Ẹksọdọs 21

Obọ Ne A Ya Mu Avbe Ọviẹn

(Diuteronomi 15:12-18)

1“Uhi na u ra gbe ma ivbi Izrẹl: 2A deghẹ u dẹ ovbi e Hibru ọviẹn, ukpo ehan ọre ọ ra ga la. Vbe ukpo ne ogihinrọn, a ghi faẹn fua vbe ne ẹ i na vbe ha osa rhọkpa. 3A deghẹ ọhae nọ vbe u dẹ ọre, ọ ghi vbe gha rrie zẹ vbe ọhae, sokpan a deghẹ ọ mwẹ okhuo, vbe ẹghẹ ne ọ na rre, amwẹ ọnrẹn ghi lele ẹe kpao. 4Deghẹ arowa ẹre rhie okhuo nẹ ẹn, ọ na biẹlẹ emọ ikpia kevbe emọ ikhuo nẹẹn, okhuo nii kevbe ivbi ẹre, ọghe arowa ẹre nọ, okpia nii vbe ẹhi ẹre ọkpa ọre ọ gha kpao. 5Sokpan deghẹ ọviẹn nii ghi kha wẹẹ, ‘Ẹmwẹ arowa mwẹ da mwẹ kevbe ọvbokhan mwẹ kevbe ivbi mwẹ I i ho ne I rhan egbe,’ 6ẹghẹ nii, arowa ẹre ghi rhie ẹre bu Osanobua gha dee, ọ ghi rhie ẹre gha die onurho ra ọkpẹn ẹkhu, ọ ghi ha ẹre ehọ. Rẹn ghi do gha re ọviẹn ọ te ya wu.

7“Omwa gha khiẹn ovbi ẹre ne okhuo zẹ vbe ọviẹn, ẹ i re vbene a ya fan ọviẹn ne okpia fua a gha ya gha fan ẹn fua. 8A deghẹ ọ ma yin ẹse da arowa ẹre ne ọ te ho ne ọ gha re ọkpa vbe uwu avbe amwẹ ọnrẹn, rẹn sẹtin gie erha ẹre dẹ ọe werriegbe, ẹ i mwẹ asẹ ne ọ gha ya khiẹn ọẹn ne orhunmwuyẹn, rhunmwuda, uyinmwẹ nii ma gba. 9Deghẹ ọmwa dẹ okhuo, wẹ ne irẹn rhie ẹre ne ovbi irẹn ne okpia, ọ ghi gha ya obọ ne ọ ya mu ivbi ẹre nikhuo muẹn.

10“A deghẹ ọ ghi rhie okhuo ọvbehe, ọ ghi ye gha rhie ne nokaro nii egbe evbare kevbe ukpọn ne ọ ka rhie nẹẹn yi, ke egbe ihe ne ọ ka ye de yi zẹ vbe okhuo ne ọ rre owa ọdọ. 11A deghẹ ọ ma ru nẹẹn vberriọ, ọ ghi fan ẹn fua vbe ne ẹ i na miẹn ẹre igho.

Uhi Ye Uyinmwẹ Ọkpankpan

12“Omwa ne ọ fi ọmwa emwi, ọ na gbe ẹe rua, a ghi vbe gbe ẹe rua. 13Sokpan, a deghẹ emwi udomwurri nọ ighẹ ọ ma te wẹ ne irẹn gbe ẹe rua, ọ sẹtin lẹ gha rrie eke ne I gha tama uwa. Ẹ i ghi rre ẹbe vbe odọ nii. 14Sokpan, ohu gha mu ọmwa ọ na wa rẹn gbe ọmwa ọvbehe ya, wa sẹtin kue si ẹe hin aka mwẹ rre ne a ya gbe ẹe rua.

15“Ọmwaikọmwa ne ọ fi erha zẹẹ ra iye zẹẹ emwi, te a gha gbe ẹe rua.

16“Omwa ne ọ ya ẹtin mu ọmwa ọvbehe, ọre ne ọ mu ẹn ye ima nọ ra ne ọ ya khiẹn ọẹn, te a gha gbe ẹe rua.

17“Omwa ne ọ tie ihẹn ne erha zẹẹ rha iye zẹẹ, te a gha gbe ẹe rua. 18A deghẹ ikpia gbinna ẹn ighẹ ọkpa na ya okuta ra ekpa fi enọkpa emwi, sokpan ọ ma gbe ẹe rua, a i ra rri ọre oya, sokpan a deghẹ te ọ ghi ya lovbiẹ, 19a na miẹn wẹ ọ ye sẹtin do gha khian, a gha rhe miẹn wẹ ọkpọ ọre ọ ghi ya tua otọ, ọmwa ne ọ fi ẹre emwi nii ghi ha osa ẹghẹ ne ọ miẹn ẹre re, ọ ghi gha gbe aro ghe ẹre egbe te do rran rẹn.

20“Omwa gha ya ukpokpo fi ọviẹn emwi, ọre okpia nọ ra okhuo, ighẹ ọ na wu vbe ọwarọkpa nii, a ghi rri ọmwa nii oya. 21Sokpan, a deghẹ ọviẹn ye ya ikpẹdẹ ọkpa ra eva vbe agbọn, a i ghi rri arowa ẹre oya. Emwi obọ ẹre ne ọ rhiae nii sẹ ẹe.

22“Ikpia gha gbinna iran na fi ẹkpoliyẹkẹ emwi, ọ na kpannọ kua sokpan ọ ma miẹn ikuangbe ọvbehe rhọkpa, a ghi fian ọmwa ne ọ fi ẹre emwi nii, emwi ne ọdafẹn ọnrẹn a rhirhi nọ, ọ ghi ha ẹre zẹ vbene nọbuohiẹn ta ẹe yi. 23Sokpan a i gha miẹn ighẹ okhuo nii miẹn ikuangbe, oya ne ọ ra re ọrọre wẹ orhiọn a ya ha osa orhiọn. 24Aro ye ihe aro, akọn ye ihe akọn, obọ ye ihe obọ, owẹ ye ihe owẹ, 25ẹwẹn erhẹn ye ihe ẹwẹn erhẹn, ikuan egbe ye ihe ikuan egbe, eguọguọ ye ihe eguọguọ.

26“Omwa gha fi ọviẹn ọnrẹn ne okpia ra ne okhuo emwi vbe aro ighẹ ọ na rhu, ọ ghi fan ọviẹn nii fua ne ọ ya ha ẹre osa aro ẹre. 27A deghẹ ọ kpan ẹre akọn, ọ ghi fan ọviẹn nii fua ne ọ ya ha ẹre osa akọn rẹn.

Iwinna Enọyan Emwi

28“Ẹmila gha sua okpia ra okhuo gbe uẹ ua, a ghi filo okuta gbe ẹe rua, a ghe vbe rri aranmwẹ ọnrẹn. Sokpan a i ra rri enọyan rẹn oya. 29Sokpan, a deghẹ ẹmila nii ka zẹ emwa khu dee yi ighẹ a vbe gie enarẹn rẹn vbene ọ ma na gba ogba muẹn yi, ọ gha gbe okpia ra okhuo, a ghi filo okuta gbe ẹe rua, a ghi vbe gbe enọyan rẹn rua. 30Sokpan, a deghẹ a fian igho nẹẹn ya de uhunmwu, ọ ghi ha igho hia ne a nọ rẹn ne ọ ya de uhunmwu. 31Adeghẹ ọvbokhan okpia ra ọvbokhan okhuo ọre nene ẹmila gbe, emwi ọkpa nii ọre a gha ru ye ehia. 32A deghẹ ọviẹn okpia ra ọviẹn okhuo ọre ọ gbe, enarẹn ghi hae nọyan ọviẹn nii e esiliva ọgban, a ghi filo okuta gbe ẹmila nii uan.

33“Omwa gha wẹ uvun ye otọ ra te ọ tọn uye ighẹ ọ ma gue ẹre, a deghẹ ẹmila ra ekẹtẹkẹtẹ na de yọ, 34rẹn ghi ha osa emwirri nii. Ọ ghi ha osa ẹre ne nọyan rẹn, sokpan rẹn o ghi yan ikun aranmwẹ nii. 35Ẹmila ọmwa gha gbe ẹmila ọmwa ọvbehe, iran eveva ghi khiẹn ẹmila nọ ma wu nọ rrọọ, iran ghi gha igho ẹre; iran ghi vbe gba gha ikun e ne ọ wu nii. 36Sokpan a gha rẹn wẹ erriọ ẹmila na ka gbinna yi ighẹ enarẹn ma gba ogba muẹn yi, ọ ghi mu osa hae, ọ ghi mu ẹmila nọ ma wu ya ha osa e nọwu nii, ẹmila nọwu nii ghi khian ọghọe.

Currently Selected:

Ẹksọdọs 21: EDO96

Highlight

Copy