रोमियां 7

बीहा ची मिसाल

1हे माये भऊ, का तम्ही ना जाणा, मैं व्यवस्था नु जाणने आला नु किहे पला कि जब तक बन्दे जीते रिहे, तब तक ओचे उपर व्यवस्था चा राज़ रिहे? 2कांकि परनीली आली असतरी व्यवस्था चे अनुसार आपणे मुणसा चे जीते-जी ओचे लारे ब़झली आली छै, पर अगर मोणस मरती जाये, तां वा बीहा ची व्यवस्था कनु आजाद हुती जाये। 3ऐवास्ते अगर मुणसा चे जीते-जी वा कुई नेरे मर्दा ची हुती जाये, ते वा व्यभिचारणी किहवावी, पर अगर मोणस मरती जाये, ते वा वे व्यवस्था कनु छुटती गेली, इठे तक कि अगर कुई ङुजे मर्दा ची हुती जाये तां वी व्यभिचारणी नी ठहरी। 4तां हे माये भऊ, तम्ही वी मसीह ची देह चे जरिये व्यवस्था वास्ते मरले आले बणती गेले कि मसीह चे हुती जऊं, जको मरला आला महु जीता हुती गेला, ताकि अम्ही नरीकारा चे वास्ते फल आणु। 5कांकि जिसे बेले अम्ही पुराणे इन्साना चे सुभाव मां हुते, तां पाप ची इच्छा जको व्यवस्था चे जरिये हुती, मौत चा फल पैदा करने वास्ते अम्चे शरीरा चे अंगा मां काम करती। 6पर जाये बन्धन मां अम्ही हुते ओचे वास्ते मरती कर, हमा व्यवस्था कनु छुटती गेले कि, लिखली आली पुराणी व्यवस्था उपर कोनी, बल्कि नरीकारा ची आत्मा ची नवीं रीति उपर सेवा करु वी।

व्यवस्था ते पाप

7तां अम्ही का किहुं? का व्यवस्था पाप छै? कङी वी कोनी! बल्कि बिना व्यवस्था चे मैं पापा नु ना पिछाणी, व्यवस्था अगर ना किहा कि, “लालच ना कर” तां मैं लालच नु ना जाणेहा। 8पर पाप ने मौका सोती कर आज्ञा चे जरिये माये मां हर-तरहा ची लालच पैदा करली, कांकि बिना व्यवस्था चे पाप मुड़दे छै। 9मैं तां व्यवस्था चे बिना पेहले जीता हुता, पर जिसे बेले आज्ञा आली, तां पाप जीता हुती गेला, ते मैं मरती गेला। 10ते वाहो आज्ञा जको जीवन चे वास्ते हुती, माये वास्ते मौत ची वजह ठहरली। 11कांकि पाप ने मौका सोती कर आज्ञा चे जरिये मनु बहकाले, ते ओचे ही जरिये मनु मारती वी नाखले।

12ऐवास्ते व्यवस्था पवित्र छै। ते आज्ञा पवित्र, धर्मी, ते आच्छी छै। 13ते का वा जको आच्छी हुती, माये वास्ते मौत ठहरली? कङी वी कोनी। पर पाप वे आच्छी चीजे चे जरिये, माये वास्ते मौत नु पैदा करने आला हुला कि ओचे पाप हुवणे प्रकट हो, ते आज्ञा जरिये पाप ब़ोहत ही पापमय ठहरे।

मन ची लड़ाई

14कांकि अम्ही जाणु कि व्यवस्था तां आत्मिक छै, पर मैं शरीरिक छै ते पाप चे हाथा मां बिकला आला छै। 15#गला 5:17ते जको मैं करे ओनु ना जाणी, कांकि जको मैं चाहवे ओ ना करी वी, पर जाये कनु मनु नफरत आवे, ऊंही करे वे। 16ते अगर, जको मैं ना चाहवी ऊंही करे, तां मैं मनती गिहे कि व्यवस्था आच्छी छै। 17तां इसड़ी हालती मां ओचा करने आला मैं कोनी, बल्कि पाप छै जको माये मां बसला आला छै। 18कांकि मैं जाणे, कि माये मां यानिकि माये शरीरा मां कुई आच्छी चीज वास ना करी। इच्छा तां माये मां छै, पर भले काम माये कनु हुवी ना। 19कांकि जिसे आच्छे कामा ची मैं इच्छा राखे, ऊं तां ना करी, पर जिसी बुराई ची इच्छा ना करी, वा ही करे। 20पर अगर मैं ऊंही काम करे, जाये इच्छा मैं ना करी, तां वास्तव मां विचा करने आला मैं कोनी, पर पाप छै, जको माये मां बसला आला छै।

21तां मैं हा व्यवस्था गिहे कि जिसे बेले भलाई करने ची इच्छा करे, तां बुराई माये गोढु आवे। 22कांकि मैं भितरला मनुष्यत्व कनु तां नरीकारा चे व्यवस्था कनु ब़ोहत खौश रिहे। 23पर माये आपणे शरीरा चे अंगा मां ङुजे तरीके ची व्यवस्था ङिसे, ते जको माई ब़ुध्दि ची व्यवस्था लारे लड़ती रिहे, ते मनु पाप ची व्यवस्था चे बन्धन मां नाखे जको माये शरीरा चे अंगा मां छै। 24मैं किसड़े अभाग़े इन्सान छै! मनु ये मौत ची देह कनु कूण छुड़ावी? 25अम्चे प्रभु ईशु मसीह चे जरिये नरीकारा चा धन्यवाद हो।

ऐवास्ते मैं आपणी ब़ुध्दि लारे तां नरीकारा ची व्यवस्था ची सेवा करे, पर शरीरा लारे पाप ची व्यवस्था ची सेवा करे।

Currently Selected:

रोमियां 7: ODR

Highlight

Copy