăn joi du ntŭk gŭ ma Brah Ndu Y-Yakôp.#II Sa 7:1-16; I Rêh Jêng 17:1-14. 47Pakơi nây, hađăch Salômôn ndâk du mlâm ngih ma Kôranh Brah.#I Hađăch 6:1-38; II Rêh Jêng 3:1-17. 48Ƀiălah Nơm Dŭt Prêh mâu gŭ ôh tâm ngih ƀư ma ti bunuyh, tĭng nâm nau nơm mbơh lor ngơi jêh:

49‘Kôranh Brah lah: Trôk jêng sưng hađăch Gâp,

Jêh ri neh ntu jêng rnơl chrong jâng ma Gâp.

Moh ngih khân may mra ŭch rdâk ma Gâp,

Moh ntŭk jêng ntŭk ma Gâp gŭ rlu?

50Mâu di ƀơh ti Gâp rhăk njêng jêh lĕ rngôch ndô ndơ aơ?’#Êsai 66:1,2.

51Hơi phung bunuyh dăng ko, nuih n'hâm jêh ri tôr ê hŏ koh ntâu ri! Khân may tâm rdâng mro đah Brah Huêng Ueh. Phung chô yau khân may tâm ban ma khân may!#Êsai 63:10. 52Mbu tâm phung nơm mbơh lor, dĭng phung chô yau khân may mâu ƀư mhĭk? Khân păng nkhĭt jêh phung ngơi nau mbơh lor ma Nơm Sŏng mra văch, jêng Nơm aƀaơ aơ khân may rlăng jêh ri nkhĭt lơi jêh. 53Khân may sŏk dơn jêh nau vay ntrŭnh tă bơh tông mpăr, ƀiălah khân may mâu tông nau vay nây ôh!”

Nau Y-Êtiên khĭt

54Khân păng ji nuih hâu ngăn tâm nuih n'hâm jêh ri rket sêk ma Y-Êtiên. 55Ƀiălah Y-Êtiên, bêng ma Brah Huêng Ueh, n'gơr uănh ta klơ trôk, saơ nau chrêk rmah Brah Ndu jêh ri Brah Yêsu gŭ dâk pa ma Brah Ndu. 56Păng lah: “Ri, gâp saơ lĕ ndâr trôk pơk mpơl jêh ri Kon Bunuyh gŭ dâk pa ma Brah Ndu.” 57Nôk nây, khân păng nter hâu ngăn, nsêt tôr jêh ri lĕ rngôch nchuăt rduh lăp nhŭp Y-Êtiên 58têk păng du luh padih ƀon, jêh ri klŭp lŭ ma păng. Phung nơm mbơh nkoch sŏk kho ao khân păng dơm ta jâng du huê bu klâu ndăm, amoh păng Y-Sôl. 59Dôl khân păng klŭp lŭ, Y-Êtiên mbơh sơm pô aơ: “Ơ Kôranh Brah jêng Brah Yêsu, dăn sŏk dơn huêng gâp.” 60Jêh nây păng chon kômâk, nter huy: “Ơ Kôranh Brah, lơi kơp nau tih aơ ma khân păng!” Lah lôch nau ngơi nây, păng bê̆ch.

Currently Selected:

Kan Kôranh Oh Mon 7: CMO2023

Highlight

Copy