Levitikọs 11

Aranmwẹ Ne Ọ Kere Ne A Gha Re

(Diuteronomi 14:3-21)

1E Nọyaẹnmwa keghi viọ ilele na ne Mosis kevbe Errọn, 2Ne iran ta ẹe ma ivbi Izrẹl: 3“Wa sẹtin rri avbe aranmwẹ otọ hia, ne ihiẹn ọnrẹn va ada kevbe ne ọ vbe hu evbare rre lue vbe unu. 4-6Sokpan wa ghẹ rrie ekẹtẹkẹtẹ, osorhue ra ọfiontọ, wa ghi ka enena ye emwi awua, iran hu emwi re lue vbe unu sokpan iran i mwẹ ihiẹn ne ọ va ada. 7Wa ghẹ rri esiebo, wa ghi ka ẹe ye emwi awua, ihiẹn iran va ada sokpan iran i hu emwi re lue vbe unu. 8Wa ghẹ kue ya obọ kan ikun iran, emwi awua iran khin.

9“Wa sẹtin rri ehẹnkehẹn ne ọ mwẹ ifuẹn akhuẹ kevbe ne ọ bolo ikpakpa. 10Sokpan emwikemwi ne ọ rre uwu amẹ, ne ẹ i mwẹ ifuẹn akhuẹ, ẹ i bolo ikpakpa, wa ghẹ rri ọe. 11Wa ka iran ye awua, wa ghẹ rrie iran amawẹ ne uwa ya obọ kan ikun iran, 12wa ghẹ rrie emwi ni rre uwu amẹ, ne ẹ i mwẹ ifuẹn akhuẹ ra ikpakpa ne ọ bolo. 13-19Wa ghẹ rri avbe ahianmwẹ ne a ra sunu yi na: ahua, ekperọkhuẹ, ẹrekhue, ugu, egbu, ugomugo, ekpẹkpẹyẹ ọghe ẹzẹ, oghohọn ẹzẹ, olọkọmwọrhu, epianpian, ukorobozo, ọwọ ra ẹguẹn.

20“Ivbi otutu ni ghi zẹ ifuẹn hiehie mwẹ awua. 21Sokpan a ma wẹ avbe ne ẹ i mwẹ owẹ ni mwẹ akhuẹn, ne ọ sẹtin san. 22Wa sẹtin rri irhiso, asẹlẹ ra atete. 23Sokpan avbe emwi negiẹrẹ hia ni mwẹ ifuẹn, ni vbe rẹnrẹn vbe otọ, a ghi ka ẹe ye ni mwẹ awua.

24-28“Ọmwaikọmwa ne ọ ya obọ kan ikun avbe aranmwẹ na hia, gha khian ne awua gue ya sẹ ota, ọmwaikọmwa ne ọ vbe mu ikun iran, ọ ghi họ ukpọn rẹn sokpan awua ye guẹe ya sẹ ota: aranmwẹ ni mwẹ ihiẹn hia. sokpan a ma wẹ te ihiẹn ọnrẹn va ada, ọ ghi vbe gha hu emwi rre lue vbe unu, deba aranmwẹ ni mwẹ owẹ enẹ ni vbe mwẹ ihiẹn ni mu.

29-30“Ukhan, ọfiontọ, ofẹn kevbe avbe osikpalọ, a ghi vbe ka iran ba ni mwẹ awua. 31Omwa ne ọ ya obọ kan iran gha mwẹ awua ọ te ya sẹ ota. 32Ikun iran gha vbe degbe emwikemwi, iran ghi vbe gha mwẹ awua. Te ọna wa sẹ egbe emwi hia, kevbe ne a ya erhan ru, ukpọn, ohian ẹkpo, emwi ne ọ khọn rẹn ne a gha ya ẹe ru. A ghi fi ẹe ye amẹ, sokpan ọ ghi gha re ne ọ mwẹ awua, ọ te ya sẹ ota. 33Ọ gha de yan akhe, emwi ni rrọọ hia mwẹ awua nẹ, a ghi guọghọe rua ighẹ akhe nii. 34Evbare ne a gha te re, sokpan amẹ ne ọ ke akhe ni rre na sanmwẹ yọ, ọ ghi khian ne awua ye, emwi ne a wọn nii rre akhe ni hia ghi khian nii mwẹ awua. 35Emwi ne ikun iran dekan khian ne awua ye, aroewu ne a ya obuẹ ma ke uvun ne a na ka emwi, a ghi guọghọe rua. 36Ẹzẹ ne ọ lẹ ke uhunmwu ẹnrẹn rre, kevbe uhae ne amẹ na rọn ke uwu otọ rre, ghi gha re ne ẹ i mwẹ awua, a gha rhe miẹn wẹ emwi ọvbehe hia ni de kan rẹn mwẹ awua.

37“A deghẹ eso dekun emwi okọ ne a ra ya kọ, emwi okọ nii i mwẹ awua, 38sokpan, deghẹ te a rhuarhua emwi okọ nii ye amẹ, a na miẹn wẹ ọkpa vbe uwu iran do dekan rẹn, emwi okọ nii khian ni mwẹ awua.

39“A deghẹ aranmwẹ ne a re, de wu, emwikemwi ni dekan rẹn khian ne awua ye ọ te ya sẹ ota. 40A deghẹ ọmwaikọmwa re vbe aranmwẹ nii, ọ ghi họ ukpọn rẹn, sokpan awua gha ye gha guẹe ọ te ya sẹ ota. Omwa ne ọ mu ikun ẹnrẹn ghi họ ukpọn rẹn sokpan awua ye gue ẹe ọ te ya sẹ ota.

41“Wa ghẹ re vbe aranmwẹ ne giẹrẹ ni rẹnrẹn vbe otọe nii. 42Ya sẹ egbe avbe aranmwẹ ni ya ẹko hiọrọ, ra ni ya owẹ enenẹ khian ra ni mwẹ owẹ ni bun. 43Wa ghẹ rri ena rhọkpa ya mu awua ye egbe. 44Mẹ ọre Nọyaẹnmwa Osanobua rua, wa ghi ya egbe khian ni huanrẹn rhunmwuda ọmwa ne ọ huanrẹn ọre ime khin. 45Mẹ ọrọre Nọyaẹnmwa ne ọ viọ uwa ke Igipt ladian, ne I mẹ sẹtin gha re Osanobua rua. Wa ghi gha re ne ọ huanrẹn, rhunmwuda ọmwa ne ọ huanrẹn mẹ khin.”

46Ọna ọrọre uhi ne ọ kan aranmwẹ, ahianmwẹ kevbe avbe emwi hia ni rre uwu amẹ kevbe ni khian vbe otọ. 47Wa ghẹ mianmian ne a gha rẹn alughaẹn ne ọ rre emwi ne awua ye kevbe nẹ i ye, aranmwẹ ne ọ kere ne a gha re kevbe ne ọ ma ke ne a gha re.

Currently Selected:

Levitikọs 11: EDO96

Highlight

Copy