Levitikọs 4

Ese Ye Orukhọ Ne Ẹ I Re Ẹmwọmwa

1E Nọyaẹnmwa keghi tama e Mosis wẹẹ, 2“Ne ọ tama ivbi Izrẹl wẹ ọmwaikọmwa gha rukhọ, ọ na rra uhi ẹ Nọyaẹnmwa, vbene ẹ i na re ẹmwẹ ọnrẹn, emwi ne ọ gha ru ena khin. 3Adeghẹ Ogie Ohẹn ọre ọ ru orukhọ ne ọ na mu abe gie emwa nii, ọ ghi mu ẹkhuia ẹmila ne ẹ i mwẹ okan ya zọ ese ghe Nọyaẹnmwa ye orukhọ ẹre. 4Ọ ghi mu ẹkhuia ẹmila nii gha die onurho Owa Ukpọn, ọ ghi rhie obọ yan ẹre uhunmwu, ne ọ gbe ẹe ye evba vbe odaro Nọyaẹnmwa. 5Iyeke ọnii Ogie Ohẹn ghi rhie vbe esagiẹn ẹkhuia nii gha rrie uwu Owa Ukpọn.

6“Ọ ghi fi ikpinhianbọ ẹre yọ igba ihinrọn, ọ ghi sanmwẹ ọẹn ye odaro ukpọn onurho ne ọ huansẹ nii. 7Iyeke ọnii ọ ghi rhie eso vbe esagiẹn ye ehe ne ọ zẹ ukpẹ ladian vbe aka ne a na giẹn eturari vbe uwu Owa Ukpọn e Nọyaẹnmwa. Ọ ghi hihiẹ esagiẹn ne ọ dekẹe ye ẹzi aka ne a na giẹn emwi izọ ese vbe onurho Owa Ukpọn nii. 8Ọ ghi viọ ẹvbi ni rre ẹkhuia na hia, ẹvbi ni rre ẹkpokhurhu ẹre, 9ni rre ihẹnmwẹ ọnrẹn kevbe nene ihẹnmwẹ ọnrẹn, deba ehe ne ọ maa sẹ vbe ni rre udu ẹre.

10“Erriọ vbe nọ, zẹ vbene a ru ẹkhuia ne a gbe ya sisara, ohẹn ghi mu ẹvbi na, ọ ghi ya giẹn ọnrẹn vbe aka ne a na giẹn ihaoko ne a giuan. 11Sokpan, Ọ ghi mu ohian ẹnrẹn, efun ni rrọ hia, uhunmwu ẹnrẹn, owẹ ọre, ẹkpokhurhu ẹre kevbe ibiẹ ọre. 12U ghi mu ehia ladian gha rrie ehe ne awua i ye vbe ore, vbe ehe ne a na mu emuẹn ọnrẹn kua, ne u ya giẹn ọnrẹn uan vbe evba vbe erhẹn erhan.

13“Ọ gha re ivbi Izrẹl hia ọre ọ ru orukhọ, ighẹ te iran rra ọkpa vbe uwu uhi e Nọyaẹnmwa vbene ẹ i na re ẹmwẹ iran. 14A gha wa rẹn orukhọ nii ọwarọkpa, emwa nii ghi mu ovbi ẹkhuia ẹmila rre zẹ vbe emwi izọ ese ye orukhọ. Iran ghi mu ẹẹn gha die Owa Ukpọn Ile Nọyaẹnmwa. 15Avbe ekaolotu ghi viọ obọ yan ẹre uhunmwu, a ghi gbe ẹe vbe evba. 16Ogie Ohẹn ghi rhie vbe esagiẹn ẹkhuia nii gha rrie Owa Ukpọn. 17Ọ ghi fi ikpinhianbọ ẹre yọ, ọ ghi sanmwẹ ọẹn ye odaro ukpọn onurho igba ihinrọn. 18Ọ ghi rhie vbe esagiẹn ọnrẹn ye ehe ne aka eturari ye vbe uwu Owa Ukpọn, ọ ghi hihiẹ ni dekẹe ye ẹzi aka ne a na giẹn ese, ne ọ rre onurho owa ukpọn. 19Ọ ghi viọ efun ọnrẹn hia, ọ ghi giẹn ọnrẹn vbe aka. 20Erriọ ọre ọ gha vbe ru ẹkhuia na, zẹ vbene ọ ru ẹkhuia ne a ya zọ ese ye orukhọ, odẹ vberriọ ọre ohẹn gha ya zọ ese ye orukhọ avbe emwa nii, a ghi yabọ iran. 21Ọ ghi mu ẹkhuia ẹmila nii hin ore agọ rre, ọ ghi ya giẹn ọnrẹn, zẹ vbene a giẹn ne irẹn ya zọ ese ye orukhọ obọ irẹn. Ese ne a ya rhie orukhọ hin uwu ẹbu emwa rre ọre nọ.

22“Ọ gha re enogie ẹre ọ rukhọ, ighẹ ọ rra uhi e Nọyaẹnmwa vbe ne ẹ i na re ẹmwẹ ọnrẹn. 23Ọwarọkpa vbe a ghẹ ghi rhie orukhọ nii ma rẹn nẹ, ọ ghi ya mu ovbukhọ ne ẹ i mwẹ okan, rre do ya zọ ese. 24Ọ ghi rhie obọ yan ẹre uhunmwu, ọ ghi gbe ẹe vbe odẹ okuọ ọghe aka ne a na gbe avbe aranmwẹ ne a ya zọ ese na giẹn uan. Ese ne a ya kpe orukhọ kua ọre ọna khin. 25Ohẹn ghi fi ikpinhianbọ ẹre ye uwu esagiẹn aranmwẹ na, ọ ghi rhie ẹre ye ukpẹ ni rre okhiẹ aka nii, ọ ghi hihiẹ ni dekẹe ye ẹzi aka nii. 26Ọ ghi giẹn efun ẹnrẹn hia vbe aka nii, zẹ vbe ne ọ vbe ru aranmwẹ ne a gbe ya si isara, odẹ vberriọ, ohẹn gha zọ ese ye orukhọ ne enogie ru, a ghi vbe ya bọe.

27“A deghẹ ọkpa vbe uwu avbe emwa kẹkan ọre ọ ru orukhọ, ọ na vbe rra uhi e Nọyaẹnmwa vbe ne ẹ i na re ẹmwẹ ọnrẹn. 28Ọwarọkpa vbe a ghẹ ghi wa rhie orukhọ nii ma rẹn nẹ, ọ ghi mu ẹwe amwẹ ne ẹ i mwẹ okan rre do ya zọ ese. 29Ọ ghi rhie obọ yan ẹre uhunmwu, ọ ghi gbe ẹe vbe odẹ okuọ ọghe aka ne a na gbele aranmwẹ ne a ya zọ ese na giẹn uan. 30Ohẹn fi ikpinhianbọ ẹre ye esagiẹn aranmwẹ nii, ọ ghi ya ẹe woo ukpẹ aka ni rre okhiẹ aka nii, ọ ghi hihiẹ nii dekẹe kua ye ẹzi aka. 31Iyeke ọnii, ọ ghi viọ ẹvbi nii rrọ hia hin rre, zẹ vbene a vbe viọ ẹvbi hin aranmwẹ ne a gbe ya sisara, ne u vbe giẹn rẹn uan vbe aka, zẹ vbe emwi ne ọ winhin ne ọ yẹ e Nọyaẹnmwa. Odẹ vberriọ ọre ohẹn gha na zọ ese ye orukhọ ọmwa nii, a ghi vbe ya bọe.

32“A deghẹ ọmwa mu ohuan rre do ya zọ ese ye orukhọ, a ghi gie ẹe gha re amwẹ ne ẹ i mwẹ okan. 33Ọ ghi rhie obọ yan ẹre uhunmwu ne ọ gbe ẹe vbe odẹ okuọ ọghe aka ne a na gbele aranmwẹ ne a ya zọ ese ne a giẹn uan. 34Ohẹn ghi fi ikpinhianbọ ye esagiẹn aranmwẹ nii, ọ ghi ya ẹe woo ukpẹ aka ni rre okhiẹ aka nii, ọ ghi vbe rhurhẹ ne ọ ghi dekẹe vbo ye ẹzi aka. 35Iyeke ọnii, ọ ghi viọ ẹvbi ẹre hia ladian zẹ vbe ne a vbe viọ ẹvbi hin ohuan ne a gbe ya sisara, a ghi giẹn ọnrẹn vbe aka ba emwi ihaoko evbare ne a viọ gie Nọyaẹnmwa. Odẹ vberriọ ọre ohẹn gha na zọ ese ye orukhọ ọmwa nii, a ghi vbe ya bọe.

Currently Selected:

Levitikọs 4: EDO96

Highlight

Copy