Gẹnẹsis 22

A We Ne Ebraham Ye Aizik Zọ Ese

1Ọ ghi kpẹe fua kherhe, Osanobua keghi danmwẹ Ebraham ghe; ọ tama rẹn wẹẹ, “Ebraham!” Ebraham keghi wanniẹn wẹẹ, “Ghe mwẹ, I danmwehọ!” 2Osanobua keghi kha wẹẹ, “Rhie ovbuẹ, ovbuẹ ne ukpọmọkpa ighẹ Aizik ne u ho ẹmwẹ ọnrẹn, ne u gha rrie otọ Moraia. U ghi ya yae zọ ese na giuan, vbe uhunmwu oke ne I gha rhie ma ruẹn.”

3Vbe owiẹ vbe ẹdẹ ne ọ lelẹe, Ebraham keghi mu ekẹtẹkẹtẹ ọre, ọ na yọ emwi yọ ọre egbe, ọ na rhie Aizik kevbe eva vbe uwe eguọmwadia ẹre ba egbe. Ọ na giagia erhan eso ne a ra ya zọ ese, ọ na mu uhunmwu da ehe ne Nọyaẹnmwa tama rẹn. 4Vbe ikpẹdẹ ne ogieha, Ebraham keghi ya bẹghe ehe ne a kha na vbe urria. 5Ọ keghi tama avbe eguọmwadia ẹre wẹẹ, “Wa mudia ke ekẹtẹkẹtẹ vbe emwa; mẹ vbe ọmọ okpia na gha ye sikẹ odọ ne ima ya ga, ne ima vbe dọlegbe bu uwa gha dee.”

6Ebraham keghi mu erhan ne a ra ya zọ ese yan Aizik uhunmwu, sokpan rẹn keghi tobọ ẹre mu erhẹn ẹyin kevbe ọpia. Iran eveva na deyan okhian. 7Ọ ma ghi kpẹe, Aizik keghi guan wẹẹ, “Ebaba ọ!” Rẹn wanniẹn wẹẹ, “Ghe mwẹ ovbi mwẹ.” Aizik na kha wẹẹ, “I miẹn nian wẹẹ erhan kevbe erhẹn guẹ, sokpan, oteghe ohuan ne a ra ya zọ ese vboo?” 8Ebraham wanniẹn wẹẹ, “Osanobua tobọ ẹre gha kpehe, ovbi mwẹ.” Iran eveva na gba gha khian.

9Ugbẹn vbe iran ghi sẹ ehe ne Osanobua tama rẹn, Ebraham keghi gba aka, ọ na mwamwa erhan yọ, ọ keghi gba ovbi ẹre, ọ na muẹn yan aka nii vbe uhunmwu avbe erhan nii. 10Ọ keghi gu agbada rhie ne ọ gbẹe rua. 11Sokpan, odibo Nọyaẹnmwa keghi datie ẹre ke ẹrinmwi rre, “Ebraham, Ebraham!” Rẹn keghi wanniẹn wẹẹ, “Ee, ghe mwẹ mwa.” 12Rẹn tama rẹn wẹẹ, “Ghẹ kuan ọmọ nii egbe, ghẹ vbe ru ẹre emwi rhọkpa.” I rẹnrẹn nian wẹẹ, “U mu egbe ne u ya gha hẹnmwẹ ne Osanobua, rhunmwuda, u ma gun mwẹ sinmwi ovbuẹ ne ukpọmọkpa.”

13Ebraham ghi tọn aro mu, ọ ke bẹghe ogho ọkpa ne ẹti gbalọ ẹre igho. Ọ na ya muẹn, ọ na ya zọ ese na giẹn uan ye ihe ovbi ẹre nokpia. 14Ebraham kegha tie evba nii, “Nọyaẹnmwa Kpemehe.” U hin ye do sẹ ẹdẹ nẹrẹ na te emwa ye tae wẹẹ, “Uhunmwu oke Nọyaẹnmwa ọre ọ na kpemehe ẹre.”

15Odibo Nọyaẹnmwa nii keghi tie Ebraham ukpogieva ke ẹrinmwi rre, 16“I ye eni mwẹ yan, Nọyaẹnmwa ọre ọ guan na, wẹẹ I gha fiangbuẹ ẹsẹse rhunmwuda emwi ne u ru na ne u ma na gun mwẹ sinmwi ovbuẹ, 17I yanrẹn wẹẹ I gha viọ uniẹn nibun zẹ vbe orhọnmwẹ ne aro iso ra ikpekhae ni rre ọkpẹn okun nuẹn. Uniẹn ruẹn gha khọn eghian iran muotọ. 18Iyaẹvbo agbọn hia ghi wẹẹ ne I fiangbe iran zẹ vbene I fiangbuẹ uniẹn ruẹn, rhunmwuda ne u na họn ẹmwẹ ne I tama ruẹn na.” 19Ebraham keghi dọlegbe bu avbe eguọmwadia ẹre, iran hia keghi werriegbe gha die Biẹsiẹba ne ọ gha ye.

Uniẹn E Nahọ

20Ọ ghi kpẹe fua kherhe Ebraham keghi họn wẹẹ Milka biẹlẹ emọ erẹnrẹn ne ọtiọnrẹn ighẹ Nahọ. 21Ne ọdiọn kegha re Uz, ọtiọnrẹn ighẹ Buz, Kemuẹl ne erha Aram, 22Kiẹsẹd, Hazọ, Peldas, Jidlaf kevbe Bẹtuẹl, 23E Milka ne erha Ribẹka, ọ re ọ biẹlẹ emọ ikpia erẹnrẹn na ne Nahọ ne ọtẹn Ebraham. 24Reuma ne amwẹ Nahọ ne ukpogieva keghi biẹlẹ Tẹba, Gaham, Tahas kevbe Maaka.

Currently Selected:

Gẹnẹsis 22: EDO96

Highlight

Copy