Jọn 18
18
Juu Sịbịdaapụ Jizọs Kuum
(Mat 26.47-56; Mak 14.43-50; Luk 22.47-53)
1Jizọs tẹ́ghẹ̄ fama sáá ori na ori ọḅụduaapụ saghị sị Kidrọn póghóló kiri ma saḅa korom. Isi párángáa ma ḅụ olivu gbẹ́rẹ́ kálá duakiri imi, ori na ori ọḅụduaapụ warị nwángị anị bie sọ.
2Mị́sa Judas ọ dẹrịfịḅọ ma anị ngá ma nimim tegó Jizọs anị ngá tọgha sáá ori ọḅụduaapụ na kobirimam. 3Judas wárị kálá duakiri ma sọọ ori na Rom ọ́mụ́gbiapụ ma ḅụ jẹapụ na pịghị igwagwaalaapụ ma na Farisiiapụ ma fịrịma Tamunoopuwarị kúrúapụ. Nnị ọ́mụ́gbinyẹ ọlọm na pịghị tọsị na tọndọ.
4Jizọs ọ ḅụ pághá bẹnyẹ mamgba nimitẹ́lẹ́ma ḅara ma, tórúku múm sị n gbíla, <<Ọ tụọ ọ dọghụarị ḅọ?>>
5Nnị pagharam, <<Jizọs Nazarẹtịḅọ ma.>>
Jizọs pagharam, <<Ịrị anịị Jizọs.>> Judas ọ dẹrịfịḅọ ma nnị na anị ngá sẹ́fịnịarị. 6Jizọs dugho sáá ḅẹẹ, <<Irị anịị Jizọs,>> nnị ọ ḅụ pịrịm sị kiri bịghịkoro.
7Ọ Pịghị sima nnị gbilam, <<Tụọ mọ ọ dọghụarị ḅọ?>>
Nnị pagharam, <<Jizọs Nazarẹtịḅọ ma.>>
8Jizọs pagharam <<A kọkọ dugho ọ pịrịma ḅẹ́ ịrị anịị Jizọs. Ḅọ́rọ́ irị anịị ọ dọghụarị ḅọ, ọ mịnaapụ ma wáriso sị nnị soo.>> 9Mịma kiriakịm sị ọ kọọ ẹ́gẹ́rẹ́ ma karakárányẹ sọ bẹ ḅara, <<Ị pa i pịrịapụ mamgba a gbẹ́rẹ́ḅọ sọ ḅumagha.>>
10Anịsáa Saimọn Pita áláápụ́-ágidi ọlọḅọ anị nụ́nụ́ pa opu igwagwaḅọ ma fịrịnwangịḅọ amaḅara biri kịrị sim. Malikọs anịị fịrịnwangịḅọ ma ẹ́rẹ́.
11Jizọs igani Pita pịrịm, <<Ị́yẹ́ áláápụ́-ágidi pa anị akpa bie sua! Daḅọ ma pa i pịrị tọ́rụ́siarị ọmọngọ ma a anị bie ḅubịgha?>>
Nnị Jizọs Pa Anas Toruku Múm
12Anịsáa Rom ọ́mụ́gbiapụ ma na nna sịbịdáḅọ na pịghị Tamuowárị kúruarị Juuapụ ma Jizọs kuum. Nnị ọ kakám 13wárị parị ọ pa Anas tórúku ḅoo, Anas anịị Kayafas taa ma daa, Kayafas ori anịị opu igwagwaḅọ anị kụ́rá ma ḅụ. 14Mịị Kayafas ma anịị againma pa Juuapụ ma pị́rị́máaḅọ ḅẹ́ anị ibibẹm ḅọ́rọ́ gbẹ́rẹ́ḅọ fịị túminị́ ma sịbị go.
Pita Jizọs Pighim
(Mat 26.69,70; Mak 14.66-68; Luk 22.55-57)
15Saimọn Pita na jẹ́ ọḅụduaḅọ Jizọs duarị. Mịị isi ọḅụduaḅọ ma opu igwagwaḅọ ma nimim gosi o Jizọs dua mú opu igwagwaḅọ ma ẹpẹlẹ́ bie sọm, 16kụ́ma Pita nụ́ngọbie ḅụ́pọ́ ma angaá fịnị kurum. Isi ọḅụduaḅọ ma opu igwagwaḅọ ma nimiḅọ pịghịma ḅom sị ẹ́gẹ́rẹ́kọọ ọ́rụ́ḅọ tụwọ ma pịrị sị Pita daa warị ma bie suu.
17Fịrị ḅụ fịnị ọ́rụ́ḅọ tụwọ ma, ḅụ́pọ́ ma ḅụ Pita gbilam, <<Ịrị ori ọḅụduaapụ ma ḅụ gbẹrẹḅọgha?>> Pita pagharam, <<Irịgha.>>
18Oḅuu imi, anịgo fịrịnwangịapụ ma na kúrúapụ ma anyị mgbọ́lụ fịnị tọ́nọm anị ikelekelema sị fịnị ma timiarị, Pita sọ nnị na sẹ sị fịnị ma timiarị.
Opu Igwagwaḅọ Ma Nyẹ Pa Jizọs Gbilam
(Mat 26.59-66; Mak 14.55-64; Luk 22.66-71)
19Anịsáa ma ḅụ, opu igwagwaḅọ ma Jizọs gbilam, ori ọḅụduaapụ na ori dienyẹ gbolomanyẹ.
20Jizọs pagharam, <<A bịpị ḅọghugha ḅara pa ẹ́gẹ́rẹ́kọọ kị́nị́mamgba pịrịmam, sámámgba a nyẹ́diearị Juuapụ kobiri yọ ma ḅụ anịgha Tamuoopuwarị ma bie Juuapụ gonyẹ́ gonyẹ́ kobirikobiri angaá. A ḅọghu angaá ḅẹnyẹ ḅẹnyẹ dughogha. 21I tẹ́ go i gbilaarị? Biri pa ị naapụ ma gbíla. Nnị nimim a dughonyẹ.>> 22Jizọs mịma dugho sáá, kúrúapụ ma ḅụ gbẹ́rẹ́ḅọ o tórúku ọ ḅụrọm, sị o gbíla, <<Mịị anịị ị́ igwagwaḅọ ma págháraarị ḅara?>>
23Jizọs pagharam, <<A ḅọ́rọ́ iruonyẹ dugho dugho, gbọ i tọ́rụ́ sua ḅẹ́ mịma karakáragha. Kụ́ma ḅọ́rọ́ ḅẹẹ a karakárányẹ ma dughom ị tegó i ḅụ́rọ́?>> 24Anịsáa, Anas warị ọ fịrịma Kayafas opu igwagwaḅọ ma dámámuu ịkóli na ọ ḅara na.
Pita Mmẹẹ́ Na Tẹ́rẹ́ Kárámá Sáá Pa Jizọs Pighim
(Mat 26.71-75; Mak 14.69-72; Luk 22.58-62)
25Saimọn Pita sẹ sị fịnị ma timiarị sáá, nnị ọ gbilam, <<Ịrị ori ọḅụduaapụ ma ḅụ gbẹrẹḅọgha?>>
O pighim, dughoarị ḅẹẹ, <<Irị nna ḅụ gbẹrẹḅọgha.>> 26Opu igwagwaḅọ ma gbẹ́rẹ́ ómóniḅọ, Pita biri pẹ́lẹ́si ḅọ ma mị́naḅọ warị dugho kụ́rọ́ma ḅẹẹ, <<A kọkọ ịrị na ori na arịị olivu dua ma ḅụ.>> 27Pita sima pighim, anị gbẹ́rẹ́kirikiri owi ọbịọ saghị pághám.
Jizọs Paileti Tórúku
(Mat 27.1,2,11-14; Mak 15.1-5; Luk 23.1-5)
28Dedefụfụ Juuapụ ma warị Kayafas wárị Jizọs ḅọ́rọ́ma Rom ḅẹrẹtọḅọ ma áláwarị muu. Juuapụ ma áláwarị ma sọgha nnị nna pilemabịgha ḅara sị ine Sáḅáḅọ́rọ́ fị́nyẹ ma fị bẹ ḅara. 29Paileti warị págháḅo nnị gbíla ḅẹẹ, <<Ọ ḅẹẹ mị owitụ́wọ ma tẹ́ mịẹ irima?>>
30Nnị pagharam, <<Ori ḅọ́rọ́ opu ólóghó kóróḅogha wamịnị ọ saghị ị ḅarabie suabịgha.>>
31Paileti warị dugho nnị pịrị, <<Ọmịnị ori akị sị ọmịna ologho pa ọ sịbị ḅẹ́rẹ́kọọ.>>
Kụ́ma Juu sịbịdaapụ ma pagharam, <<Wamịnị wa kụ́rọ nyanagha tumḅọ ḅá ḅụ.>> 32Mịma kiriakịm Jizọs kọọ ẹ́gẹ́rẹ́ ma karakárányẹ sọ bẹ ḅara diearịnyẹ ọ kọ bẹ fịị ḅara.
33Paileti warị pịghịma áláwarị ma bie sọ sị Jizọs gbíla, <<Ịrị anịị Juuapụ ma ámányánáḅọ?>>
34Jizọs o gbilam, <<Anịị ị kóróma ḅara, anịgha kị́nị́ ị gbolomanyẹ dugho ị pịrị?>>
35Paileti pagharam, <<Ị sị ḅẹ́ ịrị Juuḅọ? Ị́yẹ́ a túminị́ na ị́yẹ́ igwagwaalaapụ anịị ị saghị i ḅarabie suaapụ. Ọ tẹ́ nyẹ ị mịẹnyẹ?>> 36Jizọs pagharam, <<Ị́yẹ́ ásẹ́mẹ́kiri mị tuminikiri nganyẹgha. Ḅọ́rọ́ mị tuminikiri nganyẹ, ị́yẹ́ fịrịnwangịapụ Juuapụ ma na owusọbẹm sị nkiki nnị ikubịgha ḅara, Kụ́ma ị́yẹ́ ásẹ́mẹ́kiri mịị tuminikiri ngá nyẹ́gha.>>
37Paileti warị ọ gbíla, <<Anịsáa, Ịrị ámányánáḅọ?>>
Jizọs pagharam, <<Ị karakáram dughoarị ḅẹ́ irị ámányánáḅọ anịgo nnị i yiim, anịgo a tuminikiri ma ḅom sị a karakáráma dugho págháma. Karakáráma ḅụ sẹapụ gonyẹ́ gonyẹ́ i pughu pughum.>>
38Paileti gbilam, <<Karakáráma tẹ́ nyẹ?>> Ọ mịma dugho fama sáá ọ sima pághá si muu Juuapụ ma ḅẹm, <<A gbẹ́rẹ́nyẹ sọ arịgha a go fịị ḅẹrẹ pẹlẹ bẹnyẹ ọ sịbị.
Nnị Fịị Bẹ́rẹ́pẹlẹm Jizọs Sịbị
(Mat 27.15-31; Mak 15.6-20; Luk 23.13-25)
39<<Ọmịna nyẹ́ mịẹmịẹ ḅara ḅụ sámámgba Sáḅáḅọ́rọ́ Álálị ma bie a gbẹ́rẹ́ ikólinaḅọ wárịsósom o sóo. O dọghụ ḅẹ́ a Juuapụ ámányánáḅọ ma wáriso?>>
40Nnị wárii ilúghú dugho, <<Enrrh enrrh, origha! Barabas pa wa pịrị!>> Barabas ori ma gbẹ́rẹ́ḅọ ḅẹrẹ pa ama dọghụapụ ma ḅụ.
Currently Selected:
Jọn 18: IBY
Highlight
Share
Copy
Want to have your highlights saved across all your devices? Sign up or sign in
©2024 Luke Initiative for Scripture Translation
