Levitikọs 1
1
Ese Na Giẹn Ọnrẹn Ohoho
1E Nọyaẹnmwa keghi datie Mosis ke uwu Owa Ukpọn e Nọyaẹnmwa rre, ọ na viọ avbe uhi na ne ẹẹn wẹẹ, 2“Ne ivbi Izrẹl gha rhie obọ lele ẹe vbe iran a gha zọ ese. Omwa gha ra zọ ese aranmwẹ, ọ sẹtin gha re ọkpa vbe uwu ẹmila ẹre ra ohuan rẹn ra ewe ẹre. 3A deghẹ ẹmila obọ ẹre ọre ọmwa ra ya zọ ese ne a giẹn uan, ọ ghi mu ẹkhuia ẹmila ne ẹ i mwẹ okan rre. Ọ ghi mu ẹẹn gha die onurho Owa Ukpọn e Nọyaẹnmwa, ne Nọyaẹnmwa miẹn ehe na rhan obọ miẹn rẹn. 4Ọ ghi rhie obọ yan rẹn uhunmwu, a ghi rhan obọ miẹn rẹn zẹ vbe ese ne ọ gha viọ orukhọ ẹre gha rrie.
5“Ọ ghi gbe ẹkhuia ẹmila nii vbe evba, avbe ohẹn ghi mu esagiẹn ọnrẹn gie Nọyaẹnmwa, iran ghi vbe rhurhẹ esagiẹn ọnrẹn ye igienenẹ ọghe aka ne ọ rre onurho Owa Ukpọn nii. 6Iyeke ọnii, ọ ghi zẹ aranmwẹ nii ohian, ọ ghi vbe va ẹe. 7Avbe ohẹn ghi mwamwa erhan ye aka, iran ghi wan erhẹn yọ. 8Iran ghi viọ avbe emiowo ne a giagia ẹe nii ye erhẹn, ke ẹe kevbe uhunmwu ẹnrẹn kevbe ẹvbi ẹre. 9Okpia nii ghi kpe avbe ibiẹ ọre kevbe avbe owẹ ọre, ohẹn ne ọ ru ugamwẹ ghi giẹn ese nii hia vbe aka. Uwinhinmwẹ emwi imuohan evbare na yẹ Nọyaẹnmwa.
10“A deghẹ ohuan ra ẹwe ẹre ọre ọ ra ya zọ ese, ọ ghi gha re ọwẹ ne ẹ i mwẹ okan. 11Ọ ghi gbe ẹe vbe odẹ okuọ ọghe aka, ohẹn ghi rhurhẹ esagiẹn ọnrẹn ye igienenẹ ọghe aka. 12Ọmwa nii ghẹ ghi va ẹe nẹ, ohẹn ne ọ ru ugamwẹ ghi viọ ikele ẹre hia ke ẹe kevbe uhunmwu ẹnrẹn kevbe ẹvbi ẹre ye erhẹn. 13Ọmwa nii ghi kpe ibiẹ ọre kevbe owẹ ọre, ohẹn ghi do mu ese nii gie Nọyaẹnmwa, ọ ghi giẹn ehia fẹẹrẹ vbe uhunmwu aka, uwinhinmwẹ emwi ihaoko evbare na yẹ Nọyaẹnmwa.
14“A deghẹ ahianmwẹ ọre ọmwa ra ya zọ ese ne a giẹn uan, ọ ghi gie ẹe gha re idu ra elikhukhu. 15Ohẹn ghi mu ẹẹn gha die aka, ọ ghi khiẹn ọnrẹn urhu, ọ ghi giẹn uhunmwu ọnrẹn vbe aka. A ghi da esagiẹn ọnrẹn ladian ye egbe aka. 16Ọ ghi mu ẹkpurhu ọre hin rre ke ẹe kevbe emwi nii rrọ, ọ ghi filo ẹe kua ghe odẹ ahọ vbe obọ ne a kpolo emuẹn yi. 17Ọ ghi viọ ẹre ifuẹn, ọ ghi va ẹe ẹre egbe ua vbene ẹ i na yanghan ifuẹn ọnrẹn kua. Ọ ghi giẹn ọnrẹn vbe aka. Uwinhinmwẹ emwi ihaoko evbare na yẹ Nọyaẹnmwa.
Currently Selected:
Levitikọs 1: EDO96
Highlight
Share
Copy
Want to have your highlights saved across all your devices? Sign up or sign in
@ The Bible Society of Nigeria, 1996
