Luke 20

Djesu, anyi atsiwuveghe musughe awune?

Mat 21.23-27; Mrk 11.27-33

1Mwa yilumbu, Djesu amalonzaange batu, akebatsingulaange musamu wuboti va dulombili du ndaghu Nzambi. Bivunde bi bavaghulitsi ba paghu, milonzi mi mighaghe na bivunde bi baSwife bimosi bakebarasune vane. 2Bivunde byeni bakemuwivule rye: «Awuni widilile musughe mu udughusu mambu mémane? Tutsinguli, anyi amawuveghe musughe ewune?» 3Djesu akebawaghule rye: «Menu wandi nyuduwivule yivu: 4Anyi amasindighe San nomuveghe musughe wu ubatise batu? Amasindughu na Nzambi vo na batu?» 5Batu beni, bakevosange va ghari djobeni rye: «Yike twisingi yiri Nzambi amamurume, djandi otuwivule rye: “Ka mumba yi dusamasingile ame San amavose?” 6Yike twimuwaghuli yiri musughe eni ombu batu wiruyili, mukute wotsu wututinde mamani mu utuboke, mumbari batu beni bédjabi yiri San amabe mubiyitsi.» 7Batu beni, bakewaghule Djesu rye: «Djetu, tughedjabi anyi amamuveghe musughe mu ubatise batu.» 8Na Djesu akebawaghule rye: «Menu wandi, ngodutsingule mu musughe nyi nyimavayili.»

Nongu dji bisyele bibi

Mat 21.33-46; Mrk 12.1-12

9Djesu anomane uvose, akemwébukile mukute nongu rye: «Dibaale amavare nungi dji miri mi vinye#20.9 nungi dji miri mi vinye: nungi ane bivale bi kumu amiburi milunde mu vayile dingibe dibenge., akedjisile va makake ma bisyele mu udjikelise, na amawende mu mulingu yitsingu. 10Temu dighumbe djinotole, fumu nungi akesindighe musatsi andi wumosi ombu bisyele abimasyale na nungi, Bakemuveghe dyandi dikabu di milunde mi vinye. Tumbe bisyele byeni bakedimbe musatsi eni kube na bakemughabuse myowu pavele. 11Fumu nungi, akesindighe awu mubedji, bisyele byeni bakedimbe wune wandi kube, bakemusyenge na bakemughabuse myowu na myowu. 12Akebwésindighe awu mutatu, awune wandi, bakemutsungule na bakemusyanze. 13Fumu nungi akekewivule: “Tsyeni ngavale? Nyusindighe mwane ami murime, tangudji bomughobise.” 14Tumbe ave bisyele byeni bamalabile mwane andi, baketsingusunaange rye: “Lanu mungo disyale! Tumubokyanu, tuke byalile nungi.” 15Bisyele, bakemughange, bakemupalise o ghari nungi na bakemuboke.»

Djesu akebawivule rye: «Mu dyoni, yike yi fumu nungi obavaghe? 16Djandi, orughe na oboke bisyele byeni bine, na owakise nungi andi va makake ma bisyele bisusu.» Batu banowulu nane, bakemuwake rye: «Tsatsabi, dighorungule ube nane!»

17Djesu anobaghengile, akebawivule rye: «Divindughulu di Bisonu bi Nzambi, tsyeni diwendili? Labatyanu:

“Dimani adimabwaghu na barungitsi ba mandaghu,

yike dine diwarisi nziku yibughe#Nim 118.22?”

18Wotsu oduku dibaku mu dimani dyeni, oberughe na otsungughe. Djandi awu dimani dyeni dyubonduyile, onyighemughe.»

Ghabusilanu Sesare abivu byandi

19Milonzi mi mighaghe na bivunde bi bavaghulitsi ba paghu bakerombange nane borungulile wughange Djesu mumbari bamatasaange yiri djowu, Djesu amatsokiyilaange mu nongu eni. Tumbe basamamughaange mumbari bamadumange mughungi.

Djesu na dyambu dyufute lepu

Mat 22.15-22; Mrk 12.13-17

20Batu bamabe numi-numi na Djesu. Bakemutindile batu abamafuraange ube basatsi ba Nzambi. Batu beni bamarombaange ubaghule batonu mu malongi ma Djesu mu umughange, na umuwakise ombu yidjeti yi baRome mu umusosise. 21Batu beni abamatindu, bakemuwivule yivu rye: «Mulonzi, twidjabi yiri wivosi nolonze na dusungughu; wughévayi dupasu va ghari batu, tumbe wilonzi na ngenze nzile Nzambi. 22Tutsinguli nine vo nesi, diwelimine mu ufute lepu ombu Kaghe Sesare?» 23Tumbe Djesu anobaghule dyele adi mbé bamusoghe, akebawaghule rye: 24«Mbeyilyanu fure. Yinzi yi nyi? Na dine di nyi bisonughu mu fure eni?» Bakemuwaghule rye: «Bi Kaghe Sesare.» 25Djesu amabatsingule rye: «Ghabusilanu Kaghe Sesare abivu abyandi, mbana abi Nzambi, bi Nzambi.» 26Djowu bamakambulu mu posulu tsyandi na basamadile tonu mu umuveghe mbele. Bakevole «swii».

BaSadisi béwivuli Djesu mu durambughulu du abafu

Mat 22.23-33; Mrk 12.18-27

27Dighuki di baSadisi abamabe na bakemi mu durambughulu du abafu, banobambene na Djesu, bakemuwivulaange rye: 28«Mulonzi, Moyise, mu mighaghe mi Nzambi, amatusoniyile rye: “Dibaale adiwele, payi aghaabure, yike efu, ngebi andi obyalile mukwili na bobure va yivinze yi awu amafu#Det 25.5-6.” 29Vamabe yisambwali yi baane ba ngudji ba babaale. Awuteghe akewele na akefu, asamabure. 30Nduke tsomi [akewele mukwili, akefu djandi wandi asamabure.] 31Awu muryeru akemwébyalile mukwili eni, akefu djandi wandi, asamabure. Mu yisambwali yotsu ayi mabyalile mukwili, yikefu, yi samasile baane. 32O nzitu, mughetu wandi akefu. 33Yilumbu ayi babaale beni borambuyile o dufu, anyi obe mulumi mughetu eni? Mumbari amabe mughatsi djowu botsu.»

34Djesu akebawaghule rye: «Mu butambe bwébubu, baghetu na babaale béwelisini, 35tumbe bamosi abe Nzambi elabi yiri bawelimine mu urambughe o dufu nodile monyu awurughe, djowu baghomwéwele. 36Kaboghu, dufu mbé dughobwébabembe, mumbari bobe nane byanze bi Nzambi. Djowu bobe baane ba Nzambi, na djandi obarambuse o dufu nobaveghe monyu. 37Moyise amavose kengili yiri Nzambi orambuse abafu. Ave amavosile mu yilombi yi yivale yi mudji Nzambi, amanengile Fumu “Nzambi dji Aberaame, Nzambi dji Yisaake na Nzambi dji Sakobe#Ukm 3.2,6.” 38Agha Nzambi dji bamvumbi, tumbe Nzambi adji djowu abavu monyu, mumbari djowu badji monyu dibandu djandi.» 39Dighuki di milonzi mi mighaghe baketsingule Djesu rye: «Mulonzi, wutsivose dingenze.» 40Na djowu, basamamwérungule umuwivule bivu bisusu.

Batu béwivuli Djesu mu dyambu di Davide

Mat 22.41-46; Mrk 12.35-37

41Djesu akewivule milonzi mi mighaghe rye: «Dibandu yi batu bévosili rye: “Kirisete, adji mwane Davide?” 42Davide etubuli djabeni mu mughande Nyimbu rye:

“Fumu Nzambi etsinguli Fumu ami rye:

Tsane va mabaale mami,

43tena nyukutighe bambeni baghu,

otsi makulu maghu#Nim 110.1.”

44Payi Davide enengili Yibyatsi yi Nzambi “Fumu andi”, ka tsyeni omwébile mwane andi?»

Djesu elubusi milonzi mi mighaghe

Mat 23.1-36; Mrk 12.38-40

45Mughungi wotsu wunobe limbe mu umuwululu, Djesu aketsingule badukitsi bandi rye: 46«Kebenanu na milonzi mi mighaghe, djowu aberondingi bu uyenelingaange mu bikutu bisakeme, djowu aberondingi usimbungu na dighobe mu mambure ma mighungi, djowu aberondingi utsane mu bitsighe abiteghe mu mandaghu ma tsambu na mbure tsi mimengu amineni, 47djowu bédyongi nodayile bakwili, djowu bévayi tsambu tsisakeme mu ukelase yiri basungeme. Mu tonu adjine, Nzambi obakilisi pwele uvyoghulile bamosi.»

Currently Selected:

Luke 20: PUNNT

Highlight

Copy