Ẹksọdọs 23

Uhunmwu ẹmwẹ Kevbe Oseghe

1“Ghẹ ta ewẹwẹwẹ. Ghẹ yi ọmworukhọ ike vbe ekpa osẹe ohoghe ne a sẹ. 2Ghẹ ye egbe ba emwa ra emwi dan rhunmwuda ighẹ iran bun, a gha gui ẹzọ, ghẹ sẹ osẹe ne ẹi gie a miẹn otọ ẹmwẹ rhunmwuda ne emwa nibun sẹ miẹn ehe na gha ghe ruẹ ẹse. 3Ghẹ vbe zẹ ovbiogue ẹkpe vbe a gha bu ohiẹn ọnrẹn.

4“U gha miẹn i ghẹ ẹmila ra ekẹtẹkẹtẹ eghian ruẹn fian fua, u ghi muẹn dọlegbe gie ẹe. 5A deghẹ ihẹ gbe ekẹtẹkẹtẹ ọre fi iguẹ, ghẹ kpao sẹrae yọ, u ghi guẹe mu ẹn kpaegbe.

6“A gha gui ẹzọ ivbiogue vbe uwu uwa wa ghẹ khiẹn ohiẹn bu gbe ẹe. 7Wa gha lẹ ne ẹmwẹ ne a ba ọmwa ẹre. Wa ghẹ gbe ọmwa ne ọ ma rukhọ rua, rhunmwuda I gha bu ohiẹn uwa gbe ọmwa ne ọ ru emwi dan vberriọ. 8Ghẹ miẹn oko iyeke, rhunmwuda te oko iyeke rhu emwa aro ne iran ghẹ dẹghe ẹmwata, ọ ghi gbe ẹki ẹmwẹ ye ne ọ ma ru khọ obọ.

9“Wa ghẹ ye obọ dan mu orhunmwuyẹn, rhunmwuda wa rẹn agbọn ne orhunmwuyẹn ye rhunmwuda wa te vbe gha re orhunmwuyẹn yi vbe Igipt.

Ukpo Ne Ogihinrọn Kevbe Ikpẹdẹ Ne Ogihinrọn

10“Wa ghi ya ukpo ehan gha kọ emwi ye otọ rua ne uwa vbe gha rhọ emwi ne ọ mọ ẹn vbọ. 11Sokpan vbe ukpo ne ogihinrọn, wa ghi gie ẹe hẹwẹ, wa ghẹ rhọ emwiokọ ne ọ mọ vbọ. Ivbiogue nii rre uwu uwa sẹtin ya rri emwi ne ọ mọ vbọ, aranmwẹ oha ghi rri enọdekẹe. Erriọ wa gha vbe gha ru ugbo emwiokọ kevbe ọghe oha uwa.

12“Wa ghi ya ikpẹdẹ ehan winna sokpan vbe ikpẹdẹ ne ogihinrọn, wa ghẹ winna ne ẹmila uwa kevbe ekẹtẹkẹtẹ uwa miẹn ehe na hẹwẹ ne avbe eviẹn kevbe orhunmwuyẹn miẹn ehe na koko ẹtin. 13Wa rhie ehọ ye ẹmwẹ ne I tama uwa, wa ghẹ na erhunmwu ghe osa ọvbehe, wa ghẹ kue so eni iran.”

Ogiete Emwiukpo Neha

(Ẹksọdọs 34:18-26; Diuteronomi 16:1-17)

14Igba eha vbe ukpo ọre uwa gha ru emwiukpo mẹ. 15Vbe uki Abib, uki ne uwa na kpao hin Igipt rre, wa ghi ru emwiukpo Ebrẹd nọmahue; zẹ vbene iyi ẹre nii yi ma uwa, wa ghẹ rri ebrẹd ne ọ huere la ikpẹdẹ ihinrọn vbe ẹghẹ emwiukpo na. Omwa ikọmwa ghẹ fiabọ emwi imuohan bu mwẹ gha dee. 16Wa ghi vbe gha ru emwi ukpo Akọrhọre Ọka vbe uwa gha rhọ emwi okaro ne uwa kọ ye ugbo rua. Wa ghi ru emwiukpo Emwiorhọ Okaro vbe ufomwẹ ukpo vbe uwa a ghi rhọ emwiorhọ ke ugbo kevbe agọ rre. 17Igba eha vbe ukpo ọre ikpia nii rre ọbuohiẹn uwa hia gha do gha miẹn mwẹ aro, erriọ Nọyaẹnmwa khare. 18Wa ghẹ rhie ebrẹd ne ọ huere ya ye aranmwẹ zọ ese ghe mwẹ. Efun aranmwẹ ne a ya zọ ese ghe mwẹ, wa ghẹ sẹrae vbọ ne ẹdẹ gbe. 19Wa ghi viọ avbe ne ọ maa sẹ vbe emwiokọ ne okaro ne uwa ka gha rhọ vbe ugbo uwa gha die owa Nọyaẹnmwa Osanobua rua. Wa ghẹ ye ewẹn ohuan le ovbi ẹre.

Emwi Ne A Ve Kevbe Ibude

20I gha gie odibosa ke odaro ne uwa ne ọ gha degue uwa vbe odẹ kevbe ne ọ viọ uwa sẹ ehe ne I dọlọyi ye otọ. 21Wa ghi rhie ehọ ye ẹmwẹ ọnrẹn, wa gha ru vbene ọ khare. Wa ghẹ sọtẹ ghe ẹre rhunmwuda eni mwẹ ọre ọ ya ru emwi. Rẹn i ra ye egbe abakuru vberriọ bọ ọmwa. 22Sokpan deghẹ wa họn ẹmwẹ ọnrẹn wa na vbe gha ru emwi hia ne I khare, I gha gu eghian uwa hia gbinna, I ghi mu aro igbinna da iran. 23Odibosa mwẹ gha ke odaro ne uwa, ọ ghi viọ uwa gha rrie otọ iran ne emwa Amọri, Hiti, Pẹriz, Kenan, Hivi kevbe Jebus, I ghi vbe fuẹn iran an. 24Wa ghẹ ya uhunmwu rhanmwẹ otọ ne ẹbọ iran, wa ghẹ vbe ga iran. Wẹ ghẹ gho emwi ne avbe emwa nii gho wa ghi fuẹn avbe ẹbọ iran an fẹẹrẹ, wa ghi wa dunmwu okuta ẹbọ iran an. 25Wa gha ga imẹ e Nọyaẹnmwa Osanobua uwa, I gha vbe ye amẹ kevbe evbare sẹ uwa ọkẹn, I ghi vbe viọ avbe emianmwẹ hia hin ehe ne uwa ye rre. 26Egbe i ra gu okhuo ro vbe ẹvbo uwa, a i ra vbe miẹn agan vbọ. I gha rhie ẹdagbọn ne ọ taẹn ne uwa. 27I gha gie afianma mwẹ gha fian iran ni mu aro igbinna da uwa, I ghi fian otighi fi emwa ne uwa gu gbinna egbe, I ghi vbe gie avbe eghian uwa fi iyeke werriẹ ne iran le hin odaro uwa rre. 28I gha gie ugborrirri mwẹ ke odaro uwa ne ọ ya khulo avbe Hivi, emwa Kenan kevbe Hiti hin odaro uwa rre. 29Mẹ i ra khulo iran kua vbe ukpo ọkpa kẹkan, ne a ghẹ miẹn wẹ ẹvbo i ghi rre otọe nii, aranmwẹ akọn ghi do sẹ uwa abọ. 30Te I ra hẹko gha khulo iran kpao kherhe kherhe rhinrin wa te do biẹlẹ sayọ vbene obọ uwa gha na gba otọe nii ne uwa yan rẹn, 31I gha mwa otọ uwa ne ọ ke okun Akaba ya sẹ Okun Meditẹrrenian kevbe ke ato ya sẹ Ẹzẹ Yufretes. I gha rhie uwa obọ yan emwa ẹvbo nii uhunmwu, wa ghi vbe khulo iran hin odaro uwa rre vbe uwa a gha nana sikẹ odaro. 32Wa ghẹ gu iran, ra ẹbọ iran mu obọ vbe emwikemwi.

33Iran i ra de uwa ẹvbo ya ne iran ghẹ ya ye uwa ru khọ ghe mwẹ. A deghẹ wa ga ẹbọ iran evba ọre ọfuan uwa la dee.

Currently Selected:

Ẹksọdọs 23: EDO96

Highlight

Copy