Gẹnẹsis 47

1Ẹre Josẹf na viọ isẹn vbe ivbi erhae, ọ na bu ọba gha khian. Ọ tama rẹn wẹẹ, “Erha mwẹ kevbe avbe etẹn mwẹ nikpia ke Kenan gha dee, ke iran kevbe oghẹn ohuan, oghẹn ẹmila kevbe emwi hia ne iran mwẹ. Iran yakọ vbe odẹ Gosiẹn nian.” 2Ọ keghi viọ isẹn vbe uwu avbe etiọnrẹn nikpia ne irẹn viọ mwẹ obọ gha khian ma ọba. 3Ọba keghi nọ iran wẹẹ, “De iwinna ne uwa winna?”

Iran wanniẹn wẹẹ, “Ọsuohuan ma khin enọwanrẹn, zẹ vbene avbe erha mwa vbe gha ye. 4Te ima do yin ẹvbo na, rhunmwuda vbe otọ Kenan, ukhunmwu fi sẹrriọ wẹ, avbe emwirri i ghi miẹn irunmwu re. Lahọ, ne ima yin odẹ Gosiẹn.” 5Ọba keghi tama e Josẹf wẹẹ, “Vbene erhaa kevbe avbe etuẹn ghi na rre na, 6otọe Igipt rre iran evba nii, gie iran yin odẹ Gosiẹn, ehe ne ọ maa sẹẹ vbe otọe na, adeghẹ a ghi vbe miẹn ne ọ gha sẹtin vbe uwu iran, we ne iran gha gbearoghe avbe emwirri mwẹ.” 7Ẹre Josẹf na rhie Jekọb ne erha ẹe do ma ọba, e Jekọb keghi fiangbe ọba. 8Ọba keghi nọ rẹn wẹẹ, “Inu ukpo u ye na?” 9E Jekọb keghi wanniẹn wẹẹ, “Ukpo ọgban yan iyisẹn ọre i he ya zozo. Avbe ukpo na keghi re ni i bun sokpan ọ kegha re ọghe ọlọghọmwa, ọ ma zẹdẹ yevbe avbe ukpo ne avbe erha mwẹ ya zozo.” 10E Jekọb keghi na erhunmwu ọ khian ẹdẹ hia ne Fero, ọ na kpao. 11Ẹre Josẹf na do gbe erha ẹe kevbe etiọnrẹn ẹkun sotọ vbe Igipt, ọ na viọ emwi ne iran vbe ehe ne ọ maa sẹẹ vbe otọe nii vbe asefẹn Ramesis zẹ vbe ne ọba tae. 12E Josẹf keghi gha rhie evbare ne erha ẹe, kevbe avbe etiọnrẹn kevbe emwa erha ẹe hia ya sẹ egbe iran ni kanmwa sẹ.

Ukhunmwu Ni

13Ukhunmwu na keghi fi sẹrriọ wẹ, evbare i ghi rre uhunmwu otọ agbọn hia hiehiere. Ohanmwẹ keghi ye emwa Igipt kevbe Kenan khian ene mitan mitan. 14E Josẹf keghi si igho ne emwa Igipt kevbe Kenan ya dẹlẹ ọka koko. Ọ na mu igho ni gha die ẹguae ọba. 15Ugbẹn vbe igho ghi fo nẹ vbe obọ emwa Igipt kevbe Kenan, emwa Igipt hia keghi bu e Josẹf gha dee, do tama rẹn wẹẹ, “Rhie evbare ne ima, ghẹ gie ima wulo. Guan yọ, igho ima hia fo nẹ.” 16E Josẹf keghi wanniẹn wẹẹ, “Wa viọ emwirri uwa rre, I gha ye evbare rọe ne uwa a deghẹ wa i ghi mwẹ igho.” 17Rhunmwuda ọnii, iran keghi viọ emwirri iran hia gie Josẹf, ọ na ye evbare gha rọe ne iran, avbe ẹsin, ohuan ke ẹwe, ẹmila ke ekẹtẹkẹtẹ. Ukpo nii, ọ keghi ya evbare rọ emwirri iran hia ne iran.

18Ukpo ne ọ lelẹe, iran kevbe bu ẹre rre do kha wẹẹ, “Ma i ra vbe rẹrẹ egbe ma ruẹn, ne ima wa kha nian enọwanrẹn wẹẹ igho ima hia fo nẹ, wẹ ọ re emwirri ima hia ghi gue. Enọwanrẹn, ma i ghi mwẹ emwi ọvbehe ne ima gha viọ nuẹn gberra ikinnegbe mwa kevbe otọe mwa. 19Ghẹ gie ima wulo, Guan yọ. Ghẹ gie otọe ima de ihoi rua. Ye evbare dẹlẹ ima kevbe otọe mwa. Ma ghi gha re eviẹn ne ọba, rẹn ghi vbe yan otọe ima. Viọ ọka ne ima ne ima ghẹ wulo, ima sẹtin gha ya otọe ima gbe ugbo.”

20E Josẹf keghi dẹlẹ otọe ni rre Igipt hia ne ọba. Emwa Igipt hia keghi khiẹnnẹ otọe iran, rhunmwuda ukhunmwu ne ọ wegbe gbe. Otọe nii hia keghi khian ọghe ọba. 21E Josẹf keghi ye emwa Igipt hia khian eviẹn la ehe ne otọe ni sẹe ehe ne ọ rhanmwẹ. 22Otọe ne ọ ghi sẹrae ne ọ ma dẹ keghi re ọghe avbe ohẹn. Emwi ne ọ gha ye iran khiẹn otọ iran irrọọ, rhunmwuda te ọba gha rhie evbare ne iran re ne iran. 23E Josẹf keghi tama emwa ni wẹẹ, “Wa miẹn ọẹn nian wẹ I dẹlẹ uwa dẹlẹ otọ uwa ne ọba nẹ, wa miẹn emwiokọ nian ne uwa kọ ye otọ uwa. 24Ọ gha sẹ ẹghẹ emwiorhọ, wa ghi ghae ehia ye ihe isẹn, wa ghi viọ obọ ọkpa gie ọba, ni dekẹe ghi gha re ọghe uwa, ne uwa ya gha kọ, ne uwa gha re, emwa uwa kevbe ivbi uwa.” 25Iran keghi wanniẹn wẹẹ, “U miẹn ima fan nẹ, u ru ima ẹse nẹ enọwanrẹn, ma gha gele gha re eviẹn ọba.” 26E Josẹf keghi yi ẹre iyi wẹ a gha wa ẹre ye ihe isẹn, obọkpa vbe emwiokọ ne a rhọre ghi gha re ọghe ọba. Te iran ye lele uhi na do sẹ ẹdẹnẹrẹ na. Otọe avbe ohẹn ọkpa ọre ọ ma khian ọghe ọba.

Emwi Okiekie Ne Jekọb Nọrẹn

27Ivbi Izrẹl kegha rre Igipt iran keghi do fe, iran na vbe gha mwẹ emọ nibun. 28E Jekọb kegha rre Igipt vbe ukpo ehairrọvbugie rhinrin ọ te do sẹ ọmọ ukpo ihinrọn yan ikiọkhọe. 29Ọ ghi bu ẹghẹ ne Izrẹl gha ya wu, ọ keghi tie Josẹf ne ovbi ẹre, ọ tama rẹn wẹẹ, “Lahọ, do viọ obọ ruẹ yọ mwẹ akharha ne u yan ma mwẹ wẹ, u gha ya ẹkoata gha ru emwi ne ọ maa ghe mwẹ, wẹ u i ra mu mwẹ yotọ vbe Igipt. 30I ho ne a mu mwẹ yotọ vbe ehe ne a vbe munọ avbe erha mwẹ yi. Mu mwẹ hin Igipt rre ne u vbe ya mu mwẹ ye idin iran.” E Josẹf keghi wanniẹn wẹẹ, “I gha ru vbene u khare.” 31E Jekọb keghi kha wẹẹ, “Yan ma mwẹ wẹ u gha ruẹe.” E Josẹf keghi yan eyan nii, ere Jekọb na kpọnmwẹ vbe uhunmwu ukpo ẹre vbe evba.

Currently Selected:

Gẹnẹsis 47: EDO96

Highlight

Copy