Matta 15

Jǝfʊlǝn Nǝb Dʊʊmɨ

(Mar 7:1-13)

1Nǝngɔ kaam nǝbɔ Farisaɨ jǝbɔ nǝb mɛlalɨ diilɔ a jel a Urushalima ja bɛ a daa Yesu woi, ja bʌ gǝn gɔ, 2“N wɛ a bwɨ bɛtɔ mɛlalɨ mʊnɔ mɨ bwangtǝn jǝfʊlǝn nǝb dʊʊm bǝnɔ lɛɨ? Mɨ jǝ saal kang jinɔ lɛ sǝla ja ja jǝjalǝnɨ.” 3Nǝngɔ a jǝla ji gɔ, “N wɛ a bwɨ mɨ jǝ́ bwangtǝn diil Kwaamaɨ lɛ a kɛl dul jǝfʊlǝn jeni? 4Kwaama a sʊwa gɔ, ‘Nǝ tɛtɛ mɔ jǝbɔ nɛnɛ mɔ dʊʊn.’ A sʊwa gɔ, ‘Na nʊ nɨ a sʊwa kɛl bwɨla a dul tɛtɛ gɨɨ jǝbɔ nɛnɛ gɨɨ, bɛ ja jʌ gǝn!’ 5A jenɔ jǝ́ sʊwa jengɔ, ‘Na nǝl a sʊwa tɛtɛ gɔ jǝbɔ nɛnɛ gǝ gɔ, “Kanjǝl nɨ na mǝ tɨka jen nɛ nǝnɨ, n kwɛl n swa swaɨ Kwaama gǝm yaa nǝngǝn!” ’ Na ga sʊwa nyɨɨ, jǝ́ mɛla jengɔ ga nǝ bɔ tɛtɛ gɔ dʊʊn. 6N jʊ a bwɨ jǝfʊlǝn jenɔ a dǝg jen mɨ jǝ́ bwangtǝn kɛl Kwaamaɨ lɛɨ. 7Nǝb fento nǝn kwan! N dǝngdǝng Ishaya a maa kuwotǝmkǝga a dul jeni, kwama a sʊwa gɔ,

8“ ‘Nǝb nɨ jǝ nɨ ɨ dʊʊnɔ

a nyiyo kwaagɔ.

Mʊgɔ nǝl jinɔ a kʊta jǝbɔ mǝ.

9Jǝ jʊng jǝ nɨ ɨ dʊʊn nǝn kwan,

jǝ maa mɛlalɨ diil nǝfitʌmi

maamɔ n mɛlalɨ diil Kwaamaɨ

jǝ maa lɛɨ.’ ”

Kanjǝl Nɨ Gǝ Dǝg Nǝbɔ Lɛ A Dutoi

(Mar 7:14-23)

10Yesu a jo nǝbɔ a bɛ a daa gǝ woi, nǝngɔ a sʊwa ji gɔ, “Jǝ́ nyʊwa sǝ jǝ́ nyǝm. 11Ke bɔ kanjǝl nɨ gǝ dɔ lɛ a nyiyo nǝlɨ gǝ kal gǝn nɛɨ, n kanjǝl nɨ gǝ jel lɛ a nyiyo nǝlɨ gǝ kal gǝn nɛɨ.”

12Nǝngɔ bɛtɔ mɛlalɨ gǝnɔ a bɛ a daa gǝ woi ja bʌ gǝn gɔ, “Mʊ nyǝm bɔ nǝbɔ Farisaɨ a maa nabwɨl nǝn kwama ja nyʊwa kɛl nɨɨ ka?”

13Nǝngɔ Yesu a jǝla ji gɔ, “Jʊtǝb nɨ gwam ke bɔ Tɨya mɨ nɨ a kwamaɨ a kwalɨ, jǝ kubom kubom. 14Jǝ́ bǝla ji wo, jǝ kululʌm, n nǝbɔ ta kululʌmɔ gǝm kang lɛɨ. Na kuli a ta kuli gǝm kangɨ, ya ja tǝla a bʊwa gwam jinɔ.”

15Nǝngɔ Bitrus a sʊwa gɔ, “Fɛta nǝn mɛlalɨ mʊsǝn kɛl nɨ.”

16Nǝngɔ a sʊwa ji gɔ, “Jen jǝ́ nyǝm bɔ kǝngkɔ dwal ka? 17Mǝ nʊng jʊ nɨ nǝl a jaɨ, dɔ a nyiyo gǝn dɨn, sǝla a gǝla mʊgɔ fʌl. Nǝn gul sǝla ba jel a daa tɛltǝm fʌl. 18Kanjǝl nɨ jel lɛ a mʊgɔ nyiyoi, gǝ jel a mʊgɔ nǝl, n kanjǝlɔ gǝ dǝg nǝl lɛ a dutoi. 19Bʊʊlalɨ bwɨlagɔ gǝ jel a mʊgɔ nǝl, jǝbɔ jʌtǝm dul, jǝbɔ bulon, jǝbɔ bwɨlan, jǝbɔ kuul, jǝbɔ nǝtǝm nyiyo gabakɛl jǝbɔ kaltǝm dun nǝbɨɨ. 20N kanjǝl nɨ gǝ dǝg nǝl lɛ a yǝlam nǝ duto a kǝga Kwaamaɨ. Jatǝm nǝn kang duto, mɨ gǝ dǝg nǝl lɛ a yǝlam nǝn duto a kǝga Kwaamaɨ.”

Nǝtǝm Bɨlǝngkɛl Bwɛn Kananaɨ

(Mar 7:24-30)

21Yesu a gun a bǝla daa gɔ a shu a tǝm Taya jǝbɔ Sidon. 22Nǝngɔ kaa bwɛn Kananaɨ, wʊnɨ yǝm a tǝm gɨɨ, a bɛ a daa gǝ woi, gaba wulongɔ lɛ gɔ, “Tɛlalɔ, Bʊla Daudaɨ! Ji bʊnǝn mǝndɨ! Yʊwa bwɨlagɔ a nyʊwa bwɛnɔɔlɨ mǝndɨ gǝm lɛ dangǝn.”

23Yesu a swa bɔ lɔl a daa gǝ woi, nǝngɔ bɛtɔ mɛlalɨ gǝnɔ a bɛ a daa gǝ woi ja tɨtǝn jǝ kel gǝn nɛ gɔ, “Kaa gǝn ya yilo, jʊ a bwɨɨ a tɨtǝn bwang bǝm lɛ gaba wulongɔ lɛ, mǝla bǝm lɔl lɛ nǝn wi.”

24Nǝngɔ a jǝla gɔ, “Mǝ, ja twam ɨ a daagɔ kwamɨ nǝbɔ Israilaɨ nɨ kwaaji a lɛlaɨ.”

25Nǝngɔ, nɔɔlɨ nɨ a bɛ ba jʊng a kǝga gǝn a sʊwa gɔ, “Tɛlalɔ, tɨka ɨ.”

26Nǝngɔ a jǝla gɔ, “A bʊm bɔ nyɔ ja do jǝjalǝn bɛtɨɨ ja nǝ sǝgantɨnɔ.”

27Nǝngɔ a sʊwa gɔ, “Ɔɔ, Tɛlalɔ, gǝ maa maa nyɔ, sǝgantɨnɔ gǝ ja ja fʌtʌlogi gǝnɔ tǝla lɛ a kang nǝ lɔngɨ.”

28Nǝngɔ Yesu a jǝla gǝn gɔ, “Nɔɔlɨ, nǝtǝm bɨlǝngkɛl mʊnɔ a lada! Bɛ a yǝlam nyɔ kanga mʊ swɨ lɛɨ.” A tʌgo a kang bwɛnɔɔlɨ gǝnɔ a gun.

Yesu A Gung Nǝbɔ A Lada

29Nǝngɔ Yesu a gun a daa gɔ a bwangtǝn a kʌng wɨma Galilii. A gwi dʌbʌl yemɔ a yɨɨ. 30Nǝbɔ a lada na a bɛ a daa gǝ woi, ja bɛ nǝn nǝbɔ naagɔ a swam swamɨ, jǝbɔ kululʌmɔ, jǝbɔ nǝbɔ jinʌnɔ a taam taamɨ, jinʌn jinɔ a yǝla a kwama tʌgo, jǝbɔ nǝbɔ nyiyogɔ a ta taɨ, jǝbɔ kaamɨ a lada nyɔ, ja bɛ nǝn ji a daa gǝ woi, nǝngɔ a gung jii. 31Nǝbɔ a lada a ta kang a nyiyo, jʊ a bwɨɨ ja nyʊwa gɔ nǝbɔ nyiyogɔ a ta taɨ sʊwa kɛl lɛ kǝngkɔ, jǝbɔ nǝbɔ jinʌnɔ a taam taamɨ, jinʌn jinɔ a yǝla kwama tʌgo, nǝbɔ naagɔ a swam swamɨ, yɔ yɔm lɛ, jǝbɔ kululʌmɔ kuwo daagɔ lɛ kǝngkɔ. Nǝngɔ ja bǝlá Kwaama Israilaɨ.

Jatǝm Nǝn Nǝbɔ Fʊlkʊblǝn Naal

(Mar 8:1-10)

32Nǝngɔ Yesu a jo bɛtɔ mɛlalɨ gǝnɔ a sʊwa ji gɔ, “Nǝb nɨ bʊna ɨ lɛ nyɔ, jʊ a bwɨɨ dwiyen kum jinɔ taal jǝbɔ mǝ, mɨ ji nǝn jǝjalǝn. Mǝ swɨ bɔ n ywa ji ja ja bɔ jǝl, kage ja gaa a gola.”

33Nǝngɔ bɛtɔ mɛlalɨ gǝnɔ a bʌ gǝn gɔ, “Bǝ nya jǝjalǝn nɨ fee a kuul nɨ, bǝ ja lɛ nǝn nǝb nɨ a lada nyɨɨ?”

34Nǝngɔ Yesu a bʌ ji gɔ, “Jǝ́ na nǝn kʊkkʊmɔ nyǝn?”

Nǝngɔ ja jǝla gɔ, “Nʌbʌl jǝbɔ kaam bɛlɨ jʌngi.”

35Nǝngɔ a sʊwa nǝbɔ gɔ ja yɨ yɨɨ a tǝmɨ. 36Nǝngɔ a do kʊkkʊm nɨ nʌbʌli jǝbɔ jʌngigɔ a buu Kwaama gǝm kangɨ, a kǝlsa a nǝ bɛtɔ mɛlalɨ gǝnɨ, ji tʌji ja nǝ nǝbɨɨ. 37Pʌd jinɔ ja ja, ja boba. Ja wɔɔ tangǝn fʌtʌlogi gǝnɨ, a yii daltɔ tunɔ nʌbʌl. 38Nǝb nɨ a jaɨ, batǝmɔ fʊlkʊblǝn naal, ja kiyo bɔ nɔɔtǝmɔ jǝbɔ bɛtɨɨ. 39Yesu a ywa nǝb nɨ a mʊrka a lada nyɨɨ, nǝngɔ a dɔ tɨyamwɛngɔ a shu a tǝm Magadanɨ.

Currently Selected:

Matta 15: DBD

Highlight

Copy