Ẹksọdọs 2

Vbene A Biẹ Mosis Vbe Miẹn Rẹn Fan Hẹ

1Vbe uwu ẹghẹ na, okpia ọkpa vbe uniẹn Livai keghi vbe rhie okhuo ọkpa vbe uniẹn nii rọnmwẹ. 2Okhuo nii keghi hanmwa ọ na biẹ okpia nẹẹn. Okhuo nii ghi miẹn vbene ọmọ nii mose hẹ, ọ keghi mu ẹẹn lẹre la uki eha. 3Ugbẹn vbe ọ ma ghi gie ẹe rhie lẹre, ọ keghi mu okhuae ne a ya irunmwu do, ọ na ya ọdan vbe ibi rhu ẹe ne amẹ ghe larọ, ọ keghi mu ọmọ nii ye uwu ere, ọ keghi ya muẹn ye uwu irunmwu ne ọ wan ẹsẹse vbe ọkpẹn ẹzẹ. 4Ọtiọnrẹn ne okhuo keghi ya mudia ye urria ne ọ miẹn ehe na miẹn emwi ne ọ gha sunu vbe egbe ẹre.

5Ovbi ọba ne okhuo ke gha die ẹzẹ do khuẹ, avbe ọkpọmwa rẹn kegha lele ọkpẹn ẹzẹ khian. Rẹn keghi bẹghe okhuae nii vbe ọkpẹn ẹzẹ, ọ na gie ọviẹn ọnrẹn ne okhuo ne ọ ya muẹn rre. 6Ovbi ọba ghi wẹ ẹre, ọ keghi miẹn ọmọ okpia ọkpa vbọ, ọ gha viẹ, ohan rẹn keghi to ẹe, ọ na wẹẹ, “Usun ivbi e Hibru ọre ọ na khin.” 7Ọtiọnrẹn ne okhuo keghi nọ rẹn wẹẹ, “Ne I ya tie okhuo ọkokọmọ vbe uwu emwa Hibru guẹ ra ne ọ koko ọmọ na nuẹn?” 8Ọ keghi tama rẹn wẹẹ, “Gha khian.” Ọvbokhan okhuo nii keghi ya tie iye ọmọ nii rre. 9Ovbi ọba ne okhuo keghi tama rẹn wẹẹ, “Mu ọmọ na ne u ya koko ẹe mẹ, I gha ha ruẹ osa ẹre.” Ẹre okhuo nii na mu ọmọ nii, ọ na ya kokẹe. 10Ugbẹn vbe ọmọ nii ghi wan sẹ nẹ, ọ keghi muẹn gie ovbi ọba ne okhuo, ọ na ya ẹe ye ọmọ. Rẹn keghi kha wẹẹ, “Uwu amẹ I na muẹn ladian na hẹ ẹre Mosis.”

E Mosis Lẹ Gha Rrie Midian

11Ọ ghi kpẹe fua kherhe vbe Mosis ghi wan nẹ, ọ keghi ladian ne ọ ya tue avbe emwa rẹn, ighẹ ivbi e Hibru, ọ ke do miẹn vbe a ya ẹtin ya iran miẹn ẹsọn. Ọ na miẹn vbe ovbi Igipt ọkpa gbe ovbi e Hibru, ọkpa vbe uwu avbe emwa irẹn rua. 12E Mosis keghi ghe lẹga, ugbẹn vbe ọ ghi miẹn wẹ ọmwa rhọkpa i rre evba, ọ na gbe ovbi Igipt nii uan, ọ na tọnnọ ọẹn ye uwu uzekhae.

13Ẹdẹ ne ọ lele ẹe, ọ na vbe gha khian, ọ na miẹn ivbi e Hibru eva ni gu egbe iran gbinna, ọ keghi tama ne ọ ho ẹmwẹ vbọ wẹẹ, “Vbọzẹ ne u na gbe ovbi e Hibru ne ihua yi?” 14Rẹn keghi wanniẹn wẹẹ, “Gha ọ ya a ru enọkhaemwisẹ ra enọbuohiẹn yan ima yi? Te u ra do gbe mwẹ uan vbene u gbe ovbi Igipt nii uan ra?” Ohan keghi mu e Mosis, ọ na roro ẹe wẹẹ, “Emwa rẹn emwi ne I ru nẹ.” 15-16Ọba ghi do họn emwi ne ọ sunu, ọ keghi te ra gbe Mosis ua, sokpan rẹn keghi lẹ fe, ọ na gha rrie otọe Midian ya diẹe ya. Ọ ghi sẹ ẹdẹ ọkpa, ugbẹn vbe Mosis ghi tota ye ọkpẹn uhae, ohẹn ne ọ rre Midian kegha mwẹ emọ ikhuo ihinrọn. Iran keghi rre, iran na do sa amẹ, iran na vbe sa amẹ vuọn uroroamẹ ne ohuan kevbe ẹwe erha iran na wọn amẹ.

17Sokpan, avbe ọsuohuan keghi rre, iran na khulo ivbi e Jẹtro kua. E Mosis keghi bu iran rre, ọ na sa amẹ ne emwirri iran. 18Ugbẹn vbe iran ghi bu erha iran gha die owa, ọ keghi nọ iran wẹẹ, “Vbe uwa na rherhe rre sẹrriọ hẹ ere na yi?” 19Iran wanniẹn wẹẹ, “Ovbi Igipt ọkpa ọre ọ do miẹn ima fan vbe obọ avbe ọsuohuan, rẹn ọre ọ wa sa amẹ ne ima, ọ na vbe mu ne avbe emwirri wọn.” 20Rẹn keghi nọ ivbi ẹre wẹẹ, “Rẹn ghi vbo nian? Vbọzẹ ne uwa na sọrae ye odẹ yi? Wa ya tie ẹre rre ne ọ do gu ima rri evbare.”

21E Mosis na ghi wa tota vba, ọre Jẹtro na rhie ovbi ẹre ne a tie ẹre Zipora nẹẹn ne ọ rhie rọnmwẹ. 22Okhuo nii keghi biẹ ọmọ okpia ọkpa. E Mosis ke kha wẹẹ, “Ọrriọvbe ẹre I khin vbe ẹvbo ẹrrẹe, ọre I na he ere Gẹsiọm.” 23Ọ ghi kpẹe fua, ọba Igipt keghi wu. Ivbi Izrẹl kegha khiẹkhiẹ egbe vbe uwu ọviẹn ne iran ye, iran na gha tu nọ iyobọ. Eve iran keghi sẹ ehe ne Osanobua ye. 24Ọ keghi ghe ikhiẹkhiegbe iran, ọ na ye ile ne ọ gu Ebraham ta rre kevbe Aizik kevbe Jekọb. 25Ọ keghi miẹn ihe ọviẹn ne ivbi Izrẹl ye, ọ na ya egbe ne iran miẹn.

Currently Selected:

Ẹksọdọs 2: EDO96

Highlight

Copy