Yohana 11

Bwaa Liazarui

1Kaa nǝl wo dunɔ nǝn Liazaru, a daa bɔɔla a bɛ tuulɔ Betanya. N bɛ tuulɔ bǝ Maryamui jǝbɔ kɨla gǝ nɔɔlɨgɔ, Marta. 2Liazaru, wʊnɨ mɨ kwamɨgǝnɨ, nǝn kɨla Maryamui, wʊnɨ a kul Tɛlalɔ gǝm nwang lǝmɨɨ, a waam naatɨn gǝnɔ nǝn yitʌn dul gǝnɨ. 3Kɛtǝlam gǝnɔ nɔɔtǝnɔ ja twam Yesu gǝm gɔ, “Tɛlalɔ, n wɔ nʊ nɨ mʊ swɨ lɛɨ, mɨ kwamɨgǝn.”

4Yesu a nyʊwa nyɨɨ, nǝngɔ a sʊwa gɔ, “Bɔɔla nɨ mɨsɔ yǝlam gǝm bwaa lɛ, bɛ bɛ nǝn dʊʊlǝn a daa Kwaama woi, jǝbɔ Bʊla gɔ.” 5Yesu a swɨ Marta jǝbɔ kɨla gǝ nɔɔlɨgɔ jǝbɔ Liazaru. 6Kwama a nyʊwa fulonɔ gɔ Liazaru mɨ kwamɨgǝnɨ, a sʊ kumɔ yo a daa gǝ woi.

7A gulɔ gǝmɨ, a sʊwa bɛtɔ mɛlalɨ gǝnɔ gɔ, “Bǝ yǝla a Yahudiya.”

8Bɛtɔ mɛlalɨ gǝnɔ ja sʊwa gǝn gɔ, “Feyi, n kumtɨn nɨ Yahudawagɔ saa malatǝm mʊnɔ lɛ nǝn tɛl sǝ ja jʌ ńi, nǝngɔ mʊ swɨ lɛ ń yǝla wo tagɨ ka?”

9Nǝngɔ Yesu a jǝla ji gɔ, “Kemʌnɔ kʊb jeli yo a kɔkɔ, mɨ nyɔ ka? Gwam nʊ nɨ yɔ yɔm lɛ nǝn kɔkɔɨ, mɨ gǝ fǝ naa lɛ, jʊ a bwɨɨ kuwo nyalǝm yooligɔ lɛ. 10A kaa gola nʊ nɨ yɔ yɔm lɛ nǝn kumi gǝ fǝ fǝ naa, jʊ a bwɨɨ mɨ nyalǝm wo a daa gǝ woi!”

11Kwama Yesu a sʊwam kanjǝl nɨɨ, nǝngɔ a yǝla a sʊwa ji, gɔ, “Fwal bǝn Liazaru a daa dum. Mǝ yɔ ya mǝ gung gǝn gung a dum.”

12Nǝngɔ bɛtɔ mɛlalɨ gǝnɔ a sʊwa gǝn gɔ, “Tɛlalɔ, na n dum a do gǝnɨ, gun gun.” 13Yesu gǝ nʊng Liazaru a bʊla. A bɛtɔ mɛlalɨ gǝnɨ jǝ bʊʊla lɛ gɔ kɛna dum fǝbtǝm.

14Nǝngɔ Yesu a jel a sʊwa ji a talɨ gɔ, “Liazaru a bʊla. 15Mǝ nyʊwa fulotǝm nǝl lɛ a dul jen gɔ mɨ mǝ woi, sǝ jǝ́ nǝ bɨlǝngkɛl. Bɛ bǝ yɔ a daa gǝ woi.”

16Nǝngɔ Toma (wʊnɨ jǝ jo lɛ gɔ Bɛtɔ yoi) a sʊwa kɛtǝlam gǝnɔ bɛtɔ mɛlalɨgɨɨ gɔ, “Bǝn tǝbǝn bǝ yɔ ya bǝ bʊla dakini jǝbɔ gɔ.”

Yesu Nǝn Gɔ Nǝ Gungtǝm Bwaa Jǝbɔ Kʊlɨɨ

17Yesu a la daagɨɨ, a nyʊwa gɔ Liazaru a bʊla, a maa kumɔ naal a tuu. 18Betanyagɔ a kɔtʌgo a Urushalima. A la bɔ mɛlɔ taal. 19Yahudawagɔ a lada nyɔ, ja bɛ sǝ ba ja nǝ Marta jǝbɔ Maryamu kʊʊtǝm nǝl a dul bwaa kɨla jii. 20Marta a nyʊwa gɔ Yesu bɛ lɛɨ, nǝngɔ a yɔ sǝ ya gǝ tǝga gǝnɨ. Maryamu yɨm a lɔ.

21Marta a bɛɨ, nǝngɔ a sʊwa Yesu gɔ, “Tɛlalɔ, na na mʊ fǝɨ, na kɨla mɨ a bʊla bɔ. 22A kǝngkɔ tag n nyǝm Kwaama nǝ ń nǝ ń gwam jʊ nɨ mʊ kel gǝnɨ.”

23Nǝngɔ Yesu a sʊwa gǝn gɔ, “Kɨla mɔ gun gun.”

24Marta a sʊwa gǝn gɔ, “N nyǝm yǝla yǝla nǝn kʊlɨ a guntǝm nǝn kʊlɨ a kɔkɔ dɨltǝm tǝmɔ gǝm.”

25Nǝngɔ Yesu a sʊwa gǝn gɔ, “Nǝmǝ mǝ guntǝm kʊlɨɨ. Nǝmǝ mǝ kʊlɨɨ. Nʊ nɨ a nǝ bɨlǝngkɛl a daa mǝ woi, na a bʊlaɨ, yɨ yɨ nǝn kʊlɨ. 26Nʊ nɨ nǝn kʊlɨ, a nǝ bɨlǝngkɛl a daa mɨ woi, mɨsɔ bʊla lɛ wo. Ń nǝ bɨlǝngkɛl nǝn jʊ nɨ ka?”

27Nǝngɔ Marta a jǝla gǝn gɔ, “Ɔɔ, Tɛlalɔ, n nǝ bɨlǝngkɛl mǝʊ nǝmɔ mʊ nǝn Kiristi Bʊla Kwaamaɨ, wʊnɨ bɛ lɛ a yoolii.”

Yesu A Ji Wi

28Marta a sʊwa nyɨɨ, nǝngɔ a yɔ ya jo Maryamu kɨla gǝ nɔɔlɨgɔ a kelii, a sʊwa gǝn gɔ, “Feyigɔ fɔ, jo ń nɛ.” 29Nyʊwatǝmɔ nyɨɨ, nǝngɔ Maryamu a gun dǝbǝr dǝbǝr, a shu a daa Yesu woi. 30Yesu a lǝga bɔ a dɔ bɛ tuulɔngɔ dɨn. Gǝ na a daagɔ Marta a tǝgam gǝnɨ. 31Yahudawa nɨ jǝ dakini jǝbɔ Maryamu a mʊgɔ lɔngɨ, jǝ nǝ gǝn kʊʊtǝm nǝl lɛɨ, ja kuwo gǝn a gun dǝbǝr a jeli, nǝngɔ ja bwang gǝmɨ, jǝ dʌng lɛ gɔ kɛna yi a tuu ya ji wi woi.

32Maryamu ya la daagɔ Yesu woi, a kuwo gǝnɨ, nǝngɔ a yal a kǝga gǝnɨ, a sʊwa gǝn gɔ, “Tɛlalɔ, na na mʊ fǝɨ, na kɨla mɨ a bʊla bɔ.”

33Yesu a kuwo gǝn ji wi lɛɨ, Yahudawa nɨ a bɛ jǝbɔ gɨɨ, jǝ ji lɛ tʌjii, jʊgɔ a kom Yesu a nǝl gǝn dangǝn. 34Nǝngɔ a sʊwa gɔ, “Jǝ́ fʌl gǝn a daa won?”

Ja sʊwa gǝn gɔ, “Tɛlalɔ, yɔ ba kuwo.”

35Yesu a ji wi.

36Nǝngɔ Yahudawagɔ a sʊwa gɔ, “Dʌng kanga a swɨ gǝn nɛɨ.”

37Kaamɨ a kʊm ji a sʊwa gɔ, “A wum nu kuligɨɨ, n wɛ bwɨ mɨsɔ gǝ maa kaa jǝl lɛɨ, wʊnɨ balɨ nɨ mɨsɔ bʊla lɛɨ?”

Yesu A Gung Liazaru A Bwaa

38Yesu a maa komtǝm a nǝl gǝn dangǝn, ba la nǝn a tuu. Tuu nɨ bʊwa gǝnɔ n tɛl ja swa a nyanga gǝnɨ. 39Nǝngɔ Yesu a sʊwa gɔ, “Jǝ́ bʌlʌm tɛlɔ a nyanga tuu.” Marta kɛ nɔɔlɨ nʊ nɨ a bʊlaɨ, a sʊwa Yesu gɔ, “Tɛlalɔ, kǝngkǝnɨ fwal fwal, jʊ a bwɨɨ dwiyen kum gǝnɔ naal nǝn bwaagɔ.”

40Nǝngɔ Yesu a sʊwa gǝn gɔ, “N kwɛl sʊwa ń sʊwa ńɨ mǝʊ na ń nǝ bɨlǝngkɛlɨ, mʊ kuwo kuwo dʊʊlǝn Kwaamaɨ, mɨ nyɔ ka?”

41Nǝngɔ ja tʊngǝm tɛlɨ. Yesu a gung dul gǝnɔ a dʌbʌl, a sʊwa gɔ, “Tɛtɛ, n buu mʊn kang mʊ nyʊwa ɨɨ. 42N nyǝm nyǝmɨ mʊ nyʊwa ɨ lɛ. Mǝ sʊwa jʊ nɨ, sǝ nǝb nɨ tɨlam fǝɨ, ja nǝ bɨlǝngkɛl gɔ nǝmɔ mʊ twam ɨɨ.”

43A sʊwa nyɨɨ, nǝngɔ a gung diilɔ nǝn kwaan gɔ, “Liazaru, jel!” 44Nǝngɔ nʊ nɨ a bʊlaɨ, a jeli, naa gǝnɔ jǝbɔ kang gǝnɔ ja bwaba nǝn dwang, kǝga gǝnɔ ja bwa nǝn dwang nɨ ja fʌlʌm gǝn nǝnɨ.

Nǝngɔ Yesu a sʊwa ji gɔ, “Jǝ́ kwɨm gǝm, a shu.”

Ja Maa Yesu Gǝm Fɛkalɨ Bwɨla

(Mat 26:1-5; Mar 14:1,2; Luk 22:1,2)

45Yahudawagɔ a lada nyɔ wʊnɨ ja bɛ yaltǝm Maryamui, ja kuwo jʊ nɨ Yesu a maaɨ, nǝngɔ ja nǝ bɨlǝngkɛl a daa gǝ woi. 46Kaamɨ a shu a daagɔ nǝbɔ Farisaɨ woi, ya ja sʊwa ji jʊ nɨ Yesu a maaɨ. 47Nǝngɔ dʊʊm nǝbkǝlamɔ jǝbɔ nǝbɔ Farisaɨ ja mʊr nǝb dʊʊm koteregɨɨ.

Ja bʌbko a bʊtɔ ji gɔ, “Wɛ bǝ maa lɛɨ? Balɨ nɨ wɔ maa kanjǝl laatǝm kang lɛ a lada nyɔ. 48Na bǝ bǝla gǝn wo maa kanjǝl nɨ lɛɨ, nǝbɔ gwam nǝ nǝ bɨlǝngkɛl a daa gɔ woi. Nǝbɔ Romaɨ tag ba jǝ yem yem Kan Kwaaman bǝnɔ jǝbɔ bǝlǝntǝm bǝnɔ!”

49Nǝngɔ kaa nǝl win wʊnɨ jǝ jo lɛ gɔ Kayafaɨ wʊnɨ n dalɨ nǝkǝlagɔ a jol gɨɨ, a sʊwa ji gɔ, “Jen jǝ́ nyǝm bɔ kaa jǝl. 50Jǝ́ kuwo bɔ ka? A laa jǝl nǝl win a bʊla a dul nǝbɨɨ, na bǝlǝntǝmɔ gwam kala kalaɨ.”

51Kɛl nɨ Kayafa a sʊwaɨ, ke bɔ bʊʊlalɨ dul gǝn. Nǝn gɔ dalɨ nǝkǝlagɔ a jol gɨɨ, a maa kuwotǝmkǝga gɔ Yesu bʊla bʊla a dul Yahudawagɨɨ. 52Yesu mɨsɔ bʊla lɛ a dul Yahudawagɨɨ kwaaji. Bʊla bʊla tag, sǝ a mʊr bɛtɔ lɔ Kwaamaɨ wʊnɨ ja kwɨya tǝmɔ nǝn kwanɨ, sǝ ja yǝlam win. 53Jʊ a ta a di gɨɨ ja mʊrkam nyiyo kanga jǝ jʌm Yesu lɛɨ.

54A dul kɛl nɨɨ, Yesu a yɔ bɔ yɔm nyangnyang a mʊgɔ Yahudawagɨɨ. A bǝla daa gɔ, a shu a kaa tuulɔ wʊnɨ jǝ jo lɛ gɔ Ifraimui (wʊnɨ a kɔtʌgo a kwaranɨ). N daa gɔ a yɨ wo jǝbɔ bɛtɔ mɛlalɨ gǝnɨ.

55Dikulom Yabtǝm Yahudawagɨɨ a dwamaɨ, nǝbɔ a lada nyɔ a bɛl tuulɔtɨn ja gwi ja shu a Urushalimaɨ, sǝ ya ja saalǝm dul jinɔ, sǝla dikulomɔ a bɛ. 56Nǝngɔ ja tɨtǝn saatǝm Yesui. Jǝ tɨlam a Kan Kwaaman, jǝ bʌbko lɛ a bʊtɔ jin, jǝ sʊwa lɛ gɔ, “N wɛ jǝ́ kuwoi? Bɛ bɛ dikulom nɨ ka? Mɨsɔ bɛ lɛ ka?” 57Ja bʌ jʊ nɨ, jʊ a bwɨɨ dʊʊm nǝbkǝlamɔ jǝbɔ nǝbɔ Farisaɨ ja kwɛl ja ga diil gɔ gwam nʊ nɨ a nyǝm daagɔ Yesu woi, a bɛ ba sʊwa ji, sǝ jǝ ta gǝn.

Currently Selected:

Yohana 11: DBD

Highlight

Copy