Levitikọs 9

Errọn Zọ Ese

1Ẹdẹ ghi gba vbe a ru emwi ọghe a ye ọmwa ma ohẹn fo nẹ, e Mosis keghi tie Errọn kevbe ivbi ẹre ke iran kevbe avbe olotu Izrẹl. 2Ọ keghi tama Errọn wẹẹ, “Mu ovbi ẹkhuia ẹmila kevbe ogho ne ẹ i mwẹ okan ne uwa ya iran zẹ ọhẹ gie Nọyaẹnmwa, ẹkhuia ne ọ rrọọ, ọghe izọese orukhọ, ke ogho ne ọ rrọọ, ọ ghe izọese na giẹn uan. 3U ghi vbe tama ivbi Izrẹl ne iran mu ovbukhọ ya zọ ese orukhọ, ovbi ẹkhuia ne ọ rre ukpo ọkpa kevbe ogho ne ọ rre ukpo ọkpa, ne ẹ i mwẹ okan ne ese na giẹn uan. 4Ẹkhuia ọkpa kevbe ogho ọkpa, ọghe izọhẹ isara. Iran ghi ya iran zọ ese ghe Nọyaẹnmwa ba emwi izọese ọka ne a ya ofigbọn gbe. Tama iran ne iran ru ọna rhunmwuda e Nọyaẹnmwa gha rhie egbe maa iran ẹrẹna.”

5Iran keghi viọ avbe emwi hia ne Mosis tama iran gha die odaro Owa Ukpọn Ile, emwa nii hia keghi si koko ye evba ne iran ga e Nọyaẹnmwa. 6E Mosis keghi kha wẹẹ, “Te e Nọyaẹnmwa tama uwa ne uwa ru avbe emwi na hia ne uwa sẹtin bẹghe awanwan uyi irẹn.” 7Rẹn ke ghi tama Errọn wẹẹ, “Gha rrie aka ne u ya ru izẹọhẹ ese orukhọ ke ese na giẹn uan, ne ọ kpe orukhọ ọghe uwa kevbe ọghe emwa nii kua. U ghi ru izẹọhẹ ne ọ gha kpe orukhọ emwa kua zẹ vbene Nọyaẹnmwa khare.”

8Errọn keghi gha rrie aka, ọ na ya gbe ovbi ẹkhuia ẹmila nii ya zọ ese orukhọ ọghọe. 9Ivbi ẹre keghi mu esagiẹn ọnrẹn bu ẹre gha dee, ọ na fi ikpinhianbọ irẹn yọ, ọ na ya vbọ ye ukpẹ aka ni rre dọmwadẹ okhiẹ aka, ọ na mu nọ ghi dekẹe vbọ hihiẹ ye ẹzi aka. 10Ọ ke ghi giẹn ẹvbi ẹre, ihẹnmwẹ ọnrẹn, kevbe ititi ẹvbi ne ọ rre udu ẹre, zẹ vbe ne Nọyaẹnmwa tama e Mosis. 11Sokpan, ọ keghi giẹn emiowo nọ rrọọ kevbe ohian rẹn vbe a gha ladian ore agọ rre nẹ.

12Ọ keghi gbe aranmwẹ ese na giẹn uan ọghe egbe ẹre. Ivbi ẹre ke mu esagiẹn ọnrẹn gie ẹe, ọ keghi rhurhẹ ọe ku igienenẹ ọghe aka. 13Iran keghi mu uhunmwu ẹnrẹn kevbe ikele emiowo aranmwẹ nii nọ dekẹe, ọ keghi giẹn ehia vbe aka. 14Ọ keghi do kpe avbe ibiẹ ọre kevbe owẹ ọre, ọ na giẹn ọnrẹn uan vbe aka yan ese na giẹn uan ni kẹre.

15Vbe iyeke ọnii, ọ keghi viọ izọhẹ emwa nii gha dee. Ọ keghi mu ẹwe ne a ra ya zọ ese ye orukhọ emwa nii, ọ gbe ẹe, ọ keghi ya ẹe ru izọhẹ zẹ vbene ọ vbe ru izọhẹ orukhọ ọghọe. 16Ọ na vbe mu aranmwẹ ọghe ese na giẹn uan rre, ọ na vbe ya ẹe zọ ese zẹ vbe odẹ na ru ẹe la. 17Ọ keghi mu izọhẹ ọka rre, ọ na zẹ uguobọ irhuarhua okpa, ọ na giẹn ọnrẹn uan vbe aka (a keghi vbe ru ọna ba ese na giẹn uan ne a zọ ẹdẹgbegbe).

18Ọ ke ghi gbe ẹkhuia ẹmila nii kevbe ogho zẹ vbe izọhẹ isara ọghe emwa nii. Ivbi ẹre keghi mu esagiẹn ọnrẹn gie ẹe, ọ na rhurhẹ ọe ye igienenẹ ọghe aka. 19Errọn keghi mu ehe ne ẹvbi ẹkhuia nii ye kevbe ogho nii, 20yan ewẹn ọghe aranmwẹ nii, ọ na viọ ehia gha rrie aka, ọ keghi giẹn ẹvbi ẹre nii vbe aka. 21Ọ keghi viọ ewẹn ọnrẹn kevbe owẹ obọ erha ọmwa rẹn zẹ vbe oko kpataki ne a rhie gie Nọyaẹnmwa vbe kpa avbe ohẹn zẹ vbene Mosis khare.

22Ugbẹn vbe Errọn ghi zọ ese na hia fo nẹ, ọ keghi tọn obọ ẹre mu yan emwa nii, ọ na fiangbe iran, ọ ke ghi tuorre. 23E Mosis kevbe Errọn keghi la uwu Owa Ukpọn Ile, iran ghi ladian, iran keghi fiangbe emwa nii, uyi e Nọyaẹnmwa keghi rhie egbe ma emwa nii hia. 24Vbe udomwurri, e Nọyaẹnmwa keghi gie erhẹn rre, ọ keghi giẹn emwi izọ ese nii hia ke ẹe kevbe efun emwi nii rre aka. Ugbẹn vbe emwa nii ghi miẹn ọẹn, iran keghi datu, iran keghi munọ ẹko rhu otọ.

Currently Selected:

Levitikọs 9: EDO96

Highlight

Copy