Matiu 10

Jizọs Oyi Mmẹẹ́ A Ọḅụduaapụ Findi Fịrịma Pághámam

(Mak 3.13-19; Luk 6.12-16)

1Jizọs ọrẹ oyi mmẹẹ́ a ọḅụduaapụ findi sị ọ ḅụ pịrịm sị kụrọ pa n pịrị sị nnị sitẹ́mẹ́ deesi sị pịghị tọ́rụ́kịrịkị́rị́ obi na ikúléapụ gwọọ. 2Mịị oyi mmẹapụ findi nfịrịmaapụ ma ẹ́rẹ́: parị ḅo Saimọn n Pita pa sịḅọ na pịghị ọ numboru Anduru; na Jems na ọ numboru owitụ́wọ Jọn; nnị Zebidi awọ; 3na Filipụ na Batolomi na Tọmọs na Matiu ásẹ́mẹ́kiri ósó igbii daaḅọ; na Jems Alịfịyọs tụwọ, na Tadiyọs, 4na Saimọn Ámáibidọghụḅọ, na Judas Isịkarọtị ọ dẹrịfịḅọ.

Jizọs Oyi Mmẹapụ Findi Ma Fịrịma Pághámam

(Mak 6.7-13; Luk 9.1-6)

5Mịná oyi mmẹapụ findi ma anịị Jizọs fịrịma pághámáapụ sị mịị bịpị ma pa n pịrị ḅẹẹ: <<O Juughaapụ fịnị ngaa muma anịgha Sameriyaapụ gbẹrẹ ama sọ sọọ ma. 6Anịmanakaragha ọmịnị Izirẹlịawọ dámámuu, faá ánáná fịnị ḅara fịnịapụ. 7Ọ muu sáá, dugho wásámáa ḅẹẹ, <Sọ ásẹ́mẹ́kiri ma kikiamam!> 8Obiapụ gwọọ, fịịapụ saghịma, ḅụkọ-obii kọọapụ gwọọ sị n fíafía, sitẹ́mẹ́ deesi, ọ papa anị nyánaḅom, ọ pịghị papa anị die wásámáa. 9Gbẹ́rẹ́ odoḅala sọ akịma muunyẹ ma ḅụ anịgha pị́naḅala anịgha ọjọḅala igbii akịma ọmịna akpa bie. 10Ọ gbẹ́rẹ́ akpa sọ akịma muunyẹ ma ḅụ anịgha jẹ́ suabịtẹ anịgha ḅụọ ḅụ sua agbaa, anịgha agbara ọlọ; fịrịwangiḅọ amịna imoo ḅụ nyẹ́fị na ibim.

11<<Ọ sọọ opu ama anịgha ọ sọọ káláama gonyẹ́ gonyẹ́, ọ muu dighi ḅọ́rọ́ ọ daákóróma bẹḅọ imi, ọmịnị anị tumḅọ ma na fịnị akị muu ọmịnị anị ngaa ma wáriso bẹ sá láa. 12Ọ warị ma sọọ bẹ sáá, ọ sịbịpị sị ḅẹẹ, <Diin ọmịnị na fịnị.> 13Ḅọ́rọ́ anị ngaa fịnịapụ ma ọ daá kórómam, ọmịna diin sịbịpị ma fịnịbẹm; kụma ḅọ́rọ́ nnị ọ daakórómagha ọmịna diin sịbịpị pịghịma ḅo ọ pịrị. 14Ḅọ́rọ́ kị́nị́ ọ daakórómagha anịgha ọmịna ẹ́gẹ́rẹ́ pughugha, ọmịnị ama ma anịgha warị ma warịsoarị sáá, ọmịnị ọmịna ḅụọ sughu fịnị onwo ma gugu kóróma n pịrịị. 15A karakárányẹ ma dugho ọ pịrịm ḅẹ́ ḅẹ́rẹ́kọ éné ma ḅụ Tamuno tọ́rụ́kụrụkụ́rụ́ nyáná Sodom na Gomora amaapụ pịrị mịná amaapụ ma nẹ́ngịbẹm.

Tórúku Ḅoarị Tọ́rụ́siarị

(Mak 13.9-13; Luk 21.12-17)

16<<A ọ fịrịma pághámaarị ánáná awọ ḅara piri obiri ogbobie. Anịgosi ọmịnị ododó nyẹ́nimi ḅara pa nyẹ́nimi kụ́ma diin elesia diin ḅara.

17<<Ọmịnị ọḅụ ẹbị, túminị́ imi, okuakị bẹapụ sị ọ pa ḅẹ́rẹ́kọ warị muu sị pịghị ọ fom nna kobiri yọ ma ḅụ. 18I sịbị go nnị ọmịnị akuoo ḅẹ́rẹ́kọ ḅobẹm, ḅẹ́rẹ́tọapụ na ámányánáapụ tórúku. Mị ḅara ọmịnị asọ árịbẹm ibi oku ma dugho wásámáa nnị na Juughapụ pịrịị. 19Kụ́ma nnị okumaẹrẹ nḅẹḅẹ́ ọ báláma ọ dugho bẹnyẹ anịgha ọmịnị anị dugho bẹ ḅara. Anịsáa ma ḅụ n pa ọ pịrịbẹm ọ dugho bẹnyẹ. 20Ḅẹẹ ọmịnịgha ẹ́gẹ́rẹ bẹnyẹ, kụ́ma ọmịna Daá Tẹ́mẹ́ anịị ọ ḅụ ḅọ́rọ́ ẹ́gẹ́rẹ́kọ bẹnyẹ.

21<<Mịná owiapụ amịna jẹ́ mịná owiapụ dẹrịfị fịị bie suubẹm, daa amịna awọ dẹrịfị pa fịị bie suubẹm, awọ mịnị nyingiapụ na daapụ bịpị pughubịgha sị nyingiapụ na daapụ na túlúma fịị bie sua. 22Túminị́ mamgba tarịgha ḅụ ọmịnị na fịnịbẹm i sịbị go, kụ́ma sẹ kụ́rọ muu kunema láa ḅo dụaḅọ́rọ́ma nyánábẹm. 23Nnị gbẹ́rẹ́ angaá ọ pa tọ́rụ́siarịmamaẹrẹ, ọ mangị jẹa ngaa muu. A karakárányẹ ma dugho ọ pịrịm ọ mịnị Izirẹlị ḅụ fịnị ama gbọrụ ikelemabịgha Tumḅọ yii Tụwọ ma ḅoobẹm.

24<<Diridáwọ́ warị ḅụ nyẹ dawọarị tụwọ amịna nyẹ́dieḅọ nẹngịgha anịgha fịrịnwangịḅọ amịna nyánáḅọ nẹ́ngị. 25Anị ḅụ́gbẹm ḅẹẹ diriwarị ḅụ nyẹ́dáwọ́arị tụ́wọ amịna nyẹ́dieḅọ fịnị ḅara fịnị, sị fịrịnwangịḅọ sọ amịna nyánáḅọ fịnị ḅara fịnị. Nnị ḅọ́rọ́ warị ma sịbịdáḅọ sịmam Bẹlizibọl tẹ́ nkiki sị nnị ọkọfịnị ẹ́rẹ́ pa wárị ma bieapụ sịbịgha!

Dighi Ḅáláfá Na Ibiḅọ

(Luk 12.2-7)

26<<Anịgosi n dighi ḅáláfama. Nnị gbẹ́ẹ̄ warị nyẹ ofori sị nnị findibịgha nyẹ, anịgha túminị́ ḅọghu sị n dọghụ pághámaḅobịgha nyẹ. 27A dugho ọ pịrịnyẹ kánákánábie, éné bie baá ḅụ anị dugho págháma; biri ḅụ n pụghọ tẹ́rẹ́ ma dughonyẹ, warị osu ḅụ anị dugho págháma. 28Ojumẹnị ḅáapụ ma dighi ḅáláfama kụ́ma ine tẹ́mẹ́ ma ḅagha. Anịmanakaragha Tamuno dighi ḅáláfa ine ojumẹnị ma na biebẹ duma ma ḅáa bẹḅọ ẹ́kpẹ́duaama kọrịfịnị bie. 29Nnị gbẹ́rẹ́ pẹ́nị pa mmẹẹ́ epekele péepe fíní dẹrịgha? Ḅọ́rọ́ ọmịna Daa minigha nna ḅụ gbẹ́rẹ́nyẹ sọ kiri sóóró kóróbịgha. 30Ọmịnị a sịbị fịnị sịbị núme sọ nnị mamgba kịẹbịpị ḅụ imii. 31Anịgosi ọ ḅáláfama; ọ nyẹ láa tọgha epekele péepe fíní nẹngịm.

Krais Sịghịị Na Ori Ibi Dugho Págháma

(Luk 12.8,9)

32<<Tuminikiriapụ toruku diepághámáapụ ḅẹ́ nnị ịḅụ mininim, a pịghị anị gbẹ́rẹ́ ḅara ma pa nnị mịẹbẹm i Daa ma toruku sobie. 33Kụ́ma i pighiḅọ gonyẹ́ gonyẹ́ tuminikiriapụ tórúku, a pịghị n ḅo pighibẹm i Daá ma tórúku sobie.

A Diin Akuoogha Kuma Áláápụ́-ágidi

(Luk 12.51-53; 14.26,27)

34<<Ọ sị ma ḅẹẹ, a ḅoo diin akuom tuminikiri. A ḅo diin akuogha, kụ́ma afaragada. 35A ḅom ḅẹ́,

<< <A tụ́wọ pịghị ọ daa na iruonaḅọ mịẹ,

ọ́rụ́ḅọ tụwọ pịghị pa a nyingi na iruonaḅọ mịẹ,

pịghị taa pa a dee nyingi na iruonaḅọ mịẹ,

36tumḅọ iruonaapụ anịị tumḅọ ma wárịbieapụ!>

37<<Amịna daa anịgha amịna nyingiḅọ ḅẹlẹma i nẹngịḅọ, n ḅo ḅụgbẹ́gha ị́yẹ́ ọḅụduaḅọ sọọ, amịna owitụ́wọ tụwọ anịgha amịna ọrụḅọtụ́wọ ḅẹlẹma i nẹngịḅọ ine ị́yẹ́ ọḅụduaḅọ sọbịgha. 38Amịna mgbẹsẹ sị́ akị sị i duagha ḅọ, ine ị́yẹ́ ọḅụduaḅọ sọbịgha. 39Amịna duma warị dọghụapụ anị famabẹm kụ́ma amịna duma famapụ i sịbị go anị dọghụ pághámaḅobẹm.

Gbẹ́nyẹ Nyáná Ḅo

(Mak 9.41)

40<<Ọ dakóróma ḅo gonyẹ́ gonyẹ́ i dakórómam, pịghị i dakóróma ḅo fịnịfịnị Tamuno ma dakórómam. 41Ikiakoroḅọ dakóróma ḅọ gonyẹ́ gonyẹ́ ḅẹ́ n ḅọ ikiakoroḅọ gosi, ikiakoroḅọ gbẹ́nyẹ nyánáḅobẹm, pịghị karakárá ibiamịẹnyẹ tumḅọ dakóróma ḅọ gonyẹ́ gonyẹ́ ḅẹ́ n ḅo karakárá ibiamịẹnyẹ tumḅọ gosi pịghị karakárá ibiamịẹnyẹ gbẹ́nyẹ nyánáḅobẹm. 42Gbẹ́rẹ́ oḅuu mingi ọmọngọ pa mịná káláapụ ma pịrịbẹḅọ gonyẹ́ gonyẹ́ ḅẹ́ n ḅọ ị́yẹ́ ọḅụduaḅọ gosi, a karakárányẹ ma dugho ọ pịrịm, n ḅọ gbẹ́nyẹ n ḅọ gbarịbịgha.>>

Currently Selected:

Matiu 10: IBY

Highlight

Copy