Kan Kôranh Oh Mon 15

Nau tâm nchră ta ƀon Yêrusalem

1Geh ƀaƀă bunuyh văch tă bơh n'gor Yuđa nti ma phung oh nâu pô aơ: “Tơlah khân may mâu koh ntâu tĭng nâm nau vay Y-Môis, khân may mâu dơi geh nau tâm rklaih ôh.”#Lêvi 12:3. 2Rnôk nây, mâu geh du ai, Y-Pôl jêh ri Y-Ƀarnaƀas tâm rlăch dŭt n'hâm ngăn đah phung bunuyh nây. Yor nây, Y-Pôl jêh ri Y-Ƀarnaƀas ndrel ma bar pe nuyh tâm phung nây dơi săch hăn ta ƀon Yêrusalem, tât ta phung kôranh oh mon jêh ri phung kôranh bu ranh gay ôp ma nau nây. 3Pôri, jêh Phung Ngih Brah Ndu njŭn hăn trong, khân păng n'ho rgăn Phênisi jêh ri n'gor Samari, nkoch bri nau phung bu năch sĭt chroh, ƀư ma lĕ rngôch phung oh nâu răm maak hâu găn. 4Tât ta ƀon Yêrusalem, Phung Ngih Brah Ndu, phung kôranh oh mon jêh ri phung kôranh bu ranh vơt rom khân păng, jêh ri khân păng nkoch bri ma phung nây lĕ nau Brah Ndu đă khân păng ƀư. 5Ƀiălah geh ƀaƀă tâm phung chroh tâm mpôl Pharisi dâk jêh ri lah: “Ăn koh ntâu ma phung bu năch, jêh ri ntăm ma khân păng djôt prăp nau vay Y-Môis.”

6Phung kôranh oh mon jêh ri phung kôranh bu ranh tâm rƀŭn gay ma sek uănh nau nây. 7Lôch jêh nau tâm nchră nanê̆ ngăn, Y-Pêtrôs dâk lah ma khân păng pô aơ: “Hơi phung oh nâu, khân may gĭt bơh saơm jêh, Brah Ndu hŏ săch gâp tâm phung khân may, gay bơh bâr mbung gâp, phung bu năch dơi tăng nau mbơh ma Nau Mhe Mhan Ueh jêh ri chroh.#Kan 10:1-43. 8Brah Ndu jêng Nơm dơi gĭt nuih n'hâm ma lĕ rngôch bunuyh, hŏ mpơl Păng Nơm dơn phung bu năch dôl ăn Brah Huêng Ueh ma khân păng tâm ban ma he.#Kan 10:44; Kan 2:4. 9Păng mâu tâm nkhah phung he đah phung bu năch jêng êng êng ôh, ƀiălah Păng ƀư kloh nuih n'hâm khân păng ma nau chroh. 10Pôri aƀaơ, mâm ƀư khân may janh rlong uănh Brah Ndu, dơm ta trô ko phung oh mon du mlâm mâng mbăk, phung chô yau he mâu lah he nơm ăt mâu dơi mbăk lĕ. 11Ƀiălah, he chroh yor nau yô̆ Kôranh Brah jêng Brah Yêsu yơh, he geh nau tâm rklaih tâm ban ma khân păng lĕ.”

12Lĕ rngôch phung rƀŭn gŭ rklăk, iăt nau Y-Ƀarnaƀas jêh ri Y-Pôl nkoch bri lĕ rngôch nau mbên khlay jêh ri nau khlay, Brah Ndu đă khân păng ƀư jêh ta nklang phung bu năch. 13Dôl khân păng rlu ngơi, Y-Yakơ lah: “Hơi phung oh nâu, iăt hom nau gâp! 14Mâm Y-Simêôn hŏ nkoch êlor Brah Ndu chop khâl ma mpôl băl phung bu năch, gay ma sŏk luh tă bơh khân păng du phung ƀon lan ma amoh Păng. 15Nau nây tâm di jêh đah nau phung nơm mbơh lor hŏ nchih jêh:

16‘Jêh lĕ nau nây, Gâp mra plơ̆ sĭt,

Rdâk tay ngih Y-Đavit hŏ rlâm rai jêh.

Gâp mra nkra tay lĕ ntŭk geh nau ƀư rai

Jêh ri ndâk tay păng;

17Gay ma phung bunuyh hôm e,

Jêh ri lĕ rngôch phung bu năch dơi kuăl tâm amoh Gâp, joi Kôranh Brah da dê.

Kôranh Brah jêng Nơm hŏ ƀư lĕ nau nây, Păng lah tâm ban pônây.

18Nây jêng lĕ nau dơi gĭt ntơm bơh rbăn rnôk kăl e.’#Amôt 9:11,12 (LXX).

19Pôri, gâp mĭn mâu dơi rkhŭk ma phung bunuyh tâm phung bu năch dôl plơ̆ sĭt ma Brah Ndu; 20ƀiălah ăn he nchih samƀŭt ntăm ma khân păng djôt prăp khân păng nơm bơh nau ƀơ̆ ƀơch tă bơh lĕ rup brah jêh ri nau văng tĭr, mâu đŏng sa puăch mpô mpa khĭt măp jêh ri mham.#Ngluh 34:15-17; Lêvi 17:10-16; 18:6-23. 21Yorlah ntơm bơh lĕ rngôch rô̆ kăl e, tâm ăp ƀon, geh phung bunuyh nti lah nau vay Y-Môis jêh ri rŏ nau vay nây ăp nar saƀat tâm lĕ ngih rƀŭn.”

22Pakơi nây, phung kôranh oh mon jêh ri phung bu ranh ndrel ma lĕ rngôch Phung Ngih Brah Ndu ŭch săch phung bunuyh tâm phung khân păng jêh ri njuăl hăn ndrel ma Y-Pôl jêh ri Y-Ƀarnaƀas ta ƀon Antiôs. Khân păng njuăl Y-Yuđas, trơn amoh Y-Barsabas, jêh ri Y-Silas, jêng bar hê kôranh chiă uănh tâm phung oh nâu, 23ndrel ma du pŏk samƀŭt pô aơ: “Phung oh nâu hên jêng phung kôranh oh mon jêh ri phung kôranh bu ranh njuăl nau mbah jô̆ khâl tât ma phung oh nâu tâm phung bu năch ta ƀon Antiôs, n'gor Siri, jêh ri n'gor Silisi! 24Yor hên tăng jêh geh bar pe nuyh tâm hên, nđâp lah mâu dơn nau ntĭnh tă bơh phung hên, hŏ lah lĕ nau ƀư vĭ jêh ri ƀư rsuak nau mĭn khân may. 25Yor nây, hên du nau mĭn gay ma săch jêh ri njuăl phung bunuyh aơ hăn ndrel ma bar hê nơm rŏng ngăn ngên ma hên jêng Y-Ƀarnaƀas jêh ri Y-Pôl, văch ta khân ay may. 26Bar hê aơ hŏ sân săk jăn khân păng ma amoh Kôranh Brah he jêng Brah Yêsu Krist. 27Pônây, hên njuăl jêh Y-Yuđas jêh ri Y-Silas văch ngơi đah khân may ma lĕ nau hên hŏ nchih tâm samƀŭt. 28Yorlah Brah Huêng Ueh jêh ri hên hŏ dơn jêh, mâu dơm ntop nau jâk jêr ma khân may ôh, knŏng lĕ nau khlay aơ: 29Ăn khân may ver sa ndơ ƀư brah ma rup brah, mham, mpô mpa khĭt măp, jêh ri lơi văng tĭr. Khân may djôt prăp lĕ rngôch nau nây jêng ueh. Nĕ khân may yơ̆!”

30Pôri, phung bunuyh nây tâm nkhah đah Phung Ngih Brah Ndu, hăn jŭr ta ƀon Antiôs, kuăl rgum phung tâm rƀŭn jêh ri jao do pŏk samƀŭt nây. 31Jêh rŏ samƀŭt nây, khân păng răm maak da dê ma nau n'hao nuih n'hâm nây. 32Y-Yuđas jêh ri Y-Silas jêng phung nơm mbơh lor lĕ, sŏk âk nau nti lah gay ma n'hao nuih n'hâm jêh ri ƀư ma khân păng ntop nâp. 33Jêh jŏ djê̆ ma nây, phung oh nâu ăn khân păng plơ̆ sĭt đăp mpăn ma phung njuăl khân păng.#15:33 Geh ƀaƀă nau rblang ntơm saơm ntop trong 34: Ƀiălah Y-Silas tâm nal gŭ ta ƀon Antiôs.

Y-Pôl tâm nkhah đah Y-Ƀarnaƀas

35Ƀiălah Y-Pôl jêh ri Y-Ƀarnaƀas gŭ ta ƀon Antiôs, ndrel ma âk bunuyh êng nti lah Nau Mhe Mhan Ueh jêh ri sâm nti nau ngơi Kôranh Brah. 36Jŏ djê̆ ma nây, Y-Pôl lah ma Y-Ƀarnaƀas: “Kay lŏng he plơ̆ sĭt khâl phung oh nâu tâm lĕ ƀon he hŏ tă mbơh nkoch jêh nau ngơi Kôranh Brah, uănh mâm khân păng.” 37Y-Ƀarnaƀas ŭch jă Y-Yôhan, ntơ amoh Y-Markôs. 38Ƀiălah Y-Pôl mĭn mâu ueh djôt leo Y-Markôs, yorlah Y-Markôs hŏ chalơi bar hê khân păng ta n'gor Pamphili, mâu hăn ndrel ma khân păng tâm nau pah kan tay.#Kan 13:13. 39Yor nây, geh nau tâm rlăch ngăn, kŏ tât bar hê khân păng tâm nkhah băl: Y-Ƀarnaƀas djôt leo Y-Markôs ncho ndrel kumpăn hăn ta kôdak Syprơ. 40Bi Y-Pôl hăn trong, jêh săch Y-Silas, jêh ri phung oh nâu jao păng ma nau yô̆ Kôranh Brah. 41Păng nsong tâm n'gor Siri jêh ri n'gor Silisi, ƀư ăn lĕ Phung Ngih Brah Ndu dơi nâp.

Currently Selected:

Kan Kôranh Oh Mon 15: CMO2023

Highlight

Copy