Yohana 8
8
Nɔɔlɨ Nɨ Ja Ta Nǝn Buloni
1Nǝngɔ Yesu a gun a shu a Yem Zaituni. 2Nǝn kumsʌl butʌb nǝngɔ Yesu a yǝla shu a talɨ Kan Kwaamanɨ. Nǝbɔ gwam a bɛ daa gǝ woi, nǝngɔ a yɨ mɛla jim lɛɨ. 3Nǝb mɛlalɨ diilɔ jǝbɔ nǝbɔ Farisaɨ ja bɛ gǝm nǝn kaa nɔɔlɨ nɨ ja ta a daa buloni. Nǝngɔ ja dǝg gǝn a tɨ a tɨbǝl jini. 4Nǝngɔ ja sʊwa Yesu gɔ, “Feyi, nɔɔlɨ nɨ ja ta gǝn a mʊgɔ maatǝm bulon. 5Diil Musaɨ a nʊng bǝn gɔ bǝ mala nǝb nɨ nǝn tɛl sǝ ja bʊlala. A mʊnɔ n wɛ mʊ kuwoi?” 6Ja bʌ gǝn jʊ nɨ sǝ ja tɛl gǝn, sǝ ja nya gǝn nǝn bwɨlangkɛl nɨ jǝ yɔ lɛ nǝn gɔ a kan borangɨ.
Nǝngɔ Yesu a lii, a maa mʊlalɨgɔ a tǝm nǝn bawuli kang gǝnɨ. 7Ja tɨtǝn jǝ maa Yesu gǝm bʌbotǝm lɛɨ, nǝngɔ a gun a sʊwa ji gɔ, “Nʊ nɨ a maa bɔ bwɨlangkɛl wo a kʊm jeni, ga tǝl matǝm gǝnɔ nǝn tɛl.” 8Nǝngɔ Yesu a yǝla a lii, a maa mʊlalɨgɔ a tǝmɨ. 9Ja nyʊwa nyɨɨ, nǝngɔ ja tǝl jelatǝmɔ win wini, a tǝl nǝn dʊʊmɔ a yɔ nǝn a bɛtɨ gǝmɨ, ba bǝla Yesu jǝbɔ nɔɔlɨ nɨ tɨm a kǝga gǝnɨ. 10Nǝngɔ Yesu a gun a bʌ gǝn gɔ, “Nɔɔlɨ, jǝ fee? Mɨ nʊ nɨ wo a nǝ ń bwɨlangkɛlɨ ka?”
11Nǝngɔ a jǝla gǝn gɔ, “Nǝ dʊʊ, mɨ kaa nǝl wo fɔ.” Nǝngɔ Yesu gɔ, “Mǝ tǝmɨ mǝ biyo mʊn bɔ borang. Yilo, ka ń yǝla lɛ ń maa bwɨlangkɛl tag.”
Yesu Nǝn Gɔ Nyalǝm Yooligɨɨ
12Nǝngɔ Yesu a sʊtǝn sʊwatǝm nǝbɔ kɛlɔ gɔ, “Nǝmǝ mǝ nyalǝm yooligɨɨ. Nʊ nɨ bwang mɨ lɛɨ mɨsɔ yɔ yɔm lɛ a duddugi, nya nya nyalǝm kʊlɨ.”
13Nǝngɔ nǝbɔ Farisaɨ a sʊwa Yesu gɔ, “Mʊ nǝ nyiyo lɛ a dul mʊn nǝn kang mʊn. Sʊwatǝm kɛl mʊnɔ mɨ dǝngdǝng.” 14Yesu a jǝla ji gɔ, “Na n nǝ nyiyo a dul mɨɨ, nǝtǝm nyiyo mǝndɨ n bɨlǝngkɛl, jʊ a bwɨɨ n nyǝm daagɔ mǝ jelʌmi jǝbɔ daagɔ mǝ yilomi. Jen jǝ́ nyǝm bɔ daagɔ mǝ jelʌmi jǝbɔ daagɔ mǝ yilom tagɨ. 15Jen jǝ́ mwatɨ borangɔ a kuwotǝm nǝfilii. A mǝndɨ mɨ mǝ mwatɨ nǝl gǝm borang lɛ. 16Na mǝ biyo biyo borangɨ, biyotǝm borang mǝndɨ n dǝngdǝng. Jʊ a bwɨɨ ke bɔ mǝ kwaamɨ mǝ maa lɛɨ, mǝ maa nǝbɔ Tɛtɛ mɨ nɨ a twam ɨɨ. 17A mʊgɔ diil jenɔ gǝmɨ, a mʊla mʊlaɨ gɔ, na nǝb yo ja nǝ nyiyo a dul jʊ wini, jǝ yo yo nǝtǝm nyiyo jinɔ, n dǝngdǝng. 18Mǝ tǝmɨ mǝ nǝ nǝtǝm nyiyo a dul mɨ. Tɛtɛ mɨ a twam ɨɨ nǝn gɔ na yogɨɨ.”
19Nǝngɔ ja bʌ gɔ, “Tɛtɛ mɔ gǝ na a fee?” Yesu a jǝla ji gɔ, “Jǝ́ nyǝm ɨ bɔ. Jǝ́ nyǝm bɔ Tɛtɛ mɨ. Na na jǝ́ nyǝm ɨɨ, na jǝ́ nyǝm tɛtɛ mɨ tag.”
20Yesu a sʊwa kɛl nɨ nǝn kwama maam mɛlalɨ lɛ nǝn dɔɔm a gwanga daa nɨ jǝ yam kemʌn nɛ a Kan Kwaamanɨ. Mɨ nʊ nɨ a ta gǝnɨ, jʊ a bwɨɨ kwama gǝnɔ a la bɔ dɨn.
Daa Nɨ Mǝ Yilomi Mɨsɔ Jǝ́ Dwal Lɛ Jǝ́ Yɔ Wo
21Nǝngɔ Yesu a sʊtǝn sʊwatǝm nǝbɨɨ gɔ, “Mǝ shu shu, jǝ́ saa ɨ saa ɨ, jǝ́ bʊla bʊla a mʊgɔ bwɨlangkɛl jenɔ gǝm. Daagɔ mǝ shum lɛɨ, mɨsɔ jǝ́ dwal lɛ jǝ́ yɔ wo.”
22Jʊ nɨ a dǝg nǝb dʊʊm Yahudawagɔ a sʊwa gɔ, “Gǝ jʌ jʌ dul gǝnɔ ka? N jʊ a bwɨ a sʊwa gɔ daa nɨ gǝ shum lɛɨ, mɨsɔ bǝ dwal lɛ bǝ yɔ woi ka?”
23Nǝngɔ Yesu a ja kǝga sʊwa lɛ gɔ, “Jen jǝ́ na fɔ a tǝm nɨɨ, a mɨɨ mǝ jel a dʌbʌl. Jen jǝ́ na yooli nɨɨ, a mɨɨ mǝ ke bɔ a yooli nɨ. 24N jʊ a bwɨ mǝ sʊwa jen mǝ jǝ́ bʊla bʊla a mʊgɔ bwɨlangkɛl jenɔ gǝmɨ. Na jǝ́ nǝ bɔ bɨlǝngkɛl gɔ nǝmǝ mǝ nʊ nɨ mǝ sʊwa jen mǝ nǝn nǝmɨɨ, jǝ́ bʊla bʊla a mʊgɔ bwɨlangkɛl jenɔ gǝm.”
25Nǝngɔ ja bʌ Yesu gɔ, “Nǝmɔ mʊ wo?” Yesu a jǝla ji gɔ, “Nǝmǝ mǝ nʊ nɨ mǝ sʊwa jen nǝn tɨkǝgaɨ. 26Mǝ nǝn kanjǝl nɨ a lada mǝ sʊwa lɛ a dul jeni, sǝ n maa jem borang nǝn. Nʊ nɨ a twam ɨɨ n nǝ bɨlǝngkɛl. Jʊ mǝ nyʊwa a daa gǝ woi jʊ mǝ sʊwa yooligɔ lɛɨ.”
27Nǝbɔ a nyǝm bɔ gɔ gǝ sʊwa ji kɛl a dul Tɛ bwɛɨ. 28N jʊ a bwɨ Yesu a sʊwa ji gɔ, “Nǝn kwama jǝ́ gung Bʊla Nǝlɨ lɛɨ a dʌbʌl tɨyaɨ, n kwama jǝ́ nyǝm lɛ nǝmǝ mǝ nʊ nɨ mǝ sʊwa jen mǝʊ nǝmɨɨ. Jǝ́ nyǝm nyǝm jengɔ kanjǝlɔ mǝ maa lɛɨ, ke bɔ nǝn fɔlɔn mɨ. Mǝ sʊwa jʊ nɨ Tɛtɛ a mɛla mɨɨ. 29Nʊ nɨ a twam ɨɨ, gǝ na jǝbɔ mǝ. A bǝla ɨ bɔ kwaamɨ, jʊ a bwɨɨ mǝ maa jʊ nɨ gǝ swɨ lɛɨ kwangkwang.” 30Nǝn kwama Yesu sʊwa kanjǝl nɨ lɛɨ, nǝbɔ a lada a nǝ bɨlǝngkɛl a daa gɔ woi.
Bɨlǝngkɛlɔ Nǝn Gɔ Jǝg Jen Nɛɨ
31Nǝngɔ Yesu a sʊwa Yahudawa nɨ a nǝ bɨlǝngkɛl a daa gɔ woi gɔ, “Na jǝ́ ja kǝga nǝn tatǝm mɛlalɨ mǝndɨ, jǝ́ bɛtɔ mɛlalɨ mɨ, nǝn bɨlǝngǝn. 32Jǝ́ nyǝm nyǝm bɨlǝngkɛlɔ, bɨlǝngkɛlɔ nǝn gɔ jǝg jen nɛɨ.”
33Nǝngɔ ja jǝla gǝn gɔ, “Nǝn nǝn guu Ibrahimi. Nǝn yǝlam bɔ bwɛ jwaalɛ nǝlɨ wo. N wɛ bwɨ mʊ sʊwa mɔʊ nǝn nya nya jǝgtǝmɨ?”
34Nǝngɔ Yesu a jǝla ji gɔ, “Bɨlǝngkɛl, mǝ sʊwa jen nɛɨ, nʊ nɨ maa bwɨlangkɛl lɛɨ, n bwɛ jwaalɛ bwɨlangkɛl. 35Bwɛ jwaalɛ mɨ gǝ yɨ lɛ jǝbɔ nǝb lɔngɔ mɨ dɨtǝm wo. Bwɛ lɔngɔ n bwɛ lɔ mɨ dɨtǝm wo. 36Na Bwɛ a jǝg jeni, jǝ́ nya nya bɨlǝng jǝgtǝm. 37N nyǝm jǝ́ guu Ibrahimi sul, jǝ́ swɨ lɛ jǝ́ jʌ i, jʊ a bwɨɨ jǝ́ yo bɔ mɛlalɨ mǝndɨ. 38Mǝ sʊwa jen jʊ mǝ kuwoi a daagɔ Tɛtɛ mɨ woi. Jen jǝ́ maa jʊ nɨ jǝ́ nyʊwa a daagɔ tɛtɛ jen woi.”
Mammɔ Nǝn Tɨya Jen
39Nǝngɔ ja jǝla gǝn gɔ, “Ibrahim nǝn tɨya nǝn.” Nǝngɔ Yesu a jǝla ji gɔ, “Na na jǝ́ bɛtɔ lɔ Ibrahimi, na jǝ́ maa kanjǝl nɨ Ibrahim a maaɨ. 40Mǝ nʊ nɨ mǝ sʊwa jen bɨlǝngkɛl nɨ mǝ nyʊwa a daagɔ Kwaama woi, kǝngkɔ jǝ́ swɨ lɛ jǝ́ jʌ i. Ibrahim a maa bɔ jʊ nɨ wo. 41Jǝ́ maa jʊ nɨ tɛtɛ jen a maaɨ.”
Nǝngɔ Yahudawagɔ a sʊwa gɔ, “Nǝn nǝn ke bɔ nǝb yʊwam. Kwaama nǝn Tɨya nǝn. Nǝn gɔ kwaagɔ win nǝn Tɨya nǝnɨ.”
42Yesu a sʊwa ji gɔ, “Na na Kwaama nǝn Tɨya jeni, na jǝ́ swɨ ɨ lɛ, jʊ a bwɨɨ mǝ jel a daa gǝ woi, kǝngkɔ mǝ wɔ. Ke bɔ mǝ mǝ bɛ nǝn kang mɨɨ. Nǝn Kwaama a twam ɨɨ. 43N wɛ bwɨ jǝ́ nyǝm bɔ kɛl mǝndɨɨ? Jʊ a bwɨɨ jǝ́ dwal bɔ nyʊwatǝm mɛlalɨ mǝndɨ. 44Jen jǝ́ na a tɨya jen Mammɨ. Jǝ́ saa lɛ jǝ́ maa jʊ nɨ swɨ lɛɨ. N nǝ jʌtǝm dul a tǝltǝmɔ gǝm. Mɨ mwɛ gǝn wo nǝn bɨlǝngkɛl, jʊ a bwɨɨ mɨ bɨlǝngkɛl wo a fʌl gǝn. Gwam kwama nɨ maam gabakɛl lɛɨ, gǝ nʊng bʊʊlalɨ gǝn, jʊ a bwɨɨ n nǝ gabakɛl, tɛ bwɛ gabakɛl. 45Jʊ a bwɨɨ mǝ sʊwa bɨlǝngkɛlɔ lɛ, jǝ́ nǝ bɔ bɨlǝngkɛl a daa mǝ woi. 46Nuwo a kʊm jen nʊng lɛ gɔ n maa bwɨlangkɛl woi? Na n bɨlǝngkɛl mǝ sʊwa lɛɨ, n wɛ a bwɨ jǝ́ nǝ bɔ bɨlǝngkɛl a daa mɨ woi? 47Nʊ nɨ na a Kwaamaɨ, gǝ nyʊwa nyʊwa jʊ nɨ Kwaama sʊwa lɛɨ. Jʊ a bwɨ mɨ jǝ́ nyʊwa jʊ nɨ lɛ Kwaama sʊwa lɛɨ, jǝ́ ke bɔ a Kwaamaɨ!”
Yesu A Laa Ibrahim
48Nǝngɔ Yahudawagɔ a jǝla gǝn gɔ, “Nǝn sʊwa nǝngɔ mʊ bwɛ Samariya, mɔ nǝngǝn nǝn yʊwa bwɨla. Mɨ nyɔ ka?”
49Yesu a jǝla ji gɔ, “Mǝ mɨ mǝ nǝn yʊwa bwɨla. N dʊʊl Tɛtɛ mɨ, jen jǝ́ soga ɨ lɛ. 50Ke bɔ mǝ mǝ saa dul mɨ gǝm dʊʊlǝn nɛɨ. Kaa nǝl wo saa mɨ dʊʊlǝn nɛɨ, nǝn gɔ maa borangɔ lɛɨ. 51N bɨlǝngkɛl mǝ sʊwa jen nɛɨ, nʊ nɨ bwangtǝn mɛlalɨ mǝndɨ lɛɨ, mɨsɔ bʊla lɛ wo.”
52Nǝngɔ Yahudawagɔ a sʊwa gǝn gɔ, “Kǝngkɔ nǝn nyǝm mʊ nǝngǝn nǝn yʊwa bwɨla. Ibrahim jǝbɔ nǝbkuwotǝmkǝgagɔ ja bʊlala. Mɔ ń sʊwa mɔʊ nʊ nɨ bwangtǝn mɛlalɨ mʊnɔ lɛɨ, mɔʊ mɨsɔ bʊla lɛ wo. 53Mʊ bʊʊla mɔʊ ń laa tɨya nǝn Ibrahim ka? Gǝ tǝgǝn a bʊla. A na nyɔ nǝbkuwotǝmkǝgagɔ ja bʊlala. Mɔ bʊʊla mɔʊ nǝmɔ mʊ wo?”
54Nǝngɔ Yesu a jǝla ji gɔ, “Na n nǝ dul mǝndɨ dʊʊlǝnɨ, dʊʊlǝn mǝndɨ mɨ a nyiyo jǝl. Nʊ nɨ dʊʊlɨ ɨ lɛɨ, nǝn gɔ nǝn Tɛtɛ mɨ, wʊnɨ jǝ́ sʊwa lɛ jengɔ Kwaama jeni. 55Jen jǝ́ nyǝm gǝn bɔ. Mǝ n nyǝm gǝn. Na na n sʊwa jen mǝʊ mǝ nyǝm gǝn bɨɨ, n yǝlam nǝ gabakɛl na jen. N nyǝm gǝn, n bwangtǝn mɛlalɨ gǝnɔ. 56Tɛtɛ jen Ibrahim a maa fulotǝm nǝl nyangǝn, jʊ a bwɨɨ kuwo kuwo jol mǝndɨ. A kuwo, a maa fulotǝm nǝl.”
57Nǝngɔ Yahudawagɔ a sʊwa Yesu gɔ, “N wɔ kǝngkɔ mɔ la bɔ jolɔ fʊltǝnʊ, nǝngɔ mɔ sʊwa lɛ tag mɔ ń kuwo Ibrahimi ka?”
58Yesu a jǝla gɔ, “N bɨlǝngkɛl mǝ sʊwa jen nɛɨ, lǝga bɔ ja bʌ Ibrahim, mǝ fɔ.” 59Yesu a sʊwa kɛl nɨ nyɨɨ, nǝngɔ ja wɔɔ tatǝnɔ jǝ swɨ lɛ ja mala gǝn ja jʌi. Nǝngɔ Yesu a waam, a jel a bǝla Kan Kwaamanɨ.
Currently Selected:
Yohana 8: DBD
Highlight
Share
Copy
Want to have your highlights saved across all your devices? Sign up or sign in
©️2024 Luke Initiative for Scripture Translation
