रोमियां 9

नरीकार ते यहूदी लौक

1मैं मसीह मां सच्‍च किहे, कूड़ ना मारी, ते माया विवेक वी पवित्र आत्मा मां ग़वाही ङिये, 2कि मनु बङी उदासी छै, ते माये मन हमेशा ङुखते रिहे। 3कांकि माई हा मनसा हुती कि, आपणे यहूदी भावां वास्ते ते आपणे देशा चे लौका वास्ते आप श्रापित हुती मसीह कनु अंज हुती जईया। 4जको सब इस्राएली छी, वानु नरीकारा ची ऊलाद्ध हुवणे चा अधिकार हुता, महिमा, ते वाचा, ते व्यवस्था चा उपहार, ते नरीकारा ची उपासना, ते वायदा वांचीया ही छी। 5पुरखे वी वांचे ही छी,#9:5 अब्राहम, इसहाक, ते याकूब ये ही वे पुरखे छी ते मसीह वी शरीरा चे भाव लारे वांचे महु ही हुला, जको सब चे उपर परम नरीकार युगानयुग धन्‍न छै। आमीन।

6पर हा कोनी कि, नरीकारा चा वचन टलती गेला, ऐवास्ते कि जको इस्राएल चे वंश छी, वे सारे इस्राएली कोनी। 7ते ना अब्राहम चे वंश हुवणे ची वजह लारे सब ओची ऊलाद्ध ठहरली, पर लिखले आले छै, “इसहाक कनु दुधा वंश किहवाला जई।” 8यानिकि शरीरा चे अनुसार जमले आले नरीकारा ची ऊलाद्ध कोनी, पर वायदे चे अनुसार जमले आले नरीकारा चे वंश गिणले जई। 9कांकि वायदे चा वचन हा छै, “मैं तय करले आले समय उपर बल्ति पुठा आवी, ओ बेले सारा हेक पूता नु जनम ङी।”

10ते सेर्फ ईं ही कोनी, पर जिसे बेले रिबका वी हेक कनु यानिकि अम्चे पुरखे इसहाक कनु गर्भवती हुली हुती। 11ते हमा तक ना तां ब़ाले जमली हुती, ते ना ही वाणे कोच्छ भले जा बुरे करले हुते, ऐवास्ते कि नरीकार ची मनसा जको ओचे चुणती गेहणे चे अनुसार छै, कामा ची वजह कोनी, पर हकारने आला उपर बणली रिहो, 12ऐवास्ते नरीकारा ने रिबका नु केहले, “जेठा छोटे चा दास हुवी।” 13जिसड़े कि पवित्रशास्त्रा मां लिखले पले, “मैं याकूब लारे प्रेम करला, पर एसाव नु ठुकराती ङिले।”

14तां अम्ही का किहुं? का नरीकारा चे इठे अन्याय छै? कङी वी कोनी! 15कांकि ओ मूसा नु किहे कि, “मैं जाये उपर दया करने चाहवे, ओचे उपर दया करी, ते जाये उपर मैं कृपा करने चाहवे ओचे उपर कृपा करी।” 16ऐवास्ते हा बात ना तां काई इच्छा लारे हुवे, ना ही द्रोक-भज करने लारे, पर दया करने आले नरीकारा ची इच्छा लारे हुवे। 17कांकि पवित्रशास्त्र मां फिरौन चे बारे मां केहले गेले कि, “मैं तनु ऐवास्ते खड़े करले कि, दुधे मां हुती कर मैं सामर्थ ङिखाणे। ते माये नांवा चा प्रचार पुरी धरती उपर हो।” 18ते बल्ति, नरीकार जाये उपर चाहे, ओचे उपर दया करे, ते जानु चाहवे, ओनु कठोर करती नाखे।

19तु मनु किहे, “बल्ति नरीकार कां दोष लावे? कूण ओची इच्छा चा सामना कर सग़े?” 20हे इन्सान, भला तु कूण छी, जको नरीकारा चा सामना करी? का घड़ली आली चीज घड़ले आले नु केह सग़े, “तु मनु इसड़े कां बणाले?” 21का कुम्भारा नु माटी उपर अधिकार कोनी, कि माटी चे हेक ही लोत्थे महु, हेक ठांवा नु आदर चे वास्ते, ते ङुजे ठांवा नु अनादर चे वास्ते बणाओ?

22का हुले अगर नरीकारा ने आपणा क्रोध ङिखाणने ते आपणी सामर्थ प्रकट करने ची इच्छा लारे क्रोध चे ठांवा ची, जको विनाश वास्ते तियार करली गेली हुती, बङे सब्रा लारे सहन करती गेले, 23जाये कनु जको दया चे ठां छै जानु ओणे आपणी महिमा वास्ते पेहले कनु तियार करले हुते, वांचे उपर आपणी महिमा चे धन्‍न नु प्रकट करो? 24यानिकि अम्चे उपर जानु ओणे ना सेर्फ यहूदिया महु बल्कि नेरीया जातिया महु वी हकारले। 25जिसड़े कि भविष्यवक्‍ता होशे ची किताबे मां वी लिखले पले,

“जको लौक माये कोनी हुते,

मैं वानु आपणे लौक किही,

जको माई प्रजा प्यारी कोनी हुती,

वानु मैं आपणी प्यारी प्रजा किही।”

26ते,

“इसड़े हुवी कि जिसी जग़हा मां वानु केहले गेले हुते, कि ‘तम्ही माई प्रजा कोनी छिवा,’

वेही जग़हा मां वे जीते नरीकारा ची ऊलाद्ध किहवावे।”

27ते यशायाह भविष्यवक्‍ता इस्राएल चे बारे मां हकारती कर किहे,

“चाहे इस्राएल ची ऊलाद्ध ची गिणती समुन्दरा ची रेत चे बराबर हो,

तांवी वांचे महु थोड़े ही बचे।

28कांकि प्रभु आपणा वचन धरती उपर पूरा करती कर, धार्मिकता लारे जल्दी ओनु सेद्ध करी।”

29जिसड़े कि यशायाह भविष्यवक्‍ता ने पेहले कनु ही भविष्यवाणी करली हुती,

“अगर सैना चा प्रभु अम्चे वास्ते कोच्छ वंश ना छोड़े हा,

तां अम्ची हालत सदोम ते अमोरा शहरा आलीकर हुती जईया।”

इस्राएल ते सुसमाचार

30तां अम्ही का किहुं? ईं कि नेरीया जातिया ने जको धार्मिकता ची खोज ना करी, धार्मिकता हांसिल करली यानिकि वे धार्मिकता नु जको विश्‍वास लारे छै। 31पर इस्राएली लौक जको धार्मिकता ची व्यवस्था ची खोज करते हुले वे व्यवस्था तक कोनी पुज़ले। 32ऐवास्ते नी पोज़ सग़ले, कांकि वे विश्‍वासा लारे कोनी, पर कर्मा लारे ओची खोज करते रेहते, वाणे ओ ठोकर चे पत्थरा उपर ठोकर खाली। 33जिसड़े कि पवित्रशास्त्रा मां लिखले पले,

“ङेखा, मैं सिय्योन मां ठोकर खाणे चा पत्थर,

जको ठोकर खाणे ची चट्टान छै मेहले पला।

ते जको ओचे उपर विश्‍वास करी,

ऊं शर्मिन्दे नी हुवी।”

Currently Selected:

रोमियां 9: ODR

Highlight

Copy