Gẹnẹsis 19

Orukhọ Emwa Sọdom

1Ugbẹn vbe avbe odibosa eva nii ghi sẹ Sọdom vbe ẹghẹ ota, e Lọt keghi rre ehe ne ọ tota yi vbe onurho ẹvbo nii, ehe ne emwa na ko. Ugbẹn vbe Lọt ghi wa bẹghe iran, ọ keghi guakpao ya vba iran. Ọ keghi diguẹ mu aro rhuotọ vbe odaro iran. 2Ọ na kha wẹẹ, “Adazẹ, te I rre do mu ọghọ ye uwa egbe, lahọ wa gha die owa mwẹ, wa sẹtin kpe owẹ ne uwa gbe asọn na mwa. Wa sẹtin rhiọ vbe owiẹ ne uwa gha rrie ehe ne uwa rrie.” Sokpan iran wanniẹn wẹẹ, “Ẹn o, adesẹ ore vbe ihuada ẹvbo na ma ra vbiẹ.” 3Sokpan rẹn keghi ye gha rhẹrhẹ iran, vbe okiekie, iran na lelẹe gha rrie owa ẹre. E Lọt keghi wẹ ne eguọmwadia ẹre le ebrẹd, ọ na le evbare esiesi ne iran, iran na re.

4Vbe ọ te sẹ ẹghẹ ne avbe orhunmwuyẹn nii ya lovbiẹ, emwa Sọdom keghi ghae ga owa nii. Ikpia nii rre ẹvbo nii hia keghi wa gha rre evba ibiẹka kevbe eniwanrẹn. 5Iran keghi datie Lọt, iran na nọ rẹn wẹẹ, “Ikpia ni rre do di owa ruẹ ya asọn na vbo? Viọ iran ladian ne ima!” Ivbi e Sọdom keghi ho ne iran gu iran ru emwi.

6E Lọt keghi ladian, ọ na khui urho vbe ọ ladian nẹ. 7Ọ tama iran wẹẹ, “Wa ne ọse mwẹ, I rinmwian uwa, wa ghẹ ru emwi dan vberriọ! 8Ghe, I mwẹ emọ ikhuo eva ni ma he rẹn okpia. Gun mwẹ viọ iran gie uwa, wa sẹtin ru emwi ne ọ khọn uwa ghe iran. Sokpan wa ghẹ ru avbe ikpia na emwirhọkpa, rhunmwuda orhunmwuyẹn mwẹ ọre iran khin, te I gha tan obọ ga iran.”

9Sokpan iran keghi kha wẹẹ, “Kpa hin odaro mwa rre, wẹ ne igbọn na! Vbua khin ne u gha na gha tama ima emwi ne ima gha ru? Deghẹ ẹ i re erriọ, ma gha ru uwẹ emwi ne ọ khọrhiọn sẹ ọghe iran.” Iran keghi sua e Lọt ghe iyeke, iran keghi vẹ ghe odaro ne iran ya gbe urho. 10Sokpan ikpia eva ni rre uwe owa nii keghi niẹn obọ ladian, iran si e Lọt la uwu owa, iran na khui urho. 11Iran na rhu ikpia hia ni rre ore aro vbe ne iran ma na ghi rẹn onurho.

E Lọt kpao Vbe Sọdom Rre

12Ikpia eva nii keghi tama e Lọt wẹẹ, “Deghẹ u ye mwẹ emwa ọvbehe vbe emwana, ivbuẹ nikpia kevbe nikhuo kevbe emwa ọvbehe ne u ghi mwẹ vbe ẹvbo na, viọ iran hin emwa rre. 13Rhunmwuda ma ra fuẹn emwa na an. E Nọyaẹnmwa họn iyẹn dan ne a na vbekpa iran na, ọ keghi gie ima ne a do fuẹn Sọdom ruan.” 14E Lọt keghi bu emwa ne avbe ivbi ẹre nikhuo ra te rọnmwẹ, ọ tama iran wẹẹ, “Wa zẹgiẹ ladian vbe emwana, e Nọyaẹnmwa ra do fuẹn emwa na an.” Sokpan iran keghi ro ighẹ ọdẹn ọre ọ gbe.

15Ẹdẹ ghi gbe, avbe odibosa nii keghi ya tua Lọt, iran tama rẹn wẹẹ, “Zẹgiẹgiẹ, rhie amwẹ ọn kevbe ivbuẹ nikhuo eveva ne u ladian ne uwa ghẹ wirua ye uwe ehe ne a na fuẹn ẹvbo na an.” 16E Lọt keghi gha si uhe. Sokpan e Nọyaẹnmwa tohan rẹn, emwa nii keghi rhie ẹre obọ kevbe amwẹ ọnrẹn kevbe ivbi ẹre nikhuo eva, iran keghi hẹ iran ladian vbe ẹvbo nii, iran na sẹ iran rae ye evba. 17Ugbẹn vbe iran ghi viọ iran ladian hin ore ẹvbo rre nẹ, ọkpa vbe avbe odibosa nii ke kha wẹẹ, “Le fua! Ghẹ ghe odieke, ghẹ vbe yakọ vbe iya na. Lẹ gha rrie uhunmwu oke, ne a ghẹ gbele uwa a.” 18Sokpan Lọt wanniẹn wẹẹ, “Ẹn o, ẹ i re erriọ Nọwanrẹn. 19Ghe, u tohan mwẹ nẹ, ekhọe ruẹ ọre ọ maa ọre u na ma gbe mwẹ uan, sokpan avbe oke nii rrei gbe, obọ ọfuan nii gha vba mwẹ, I ghi wu I te sẹ evba. 20U ma bẹghe ẹvbo nekherhe nii? Ọ sikẹ emwa ẹsẹse rhunmwuda I gha sẹtin sẹ evba. Gun mwẹ gha rrie evba, u gha miẹn wẹ ovbi ẹvbo kherhe nọ, I gha miẹn uhunmwu” 21Rẹn keghi wanniẹn wẹẹ. “I kue yọọ, I i ra fuẹn ẹvbo nii uan. 22Zẹgiẹ! Rhulẹ! I i ra sẹtin ru emwi rhọkpa vbe ẹ i re te u sẹ evba nẹ.” Rhunmwuda ne Lọt na tie ẹre nekherhe, a ke gha tie ẹvbo nii Zoa.

Ufuẹnmwẹ Sọdom Kevbe Gomorra

23Te owẹn he yan rre dee vbe Lọt sẹ Zoa.

24E Nọyaẹnmwa keghi gie ugbofi ne ọ giẹn ke odukhunmwu rhọ yan Sọdom kevbe Gomorra vbe udomwurri.

25Erriọ, e Nọyaẹnmwa keghi fuẹn okpẹvbo na eveva kevbe iya nii hia kevbe emwi hia ni zọ vbe otọe nii. 26Sokpan amwẹ Lọt keghi ghe odieke, a na fiẹe werriẹ yae khian orrẹ umwẹ. 27Owiẹ vbe ẹdẹ ghi gbe, Ebraham keghi zẹgiẹ gha rrie ehe ne iran na mudia vbe odaro Nọyaẹnmwa. 28Ọ ke tọn aro mu ya ghe Sọdom kevbe Gomorra kevbe iya nii hia, ọ keghi miẹn vbe ighogho gbe ke otọe nii rre zẹ vbe ighogho nọ gbe ke ogidi erhẹn rre. 29Sokpan ugbẹn vbe Osanobua fuẹn avbe ẹvbo ni rre iya nii hia, ọ keghi mu ẹmwẹ Ebraham roro, ọ na gie Lọt miẹn uhunmwu vbọ.

Vbene Moab Kevbe Amọn Ya Suẹn Hẹ

30Ohan ma gie Lọt die Zoa ya, rẹn vbe ivbi ẹre nikhuo eva kegha rrie uhunmwu oke, iran na ya gha rre uwe uvun okuta. 31Ovbi ẹre nokhuo nọdiọn keghi tama nekherhe wẹẹ, “Erha ima ya egbe rrie ọmaẹn nẹ, okpia i ghi rre agbọn na ne ima gha rọnmwẹ ne ima miẹn ehe na biẹlẹ. 32Larre, gie ima ye ayọn ne erha ima da, ne ọ gu ima ru emwi, ne ima sẹtin biẹlẹ nẹẹn.” 33Asọn nii, iran keghi ye ayọn nẹẹn da. Nọdiọn vbọ keghi gu erha ẹe lovbiẹ, sokpan ayọn gbẹe sẹrriọ wẹ ọ ma rẹn. 34Ẹdẹ ghi gbe, ovbi ẹre nokhuo nọdiọn keghi tama nekherhe wẹẹ, “Mẹ vbe erhamwẹ gba ru emwi ọdọ vbe amwẹ nasọn, gie ima vbe ye ayọn nẹẹn da asọn na ne uwẹ vbe ya lovbiẹ kẹe. Ma eva ghi do biẹlẹ ne erha ima.” 35Vbe asọn nii, iran keghi ye ayọn nẹẹn da, ovbi ẹre nokhuo ne kherhe keghi vbe guẹe lovbiẹ. Erriọ ọ vbe gha ye, ayọn ke gbẹe sẹrriọ wẹ ọ ma rẹn. 36Erriọ ọ re ivbi e Lọt nikhuo eveva na gha hanmwa ne erha iran. 37Ovbi ẹre nokhuo nọdiọn keghi biẹ okpia, ọ na he ẹre Moab. Rẹn ọrọre erha odede ọghe emwa Moab na. 38Ovbi ẹre nokhuo nekherhe kevbe biẹ okpia, ọ na he ẹre Benami. Rẹn ọrọre erha odede ọghe avbe emwa Amọri na.

Currently Selected:

Gẹnẹsis 19: EDO96

Highlight

Copy