Yohana 14
14
Yesu Nǝn Gɔ Gola Yɔm A Lɔ Tɛtɛɨ
1“Ka jǝ́ kom lɛ dul jenɔ. Bɛ jǝ́ nǝ bɨlǝngkɛl a daa Kwaama woi, jǝ́ nǝ bɨlǝngkɛl a daa mǝ woi tag. 2A mʊgɔ lɔ Tɛtɛ mɨɨ, kantɨnɔ wo a lada. Na na mɨ nyɨɨ, na mɨsɔ mǝ sʊwa jen nɛ. Mǝ yi fʌlen sǝ n fɛka jem daagɔ. 3Na ya n fɛka jem daagɨɨ, sǝla n yǝla ba n yɔ nǝn jen a daa gɔ, sǝ tʌjen jǝ́ yɨ a daa mǝ woi. 4Daagɔ mǝ yilomi, jǝ́ kwɛl jǝ́ nyǝm golagɔ.”
5Nǝngɔ Toma a sʊwa gǝn gɔ, “Tɛlalɔ, nǝn nyǝm bɔ daa mʊ yilomi. La nǝ maa nyǝn nǝn nyǝm golagɔ lɛɨ?”
6Yesu a jǝla gǝn gɔ, “Nǝmǝ mǝ golaɨ, nǝmǝ mǝ bɨlǝngkɛlɨ, nǝmǝ mǝ kʊlɨ tagɨ. Mɨ nʊ nɨ wo yɔ lɛ a daagɔ Tɛtɛ woi, na ke bɔ a gola mɨɨ. 7Na na jǝ́ nyǝm ɨɨ, na jǝ́ nyǝm Tɛtɛ mɨ tǝgǝn. Jʊ a ta kǝngkɨɨ jǝ́ nyǝm gǝn, jǝ́ kuwo gǝn.”
8Nǝngɔ Filibus a sʊwa gǝn gɔ, “Tɛlalɔ, nʊng nǝn Tɛ bwɛ, sǝ nǝl nǝnɔ a daa.”
9Yesu a jǝla gǝn gɔ, “Filibus, n yɨ nǝbɔ jen fanga kǝrnɨ, mʊ nyǝm ɨ bɔ ka? Gwam nʊ nɨ a kuwo ii, a kuwo Tɛ bwɛ. Wɛ mʊ sʊwa lɛ mɔʊ, ‘Nʊng nǝn Tɛ bwɛɨ’? 10Mʊ nǝ bɔ bɨlǝngkɛl mɔʊ mǝ na a mʊgɔ Tɛ bwɛɨ, Tɛ bwɛ gǝn na a mʊgɔ mɨɨ ka? Kɛl nɨ mǝ sʊwa jen nɛɨ, ke bɔ fɔlɔn dul mɨ. Tɛ bwɛ nɨ a mʊgɔ mɨɨ, nǝn gɔ maa maajɨ gǝnɔ lɛɨ. 11Nǝn kwama mǝ sʊwa mǝʊ mǝ na a mʊgɔ Tɛtɛɨ, Tɛtɛ gǝ na a mʊgɔ mɨɨ, jǝ́ nǝ bɨlǝngkɛl a mǝ gǝm. Na mɨ nyɨɨ, jǝ́ nǝ bɨlǝngkɛl a daa mɨ woi a dul kanjǝl laatǝm kang nɨ mǝ maaɨ. 12N bɨlǝngkɛl mǝ sʊwa jen nɛɨ, gwam nʊ nɨ a nǝ bɨlǝngkɛl nǝn mǝɨ, maa maa maajɨtɨn nɨ mǝ maa lɛɨ. Gǝ maa maa maajɨtɨn nɨ a laa a nɨɨ, jʊ a bwɨɨ mǝ yi a daagɔ Tɛtɛ woi. 13Gwam jʊ nɨ jǝ́ kel a mʊgɔ dun mɨɨ, mǝ maa maa, sǝ Tɛ bwɛ a nya dʊʊlǝn a dul Bʊla gɨɨ. 14Jʊ nɨ jǝ́ kel pʌd nǝn dun mɨɨ, mǝ maa maa.
Swatǝm Yaa Bɛtǝm Yʊwa Kwaamaɨ
15“Na jǝ́ maa mɨ swɨtǝm lɛɨ, jǝ́ bwangtǝn bwang diil mǝndɨ. 16Mǝ kel kel Tɛtɛ, a nǝ jen kaa Nǝ tɨkalɨ, sǝ a yɨ jǝbɔ jen mɨ dɨtǝm wo. 17Nǝn gɔ Yʊwa bɨlǝngkɛlɨ, wʊnɨ yooli nɨ a dwal bɔ a yo gǝnɨ, jʊ a bwɨɨ a kuwo gǝn bɔ, a nyǝm gǝn bɔ. A jenɔ jǝ́ nyǝm gǝn, jʊ a bwɨɨ, yǝm dakini jǝbɔ jen, yɨ yɨ a mʊgɔ nǝl jen. 18Mɨsɔ mǝ bǝla jen nɛ na bɛtɔ kwɛlǝn. Mǝ bɛ bɛ a daa jen woi. 19Kumtɨnɔ a bǝla nǝn dǝm nyɔ, yooli nɨ mɨsɔ kuwo i lɛ wo tag. A jenɔ jǝ́ kuwo i kuwo i. Jʊ a bwɨɨ n na nǝn dʊʊmɨ, jen tʌjen jǝ́ na na nǝn dʊʊmɨ. 20Nǝn kɔkɔ gɔ, jǝ́ nyǝm nyǝm mǝ na a mʊgɔ Tɛtɛ mɨɨ, jen tʌjen a mʊgɔ mɨ, mǝ tǝmɨ a mʊgɔ jen. 21Gwam nʊ nɨ a nyǝm diil mǝndɨ bwangtǝn nɛɨ, nǝn gɔ nʊ swɨ ɨ lɛɨ. Nʊ nɨ swɨ ɨ lɛɨ, Tɛtɛ mɨ swɨ gǝn swɨ. Mǝ tǝmɨ mǝ swɨ gǝn swɨ, mǝ nʊng nʊng dul mǝndɨ a daa gǝ woi.”
22Nǝngɔ Yahuza (ke bɔ Yahuza Iskariyoti) a bʌ gǝn gɔ, “Tɛlalɔ, a maa nyǝn, mʊ nʊng dul mʊnɔ lɛ a daa nǝn woi, ke bɔ a daa tangǝn nǝbɔ yoolii woi?”
23Nǝngɔ Yesu a jǝla gǝn gɔ, “Gwam nʊ nɨ swɨ ɨ lɛɨ, kɨla kɨla kɛl mǝndɨ. Tɛtɛ mɨ tǝgǝn swɨ gǝn swɨ. Mǝ nǝbɔ Tɛtɛ mɨ nǝn bɛ bɛ a daa gǝ woi, sǝ nǝn yɨ dakini nǝbɔ gɔ. 24Nʊ nɨ mɨ swɨ ɨ lɛɨ, mɨ gǝ kɨla kɛl mǝndɨ lɛ. Kɛltɨn nɨ jǝ́ nyʊwa lɛɨ, ke bɔ a mɨ, na a Tɛtɛ nɨ a twam ɨɨ.
25“Gwam jʊ nɨ mǝ sʊwa jen kwama bǝ dakinii. 26Nǝ tɨkalɨ nɨ n Yʊwa Kwaamaɨ, wʊnɨ Tɛtɛ twam lɛ a mʊgɔ dun mɨɨ, nǝn gɔ mɛla jem kanjǝl nɨ lɛ gwamɨ, sǝ a bʊʊla jem kɛltɨn nɨ gwam mǝ sʊwa jeni. 27N bǝla jen nǝn yɨm kwamɨgǝn. N yɨm kwamɨgǝn mǝ nǝ jen nɛɨ. Ke bɔ a wʊnɨ yooligɔ nǝ jen nɛɨ mǝ nǝ jen nɛɨ. Ka jǝ́ kom lɛ dul jenɔ. Ka jǝ́ nyʊwa lɛ taal.
28“Jǝ́ kwɛl jǝ́ nyʊwa n sʊwa jen mǝʊ, ‘Mǝ shu shu, sǝ n yǝla n bɛ a daa jen woi.’ Na na jǝ́ swɨ ɨ lɛɨ, na jǝ́ maa fulotǝm nǝl a shutǝm mǝndɨ gǝm a daa Tɛtɛ woi, jʊ a bwɨɨ, Tɛtɛ a laa ɨ. 29Kǝngkɔ, n sʊwa jen na lǝga bɔ a bwɨ, sǝ kwama bwɨm lɛɨ, jǝ́ nǝ bɨlǝngkɛl. 30Mǝ sʊwa sʊwa kɛl nǝbɔ jen, kumtɨnɔ mɨsɔ lada lɛ, jʊ a bwɨɨ nǝ fɔlɔn yooli nɨɨ bɛ lɛ. Mɨ nǝn kwaan a dul mɨ. 31Mǝ maa jʊ nɨ lɛ Tɛtɛ a sʊwa ɨ gɔ n maaɨ dǝngdǝng, sǝ yooligɔ a nyǝm mǝ swɨ Tɛtɛ lɛ.
“Jǝ́ gun, bǝ bǝla daa nɨ.
Currently Selected:
Yohana 14: DBD
Highlight
Share
Copy
Want to have your highlights saved across all your devices? Sign up or sign in
©️2024 Luke Initiative for Scripture Translation
