Matta 14

Bwaa Yohanaɨ Nǝ Yʊtǝm Mwɛ Sagsag

(Mar 6:14-29; Luk 9:7-9)

1Nǝn kwama nɨ Hiridus Fɔlɔgɔ a nyʊwa fulon Yesui, nǝngɔ a 2sʊwa nǝbɔ maa gǝm maajɨ lɛɨ gɔ, “Wʊnɨ nǝn Yohana nǝ Yʊtǝm mwɛ Sagsagɔ, a bʊla, a gun nǝn kʊlɨɨ. N jʊ a bwɨ a nya kwaan maatǝm kanjǝl laatǝm kangɨ.”

3A sʊwa nyɔ jʊ a bwɨɨ a kwamagɔ a shui Hiridus a ta Yohana a bwa, a mal a lɔsomi, a kɛl dul Hirudiyaɨ,#14:3 Hiridus a naa Hirudiya nwala kɨla gǝ Filibusi a wʊnɨ a dem kangɨ, wʊnɨ a nʊng a bʊm bɔ ga maa nyɨɨ, kɨla gǝ daam wo nǝn kʊlɨ. nwala kɨla gǝ Filibusi. 4Jʊ a bwɨɨ, Yohana sʊwa lɛ gɔ, a bʊm bɔ Hiridus a naa Hirudiya. 5Hiridus swɨ lɛ a jʌ Yohana sul, nyʊwa taal nǝbɨɨ lɛ, jʊ a bwɨɨ nǝbɔ a do gɔ Yohana n nǝkuwotǝmkǝga.

6Kum bʌtʌm Hiridusi a kɛla a bɛɨ, bwɛnɔɔlɨ Hirudiya a ye ye a kǝga faabǝm nɨ ja bɛ dikulomi, Hiridus a nyʊwa lǝma ye gǝnɔ. 7Nǝngɔ a wɛɛl wɛɛlɨ jǝbɔ swatǝm yaa gɔ gǝ nǝ gǝn nǝ gwam jʊ nɨ ga bʌ lɛɨ. 8Nǝngɔ nɛnɛ gɔ a sʊ gǝm yʊlan kɛl gɔ ga sʊwa gɔ, “Nɨ ɨ dul Yohanaɨ nǝ Yʊtǝm mwɛ Sagsagɔ a bashɛ kǝngkɔ.” 9Fɔlɔgɔ a maa bwantǝm dangǝn, n kɛl dul swatǝm yaa nɨ ga maa a kǝga faabǝm gǝnɔ gǝmɨ, nǝngɔ a jǝla gǝmɨ. 10A twam ya ja mwatɨ dul Yohanaɨ a lɔsomii. 11Ja bɛ nǝn dulɔ a bashɛɨ ba ja nǝ bwɛnɔɔlɨgɨɨ, nǝngɔ a yɔ nɛnɛ gɔ gǝm nǝngǝnɨ. 12Nǝngɔ bɛtɔ mɛlalɨ Yohanaɨ ya ja do bʌlʌnɔ ja fʌli. Nǝngɔ ya ja sʊwa Yesui.

Yesu A Ja Nǝn Nǝbɔ Fʊlkʊblǝn Nʊ

(Mar 6:30-44; Luk 9:10-17; Yoh 6:1-14)

13Yesu a nyʊwa nyɨɨ, nǝngɔ a gun a dɔ tɨyamwɛngɔ a yab a shu a kaa daa nɨ mɨ kaa nǝl woi, sǝ ya yɨ wo kwaagɔ. Nǝbɔ a nyʊwa nyɨɨ, nǝngɔ ja jela a tuulɔtɨnɔ gǝm ja bwang gǝm nǝn naaɨ. 14A jel a tɨyamwɛng a kuwo kʌm nǝbɨɨ a mʊrka a lada nyɨɨ, bʊnatǝmɔ a ta gǝn, a gung nǝb bɔɔlamɔ a kʊm jin.

15Nǝn kwama dǝlǝng, nǝngɔ bɛtɔ mɛlalɨ gǝnɔ ja mʊrka a daa gǝ woi, ja sʊwa gɔ, “Daa nɨ mɨ nǝb wo, n wɔ kwamagɔ a lɛ, ywa nǝbɔ sǝ ja yɔ a bɛlɨ tuulɔtɨn ya ja ten jǝjalǝnɔ wo.”

16Nǝngɔ Yesu a sʊwa ji gɔ, “Mɨsɔ jǝ shu lɛ, jǝ́ nǝ ji jǝjalǝnɔ ja ja.”

17Nǝngɔ ja sʊwa gǝn gɔ. “Mɨ nǝn nǝn kaa jǝl, na ke bɔ kʊkkʊm nɨ nʊ jǝbɔ jʌngitɨnɔ yoi.”

18Nǝngɔ a sʊwa gɔ, “Jǝ́ bɛ mɨ nǝn.” 19Nǝngɔ a sʊwa nǝbɔ gɔ ja yɨ yɨɨ a dʌbʌl yǝlaɨ. Nǝngɔ a do kʊkkʊm nɨ nʊɨ jǝbɔ jʌngitɨn nɨ yoi, a gung dul gǝnɔ a dʌbʌli, a buu Kwaama gǝm kangɨ, nǝngɔ a kǝlsa kʊkkʊmɨ. Nǝngɔ a nǝ bɛtɔ mɛlalɨ gǝnɔ gɔ ja nǝ nǝbɔ. 20Gwam jinɔ ja ja, ja boba. Bɛtɔ mɛlalɨgɔ a mʊr fʌtʌlogi jǝjalǝnɔ a bǝlaɨ, a yiilo tunɔ kʊb jeli yo. 21Batǝmɔ fʊlkʊblǝnɔ nʊ n nǝbɔ ja ja jǝjalǝnɨ, ja kiyo bɔ nɔɔtǝmɔ jǝbɔ bɛtɨɨ.

Yesu A Yɔ Yɔm A Dʌbʌl Mwɛ

(Mar 6:45-52; Yoh 6:15-21)

22Jǝ dɨ lɛ nyɨɨ, nǝngɔ Yesu a dǝg bɛtɔ mɛlalɨgɔ ja dɔ tɨyamwɛngɔ sǝ ja yǝla a dʌng wini. Nǝngɔ a tɨ wo a daa gɔ sǝ a ywa nǝbɔ a golaɨ. 23Kwamagɔ a ywam nǝbɨɨ, nǝngɔ a gwi yemɔ kwaagɔ win sǝ a maa keli wo. Kwama yukumɔ a nya gǝn wo kwaagɔ win. 24A kwama gɔ tɨyamwɛngɔ gǝ na a tɨbǝl wɨma, a kʊta jǝbɔ kʌng wɨmagɔ. Yʊwa mwɛmɔ mǝg tɨyamwɛngɔ lɛ. Yʊwagɔ kom ji lɛ.

25Kemʌnɔ taal na kum Yesu yɔ lɛ a dʌbʌl wɨma, bɛ lɛ a daa bɛtɔ mɛlalɨ gǝnɔ woi. 26Kwama nɨ bɛtɔ mɛlalɨ gǝnɔ a kuwo gǝn yɔ lɛ a dʌbʌl wɨmaɨ, nǝngɔ ja nyʊwa taal jǝ sʊwa lɛ gɔ, “N bʊtɔ!” Ja nyʊwa taal ja ga kwaalɨ.

27Yesu a sʊwa ji kɛlɔ tʌgo a kang gɔ, “Nǝmǝ, ka jǝ́ nyʊwa lɛ taal!”

28Nǝngɔ Bitrus a jǝla gǝn gɔ, “Tɛlalɔ, na nǝn nǝmɔɨ, jǝla mɨ n yɔ a daa mʊ woi a dʌbʌl mwɛ.”

29Nǝngɔ Yesu gɔ, “Bɛ.”

Nǝngɔ Bitrus a gǝla a dʌbʌl tɨyamwɛng a tǝl yɔmɔ a dʌbʌl mwɛɨ, yilo a daa Yesu woi. 30A kuwo yʊwagɔ a kwamɨ, nǝngɔ a nyʊwa taalɨ, a tǝl lɛm lɛɨ, a ga kwaalɨ gɔ, “Tɛlalɔ, bʊʊ nǝn mǝ!”

31Tʌgo a kang nǝngɔ Yesu a mal kang gǝnɔ a ta gǝnɨ, nǝngɔ a sʊwa gǝn gɔ, “Mɔ nǝ nǝtǝm kǝlɨ bɨlǝngkɛl, n wɛ a bwɨ mʊ kǝma lɛɨ?”

32Ja dɔ tɨyamwɛngɨ, nǝngɔ yʊwagɔ a tam maatǝmɨ. 33Nǝbɔ a mʊgɔ tɨyamwɛngɨɨ a jʊng a nǝ Yesu dʊʊn, jǝ sʊwa lɛ gɔ, “Bɨlǝngǝn, mʊ nǝn Bʊla Kwaamaɨ.”

Yesu A Gung Nǝbɔ Mɨ Kwamɨgǝnɨ A Janisarata

(Mar 6:53-56)

34Ja yab wɨmagɨɨ, nǝngɔ ja bɛ a kʌng wɨmagɔ gǝm a tǝm Janisarataɨ. 35Nǝbɔ tǝmgɨɨ ja nyǝm gǝnɨ, nǝngɔ ja twam gɔ, ya ja sʊwa nǝb nɨ gwam a tǝmgɨɨ, sǝ ja bɛ gǝm nǝn nǝb nɨ mɨ kwamɨgǝnɨ. 36Ja kela gǝn sǝ jǝ ke nyiyo dwang malǝng gǝnɔ. Gwam nǝb nɨ a kei, ja gun a twɨla jinɔ gǝm.

Currently Selected:

Matta 14: DBD

Highlight

Copy