Ẹksọdọs 29

Vbene A Gha Ya Ma Errọn Kevbe Ivbi Ẹre Ohẹn Hẹ

(Levitikọs 8:1-36)

1“Vbenian ọre u gha ya ye Errọn kevbe ivbi ẹre fi ohan mẹ ne iran ga mwẹ zẹ vbe ohẹn. U ghi mu ovbi ẹkhuia ẹmila ọkpa kevbe ogho eva ne a ma kuan ra ne egbe gba na. 2U ghi vbe viọ ebrẹd ne ọ ma hue, ebrẹd ne eyist i ye kevbe ebrẹd eso ne a ye ofigbọn oliv ru, kevbe ebrẹd nọ ma hue ne parha ne a tu ofigbọn yan. Igharhuarhua ọghe ọka irhuarhua ne ọ wa ma ọre a gha ya ru ẹe. 3U ghi muẹn ye okhuae ne u ya zẹ ọhẹ mẹ vbe ẹghẹ ne u ya ye ẹkhuia ẹmila kevbe ogho nii zọ ese.

4“Viọ Errọn kevbe ivbi ẹre gha die onurho Owa Ukpọn mwẹ ne iran khuẹ. 5Iyeke ọnii, u ghi viọ ukpọn ohẹn nii, u ghi rhie ẹwu, ẹwu ne a mu ya ẹwu ọkotọ, adaghọ kevbe uhanhan ukpọn ẹwẹe ọghe Errọn, u ghi vbe ye ukugba gba ẹre ẹkun lẹga. 6U ghi rhie ọza uhunmwu ne u vbe de ama ne ọ huanrẹn ọghe a ya fiohan ye ọza uhunmwu nii. 7U ghi rhie ofigbọn ne a nọnọ ye ọmwa uhunmwu, u ghi tue ẹre yọ ẹre uhunmwu ne u ya zọe ye ughaẹn. 8U ghi viọ ivbi ẹre rre, u ghi yọ iran ẹwu. 9U ghi gbalọ iran ebuluku, u ghi dọlọ ẹrhu ye iran uhunmwu, iran ọ khian gha re ohẹn zẹ vbe ne iyi itẹbitẹ mwẹ khare. Vbene u gha ya ye Errọn kevbe ivbi ẹre ma ohẹn ọre ọna khin. Iran kevbe uniẹn iran gha ga mwẹ vbe ukpo ohẹn ẹdẹdẹmwẹdẹ.

10“U ghi mu ẹkhuia ẹmila nii gha die odaro Owa Ukpọn ne a na miegbe. Errọn kevbe ivbi ẹre ghi viọ obọ iran yan rẹn uhunmwu. 11U ghi gbe ẹkhuia ẹmila nii vbe evba vbe odaro Nọyaẹnmwa vbe onurho ne a la la Owa Ukpọn ne a na miegbe. 12U ghi rhie vbe esagiẹn ẹkhuia ẹmila nii, u ghi ya ikpinhianbọ ruẹ ya ẹe rhanmwẹ avbe ukpẹ aka nii. 13Iyeke ọnii, u ghi mu esagiẹn ne ọ rhu yan ẹkpokhurhu ẹre kevbe ẹvbi ne ọ rre udu ẹre kevbe ihẹnmwẹ ọnrẹn eveva kevbe ẹvbi nii rhu yan iran, u ghi giẹn ehia vbe uhunmwu aka zẹ vbe emwi izọhẹ ghe mwẹ. 14Sokpan, efun ẹnrẹn, ẹkpokhurhu ẹre kevbe ohian rẹn, u ghi ya giẹn enii vbe a gha la hin agọ rre nẹ. Izọhẹ ne a ya kpe orukhọ avbe ohẹn kua ọre enii khin.

15“U ghi mu ọkpa vbe uwu avbe ogho nii. U ghi tama Errọn vbe ivbi ẹre ne iran viọ obọ iran yan ẹre uhunmwu. 16U ghi gbe ẹe, u ghi mu esagiẹn ọnrẹn ne u rhurhẹ ọe lẹga aka nii. 17U ghi giagia ogho nii, u ghi kpe ẹkpokhurhu ẹre kevbe owẹ ẹre, u ghi viọ ẹre yan ikinnegbe ẹre nekpa ne a giagia ẹe, kevbe uhunmwu ẹnrẹn. 18U ghi wa giẹn ogho nii hia vbe uhunmwu aka. Izọhẹ ne a giẹn ne Nọyaẹnmwa ọre ọna khin, izọhẹ ne a ya erhẹn ru nọ ke ẹe kevbe uwinhinmwẹ ne ọ yẹ mwẹ. 19U ghi mu ogho nọkpa, Errọn kevbe ivbi ẹre ghi viọ obọ yan ẹre uhunmwu. 20Gbe ẹe ne u rhie vbe esagiẹn ọnrẹn, u ghi ya ẹe kan etọghọ ehọ obọ erha ọmwa ọghe Errọn kevbe avbe ivbi ẹre, kevbe ikpinhianbọ nogie, kevbe ikpinhianwẹ nogie ọghe owẹ erha ọmwa iran, u ghi mu ni dekẹe vbọ rhurhẹ lele igienenẹ aka. 21U ghi rhie vbe esagiẹn nii rre aka, kevbe ofigbọn ne a nọnọ ye emwa uhunmwu, u ghi miẹn rẹn yan Errọn kevbe ukpọn rẹn, kevbe avbe ivbi ẹre kevbe ukpọn iran, rẹn, avbe ivbi ẹre kevbe ukpọn iran hia gha khian ne a ya fiohan. 22U ghi fian efun ogho nii, ẹrhunrhun ẹnrẹn ne ọ tii, ẹvbi ne ọ rhu yan ibiẹ kevbe ẹkpokhurhu ẹre, ududu ẹvbi ne ọ rre udu ẹre, ihẹnmwẹ ọnrẹn eva kevbe ẹvbi ne ọ rrọọ, ekuawẹ obọ erha ọmwa ọnrẹn.

23“U ghi rhie ebrẹd ọkpa ne a ya ofigbọn ru vbe uwu okhuae ọghe ebrẹd ne ọ ma hue ne ọ rre odaro, a ya fi ohan gunmwẹ, kevbe ebrẹd ne parha ọkpa kevbe ebrẹd ne ọ huere. 24U ghi viọ evbare na hia ye Errọn kevbe ivbi ẹre obọ, u ghi wẹ ne iran ya ẹe fiohan vbene a gha na wẹ ne iran niẹn rẹn ladian zẹ vbe emwi izọhẹ gun mwẹ. 25Iyeke ọnii, u ghi miẹn iran evbare nii, u ghi giẹn ọnrẹn vbe uhunmwu aka, vbe uhunmwu avbe emwi imuohan na a giẹn uan, ne ọ miẹn ehe na rhie uwinhinmwẹ ne ọ yẹ mwẹ ladian, emwi imuohan evbare ne a ya rhie gun mwẹ nọ.

26“U ghi mu ẹwẹe ọghe ogho na, u ghi ya ẹe fi ohan kpataki mẹ. Ehe ne ọre ọwuẹ vbe aranmwẹ nii ọre ọ na khin.

27“A gha ma ohẹn, ẹwẹe kevbe ekuawẹ ogho nii ne a gbe ya ru ẹe, a ghi ya fiohan mẹ zẹvbe izọhẹ kpataki, a ghi vbe muẹn ye efẹn ọkpa ne ohẹn. 28Iyi etẹbitẹ mwẹ nọ wẹ avbe emwa mwẹ gha si isara, ẹwẹe kevbe ekuawẹ aranmwẹ nii ọghe ohẹn nọ, ne a kha na, emwi ne iran ya zẹ ọhẹ gie imẹ ne Nọyaẹnmwa ọre nọ. 29Errọn gha wu, a ghi viọ ẹwu ohẹn ọghọe ne ivbi ẹre, ne iran yọe vbe ẹghẹ ne a gha na ma iran ohẹn. 30Ovbi Errọn ne ọ ghi rhie ihe ẹre ne ọ vbe la uwu Owa Ukpọn ne a ya rẹn ighẹ mẹ re evba ne ọ ya gha ga vbe Ehe Ne ọ huanrẹn, ọ ghi yọ ẹwu na la ikpẹdẹ ihinrọn.

31“Ogho ne a ya ma ẹre ohẹn nii ighẹ Errọn kevbe ivbi ẹre, u ghi muẹn na a ya le ẹe vbe Ehe Ne ọ huanrẹn. 32Errọn kevbe ivbi ẹre ghi rri emiowo ogho nii kevbe ebrẹd ne ọ rre uwu okhuae nii vbe onurho ne a la la uwu Owa Ukpọn ne a na miegbe. 33Iran ghi rri emwi ne a ya rhie iyabọ gie iran vbe ẹghẹ ne a na ma iran ohẹn, a keghi vbe ya iran fi ohan. Avbe ohẹn ọkpa ọre ọ gha rri evbare na rhunmwuda evbare ne a ya ru emwi nọ. 34Adeghẹ eso rrọọ vbe emiowo nii ra evbare nii ne a ma he re vbe ẹdẹ a ghi gbe, a ghi giẹn ọnrẹn uan. A ghẹ rriọe rhunmwuda emwi ne a ya ru emwi nọ.

35“Emwi ne I tama ruẹn na zẹẹ ọre u ra ru ne Errọn kevbe avbe ivbi ẹre. Ikpẹdẹ ihinrọn ọre u ra do ugie ne a ya ma iran ohẹn la. 36Ẹdẹgbegbe u ghi gha ya ẹkhuia ẹmila zọ ese ye orukhọ ne a miẹn ehe na ya orukhọ bọ. U gha ghi zọ ese ye orukhọ nẹ, u rhie orukhọ hin aka rre nẹ, iyeke ọnii, u ghi nọnọ ori oliv yọ ne u ya ẹe khian ne ọ hunanrẹn. 37U ghi ru ọna ẹdẹgbegbe la ikpẹdẹ ihinrọn, ẹghẹ nii aka ghi do huan fo fẹẹrẹ. Ọmwaikọmwa, ra emwikemwi ne ọ ghi dekan rẹn ghi miẹn ikuangbe rhunmwuda ẹtin uhuanmwẹ ọnrẹn nii.

Izọhẹ Ẹdẹgbegbe

(Nọmbas 28:1-8)

38“Emwi ne u gha ya gha zọ ese vbe aka ẹdẹgbegbe rhinrin ẹdẹ ọre ọna khin: u ghi gbele ivbe ohuan eva ni he rre ukpo ọkpọkpa. 39U ghi gbe ọkpa vbọ vbe owiẹ kevbe nọkpa vbe ota. 40Nokaro ne ọ rrọọ, u ghi ya ẹe zọ ese ba ọduẹki ẹlubọ enẹ ne a ya ago ofigbọn oliv ne a ma gua eha gbe. U ghi sa ukpu ayọn eha kua zẹ vbe izọhẹ emwi na a da. 41U ghi gbe ovbi ohuan nọkpa vbe ota, zẹ vbe ne u vbe ru ẹe vbe owiẹ, u ghi gie izọhẹ evbare evba da lele ẹe, izọhẹ evbare ọre ọna khin mẹ, mẹ ne Nọyaẹnmwa, uwinhinmwẹ ọnrẹn wa yẹ mwẹ. 42Emwi izọhẹ ne a giẹn uan na, ke orre ya sẹ orre ẹdẹdẹmwẹdẹ ọre uwa gha ya gha ya ẹe zẹ ọhẹ vbe onurho owa ne Owa Ukpọn ne a ya rẹn ighẹ I rre evba, vbe odaro imẹ ne Nọyaẹnmwa. Emwa na I ra na do gha miẹn emwa mwẹ ne I vbe gha gu uwẹ guan. 43Evba I ra na do gha miẹn ivbi Izrẹl, uyi mwẹ ghi ya evba nii khian ne ọ huanrẹn. 44I gha ya Owa Ukpọn ne a na miegbe khian ne ọ huanrẹn, kevbe aka ne ọ rrọọ, I ghi ya Errọn kevbe ivbe ẹre khian na ya fi ohan ne ọ gha ga mwẹ zẹ vbe ohẹn. 45I gha rre uwu ẹbu ivbi Izrẹl, I ghi gha re Osanobua iran. 46Iran gha vbe rẹn wẹ mẹ ọrọre Nọyaẹnmwa ne Osanobua iran, ne ọ viọ iran ke Igipt ladian ne ọ do gha rre uwu ẹbu iran. Mẹ ọrọre Nọyaẹnmwa ne Osanobua iran.

Currently Selected:

Ẹksọdọs 29: EDO96

Highlight

Copy