Ẹksọdọs 27

Aka

(Ẹksọdọs 38:1-7)

1“U ghi ya erhan akesia gba aka. Ọ ghi gha re umwọmwẹ vbe obọ enenẹ, ibata ihinrọn vbe ukhiọnmwẹ vbe utanmwẹ, ibata ihinrọn vbe ukhiọnmwẹ vbe uvbẹmwẹ kevbe uyomwẹ. 2U ghi ru ẹe ne ọ niẹn ukpẹ ladian vbe igẹngẹn ọnrẹn enenẹ. Nene avbe aka ghi wa gha re ọkpa, a ghi ya oze rhu ehia fẹẹrẹ. 3U ghi vbe ru ọkpan ọghe emuẹn ne lọkọ nọ rre aka, u ghi vbe ru ovbẹvbẹ, ọkpan nekhua, aban kevbe emwi ne a ya wan erhẹn. Emwi hia ne a ghi lo vbe aka nii, oze ọre a gha ya ru ẹe. 4Deba ẹre, u ghi vbe ru ọkiakia yọ u ghi ru ẹgba oze ne a ya muẹn, ye igẹngẹn ọnrẹn enenẹ. 5U ghi ru ẹe gba ototọ ehọ aka, vbene ọ gha na sẹ adesẹneva uyomwẹ aka. 6U ghi ru avbe ọkpọ ọghe erhan akesia ne a ya muẹn, u ghi ya oze rhu ehia. 7Wẹ ghi fi ẹe la ẹgba ni rre efẹn aka nii vbe a khian muẹn. 8U ghi ru aka nii ne ọ gha re ne ọ guokpo vbe uwu ẹre. Uhanhan ọre a gha ya ru ẹe. U ghi ru ẹe zẹ vbe egbe ne a mu ma ruẹn vbe uhunmwu oke.

Ogba Ọghe Owa Ukpọn Ne A Ya Rẹn Wẹ E Nọyaẹnmwa Rre Evba

(Ẹksọdọs 38:9-20)

9“Wa ghi gba ogba ga Owa Ukpọn nii. Vbe odẹ ekẹn vbọ, a ghi ya eto ovbiohuẹ ne mose e ne a do sẹ ukpọn onurho yọ, utanmwẹ ọnrẹn vbe obọkpa ghi gha re ọkpọ ekigbesiyeha. 10A ghi ya ọkpọ oze ugie ne a ya oze ru odẹ owẹ ọre ke ẹe, kevbe aban kevbe irri ọghe esiliva ni rre avbe ọkpọ ni da ẹe yi. 11Erriọ vbe nọ zẹ vbe okuo ne ọ rrọọ, ọ ghi vbe ya ọkpọ ugie ne a vbe ya esiliva ru ẹzi ẹre kevbe irri da ẹe yi. 12U ghi vbe ru ukpọn onurho ne ọre ọkpọ ekesọgban ye uvbẹmwẹ ogba nii vbe odẹ orrie. Ọkpọ igbe ne a ya oze ru ẹzi ẹre ọre a gha ya da ẹe yi.

13“Vbe odẹ ahọ vbe ehe ne onurho ye uvbẹmwẹ ogba nii ghi gha re ibata isẹn irrọvbiyenẹ. 14-15Vbe obọ ọkpa vbe ehe ne a la la rọ, a ghi mu ukpọn onurho ne ọre ọkpọ ihinrọn vbe ukhiọnmwẹ yọ, a ghi ya ọkpọ eha ne ọ vbe mwẹ ẹzi eha da ẹe yi. 16Onurho ne a la la rọ tobọ ẹre, wa ghi rhie ukpọn onurho ne ọre ọkpọ igbe yọ ọ ghi gha re eto ohuan ne raghoragho ne ọ baa rhan-an, kevbe ne ọ wa baa kevbe eto ovbiohuẹ ne a do mose mose, kevbe ne a ye emwi ne a do munọ ona lele. U ghi ya ọkpọ enẹ da ẹe yi vbe ẹzi enenẹ.

17“Ọkpọ ne ọ lẹga ogba nii hia, ghi gha re ne a ya esiliva de kugbe, aban ni rrọọ ghi vbe gha re ọghe esiliva, ẹzi ẹre ghi gha re oze. 18Ogba ne ọ lẹga re ghi gha re ibata igbe yan ikiọkhọe vbe utanmwẹ, ibata isẹn irrọvbiyenẹ vbe uvbẹmwẹ, kevbe ibata ihinrọn vbe ukhiọnmwẹ vbe uyomwẹ. U ghi ya eto ovbiohuẹ ne a do, ru ukpọn onurho yọ, ototọ ẹre ghi gha re oze. 19Emwi ne a ya ru emwi vbe uwu Owa Ukpọn hia, emwi ne a rhirhi ya ẹe gha ru, kevbe avbe ukeke ne a ya so owa ukpọn nii mu otọ kevbe ọghe ogba ne ọ lẹga ẹre, oze ọre a gha ya ru ehia.

Vbene A Ya Gbe Aro Ghe Ukpa Ne Ọ Rrọọ Hẹ

(Levitikọs 24:1-4)

20“Tama ivbi Izrẹl ne iran viọ ofigbọn oliv ne ọ maa sẹ rre ne ukpa gha baa vbe evba ẹghẹ hia. 21Errọn kevbe ivbi ẹre ghi mu ukpa na ye uwu Owa Ukpọn ne Osanobua na do gha miẹn emwa rẹn aro, vbe iyeke ukpọn onurho ne ọ rre odaro avbe uhanhan ayere. Ọ ghi gha baa vbe odaro mwẹ vba ke ota ya sẹ owiẹ. Ẹmwẹ na, ivbi Izrẹl ghi da ẹe yi rhinrin ẹdẹdẹmwẹdẹ kevbe avbe emọ ne iran gha biẹlẹ.

Currently Selected:

Ẹksọdọs 27: EDO96

Highlight

Copy