YouVersion Logo
Search Icon

Mak 14

14
Nnị Tọ́ọ Jizọs Pịrị Siinyẹ
(Mat 26.1-5; Luk 22.1,2; Jọn 11.45-53)
14Mmẹẹ́ a dii kọm anị Sáḅáḅọ́rọ́ na Sughumanyẹ ófórigha Fịturu Álálị ma láa. Igwagwaalaapụ na ólóghó nyẹ́dieapụ asọ dọghụarị n ḅọghu ḅara pa Jizọs kuu ḅá bẹ ḅara. 2Nnị ḅẹm ḅẹẹ, <<Wa mịẹbịgha álálị ma bie anịgha túminị́ ma ine ḅẹ́rẹ́ dighibẹm.>>
Nnị Pulo Pa Jizọs Sịbị Saram Bẹtani Ḅụ
(Mat 26.6-13; Jọn 12.1-8)
3Jizọs Bẹtani ḅụ imim Saimọn wárị, ḅụkọ-obii kọọmáa ḅọ, Jizọs aningáa nyẹ́fịarị sáá, gbẹ́rẹ́ ọ́rụ́ḅọ kpọma igbii láa karakárá nad pulo alabasita ólóló binyẹ pa sọḅom. Árị ólóló ma ḅám warị kụ́nụ́ pulo ma pa Jizọs sịbị sara.
4Anị ngaa fịnị jẹ́ a túminị́ saghị bieoḅum warị saghị jụghọ jụghọ ḅẹ́, <<N tegósi papa mị kụ́nụ́ pulo ma gulugulumaarị? 5Nnị ine pa pị́naḅala igbii jie a si dẹrịbẹm sị igbii ma pa igonyiapụ pịrị!>> Nnị warị ḅụgbẹ́gha ḅara pa ẹ́gẹ́rẹ́kọọ ọ́rụ́ḅọ ma pịrị.
6Kụ́ma Jizọs ḅẹ́m ḅẹẹ, <<Ọmịnị a wáriso! O tẹ́ go ḅụḅáláḅálá pa a pịrịarị? A kpọma ibi na ḅụ́gbẹ́ nyẹ mịẹ i pịrịmam. 7Igonyiapụ sámamgba ọmịnị na imii ọ pịghị ḅárásua n pịrị bi sá gonyẹ́ gonyẹ́ ọmịnị ine ḅárásua n pịrịbẹm kụ́ma irị ọmịnị inyanabịgha sámámgba. 8Árị árị ine nyẹ mịẹm; a kụ́nụ́ pulo pa ị́yẹ́ oju ḅụ saram pa anị tẹ́lẹ́ma warị anị dipi sáá pịrị. 9Mị́sa a ibima dugho ọ pịrịarị ḅẹ́ nnị ibi oku ma dugho wásáma ngaa gonyẹ́ gonyẹ́ tuminikiri gbọrụ ḅụ, a mịẹnyẹ ma nnị anịgoo pa a pa biekóróma bẹnyẹ.>>
Judas Minim Sị Jizọs Dẹrịfị
(Mat 26.14-16; Luk 22.3-6)
10Anịsáa Judas Isịkarọtị, oyi mmẹapụ findi ọḅụduaapụ ma ḅụ gbẹ́rẹ́ḅọ warị saghị sị igwagwaalaapụ ma damamum sị ọ Jizọs dẹrịfị bẹ ḅara. 11O dugho n pịrị dọghụnyẹ ma nna bieḅẹ́lẹ́mam, n warị pịghị igbii minini ọ pịrị. Judas warị saghị asọ dọghụ ọ ḅara warị Jizọs saghị n ḅarabie sua bẹ ḅara.
Jizọs Ori Ọḅụduaapụ Na Saḅaḅọ́rọ́ Fị́nyẹ Ma Fịịm
(Mat 26.17-25; Luk 22.7-14,21-23; Jọn 13.21-30)
12Nnị n Fịtúrú Sughumanyẹ suagha Álálị ma parị éné, nnị Sáḅáḅọ́rọ́ ánáná ma ḅá ḅá éné ma, Jizọs ọḅụduaapụ o gbilam, <<I dọghụ mọ ḅẹ́, wa tẹ́ angaá muu Sáḅáḅọ́rọ́ fị́nyẹ ma tẹ́lẹ́ma i pịrị?>>
13Anịsáa, Jizọs warị bịpị pa mmẹapụ pịrị n mịẹ ḅẹnyẹ: <<Ọmịnị opu ama ma sọọ, ọ gbẹ́rẹ́ owitụ́wọ na donabẹm ngu pa mingi dighiḅọ, ọmịnị o dua 14ọ sọọ wárị sọọ sị dugho warị nyánáḅọ ma pịrị ḅẹẹ: <Nyẹ́dieḅọ ma ḅẹm ḅẹ́, bie ma tẹ́ angaá imii irị na ị́yẹ́ ọḅụduaapụ fịnị sị Sáḅáḅọ́rọ́ Álálị ma fị?> 15Anịsáa ọ gbẹ́rẹ́ bie pa o diebẹm ọgọnọ wárị ḅụ nnị anị bie ịkasị tẹ́lẹ́mamam, anị ngaa ọ nyẹ gonyẹ́ gonyẹ́ tẹ́lẹ́ma wa pịrịbẹm.>>
16Ori ọḅụduaapụ warị soo ama ma muu, sị dọghụ pághámaḅo bẹ́ nyẹ gonyẹ́ gonyẹ́ Jizọs dugho ḅara anịị anị pághá ḅara: n warị Sáḅáḅọ́rọ́ fị́nyẹ ma mịẹ.
17Éné ḅo ḅupiri sáá Jizọs na ori oyi mmẹapụ findi ọḅụduaapụ ma ḅom. 18Nnị fị́nyẹ fị opu ịkasị ma ḅụ fịnị nyẹ́fịarị sáá, Jizọs ḅẹm, <<A dugho ọ pịrịm ọmịna ḅụ gbẹ́rẹ́ḅọ i Dẹrịfị́bẹm ịrị na nyẹ́fịarịḅọ.>>
19Ori ọḅụduaapụ ma anị nnị igánimam, nnị warị saghị ọ gbíla, gbẹ́rẹ́ḅọ gbẹ́rẹ́ḅọ, <<A sịgha ḅẹ́ ị́ ị ḅẹm, ọkọ fịnịgha?>>
20Jizọs n pagharam, <<Ọmịna ḅụ gbẹ́rẹ́ḅọ oyi mmẹapụ findi ma ḅụ, irị na gbẹ́rẹ́ bolibie fịtúrú suu fị ḅọ. 21Tumḅọ yii Tụ́wọ ma fị́ị́bẹm Tọ́ndiri ma dugho ḅara ḅụ; kụ́ma anị opuma ḅáláfá nyẹ dighi Tumḅọ yii Tụ́wọ ma dẹrịfịḅọ ma pịrịbẹm! Anị kọkọ ibiḅaa ḅẹ́ ḅọ́rọ́ tumḅọ anịḅọ ma yiigha!>>
Kị́nị́nyánáḅọ Ḅupiri Fị́nyẹ
(Mat 26.26-30; Luk 22.14-20)
22Nnị nyẹ́fịarị sáá, Jizọs kálá fịtúrú mpara puuakim, ịmịẹḅaa tẹ́ghẹ̄ kọọ, warị anị puu sị pa ori ọḅụduaapụ pịrị. Ọ warị ḅẹẹ, <<Anị ákịị; mịị ị́yẹ́ oju ma.>>
23Ọ warị pịghị ọmọ́ngọ ma saghị akị, ịmịẹḅam pa Tamuno ḅẹẹ, warị saḅama n pịrị, nnị kị́nị́mamgba warị anị bie ḅuu.
24Jizọs ḅẹm, <<Mịị ị́yẹ́ ọmbịnyẹ́ ma nnị osu pa tọghaapụ pịrịnyẹ ma, ị́yẹ́ ọmbịnyẹ́ ma Tamuno ọ ḅoo ma gbẹpalị nyẹ. 25A dugho ọ pịrịm a mịnị jẹ́ pa mịị iru ma ḅuubịgha akị muu a ịwọ iru ma ḅụ sáá Tamuno Ásẹ́mẹ́kiri ḅụ.>>
26Nnị warị gbẹ́rẹ́ boma núme suu si Olivu Tụ́ndụ ma muu.
Jizọs, Pita O Pighi Bẹ Ḅara Dugho Pághámam
(Mat 26.31-35; Luk 22.31-34; Jọn 13.36-38)
27Jizọs n ḅẹm, <<Ọmịnị kị́nị́mamgba i wáriso mangịbẹm, ḅẹ́ Tọ́ndiri ma dughom ḅẹẹ,
<< <Tamuno ánánákúrúḅọ ma ḅabẹm,
anịsáa ánáná ma galagalabẹm!>
28Kụ́ma a fịị ḅụ saghịmaẹrẹ, a tarị ọ ḅụ ḅọ́rọ́ Galili muubẹm.>>
29Pita pagharam, <<A jẹ́ éné jẹ́ éné ị warịsobịgha, ḅọ́rọ́ isiapụ mamgba ị wáriso sọ!>>
30Jizọs Pita ḅẹm, <<Ọbịọ mmẹẹ́ sáá pa pághábịgha mị dii, ị́ tẹ́rẹ́ a sáá pa ị pighibẹm ḅẹẹ ị inimigha.>>
31Pita kụ́rọ ḅara pa ọ pagharam, ḅẹ́ jẹ́ éné jẹ́ éné ọkọfịnị nyẹ ofori, a ḅọ́rọ́ ịrị na fịị bẹ so! Isi ọḅụduaapụ mamgba gbẹ́rẹ́ ḅara ma dughom.
Jizọs Gatsimeni Ḅụ Tẹ́ghẹm
(Mat 26.36-46; Luk 22.39-46)
32Nnị ḅo Gatsimeni pa si ngaa lam, Jizọs warị ori ọḅụduaapụ ḅẹẹ, <<Ọ mịnga fịnị sị a tẹ́ghẹ̄.>> 33Ọ warị Pita, Jems na Jọn sị ọ ḅụ sua tẹ́mẹ́ si na opu tọ́rụ́siarị ḅoo ọ ḅụ kóróm. 34Ọ warị nnị ḅẹẹ, <<Ikúkúbie fịnị tẹ́mẹ́sii anị kpọma dụḅam, kálányẹ kọm anị ịgbẹ kọ́sịma. O mịnga fịnị sị dii ma kúru.>>
35Ọ kẹ́lẹ́ tórúku mum sị ọ ḅụ pa kiri gbii sị tẹ́ghẹ̄ ḅẹ́, ḅọ́rọ́ anị ine mịẹbẹ mịị tọ́rụ́siarị sáá ma ọ ḅụ ḅọ́rọ́ọ́. 36Ọ tẹ́ghẹ̄m <<Daa, i Daa! Nyẹ gonyẹ́ gonyẹ́ ịḅụ sárásárám. Mịị tọ́rụ́siarị ọmọngọ ma si a fịnị angaá. Anị n ḅẹ́sọ, irị dọghụ nyẹ́gha, kụ́ma ịrị dọghụnyẹ.>>
37Anịsáa ọ pịghịma ḅom sị ḅo ori tẹ́rẹ́ ọḅụduaapụ ma arịị n múnoarị. Ọ warị Pita ḅẹẹ, <<Saimọn ị múno ma? Ị ine pa kẹ́lẹ́ tọ́rụ findigha gbẹ́rẹ́ énékịẹnyẹ ḅụ?>> 38Ọ warị pịghị n ḅẹ́, <<O dii ma kúru sị tẹ́ghẹ̄ ọmịnị daádighi bie sọbịgha ḅara. Anị Tẹ́mẹ́ ma tarịarị, kụ́ma ojumẹnị ma ḅụ ịnyọ ofori.>>
39O sima sọm sị pịghị jẹ́ pa tẹ́ghẹ̄ sị gbẹ́rẹ́ ẹ́gẹ́rẹ́ ma kọọarị. 40Anịsáa ọ warị ori ọḅụduaapụ ma damaḅoo sị nna árị n múnoarị angaá nnị ine nna tọ́rụ́ findigha. Nnị pịghị nimigha n pa ọ ḅẹ́ bẹnyẹ.
41Ọ tẹ́rẹ́ kárámá sáá pa ḅoo sáá, ori n ḅẹm, <<Ọ pa múno sị ịnyọsáráarị? Ibimam! Sáá ma lámam! Dighi, Tumḅọ yii Tụ́wọ ma nnị ọ saghị pa siiamịẹnyẹapụ kụ́rọ pịrịm. 42Ọ saghị sị wa sọọ. Dighi, mịị anị i dẹrịfịarịḅọ ma!>>
Ólóghó Ḅara Pa Jizọs Kuu
(Mat 26.47-56; Luk 22.47-53; Jọn 18.3-12)
43Jizọs pa ẹ́gẹ́rẹ́arị, anị Judas oyi mmẹapụ findi ọḅụduaapụ ma ḅụ gbẹ́rẹ́ḅọ ḅoo láa sáá. Ori na, anịị tọgha túminị́ áláápụ́-ágidi na sị ikiḅa dighiapụ, sịbịdaa Tamuno opu igwagwaapụ na ólóghó nyẹ́dieapụ na sẹ́nịapụ ma fịrịmaapụ. 44Iruonaḅọ ma ilíghíma pa túminị́ kpo ma diemam, <<A ku pa ḅoloḅọ ma, ori anịị ọ dọghụḅọ ma. Ọmịnị okuu sị kúrúapụ pa ori na sọọ.>>
45Judas ḅoo láa gbẹ́rẹ́kiri, o Jizọs damamum warị ḅẹẹ, <<Nyẹ́dieḅọ!>> warị bịpị pa ọ bịpị timi. 46Nnị warị Jizọs kuu sị ori ọlọ kụ́rọ́ma. 47Kụ́ma anị angaá sẹ́fịnịarị gbẹ́rẹ́ḅọ ori áláápụ́-ágidi nụ́nụ́m sị Tamuno opu igwagwaḅọ ómóniḅọ gbogbom warị ọ biri pẹ́lẹ́si. 48Anịsáa Jizọs warị ẹ́gẹ́rẹ́ pághámam, warị n ḅẹẹ, <<Ọmịnị áláápụ́-ágidi na sị ikiḅa akuoo na ibi sị pa ikuu, sọ́ḅọ́rọ́ ịrị ólóghó kaa ḅo? 49Éné bie akị mú éné láa a ọmịnị na imi nyẹ́diearị Tamunoopuwarị ma bie, ọmịnị i kuugha. Kụ́ma Tọ́ndiri ma karakárányẹ sọ́bẹm.>>
50Ori ọḅụduaapụ mamgba warị o wáriso sị mangị sọ.
51Gbẹ́rẹ́ ásátụ́wọ, pị́na bịtẹ ngéré anịị ọ suanyẹ Jizọs duaarị. Nnị asọ dọ́ghụm nnị o kuu bẹ ḅara 52kụ́ma ori n ḅárápẹ́lẹ́ma papa ḅụ pa mangisom, ori bịtẹ wáriso.
Jizọs Igwagwaalaapụ Na Táarịapụ Kubiri Ogbo Tórúku
(Mat 26.57-68; Luk 22.54,55,63-71; Jọn 18.13,14,19-24)
53Anịsáa n warị Jizọs akị pa Tamuno opu igwagwaḅọ warị ḅoo, igwagwaalaapụ na sẹ́nịapụ ma ólóghó nyẹ́dieapụ kubiri angaá. 54Pita ḅọlọanga ḅụ n duam nna Ọḅụju muu Tamuno opu igwagwaḅọ ma wárị nụ́ngọbie sọọ. Anị angaá anịị ọ kúrúapụ ma na kpọrọfịnị nyẹ sị fịnị timi. 55Igwagwaalaapụ na táarịapụ kubiri ogbo ma n pa ḅara ọlọ bẹnyẹ dọ́ghụm sị anị ḅụ ḅọ́rọ́ Jizọs ḅá, kụ́ma nnị ine gbẹ́rẹ́nyẹ sọ dọghụḅogha 56Tọgha onyésẹapụ iruonyẹ dughom Jizọs sịbị ọgọnọ, kụ́ma nna dughonyẹ ma gbẹ́rẹ́ ḅara muugha.
57Anịsáa jẹa owiapụ warị saghị sị mịị iruonyẹ ma dugho Jizọs sịbị ọgọ́nọ́, 58<<Wamịnị ọ nam, o dugho sáá ḅẹẹ, <A mịị Tamunoopuwarị ma nụ́nụ́kábẹm túminị́ ḅara pa nama nyẹ ma, tẹ́rẹ́ a dii ḅọ́rọ́fáma sáá a túminị́ ḅara pa namaghaa nganyẹ namabẹm!> >> 59Anị fịnị ḅara, nnị ma so, nna dughonyẹ ma sọ kuragha.
60Tamuno opu igwagwaḅọ ma sẹ́fịnịn nnị kị́nị́mamgba toruku warị nyẹ pa Jizọs gbíla ḅẹẹ, <<I págháraa nyẹ nyanagha n pa i sịbị sẹ nyẹ mamgba?>>
61Kụ́ma Jizọs ikpuru suam, gbẹ́rẹ́nyẹ sọ dughogha. Tamuno opu igwagwaḅọ ma pighi jẹ́ pa o gbilam ḅẹẹ, <<Ịrị anịị Mesaya ma, n boma Tamuno Tụ́wọ ma?>>
62Jizọs pagharam, <<Anịị Ịrị. Ọmịnị kị́nị́mamgba pịghị Tumḅọ yii Tụ́wọ ma árịbẹm ọ kpọrọfịnị angaá Kụrọmamgba Nyánáḅọ amaḅaranga sị sobie oḅuto na kóróḅoarị!>>
63Tamuno opu igwagwaḅọ ma ọgọ́nọ́ o suabịtẹ ma kam sị ḅẹẹ, <<Wa mịnị jẹ́ onyésẹapụ dọghụgha! 64Ọ náa maá ọ Tamuno fiesima ḅara, o tẹ́ dugho bẹ?>>
Nnị kị́nị́mamgba dughom ḅẹẹ ólóghó ma ọ kuum anịgo nnị ọ ḅá.
65Nna ḅụ jẹ́apụ warị saghị fị́lā pa Jizọs sara, n pịghị bịtẹ pa o tọ́rụ́ káká sị ọ ḅaghum. Nnị ọ ḅẹ́m, <<Dugho i ine ine i ḅaghu ḅo!>> Kúrúapụ ma warị ori akị sị ọ ḅụrọọ.
Pita Jizọs Pighim
(Mat 26.69-75; Luk 22.56-62; Jọn 18.15-18,25-27)
66Pita pa warị ma nụ́ngọbie fịnịarị sáá anịị Tamuno opu igwagwaḅọ omoni ọ́rụ́ḅọ anị ngaa ḅo nyẹ́. 67A Pita árị sị ọ fịnị timiarị sáá, a tọ́rụ́ pa dada o dighim warị ḅẹẹ, <<Ịrị so, i koko Jizọs Nazarẹtị ḅụ saghị ḅoḅọ ma na imii.>>
68Kụ́ma ori anị pighim, warị págháraa ḅẹẹ a nimigha anịgha a akanyaḅo ị dughoarị nyẹ ma gbólómanyẹ ori ọkọ dughom sị warị bie asọ ma ḅụ ḅọ́rọ́ pághá. Anị gbẹ́rẹ́ sáá ma ḅụ anịị ọbịọ págháa nyẹ.
69Omoni ọrụḅọtụ́wọ ma ori arịm anị angaá warị saghị dugho anị ngaa sẹ́fịnịapụ ma pịrị ḅẹẹ, <<Mịị ḅọ ma ori nna ḅụ gbẹ́rẹ́ḅọ!>>
70Kụ́ma Pita sima anị pighim.
Kálá sáátụọ ḅo ḅọ́rọ́ sáá, anị ngaa sẹ́fịnịnapụ ma saghị Pita sịbị sẹ́m ḅẹẹ, <<Ịrị ine pighibịgha ḅẹ́, ịrị n ḅụ bẹ gbẹrẹḅọgha tegó ịrị so Galili ḅụ saghịḅom.>>
71Anịsáa, Pita warị nyẹ kuḅufị ḅẹ́, <<Tamuno i pa tọ́rụ́siarịma ḅọ́rọ́ ḅẹ́ a o dughoarị owitụ́wọ ma nimi nimi!>>
72Anịsáa, mmẹẹ́ kárámá ọbịọ ḅo pághám, Pita warị pa biekóróma Jizọs dugho o pịrị ḅara ḅẹẹ, <<Ọbịọ ma mmẹẹ́ sáá pa pághá bẹ sáá ị tẹ́rẹ́ a sa pa ị pịghịmam ḅẹ́ ị inimigha.>> Ọ warị sóghórókoro owuú.

Currently Selected:

Mak 14: IBY

Highlight

Share

Copy

None

Want to have your highlights saved across all your devices? Sign up or sign in