Yohana 21
21
Yesu jaapitii banafunzi saba
1Pagapeta ganiaga Yesu jaapitila kabee banafunzi baki mulutengu ju nhanga guku Tibelia. Jaapitila ana, 2Simoni Petili na Tomasi joankema mapaa na Nataneli mwenei juku Kana Galilaya na bana abeli baka Zebedayu na banafunzi baki bangi abeli, babia boti abeli pamu. 3Simoni Petili jaapwagila, “Nyenda kulobo homba.”
Nabombi bumpwagila, Natwe ngiti tulongana nawenga, ndienu bajenda nukukwela nhwatu, lakini ikilu je heji ngasebapatiki sokape. 4Ekwatumbuliya kukusa, Yesu jajema mulutengu ju nhanga, lakini banafunzi baki ngasemanyiki ndi ngati jombe. 5Ndienu, Yesu jaalalukiya, “Akosi bangu ngasempatiki le sokape?”
Bombi bapwaaga, “Loo! Ngasetupatiki sindo.”
6Yesu jaapwagila, “Nndekala ilepa hinu upandi wa malele uku nhwatu ngiti mpata homba.” Ndienu balekala kilepa mu nhanga lakini ngasebawesa kuhuta kabee ndaba ja homba kuba hinge.
7Papuje mmbolee jojapaliki na Yesu ampwagila Petili, “Jonzo Bambu!” Simoni Petili pajajoa Bambu, jakonga ingobu jaki ndaba jabiya ndaba ngaese jwakongike ingobo, nukuhombe mmase. 8Lakini banafunzi bangi bala bahika ku mbwani ku nhwatu gola koni ahuta ilepa yeitweli homba, ngasebabii kutali nukundema, ila babiya utali wa meta miya kuhuma mulutengu. 9Pabahika kundema bugubona mwotu wa makalakala akohiki na panani jaki abei homba ni libumunda. 10Yesu jaapwagila, “Nndeeta pamba homba yengi yendobwi yene.”
11Simoni na Petili bakwela munhwatu, jahuta mbaka mundema gola kilepa sesabii homba ngolongu mia moja hamsini ni itatu. Papuje baabii bandu bingi ndienu kilepa se ngasewajendwike. 12Yesu jaapwagila, “Nhikannya nkula.” Ngajabii hata jumu jojawesa kundaluki sokapi. “We wa nyane.” Ndaba bumanyiki jombi ndi Bambu. 13Yesu jahika, jajukua libumunda, jaapekiya, jahenga ahelahe na homba yela.
14Papuje jabiya mala ji itatu Yesu jaapitila banafunzi baki baada juku yoka.
Yesu na Petili
15Ebajomula kula, Yesu andalukiya simoni Petili, “Simoni mwana waka Yohana! Boo gumbai nepani kuliku banganya ababa?”
Najombi jaapwagila, “Ena Bambu, gumanyiki nepani nugupaile.”
Yesu ampwagila, “Gulima bana ba makondoo gangu.” 16Ndipala ampwagila mala ja pili, “Simoni mwana waka Yohana! Boo, gumbaile?”
Petili ampwagila, “Ena Bambu gumanyiki nendenda kugupala.”
Yesu ampwagila, “Gulima makondoo gangu.”
17Andalukiya mala ja tatu, “Simoni mwana waka Yohana! Boo gumbaile?”
Papuje Petili jayomika ndaba andalukiya mala ja tatu. “Gumbaile?” Ampwagila, “Bambu, wehapa wagamanyi goti, wehapa gumanyiki nepani nde kugupala.” Yesu ampwagila, “Gulima makondoo gangu!” 18Sakaka nugupwagi, pawabii gunkombu wayobali kukonga luhunga nukujenda kwokapi kogupai. Lakini pawibiya gunseja gwitondabia maboku gaku, na mundu jongi jagukonga nukugupeleka kwanga kupala kujenda. 19Kukupwaga hela, Yesu jalangia Petili ejikuwa nukundumbalii Sapanga. Ndipala ampwagila, “Nyengaliya.”
Yesu nu mmbolee jongi
20Papuje Petili jang'anambuka, ambona mmbolee jojabii Yesu ampai, jujengalee, mmbolee jola ndi jojabii kipindi sela sebabiya bakakula kilebi sa pakamii, jatemi pambipi ngamaa na Yesu nukundaluki, “Bambu nya jojwagung'anambuka?” 21Ndienu, Petili eambona hoju, andalukiya Yesu, “Bambu, na jonzo boo?”
22Yesu ampwagila, “Ana ngati jupai juhigaliya mbaka panihika, gupala kyane? We gumbwata nenga.”
23Ndienu, majambu ge haga gaeniya kwa bandu babuhobale Kilisitu kupwaaga mmbolee hoju ngajiikuwi. Lakini Yesu ngasejapwagiki mmbolee we hoju ngajukuwe ila japwaaga pe, “Ana ngati mbala juhigala mbaka panikelubuka, we gupala kyane?”
24Hoju ndi jojagabona majambu ge haga, nukuandika. Natwee tumanyiki gajapwaga ndi ga sakaka.
Kujomulela
25Gabii majambo gingi gajahenga Yesu. Gaguge ngati gakahandikwi goti, limu baada ja lengi, nholale hata ndema weni ngakwakabii kwiibeka itabu yeyabii iyandikwi.
Currently Selected:
Yohana 21: NTMBL2020
Highlight
Share
Copy
Want to have your highlights saved across all your devices? Sign up or sign in
The New Testament in Matengo Language ©The Word for the World International and Matengo Language Translation, 2020. All rights reserved.
