Mak 2

Jizọs Ḅụọ Na Ḅara Fịịḅọ Gwọm

(Mat 9.1-8; Luk 5.17-26)

1Dii ḅoo kẹ́lẹ́ ḅọ́rọ́ sáá, Jizọs pịghịma Kapanọm ḅom, dughonyẹ ma warị kaa wasa ḅẹ́ Jizọs wárị imii. 2Tọghaapụ ḅo kobirim sị ḅụọ kóróma angaá mịnị ofori, ḅụ́pọ́ ma tórúku ḅụ sọ Jizọs ibi oku ma dugho wásáma n pịrịarị. 3Ínia owiapụ awọ, ḅara na ḅụọ fịị owitụ́wọ dighi Jizọs damaḅom. 4Túminị́ kpo ma gosi, nnị ine owitụ́wọ ma pa ọ fịnị angaá laagha. Nnị warị gbẹ́rẹ́ ngaa fooma osu ma ọgọnọ Jizọs dada kpọrọfịnị ngaa ma, nnị fóo angaá miẹpágháma ḅoo sáá, nnị warị owitụ́wọ ma kóróma ọ ḅụlọlọ fịnịarị angaá ori múnonyẹ ọ́gọ́nọ. 5Jizọs nna minini láa ḅara árị sáá, Jizọs ḅụọ na ḅara fịịḅọ ma ḅẹm, <<I tụ́wọ nnị ị́yẹ́ siiḅụḅarasi ị pịrịmam.>>

6Anị ngaa kpọrọfịnị fịnị ólóghó nyẹ́dieapụ warị saghị sịbịbie kịẹ anị pịrị, 7<<O tegó sị nwọfịnị ḅara pa ẹ́gẹ́rẹ́ kọọarị? Mịma anịị wiri núme pa Tamuno wiri! Tamuno ngéré anị ine siiḅụḅarasi kị́nị́ pịrịbẹḅọ!>>

8Anị gbẹ́rẹ́kirikiri Jizọs nimim tẹ́mẹ́bie nnị kórómaarị nyẹ, ọ warị n ḅẹẹ, <<Ọ tegó ọkọfịnịnyẹ kórómaarị? 9Tẹ́ sárásáráḅa, ḅụọ fịị, ḅara fịị owitụ́wọ ma ḅẹ ḅẹẹ, Nnị ị́yẹ́ sii wáriso ị pịrịmam anịgha ḅẹẹ, <Saghị, ị́yẹ́ ibila iko akị si, nwángịị>? 10A mịẹbẹm sị ị akanyaḅo ḅẹẹ, Tumḅọ yii Tụ́wọ ma, kụ́rọ nyanam tuminikiri sị, siiḅụḅarasi túminị́ pịrị.>> Ọ warị ḅụọ fịị ḅára fịị owitụ́wọ ma ḅẹẹ, 11<<A dugho ị pịrịm, saghịị, ị́yẹ́ ibila saghị akị sị soo warị muu!>> 12Nnị kị́nị́mamgba dighiarị sáá, owitụ́wọ ma saghịm, ori ibila saghị akị, warị álála nwángị soo. Nnị kị́nị́mamgba nnị árịnyẹ n tọ́rụ nẹngịm, n warị Tamuno túmíní ḅẹẹ, <<Jẹ́ éné jẹ́ éné, na wa mị nyẹ ḅara arịgha!>>

Jizọs Livai Sịm

(Mat 9.9-13; Luk 5.27-32)

13Jizọs sima Galili posie aka ma múm. Túminị́ kpo warị ọ damaḅoo, ọ warị saghị nyẹ pa n die. 14O nwángịma muarị sa, o ḅo gbẹ́rẹ́ ósó igbii biiḅọ na donam, Livai, Alịfịyọs tụ́wọ okpọrọfịnịarị ọrẹ fịrịnwangị wárị ḅụ. Jizọs ọ ḅẹm, <<I dua.>> Livai warị saghị ọ dua.

15Sáá ḅo kẹ́lẹ́ ḅọ́rọ́ sáá, Jizọs nyẹ́fịarị Livai warị ḅụ. Tọgha tọgha ósó igbii biiapụ na siiamịẹnyẹapụ Jizọs duarị, nna ḅụ tọghaapụ na ọrẹ ọḅụduaapụ, o dua nyẹ ma fịịm. 16Ólóghó ma nyẹ́dieapụ ma, nna ḅụ Farisiiapụ ma ḅo arịm ḅẹ́ Jizọs siiamịẹnyẹapụ ma na ósó igbii biiapụ ma na nyẹ́fịarị, n warị ori ọḅụduaapụ gbíla, ḅẹẹ, <<Ọ tegó mịnaapụ ma dua nyẹ́fịarị?>>

17Jizọs naam warị n págháraa ḅẹẹ, <<Oju kụrọapụ bịrịḅọ dọghụgha, kụ́ma obiapụ ngéré. A ḅoo ibiamịẹnyẹapụ sịghaa kụ́ma siiamịẹnyẹapụ.>>

Ḅurukụ́ma Gbólómanyẹ

(Mat 9.9-13; Luk 5.27-32)

18Gbẹ́rẹ́ sáá biri Jọn dua nwángịapụ na Farisiiapụ ma ḅurukumáarị. Jẹ́apụ warị Jizọs damaḅoo sị o gbíla ḅẹ́, <<O tegó sị Jọn Mingi Saraḅọ na pịghị Farisiiapụ ma duaarịapụ ma ḅurukụ́ma, kuma ị́yẹ́ ọḅụduaapụ ma mini ḅurukụmagha?>>

19Jizọs n pagharam, <<O bii ḅẹẹ ọmịna igoniapụ ọ́rụ́ḅọ yaa ma ḅụ papa furo pa soo? Ọkọfịnị nyẹ ofori! Ọ́rụ́ḅọ yaaḅọ ma nnị na fịnị sáá gonyẹ́ gonyẹ́ nnị ḅurukụ́ma na ibighaa. 20Kụ́ma éné ḅoobẹm nnị ọ́rụ́ḅọ yaaḅọ sịịakị bẹ sáá n ḅárabie, anịsáa, nnị ḅurukụ́mabẹm.

21<<Gbẹ́rẹ́ḅọ sọ iwọbịtẹ pa olom bịtẹ na tịrọ tịrọgha, tegó ịwọ bịtẹ ma ḅo kpándubẹm sị kẹ́lẹ́ jẹ́ a olom bịtẹ ma kaakị sị mịẹsị kaa angaá ma ḅoo opuma fịoḅaa. 22Anịgha nnị ịwọ iru pa olom iru ólóló bie sua sua? Tegó iru ma ólóló ma ḅaabẹm, anịsáa iru ma na ólóló ma na ḅo papáfam. Tụ́ma, ịwọ iru pa ịwọ ólóló bie sua.>>

Ịnyọsára Éné Ma Gbólómanyẹ

(Mat 12.1-8; Luk 6.1-5)

23Gbẹ́rẹ́ Ịnyọsára Éné Jizọs n pa fịtúrú mịẹarị sịmgbọlụ dua ḅụ nwangịḅọ́rọ́arị. Ori ọḅụduaapụ ọ nana mị nwángị ma kọọarị sáá, n warị saghị fịtúrú ma sịmgbọlụ ma sịbị kiẹnị. 24Farisiiapụ ma warị Jizọs ḅẹẹ, <<Dighi anị wamịna ólóghó na karakáragha ḅẹẹ ị́yẹ́ ọḅụduaapụ mịị nyẹ ma mịẹm Ịnyọ́sárá Éné ma ḅụ!>>

25Jizọs pagharam, <<Na ọ naagha Deviti mịẹnyẹ, fị́nyẹ ọ tarị sáá, ori na ori a túminị́ na, 26ọ Tamuno wárị ma sọmum sị nnị saghị Tamuno pịrị fịtúrú ma fịm. Mịẹnyẹ ma kiriakịm Abiata opu igwagwaḅọ kiri ḅụ fịnị sáá. Wamịna ólóghó ma fịnị ḅara ḅụ igwagwaapụ ma ngéré anịị ine mị fịtúrú ma fị bẹapụ kụ́ma Deviti anị fịm warị pịghị jẹa nyẹ pa ori a túminị́ pịrị.>>

27Jizọs warị anị dugho kunema, <<Dugho n pịrị ḅẹ́ Ịnyọ́sárá Éné ma túminị́ ibi goo anịị n goo anị mịẹnyẹ; n túminị́ tẹ́mẹ́ Ịnyọ́sárá Éné ma pịrịgha. 28Anịgo Tumḅọ yii Tụ́wọ ma ori sịbịdaa Ịnyọ́sárá Éné ma pịrịm.>>

Currently Selected:

Mak 2: IBY

Highlight

Copy