Luk 7

Jesu Mu Ọguọmwadia Ọkaokuo E Rom Egbe Rran

(Matiu 8:5-13)

1Jesu ghi ta ẹmwẹ na ma avbe emwa fo nẹ, ọ na gha rrie Kapaniọn. 2Ọkaokuo e Rom ọkpa ne ọ rre evba keghi mwẹ ọguọmwadia ọkpa ne ọ mobọ ho ẹmwẹ ọnrẹn, okpia na keghi khuọnmwi, te ọ ghi ra wu. 3Ugbẹn vbe ọkaokuo na ghi họn ẹmwẹ Jesu, ọ na gie eniwanrẹn avbe Ju bu ẹre ne iran ya rinmwian ẹn ne ọ do mu ọguọmwadia irẹn egbe rran. 4Iran keghi bu Jesu gha dee, iran rinmwian ẹn ẹsẹse wẹẹ, “Ọmwa ne ọ kere ne u ru ẹre ẹse ọre ọmwa na wa khin. 5Ọ ho ẹmwẹ emwa ima ẹsẹse, rẹn wa ye ekhọe obọ re bọ Ọgua ediọn ọkpa ne ima.”

6Jesu na lele iran gha khian. Ugbẹn vbe ọ ghi wa sikẹ owa ẹre nẹ, ọkaokuo ni keghi gie avbe ọse ya tama rẹn wẹẹ, “Dọmọ o, ghẹ zẹdẹ kpokpo egbe ne u gha die owa mwẹ rhunmwuda, mẹ ma sẹ ne ọ gha tie ruẹ sẹ owa. 7I ma vbe ro ighe I sẹe nọ gha tobọ mwẹ bu ruẹ gha dee. Guan ke odọ rre, egbe gha rran ọguọmwadia mwẹ. 8Rhunmwuda, mẹ tobọ mwẹ, ototọ asẹ emwa ni sẹ mwẹ ọre I ye. Mẹ vbe mwẹ ivbiyokuo vbe ototọ mwẹ. I gha khama ọna wẹ, ‘gha khian’ ọ ghi gele gha khian, I ghi vbe khama ọvbehe wẹ, ‘gha dee,’ ọ ghi gele vbe gha dee. Erriọ ọre I vbe tama ọviẹn mwẹ wẹ, ‘Ru emwi na,’ ọ ghi gele ruẹe.”

9Jesu ghi họn ẹmwẹ na, ọ keghi yan ẹre unuan, ọ keghi mu aro da emwa ni bii lele ẹe dee vbe odieke, ọ wẹẹ, “I ma he miẹn iyayi vbe nian vbe ehe rhọkpa, uhin ya sẹ egbe otọ Izrẹl ne arengbe.” 10Iran ne a gie ẹre uhunmwu keghi dọlegbe gha rrie owa ọkaokuo ni, iran ghi do vba egbe rran ọguọmwadia ẹre nẹ.

Jesu Huẹn Ovbi Ẹgbẹ Kpaegbe Vbe Orinmwi

11Ọ ma ghi kpẹe vbe iyeke avbe emwi na, Jesu kegha rrie ẹvbo ọkpa ne a tie ẹre Nain, emwa ni bun keghi vbe deba avbe erhuanegbe ẹre lele ẹe. 12Ugbẹn vbe ọ ghi wa sẹ onurho ẹvbo ni, emwa ni mu orinmwi khian kegha gbe usun ladian. Okpia ne ọ wu na kegha re ukpọmọkpa ne okhuo ni wa mwẹ, ẹgbẹ vbe nọ, iran ni bun keghi vẹ lele ẹe ke ore ẹvbo gha dee. 13Ugbẹn vbe Nọyaẹnmwa ghi miẹn okhuo na, ohan rẹn to ẹe ẹsẹse, ọ na tama rẹn wẹẹ, “Ghẹ ghi viẹ.” 14Rẹn keghi khian sikẹ odaro, ọ na ye obọ kan ẹkpẹti orinmwi ni, iran ni mu ẹn keghi mudia, Jesu keghi kha wẹẹ, “Ọmọ okpia, I tama ruẹn, kpaegbe!” 15Ọmwa ne ọ te wu ni keghi kpaegbe tota, ọ na gha guan. Jesu keghi dọlegbe rhie ẹre ne iye ẹe.

16Ohan keghi mu emwa hia, iran keghi rhie uyi ne Osanobua wẹẹ, “Akhasẹ nọkhua zọ ladian vbe uwu ima,” kevbe wẹ, “Osanobua rre do miẹn emwa rẹn fan!”

17Ẹmwẹ Jesu keghi titi gba Judia kevbe avbe agbọn ẹvbo ni lẹga ẹre hia.

Emwa Ne Jọn Ne Ọsamẹ Gie Ẹre Uhunmwu Rre

(Matiu 11:2-19)

18Avbe erhuanegbe Jọn keghi ya na iyẹn emwi na hia ma rẹn. Jọn keghi tie eva vbọ rrie egbe. 19Ọ keghi gie iran bu Nọyaẹnmwa ne iran ya nọ rẹn wẹẹ, “Wẹ ọrọre ọmwa ne Jọn khare ighe ọ dee ra, ra ne ima gha khẹ ọmwa ọvbehe?”

20Iran ghi sẹ ehe ne Jesu ye, iran wẹẹ, “Jọn ne Ọsamẹ ọre ọ gie ima ne a do nọ ruẹn wẹ, ‘Wẹ ọrọre ọmwa ne irẹn khare ighẹ ọ dee ra, ra ne a gha khẹ ọmwa ọvbehe?’ ”

21Vbe ẹghẹ nii zẹẹ, Jesu keghi sinmwi emwa ni khuọnmwi, ni huehue, kevbe ni mwẹ orhiọn dan, ọ keghi vbe rhan avbe arhuaro ni bun aro. 22Rẹn keghi wanniẹn tama emwa ne Jọn gie wẹẹ, “Wa ya tama e Jọn emwi ne uwa họn ẹn kevbe ne aro uwa sẹe, avbe arhuaro bẹghe odẹ, avbe uke khiaẹn, a khue avbe ọkhọnmwoti huan, ayin ehọ họn ẹmwẹ, a huẹn ni wu kpaegbe vbe orinmwi, a kpe orhu Iyẹn Ne ọ Maa ma avbe ivbiogue. 23U miẹn uwa ne ọmwa ne ọ ma gbe ọkhọnmwẹ ọkhọnmwẹ vbe gbe mwẹ ye!”

24Iran ne Jọn gie ẹre uhunmwu rre ghi kpao nẹ, Jesu kegha ta ẹmwẹ e Jọn ma emwa ni gbe ẹbu ye evba, wẹẹ, “Ẹghẹ ne uwa na bu e Jọn gha rrie uwu ato, de emwi ne uwa te rhie aro yi ighe uwa gha miẹn yi? Ebe irunmwu ne ẹhoho bi yo bi rre? 25De emwi ne uwa ladian ya ghee? Ọmwa ne ọ viọ ukpọn ni mose ye egbe? Sokpan emwa ni mu egbe vberriọ, ni vbe zẹ ọwọbu, ẹguae a na miẹn iran. 26Wa tama mwẹ emwi ne uwa te rhie aro yi ighe uwa gha miẹn? Akhasẹ? Ẹmwata nọ, ne I tama uwa ighe emwi ne uwa miẹn kpọlọ sẹ akhasẹ. 27Rhunmwuda e Jọn ọrọre ọmwa ne ebe ta ẹmwẹ ọnrẹn wẹẹ, ‘Osanobua khare wẹẹ, Ghe odibo mwẹ, I gha gie ẹre uhunmwu ke aro nuẹn ne ọ ya gbẹn odẹ ye otọ khẹ ruẹ.’ ” 28Jesu keghi rhie tẹe wẹẹ, “E Jọn kpọlọ sẹ emwa hia ne a he biẹ, sokpan ne ọ kanmwa sẹ vbe Arriọba Osanobua kpọlọ sẹ ọre.”

29Avbe emwa hia kevbe iran ni koko igho uhunmwu keghi danmwehọ ẹre. Iran na ọre ọ ru emwi ẹmwata ne Osanobua khama iran, e Jọn keghi vbe samẹ ne iran. 30Sokpan avbe Farisi kevbe iran ni ma emwa Uhi ma ye obọ ye emwamwa ne Osanobua ru vbekpa iran, iran ma gie Jọn samẹ ne iran.

31“De emwi ne I gha ye orre na gie nian? De emwi ne iran khọe? 32Iran ye vbe ibieka ni tota vbe ẹki, otu ọkpa ghi van mu enọkpa wẹẹ, ‘Ma kpe ema irhiọha ne uwa, wa ma ku! Ma so ihuan orinmwi, wa ma viẹ!’ 33E Jọn ne Ọsamẹ rre, ọ na gha yo aguẹ, ọ ma vbe da ayọn, wa na wẹ, ‘Te ọ mwẹmwẹ.’ 34Ovbi Ọmwa rre, ọ na gha re, ọ na gha da, wa ghi ra vbe kha, wa wẹẹ, ‘U ghe ẹre ighe ọmwa ẹko kevbe ọdayọn, rẹn vbe iran ni koko igho uhunmwu kevbe avbe ẹwobi emwa ọre ọ gba mu obọ!’ 35Vbene ọ rhirhi a gha ye hẹ, iran hia ni rhan obọ miẹn ẹwaẹn Osanobua rhie ma ighe ẹmwata nọ.”

Jesu Vbe Owa Saimọn Ne Farisi

36Farisi ọkpa keghi tie Jesu ne ọ do gu irẹn rri evbare. Jesu sẹ owa ẹre, ọ keghi tota ne ọ rri evbare. 37Okhuo ọkpa ne ọ yin uyinmwẹ iruẹn keghi rre ẹvbo nii. Ọ ghi họn ighe Jesu rre owa Farisi nii rri evbare, ọ na mu ovbi ẹluba ori nọ winhin gha dee. 38Ọ mudia ye ọkpẹn owẹ Jesu vbe odieke ẹre, ọ kegha viẹ, ọ na gha kharha ameve ye ọre owẹ, ọ ye unu soso ẹre owẹ, ọ keghi tue ori ne ọ winhin nii ye ọre owẹ. 39Ugbẹn vbe Farisi ne ọ tie Jesu sẹ owa nii miẹn emwi na, ọ kegha ye otọ ẹko kha wẹẹ, “Akpawẹ akhasẹ ọre okpia na gele khin, ọ gha rẹn agbọn iruẹn ne okhuo na ye!”

40Jesu keghi tama Saimọn wẹẹ, “Saimọn I mwẹ emwi ọkpa ne I ho ne I tama ruẹn.”

Rẹn wanniẹn tama rẹn wẹẹ, “Gha guan ọmamwaemwi, ta ẹe ma mwẹ.”

41Jesu keghi tama rẹn wẹẹ, “Ikpia eva ni rri okpia ọkpa ne ọ rhie igho ne emwa mọmọ osa kegha rrọọ, ọkpa rri ọre igho esiliva iyisẹn yan uri, nọkpa keghi rri ọre igho esiliva ekigbe sẹ iyeha. 42A ma miẹn ne ọ sẹtin ha osa vbe uwu iran eva na, rẹn keghi rhunmwuda ọnii ya ma iran. De ne ọ gha ho ẹmwẹ okpia ni sẹ vbe iran eva?”

43Saimọn wanniẹn wẹ, “Mẹ yayi ighe ne a ya ne ọ kpọlọ sẹ ma nọ.” Jesu tama rẹn wẹẹ, “Ẹmwata ewanniẹn ruẹn khin.” 44Rẹn keghi mu aro da okhuo nii, ọ tama Saimọn wẹẹ, “U ma miẹn okhuo na? Vbe I la owa ruẹ, u ma sa amẹ mẹ ya kpe owẹ, sokpan rẹn ye ameve ẹre kpe mwẹ owẹ, ọ keghi ya eto ne uhunmwu ẹnrẹn khiẹn rẹn uan. 45U ma ye isoso unu gbe ọbokhian mẹ, sokpan ne I ya sẹ emwa usin, ọ ma he da obọ unu ne ọ ya soso mwẹ owẹ yi. 46U ma kpe ehe ori ne uhunmwu mwẹ, sokpan ori ne ọ winhin ọre ọ ya khuẹ mwẹ owẹ. 47Ne I tama ruẹn nian, a ho ẹmwẹ ọmwa nọkhua ne ọ rhie ma na, gie aro dae ighe a ye orukhọ ẹre ni bun bọe nẹ. Ọmwa ne a ya nekherhe bọ aho ẹmwẹ ọmwa kherhe ọre ọ vbe rhie ma.”

48Jesu keghi tama okhuo ni wẹẹ, “A ye orukhọ ruẹ ni bun bọọ.” 49Emwa ọvbehe ni tota vbe eteburu kegha ye ekhọe tae wẹẹ, “Vbe ọ na ke rre ighẹ ne ọ ye orukhọ bọ ọmwa na?” 50Sokpan Jesu tama okhuo ni wẹẹ, “Iyayi ruẹ miẹn ruẹn fan nẹ, gha khian vbe ọfumwegbe.”

Currently Selected:

Luk 7: EDO96

Highlight

Copy