Ẹksọdọs 32

Ekhuia Ẹmila Igoru

(Diuteronomi 9:6-29)

1Ugbẹn vbe emwa nii ghi miẹn wẹ e Mosis wa kpẹe vbe uhunmwu oke ighẹ ọ ma tuorre, iran keghi do vba Errọn, iran tama rẹn wẹẹ, “Larre o, do ma Osanobua ne ima ne ọ gha viọ ima khian rhunmwuda ma ma ghi rẹn emwi ne ọ ghi ru oko na ighẹ Mosis ne ọ viọ ima ke Igipt ladian.” 2Errọn keghi tama iran wẹẹ, “Wa viọ avbe emwi ehọ igoru ne avbe amwẹ uwa, ivbi uwa nikpia kevbe nikhuo viọ ye ehọ ne uwa viọ ehia gun mwẹ.” 3Ẹre emwa nii hia na koko emwi ehọ igoru iran, iran na hẹ ehia gie Errọn. 4Ọ keghi viọ emwi ehọ nii, ọ na ranran ẹn hihiẹ ye emwi ne a ya sa ẹrọnmwọ, ọ ke ya ẹe ru ẹkhuia ẹmila.

Emwa nii keghi kha wẹẹ, “Izrẹl, Osanobua ima ne ọ viọ ima ke Igipt ladian ọre ọna khin!” 5Ugbẹn vbe Errọn ghi miẹn emwi na, ọ keghi bọ aka ye odaro ẹkhuia ẹmila igoru nii, ọ na kha wẹẹ, “Akhuẹ a gha ru emwiukpo ya gọn ugie Nọyaẹnmwa.” 6Vbe owiẹ vbirrivbirri ẹdẹ ne ọ lele ẹe iran keghi gbele aranmwẹ ya zọ ese ne iran giẹn uan. Iran keghi vbe viọ aranmwẹ rre ne a ya zọ ese isara. Emwa nii keghi tota gha re gha da, ọ na keghi do khian ayọn ohọhọ kevbe iku okpia vbe okhuo.

7E Nọyaẹnmwa keghi tama e Mosis wẹẹ, “Zẹgiẹ tuorre, rhunmwuda avbe emwa ruẹn ne u viọ ke Igipt gha dee fa egbe ua nẹ, iran he mwẹ ye otọ. 8Iran wa lahin odẹ ne I yi ẹre iyi ne iran gha lele. Iran ya igoru ne a ranran ẹn ma ẹkhuia ne egbe iran, iran gha ga ẹe, iran gha vbe zẹ ese ghe ẹre. Iran keghi kha wẹẹ, ‘Ọnii ọrọre Osanobua iran ne ọ viọ iran ke otọ Igipt ladian.’ ” 9E Nọyaẹnmwa keghi tama e Mosis wẹẹ, “Iran na yenhọ gbe. 10Banbanna nian, ghẹ da mwẹ obọ yi, I gha ya ohu mwẹ nọkhua fuẹn iran an. I gha ya uwẹ kevbe ivbi uẹ khian okpẹvbo.”

11Sokpan e Mosis keghi rinmwian e Nọyaẹnmwa ne Osanobua ẹre, ọ wẹẹ, “Vbọzẹ yi e Nọyaẹnmwa ne u na gie ohu emwa ruẹn muẹn sẹrriọ, emwa ne uwẹ fannọ hin ọviẹn rre vbe Igipt vbe ekpa ẹtin kevbe iwẹgbe? 12Vbọzẹ ne a gha na gie ivbi Igipt gha kha wẹ te ọ viọ iran ke otọe Igipt ladian, vbene ọ na zẹ iro dan wẹ ne irẹn gbele iran ye uhunmwu oke, kevbe ne ọ wa fuẹn iran an fẹẹrẹ? Mu ohu nọ wegbe ne ọ muẹn fua, fi ekhọe werriẹ ne u ghẹ gie ẹbe na sunu vbe egbe emwa ruẹn. 13Ye avbe eguọmwadia ruẹ; rre, avbe Ebraham, Aizik kevbe Jekọb kevbe vbene u yan ma iran vbe eni ruẹn, ne u na khama iran wẹẹ, ‘I gha viọ emọ uniẹn ivbi uẹ ni yevbe orhọnmwẹ nii rre iso nuẹn. Otọe ne I ve na, I gha vbe muẹn ne avbe ivbi uẹ, ọ ghi gha re ọghe iran ẹdẹdẹmwẹdẹ.’ ”

14Ẹre Nọyaẹnmwa na fi ekhọe ẹre werriẹ ọ ma ghi gie ẹbe ne ọ te mwamwa khẹ emwa rẹn sunu vbe egbe iran.

15E Mosis keghi fi egbe werriẹ, ọ na tuorre vbe uhunmwu oke, ke irẹn kevbe uhanhan ayere eva ne a gbẹnnẹ ọre obọ eveva. 16Iwinna Osanobua ọre iran khin. Emwi ne a gbẹnnẹ yọ, emwi ne Osanobua gbẹnnẹ nọ, ne a ka e ye avbe uhanhan nii.

17E Jọsua keghi họn vbe emwa nii gbe wẹ, ọ na tama e Mosis wẹẹ, “Mẹ họn ẹmwẹ owogho okuo vbe agọ.” 18E Mosis keghi kha wẹẹ, “Ọna i re ihuan akhọnmiotọ ra eve ọmwa ne a khọn miẹn ẹre otọ, urhu ihuan ne a so ẹre imẹ họẹn.”

19E Mosis ghi sikẹ ọkpẹn agọ nii sẹ ne ọ na sẹtin bẹghe ovbi ẹkhuia ẹmila nii kevbe avbe emwa nii vbe iran ku, ohu keghi muẹn ẹsẹsẹmwẹse, ọ na filo avbe uhanhan ne ọ viọ mwẹ obọ kua, ọ na guọghọẹe rua ye ototọ oke nii. 20Ọ keghi mu ẹkhuia ẹmila ne iran ru nii ọ na giẹn ọnrẹn uan, ọ na dunmwu ẹn rẹnkhẹn, ọ na khakha ebubẹ ọre lele amẹ, ọ na wẹ ne ivbi Izrẹl wọn ẹn. 21Ọ keghi tama Errọn wẹẹ, “Vbe iran na ruẹ hẹ yi ne u na gie iran do ru orukhọ ne ọ khọrhiọn sẹ vbe nian?” 22Errọn keghi wanniẹn wẹẹ, “Ghẹ gunmwẹ gui, u rẹn vbe ne ọ rre iran na ekhọe hẹ ne iran gha ru emwi dan. 23Iran do khama mwẹ wẹẹ, ‘Ru Osanobua ọkpa ne ọ gha su ima khian, ma ma rẹn emwi ne ọ ghi ru oko na ighẹ Mosis ne ọ viọ ima ke Igipt ladian.’ 24I keghi nọ iran wẹẹ, ‘Gha ọ ghi mwẹ igoru vbọ, iran ni mwẹ emwi itegbe ọghe igoru vbọ keghi bannọ ẹn hẹ gun mwẹ.’ I keghi viọ ẹre ku erhẹn, ọre ẹkhuia ẹmila na na ladian vbọ!”

25E Mosis keghi miẹn wẹ Errọn gie emwa na wa fi werriẹ ghe nọmaa rẹn enegbe rhunmwuda ọ wa fan iran yọ ne iran gha ga ẹbọ, egbe ne a rhe ya miẹn wẹẹ iran rre uwu ẹbe ọghe eghian nii lẹga iran. 26E Mosis keghi ya mudia ye onurho agọ nii ọ na datu wẹẹ, “Gha ọ ghi rre obọ ọghe Nọyaẹnmwa vbọ? Bu mwẹ gha dee!” Avbe ivbi e Livai keghi si koko lẹga ẹre. 27Rẹn keghi tama iran wẹẹ, “Vbenian ọre Nọyaẹnmwa Osanobua ọghe Izrẹl khare, ‘Dọmwadẹ ọghọe vbe uwu uwa viọ umozo gba, wa ghi gbe agọ na dunmwu kevbe onurho na ya sẹ enọkpa, wa ghi gbele ọtẹn uwa nikpia, avbe ọse uwa kevbe emwa ẹdogbo uwa.’ ” 28Avbe Livai keghi ru zẹ vbene Mosis tama iran vbe ẹdẹ ne ẹdẹrriọ, iran keghi gbele arhin arriaisẹn eha (3,000). 29E Mosis keghi tama avbe Livai wẹẹ, “Ẹdẹnẹrẹ na, wa ma egbe uwa ohẹn nẹ wẹ uwa gha winna ne Nọyaẹnmwa vbe kpa ne uwa na gbele ivbi uwa nikpia kevbe etẹn uwa nikpia, erriọ Nọyaẹnmwa vbe rhie afiangbe ẹre ne uwa ẹrẹna.”

30Ẹdẹ ghi gbe, e Mosis keghi tama emwa nii wẹẹ, “Orukhọ ne ọ muohan ọre uwa ru. Banbanna nian, I ra hin uhunmwu oke bu e Nọyaẹnmwa gha khian, u gha ghe I gha sẹtin rinmwian ẹn ne ọ ya orukhọ uwa bọ uwa.” 31E Mosis keghi werriegbe bu e Nọyaẹnmwa gha khian, ọ wẹẹ, “Wẹ miẹn orukhọ ne ọ mu ohan ne iran an ru. Iran ya igoru ma ẹbọ ne egbe iran. 32Sokpan, banbanna nian, lahọ ya orukhọ iran bọ iran. Adeghẹ u i ra ya bọ iran, lahọ khiẹn eni mwẹ hin ebe ne u gbẹnnẹ eni emwa ruẹn yi rre.”

33E Nọyaẹnmwa keghi wanniẹn wẹẹ, “Ọmwa ne ọ ru orukhọ ghe mwẹ ọre I gha khiẹn eni ẹnrẹn hin ebe mwẹ rre. 34Banbanna nian, gha khian viọ emwa nii gha rrie ehe ne I tama ruẹn. Ye rre, odibo mwẹ gha ma ruẹn odẹ sokpan, ẹghẹ ne I gha na guan yọ, I gha rri iran oya ye orukhọ ne iran ru.” 35E Nọyaẹnmwa keghi gie emianmwẹ la uwu ẹbu iran rhunmwuda iran ya ẹtin mu Errọn ne ọ ru ẹkhuia ẹmila.

Currently Selected:

Ẹksọdọs 32: EDO96

Highlight

Copy