Ẹksọdọs 33

A wee Ne Iran Si Okhian Kpao Vbe Oke Sainai

1E Nọyaẹnmwa keghi tama e Mosis wẹẹ, “Kpao vbe emwa na rre ke uwẹ kevbe emwa ne u viọ ke Igipt ladian, ne u gha rrie otọ ne I wẹ I gha mu ne Ebraham, Aizik kevbe Jekọb, kevbe uniẹn iran ẹghẹ ne I na tama iran wẹẹ, ‘I gha mu otọ na ne ivbi uniẹn uwa.’ 2I gha gie odibosa ke odaro uwa, I gha khulo ivbi e Kenan, kevbe Hiti, e Pẹriz, e Hivi kevbe Jebus ladian. 3Otọ igho kevbe ne ọ maa emwiokọ ọre uwa rrie. Sokpan mẹ i ra lele uwa gha khian rhunmwuda emwa ni zevbudu wa khin ne a ghẹ miẹn ghẹ I ya fuẹn uwa a vbe odẹ.”

4Ugbẹn vbe emwa nii ghi họn iyẹn dan na, iran keghi suẹn gha khiẹ, iran ma ghi viọ emwi itegbe ye egbe. 5E Nọyaẹnmwa keghi tama e Mosis wẹẹ, “Tama emwa nii wẹ emwa ni zevbudu wa khin, I gha wẹ ne 1 lele uwa khian la ovbi ẹghẹ kherhe, I gha fuẹn uwa a fẹẹrẹ. Banbanna nian, wa viọ ikpẹrọnmwọ itegbe uwa hin rre ne I miẹn ehe na rẹn emwi ne I gha ru.” 6Rhunmwuda ọnii, ke uhunmwu oke Sainai kpao, ivbi Izrẹl ma ghi viọ ikpẹrọnmwọ itegbe iran ye egbe ọvbehe.

Owa Ukpọn Ne A ya Rẹn Ighẹ E Nọyaẹnmwa Rre Evba

7Ẹghẹikẹghẹ ne ivbi Izrẹl ya bu agọ, e Mosis ghi dada Owa Ukpọn na, ọ ghi muẹn lahin agọ sẹ urria kherhe. Ọ kegha tie ẹre Owa Ukpọn ehe ne Nọyaẹnmwa ye, ọmwaikọmwa ne ọ ho ne ọ gualo otọ emwi vbe obọ Nọyaẹnmwa ghi ladian gha rrie evba. 8Ẹghẹikẹghẹ ne Mosis ya ladian gha rrie Owa Ukpọn nii, emwa hia ghi kpaegbe mudia, dọmwadẹ ọghọe ghi mudia ye onurho Owa Ukpọn ọghọe gha ghe Mosis ọ te do la uwu Owa Ukpọn nii. 9E Mosis gha ghi la uwu Owa Ukpọn nii nẹ, orre okuku ghi do mudia ye onurho Owa Ukpọn nii. E Nọyaẹnmwa ghi gha ke uwu orre okuku gu e Mosis guan. 10Emwa hia ghẹ ghi miẹn orre okuku nii vbe onurho Owa Ukpọn, iran ghi kpaegbe mudia, dọmwadẹ ọghọe ghi vbokho egbe rri otọ vbe onurho Owa Ukpọn ọghọe.

11E Nọyaẹnmwa ghi gha gu e Mosis guan vbe ghe aro mwẹ ghe aro ruẹ zẹ vbene ọmwa gu ọsiọre guan. E Mosis ghi dọlegbe gha die agọ, sokpan igbama ne ọre ọguọmwadia ẹre, e Jọsua ne ovbi e Nọn, i kpa vbe Owa Ukpọn nii rre.

E Nọyaẹnmwa Wẹ Rẹn Gha Mudia Ke Emwa Irẹn

12E Mosis keghi tama e Nọyaẹnmwa wẹẹ, “Ẹmwata nọ wẹ ne I viọ emwa na gha rrie otọ nii, sokpan u ma tama mwẹ ọmwa ne u gha gie lele mwẹ. U keghi kha wẹẹ, ‘U rẹn mwẹ ẹsẹse ekhọe ruẹ vbe rhiẹnrhiẹn ghe mwẹ.’ 13Banbanna nian, adeghẹ ẹko ruẹ gele rhiẹnrhiẹn ghe mwẹ, tama mwẹ vbene u mwamwa emwi hia hẹ, ne I miẹn ehe na rẹn kevbe ne I sẹtin gha ru vbene ọ ye ruẹ. U ghi vbe yerre wẹ, agbọn ẹvbo na, emwa ruẹn ọre u zẹ iran ẹre ya khian.”

14E Nọyaẹnmwa keghi kha wẹẹ, “I gha lele uẹ gha khian, I gha vbe rhie akhọnmiotọ nuẹn.”

15E Mosis keghi tama rẹn wẹẹ, “A deghẹ u i lele ima rae, ghẹ zẹdẹ gie ima kpa vbe emwa ree. 16Vbe ne ẹmwata, de odẹ ne ọmwa gha ya rẹn wẹ ẹko ruẹ rhiẹnrhiẹn ghe emwa ruẹn kevbe imẹ. A deghẹ u lele ima gha khian mẹ kevbe emwa ruẹn ghi gha re emwa ni miẹn aro ne ọ maa sẹ emwa ọvbehe hia vbe agbọn na.”

17E Nọyaẹnmwa tama e Mosis wẹẹ, “I gha ru vbene u khare na, rhunmwuda ẹko mwẹ rhiẹnrhiẹn ghe ruẹ I keghi vbe rẹn ruẹn ẹsẹsẹmwẹse.”

18E Mosis keghi nọ wẹẹ, “Lahọ gunmwẹ bẹghe uyi ruẹ ne wainwain.”

19E Nọyaẹnmwa keghi wanniẹn, “I gha gie uyi mwẹ hia gberra vbe odaro ruẹ, I ghi vbe tie eni mwẹ Nọhuanrẹn vbe odaro ruẹ. I gha mwẹ ekhọe agiẹngiẹn kevbe itohan ghe ne ọ khọn mwẹ. 20Mẹ i ra gie uwẹ bẹghe u gbaro mwẹ rhunmwuda ọmwa i sẹtin bẹghe mwẹ ne ọ ye gha rre agbọn. 21Sokpan, ghe ihe ọkpa vbe ọkpẹn emwa, ehe ne u gha na sẹtin mudia yan okuta, 22I gha ya obọ mwẹ gue ruẹ ye uvun okuta vbe awanwan mwẹ a gha gberra, vbe I te do gberra fo. 23I gha rhie obọ hin, u gha bẹghe iyeke mwẹ sokpan ẹ i re ugbaro mwẹ.”

Currently Selected:

Ẹksọdọs 33: EDO96

Highlight

Copy