Gẹnẹsis 26

Aizik Yin e Gera

1Ukhunmwu kevbe dọlegbe fi vbe otọ nii, ẹ i vbe re ne ọ fi vbe ẹghẹ Ebraham. Aizik na bu Abimẹlẹk, ọba avbe Filistin vbe Gera. 2E Nọyaẹnmwa keghi rhiegbe ma Aizik, ọ na tama rẹn, wẹẹ, “Ghẹ yo Igipt. Mudia vbe ẹvbo ne I tama ruẹn ne u dia. 3U ghi di emwa ya, I gha rrọọ yaba ruẹ, I gha fiangbuẹ rhunmwuda, I gha mu otọ na nuẹn kevbe uniẹn ruẹn. I gha mu eyan ne I yan ma Ebraham ne erhaa sẹ. 4I gha viọ ivbi uniẹn ruẹn nuẹn ne ọ gha bun zẹ orhọnmwẹ ni rre iso, I gha mu otọe na hia ne iran. Iyaẹvbo agbọn na hia ghi gha rinmwian ne I fiangbe iran zẹ vbe ne I fiangbe ivbi uniẹn ruẹn. 5I gha fiangbuẹ rhunmwuda Ebraham họn ẹmwẹ mẹ, ọ kevbe rhie uhi mwẹ hia mwẹ.”

6Aizik keghi yin Gera. 7Emwa ẹvbo nii ghi gualọ otọ ẹmwẹ amwẹ ọnrẹn vbe obọ ẹre, ọ keghi kha wẹẹ, “Ọtẹn mwẹ nokhuo nọ.” Ohan kegha muẹn wẹẹ emwa ẹvbo nii gha gbe irẹn uan ne iran rhie, e Ribẹka ne ọ wa mose ẹsẹse. 8Aizik ghi kpẹe nẹ vbe evba kherhe, Abimẹlẹk ne ọba Filistin keghi ke ewindo ghe otọe, ọ keghi bẹghe vbe Aizik vbe Ribẹka gba ku vbe ọdọ vbe amwẹ. 9Abimẹlẹk keghi gie ne a tie Aizik, ọ tama rẹn wẹẹ, “Ghe emwi, ọvbokhan ruẹn wa nọ, vbua gu kha yi wẹẹ ọtuẹn nokhuo nọ?” Rẹn keghi wanniẹn wẹẹ, “Te I te gha ro wẹẹ iran gha gbe mwẹ uan a deghẹ I khare wẹẹ ọvbokhan mwẹ nọ.” 10Abimẹlẹk keghi kha wẹẹ, “Vbe ọna khun emwi ne u ru ima re na? A deghẹ a miẹn emwa mwẹ eso ni gu ọvbokhan ru emwi, uwẹ ọ re ọ gha do ye ima rri abe.” 11Abimẹlẹk keghi yi iyi ma emwa rẹn hia wẹẹ, “Ọmwa rhọkpa ghẹ ru ọmwa na khọ ra amwẹ ọnrẹn, a gha miẹn ọmwa ne ọ ru vberriọ, a gha gbẹe rua.” 12Aizik keghi mu ugbo vbe ẹvbo nii vbe ukpo nii, emwi ne ọ rhọre keghi ya ukhukhu arriaisẹn bun sẹ vbe ne ọ ya kọ, rhunmwuda e Nọyaẹnmwa fiangbẹe. 13Emwi kegha ma nẹẹn khian, ọ keghi khian ọmwa ne ọ fe ẹsẹsẹmwẹse. 14Avbe Filistin kegha gbe ọvo ẹre rhunmwuda ighẹ ọ mwẹ oghẹn ohuan kevbe ẹmila nibun deba avbe eviẹn. 15Ẹre iran na ya ye iku ran avbe uhae hia ne eguọmwadia erhae ighẹ Ebraham fiaẹn ẹghẹ ne Ebraham na gha rre agbọn.

16Abimẹlẹk keghi tama Aizik wẹẹ, “Do kpao rhunmwuda, u mwẹ ẹtin sẹ ima gbe.” 17Rhunmwuda ọnii Aizik keghi kpao, ọna ya bu agọ ye Gera, ọ na di evba ya vbe ẹghẹ kherhe. 18Ọ keghi dọlegbe yalọ avbe uhae ne iran fiaẹn vbe ẹghẹ Ebraham ne erha ẹe, ne avbe Filistin vbe ran vbe ọ wu nẹ. Aizik keghi dọlegbe gha tie iran eni ne erha ẹe vbe gha tie iran re.

19Avbe eguọmwadia Aizik keghi fian uhae vbe uwe iya, iran keghi miẹn ẹzẹ. 20Iran ni su ohuan emwa Gera keghi gu emwa ni su ohuan Aizik gha muan ẹmwẹ wẹẹ, “Ma ọre ọ yan ẹzẹ na.” Rhunmwuda ọnii, Aizik kegha tie ẹzẹ nii “Ẹzọ” rhunmwuda ne iran na gui yọ. 21Eguọmwadia Aizik kevbe fian uhae ọvbehe, ẹzọ kevbe larọ, ọ kevbe gha tie ọnii “Ikhuiwu.” 22Ọ keghi si kpao vbe evba, ọ na ya fian uhae ọvbehe. Ẹzọ ma ghi la ọna, ọre ọna gha tie ẹre “Ayan egbe ọmwa.” Ọ wẹẹ, “Banbanna na nian, e Nọyaẹnmwa rhie a yan egbe ọmwa mẹ nẹ vbe otọe na, I gha vbe maa vbe emwa.”

23Aizik keghi kpao, ọ na gha rrie Biẹsiẹba. 24Vbe Asọn nii e Nọyaẹnmwa keghi rhiegbe ma rẹn, ọ wẹẹ, “Mẹ ọrọre Osanobua Ebraham ne erha a. Ghẹ gie ohan muẹn, I rrọọ yaba ruẹ I gha fiangbuẹ, I gha vbe viọ ivbi uniẹn nibun nuẹn rhunmwuda Ebraham ne ọguọmwadia mwẹ.” 25Aizik keghi gba aka ye evba ọ na ga Nọyaẹnmwa. Ọna bu agọ ẹre ye evba, avbe eguọmwadia re keghi fian uhae ọvbehe.

Emwamwa Ne Aizik Ke Abimẹlẹk Ru Ne Egbe

26Abimẹlẹk keghi ke Gera gha dee kẹe kevbe Ahuzat ne ọ guẹe ziro, kevbe Fikọl ne ọkaokuo ẹre ne ọ do miẹn Aizik. 27Aizik keghi nọ rẹn wẹẹ, “Vbọzẹ ne uwa na do tuọ mwẹ yi ugbẹn vbe a miẹn wẹẹ te uwa khu iwu mwẹ, wa na khu mwẹ hin ẹvbo rua rre?”

28Iran keghi wanniẹn wẹẹ, “Banbanna nian, ma rẹnrẹn wẹẹ e Nọyaẹnmwa guẹ rrọọ, te ima rre na ne a do ru emwamwa ẹmwata ne egbe. Ma ho ne uwẹ yan wẹẹ, 29wẹ ra ho ima ẹbe zẹ vbene ima ma ho uwẹ ẹbe. Ma tohan ruẹn, ma guẹ hẹko gha ru ọwuẹ khian, eban na nian, aro dae wẹẹ e Nọyaẹnmwa fiangbuẹ.” 30Aizik keghi le evbare ne iran, iran na re, iran na da. 31Owiẹ vbe ẹdẹ ghi gbe, dọmwadẹ ọghọe ke ya ihẹn yan eyan ọghọe. Aizik keghi gbe ọkhiẹnwerẹ ne iran, iran keghi kpao vbe ọse. 32Vbe ẹdẹ nẹ ẹdẹrriọ zẹẹ, eguọmwadia Aizik keghi do tama rẹn wẹẹ iran fian uhae, iran wẹẹ, “Ma miẹn amẹ.” 33Rẹn keghi he uhae nii “Siba.” Ọnii ọ siẹe ne a na ye tie ẹvbo nii “Biẹsiẹba.”

Ikhuo Ọrriọvbe Ne Isọ Viọre

34Isọ kegha rre ukpo iyeva vbe ọ rhie Judit ne ovbi e Beeri nokhuo ne ọmwa Hiti. Ọ kevbe rhie Basimat ọmọ okhuo Elọn ne ọmwa Hiti. 35Iran keghi wa ya ẹko Aizik kevbe Ribẹka gha rriara ẹsẹse.

Currently Selected:

Gẹnẹsis 26: EDO96

Highlight

Copy