Jọn 1

Ẹmwẹ Arrọọ

1Vbe a te do yi agbọn na, Ẹmwẹ ne a guan rrọọ nẹ, rẹn keghi deba Osanobua gha rrọọ, emwi ne Osanobua khin ọre irẹn vbe gha khin. 2Ke omuhẹn gha dee, ọre ẹmwẹ ne a guan ke gu Osanobua gha rrọọ. 3Obọ ẹre Osanobua la yi emwi hia. Vbe uwu emwi ne a yi hia, ọkpa ne a la iyeke ẹre yi, ẹ i rrọọ. 4Nene ẹmwẹ ne a guan keghi mwẹ arrọọ vbe uwu irẹn, arrọọ na ọre ọ rhie uwanmwẹ gie emwa ne agbọn. 5Uwanmwẹ na kegha baa vbe uwu ebiebi, ebiebi ma he sẹtin dọ ẹre yọ.

6Osanobua keghi gie ukọ ẹre, ọmwa ne a tie ẹre Jọn. 7Ne ọ do ta ẹmwẹ uwanmwẹ nii na emwa ne agbọn. Rẹn rre do tae ma iran, ne emwa hia miẹn ehe na họn uhunmwu ne a gie ne iran yayi. 8Rẹn tobọ ẹre i re nene uwanmwẹ, ẹmwẹ uwanmwẹ ni ọre irẹn re do ta. 9Ọnọna ọrọre uwanmwẹ ne uwanmwẹ, uwanmwẹ ne ọ rrie agbọn do wan mu emwa hia.

10Ọnii nọ wẹ, nene Ẹmwẹ keghi rre agbọn, obọ ẹre ọre Osanobua la yi agbọn, levba sevba, agbọn ma rẹn ọnrẹn. 11Rẹn kegha die ẹvbo irẹn tobọ ẹre, sokpan avbe emwa rẹn ma rhan obọ miẹn rẹn. 12Vbene ọ rhirhi gha ye hẹ, eso vbọ rhan obọ miẹn rẹn, iran keghi yaeyi, rhunmwuda ọnii, rẹn keghi rhie ẹtin ne iran ne iran khian ivbi Osanobua. 13Iran ma khian ivbi Osanobua rhunmwuda ighe erriọ a wa yi ẹe, ra rhunmwuda ighe erha iran biẹlẹ iran ye agbọn na nẹ, Osanobua tobo ẹre ọrọre Erha iran.

14Nene Ẹmwẹ ne a guan keghi khian ọmwa ne agbọn, ọ keghi do gu ima gha rrọọ. Ma miẹn uyi ẹre, ọ vuọn ne ẹsọhẹ kevbe ẹmwata. Ọ na kegha re uyi ne a rhie nẹẹn zẹ vbe ukpọmọkpa kẹkan ne Evbavba mwẹ.

15Jọn ọre ọ ta ẹmwẹ ọnrẹn. Rẹn keghi datu wẹẹ, “Ọmwa ne I kha ẹghẹ nii ọna khin vbe ẹghẹ ne I na kha wẹẹ, ‘Rẹn ọre ọ khian rre lele mwẹ, sokpan ọ kpọlọ sẹ mwẹ rhunmwuda rẹn rrọọ nẹ a ke do biẹ mwẹ.’ ”

16Uwu uvuọnmwẹ ẹsọhẹ ọghọe, ọre ọ na fiangbe ima hia, ọ na gha kun afiangbe yan afiangbe ne ima. 17Osanobua rhie Uhi la obọ Mosis rre, sokpan ẹsọhẹ kevbe ẹmwata la obọ Jesu Kristi rre. 18Ọmwa ọkpa i rrọ ne ọ he bẹghe Osanobua aro ẹdẹ, rẹn ọkpa kẹkan ne ọ re emwi ne Osanobua vbe khin, kevbe ne ọ vbe diake Evbavba, ọre ọ rhie ẹre ma emwa.

Uhunmwu Ne Jọn Ne Ọsamẹ Gie

(Matiu 3:1-12; Mak 1:1-8; Luk 3:1-18)

19Ọdakha avbe Ju ni rre Jerusalẹm ghi gie avbe ohẹn kevbe Livai ya nọ Jọn wẹẹ, “De ọmwa ne uwẹ khin?”

20Jọn ma vbe he ne ọ rhie ewanniẹn ne iran, sokpan ọ keghi tae gbẹe ẹho rua vbe azagba wẹẹ, “Mẹ i re nene Mẹzaia.”

21Iran nọ rẹn wẹẹ, “De ọmwa ne uwẹ ghi khin khekherriọ? Elaija ore u khin ra?”

Jọn wanniẹn wẹẹ, “Ẹn ọ, I i re ọre.”

Iran dọlegbe nọ rẹn wẹẹ, “Wẹ ọrọre nene Akhasẹ ra?”

Ọ wanniẹn wẹẹ, “Ẹn o.”

22Iran nọ rẹn wẹẹ, “Tama ima ọmwa ne u khin ne ima miẹn ẹmwẹ tama iran ni gie ima uhunmwu. De emwi ne u ghi tie egbe ruẹ re?”

23Jọn wanniẹn wẹẹ,

“Emwi ne I khin ọrọre:

Urhu ọmwa ne ọ go vbe uwu ato

wa ze odẹ ne ọ diae ne Nọyaẹnmwa khian la!”

(Erriọ ọre akhasẹ Aizaia khare.)

24Avbe Farisi ọre ọ gie iran na uhunmwu rre. 25Iran nọ rẹn wẹẹ, “Deghẹ wẹ i re nene Mẹzaia, ra Elaija ra akhasẹ, vbọzẹ ne u ghi na same ne emwa khekherriọ?”

26Jọn wanniẹn wẹẹ, “Amẹ ọre I mẹ ya same ne emwa, orhiọnkpa ne uwa ma rẹn rre adesẹ uwa. 27Rẹn ọ re ọ khian rre lele mwẹ sokpan mẹ ma sẹ ne ọ gha ban re ibata.”

28Avbe emwi na hia ọre ọ sunu vbe Bẹtani vbe odẹ ahọ ẹzẹ Jọdan, ehe ne Jọn na gha same ne emwa.

Oteghe Ohuan Osanobua

29Ẹdẹ ghi gbe, Jọn keghi miẹn Jesu vbe ọ bu irẹn dee, ọ na kha wẹẹ, “Wa ghe oteghe ohuan Osanobua ne ọ viọ orukhọ agbọn gha rrie! 30Ọmwa ne I kha ọ na khin ẹkpo ne I na kha wẹẹ, ‘Okpia ọkpa gha rre lele mwẹ, sokpan rẹn kpọlọ sẹ mwẹ, rhunmwuda rẹn rrọọ nẹ a ke biẹ mwẹ,’ 31Mẹ ma te rẹn ọmwa ne ọ ra gha khin, sokpan emwi ne ọ do ya mwẹ ye amẹ same ne emwa ọrọre ne I miẹn ehe na rhie e ẹre ma Izrẹl.”

32Osẹe ne Jọn sẹẹ ọre ọna khin, “Mẹ miẹn vbe Orhiọn ke ẹrinmwi tuorre, ọ yevbe idu, ọ keghi rhuẹ yan rẹn. 33I ma te yevbe rẹn ọnrẹn, sokpan Osanobua ne ọ gie mwẹ ne I do gha ye amẹ same ne emwa ọre ọ tama mwẹ wẹẹ, ‘U gha miẹn vbe Orhiọn a tuorre, ọ na rhuẹ yan ọmwa ọkpa ọmwa nii ọre ọ khian gha ya Orhiọn Ne ọ huanrẹn same ne emwa.’ 34Jọn keghi kha wẹẹ, I miẹn ọẹn nẹ nian, I na vbe tama uwa wẹẹ rẹn ọrọre Ovbi Osanobua.”

Asa Nikaro Vbe Erhuanegbe Jesu

35Vbe ẹdẹ ne ọ lele ẹe, Jọn keghi vbe rre evba ke ẹe kevbe eva vbe avbe erhuanegbe ẹre. 36Ugbẹn vbe ọ ghi bẹghe Jesu vbe ọ gberra khian, ọ wẹẹ, “Ghe Oteghe Ohuan Osanobua!”

37Erhuanegbe eva nii ghi họn vbe ọ ta ẹmwẹ na, iran keghi lele Jesu. 38Jesu ghi gbe aro ghe iyeke, ọ keghi miẹn wẹ iran lele irẹn dee, ọ keghi nọ iran wẹẹ, “Vbe uwa gualọ?”

Iran wanniẹn wẹẹ, “De ehe ne u diaa e Rabai?” (Emwi ne a ya ẹmwẹ na kha ọrọre “Ọmamwaemwi.”)

39Rẹn wanniẹn tama iran wẹẹ. “Wa do ghe ọre.” Rhunmwuda ọnii, iran keghi lele ẹe gha khian, iran na do miẹn ehe ne ọ diaa. Iran keghi tota ke ẹe la ẹdẹrriọ fo. (Odẹ ihe ẹgogo enẹ vbe avan ọre ẹdẹ gha ye.)

40Ọkpa vbe uwu iran ni họn ẹn vbe Jọn guan rẹn, ọ na lele Jesu, keghi re Andru ọtẹn Saimọn Pita ne okpia. 41Vbe ọwarọkpa nii, Andru keghi miẹn Saimọn ne ọtiọnrẹn, ọ keghi tama rẹn wẹẹ, “Ma miẹn nene Mẹzaia nẹ.” (Emwi ne a ya ọnii kha ọrọre “Kristi.”) 42Rẹn keghi rhie Saimọn bu Jesu gha dee. Jesu keghi ghe ẹre, ọ wẹẹ, “Wẹ ọrọre Saimọn ne ovbi e Jọn, Kefas ọre a ra gha tie ruẹ re.” (Ọkpa ọre ẹmwẹ na ke Pita khin, emwi ne a yae kha ọrọre “Okuta nọkhua.”)

Jesu Tie Filip Kevbe Nataniẹl

43Ẹdẹ ne ọ lele ẹe, Jesu kegha rrie Galili. Ọ keghi miẹn Filip, ọ tama rẹn wẹẹ, “Lele mwẹ.” ( 44Ovbi e Bẹtsaida ọre Filip khin, ẹvbo ni ọre Andru kevbe Pita vbe ye.) 45Filip keghi miẹn Nataniẹl, ọ tama rẹn wẹẹ, “Ma miẹn ọmwa ne Mosis ta ẹmwẹ ọnrẹn ye uwu ebe Uhi, ne avbe akhasẹ vbe gbẹnnẹ ẹmwẹ ye otọ vbe ekpa ẹre. Ọmwa na ọrọre Jesu ne ovbi e Josẹf ne ovbi e Nazarẹt.” Nataniẹl keghi nọ wẹẹ, 46“Emwi ne ọ maa rhọkpa gha ke Nazarẹt ladian rre ra?” Filip tama rẹn wẹẹ, “Do ghe ẹre.”

47Ugbẹn vbe Jesu ghi bẹghe Nataniẹl Vbe ọ bu ẹre dee, ọ wẹẹ, “Ghe Ovbi Izrẹl vbe ẹmwata, ẹko ne ero i ye.” 48Nataniẹl nọ rẹn wẹẹ, “Vbe u a ya rẹn mwẹ hẹe?” Jesu wanniẹn tama rẹn wẹẹ, “I bẹghe ruẹ vbe u rre ototọ erhan ohọ vbe Filip te do tie ruẹ.”

49Nataniẹl wanniẹn wẹẹ, “Ọmaemwaemwi, Ovbi Osanobua ọre u khin, wẹ ọrọre Ọba Izrẹl.”

50Jesu tama rẹn wẹẹ, “Rhunmwuda ne I na tama ruẹn ighe I bẹghe ruẹ vbe ototọ erhan ohọ ọre u na yayi ra? U gha miẹn emwi ni sẹ ọna.” 51Ọ keghi tama iran wẹẹ, “Ẹmwata ọre I tama uwa, wa gha miẹn vbe ẹrinmwi a kie ye otọ kevbe avbe odibo Osanobua ghi gha hin odukhunmwu, iran ghi vbe gha tuorre yan Ovbi Ọmwa.”

Currently Selected:

Jọn 1: EDO96

Highlight

Copy