मरकुस 14

ईशु ची मौत ची योजना

(मत्ती 26:1–5; लूका 22:1,2; यूहन्‍ना 11:45–53)

1ङोन ङिहां चे बाद फसह ते अखमीरी रोटी चा तेंहवार हुवणे आला हुता। प्रधान याजक ते शास्त्री ये बाते ची खोज मां हुते कि ओनु किवें धोक्‍के लारे पकड़ती कर मारती नाखु, 2पर किही पलते, “तेंहवारा चे ङिओ, कङी इसड़े ना हो कि लौका मां फसाद हुती जाओ।”

ईशु उपर इत्र नाखला

(मत्ती 26:6–13; यूहन्‍ना 12:1–8)

3 # लूक 7:37,38 जिसे बेले ईशु बैतनिय्याह शहरा मां शमौन कोहड़ी चे घरा मां रोटी खाणे वास्ते ब़ेहला हुता, तब हेक असतरी संगमरमर चे ठांवा मां जटामांसी चा बेशकीमती शोद्ध इत्र चती कर आली, ते ठांवा नु भान्ती कर ओचे ठोङा उपर रेड़ती ङिला। 4पर कुई-कुई आपणे मना मां रिसाती कर किहुं लाग़ले, “ऐचा कां सत्यानास करला गेला? 5कांकि हा इत्र तां तीन साऔ चान्दी चे सिक्‍का कनु ज्यादा कीमती मां बेचला जा सग़ेला, ते कंगाला मां बांटला जा सग़ेला।” ते वे विनु दड़काऊं लाग़ती गेले।

6ईशु ने केहले, “विनु छोड़ती ङिया, विनु कां सतावा पले? विणे माये लारे भलाई करली। 7कंगाल तम्चे लारे सदा रिही, ते तम्ही जब चाहवा तब वांची भलाई कर सग़ा, पर मैं तम्चे लारे सदा नी रिही। 8जको कोच्छ वा कर सग़ली, विणे करले, विणे माये दफनाले जाणे ची तियारी मां पेहले कनु माये शरीर उपर इत्र मसड़ला। 9मैं तम्हानु सच्‍च किहे पला कि सारे संसारा मां जिठे-किठी सुसमाचार प्रचार करला जई, ओठे विचे ऐ कामा ची चर्चा वी विची यादगिरी मां करली जई।”

यहूदा इस्करियोती चे ईशु नु पकड़ावणे

(मत्ती 26:14–16; लूका 22:3–6)

10तब यहूदा इस्करियोती जको ब़ारहा चैला महु हेक हुता, प्रधान याजका चे गोढु गेला कि ओनु वांचे हाथ पकड़वाती ङियो। 11वे ईं सुणती कर खौश हुले, ते ओनु रुपये ङेणे मनती गेले, ते ओ मौका सोधु लाग़ला कि ओनु किवें करती पकड़वावे।

चैला चे लारे फसह चा तेंहवार

(मत्ती 26:17–25; लूका 22:7–14,21–23; यूहन्‍ना 13:21–30)

12अखमीरी रोटी चे तेंहवारा चे पेहले ङिओ, जाये मां वे फसह चा बलिदान करते, ओचे चैला ने ओकनु पूछले, “तु किठे चाहवी कि अम्ही जती कर दुधे वास्ते फसह खाणे ची तियारी करु?”

13ओणे आपणे चैला महु ङुंहु नु ईं केहती कर भेज़ले, “शहरा मां जावा, ते हेक बन्दे पाणीया चा घड़ा चले हुले तम्हानु मिली, तम्ही ओचे भांसु हुती पड़जा। 14ते ओ जिसे घरा मां जाये, ओ घरा चे मालिका नु केहजा, ‘गुरु किहे पलता कि माये मेहमान खाने किठे छै जिठे मैं आपणे चैला लारे फसह चा भोज़ खई?’ 15ओ तम्हानु हेक सजला सजाला, तियार करला आला बङा चौब़ारा ङिखाणती ङी, अम्चे वास्ते उठी तियारी करा।”

16चैले निकलती कर शहरा आले, ते जिंवे ओणे वानु केहले हुते, उसड़े ही ङेखले,ते फसह चा भोज़ तियार करला।

17जिसे बेले आथण हुले, तां ईशु ब़ारहा चे लारे आला। 18जिसे बेले वे ब़ेसती खाणे खई पलते, तां ईशु ने केहले, “मैं तम्हानु सच्‍च किहे पला कि, तम्चे महु हेक, जको माये लारे खाणे खाये पला, मनु धोक्‍के लारे पकड़वावी।”

19वांचे उपर उदासी आती गेली ते ये वे हेक-हेक करती कर ओनु किहुं लाग़ले, “का ओ मैं छै?”

20ओणे वानु केहले, “ओ ब़ारहा महु हेक छै, जको माये लारे थाली मां हाथ नाखली ब़ेहला। 21कांकि मैं इन्साना चा पूत जिसड़े माये वास्ते लिखले गेले, जाये ही पला, पर ओ इन्साना उपर हाय! जाये जरिये मैं इन्साना चा पूत पकड़वाला जई। अगर ओ इन्साना चा जनम ही ना हुवीया, तां ओचे वास्ते भले हुते।”

प्रभु भोज़

(मत्ती 26:26–30; लूका 22:14–20; 1 कुरिन्थियां 11:23–25)

22जिसे बेले वे खई पलते, ईशु ने रोटी चली, ते आशीष मांगती कर भांली, ते वानु ङिली ते केहले, “गिहा, हा माई देह छै।”

23बल्ति ओणे मुंगर चती कर धन्यवाद करला, ते वानु ङिला, ते वां सारा ने ओचे महु पिले।

24ते ओणे वानु केहले, “ईं वाचा चे माये ऊं लुहीं छै, जको ब़ोहता वास्ते बाहले जाये। 25मैं तम्हानु सच्‍च किहे पला कि अंगूरा चा रस ओ ङिओ तक कङी नी पिही, जब तक नरीकारा चे राज़ मां नवां ना पीयें।”

26बल्ति वे भज़न गाती कर जैतून चे पहाड़ा उपर चाह्‍ले गेले।

पतरस चे इन्कार ची भविष्यवाणी

(मत्ती 26:31–35; लूका 22:31–34; यूहन्‍ना 13:36–38)

27ईशु ने वानु केहले, “तम्ही सारे जणे ठोकर खावा, कांकि पवित्रशास्त्र मां लिखले पले,

“ ‘मैं आजड़ीया नु मारी,

ते भेङा इंगे-ऊंगे हुती जाये।’

28 # मत्ती 28:16 “पर मैं आपणे जीते हुवणे चे बाद तम्हा कनु पेहले गलील नु जई।”

29पतरस ने ओनु केहले, “अगर सब ठोकर खाओ तां खाओ, पर मैं ठोकर नी खई।”

30ईशु ने ओनु केहले, “मैं तनु सच्‍च किहे पला कि आज़ ही येही राती नु कूकड़े चे ङोन वारी बांग ङेणे कनु पेहले, तु तीन वारी माया इन्कार करती गिहे।”

31पर पतरस ने होर वी जोर ङिती कर केहले, “अगर मनु दुधे लारे मरणे वी पड़ो, तांवी मैं दुधे कनु कङी नी मुकरी।” यूं करती नेरा सारा ने वी केहले।

गतसमनी चे बागा मां ईशु ची हेकले मां प्राथना

(मत्ती 26:36–46; लूका 22:39–46)

32बल्ति वे गतसमनी नांवा ची हेक जग़हा मां आले ते ओणे आपणे चैला नु केहले, “इठी ब़ेहले रेहजा, जब तक मैं प्राथना करे।” 33ते ईशु पतरस ते याकूब ते यूहन्‍ना नु आपणे लारे गेहली गेला, ते ब़ोहत ही उदास ते बैचेन हुं लाग़ला। 34ते वानु केहले, “माये मन ब़ोहत उदास छै, इठे तक कि मैं मरणे उपर छै, तम्ही इठी रुका, ते जाग़ते रिहा।”

35बल्ति ओ थोड़ा उग़ते बढ़ला ते भोंये उपर ढेती कर प्राथना करु लाग़ला कि अगर हो सग़े तां हा घड़ी माये उपरु टलती जाओ, 36ते केहले, “हे ब़ा, हे पिताजी, दुधे कनु सब कोच्छ हो सग़े, ऐ मुंगरा नु माये कनु हटाती गे। तां वी जिसड़े मैं चाहवे उसड़े ना, पर जको तु चाहवी उसड़े ही हो।”

37बल्ति ओ चैला चे गोढु आतीकर वानु नूहले आले ङेखले ते पतरस नु केहले, “हे शमौन, तु नूहला पला? का तु हेक घड़ी वी ना जाग़ सग़ला? 38जाग़ते रिहा ते प्राथना करते रिहा कि तम्ही परीक्षा मां ना पड़ा। आत्मा तां तियार छै, पर शरीर कमजोर छै।”

39ते ओ बल्ति चाह्‍ला गेला ते वां शब्दा मां प्राथना करली। 40तब ओणे आती कर वानु बल्ति नूहले आले ङेखले, कांकि वांचीया आंखी नीङे लारे भरलीया पलतीया, ना जाणते कि ओनु का उत्तर ङिऊं।

41बल्ति तीजा वारी आती कर वानु केहले, “हमा नूहले रिहा ते आराम करा, ब़स घड़ी आती पुज़ली छै, ङेखा, मैं इन्साना चा पूत पापीया चे हाथु पकड़वाला जाणे उपर छै। 42ऊठा, चाह्‍ला, ङेखा, माया पकड़ावणे आला गोढु आती पुज़ला।”

ईशु नु कैदी बणाले गेले

(मत्ती 26:47–56; लूका 22:47–53; यूहन्‍ना 18:3–12)

43ईशु ईं किहे ही पलता कि यहूदा जको ब़ारहा चैला महु हेक हुता, आपणे लारे प्रधान याजका ते शास्त्रीया ते बङका चे तरफु हेक बङी भीड़ गेहती कर तुरन्त आती पुज़ला, जको तलवारा ते ङांगा चली आले। 44ओचे पकड़ावणे आले ने वानु हा इशारा ङिला हुता, “जानु मैं मिठ्ठी ङिही ओही छै, ओनु पकड़ती गेहजा ते जत्तन लारे गेहली जजा।”

45ओ आला, ते तुरन्त ईशु चे गोढु जती कर केहले, “हे रब्बी” ते ओनु ब़ोहत मिठ्ठीया ङिलीया। 46तब वाणे ईशु चे उपर हाथ नाखती कर ओनु पकड़ती गेले। 47वांचे महु जको गोढु भिले हुते, हेके तलवार छिकती कर महायाजक चे दासा उपर चलाली, ते ओचा कान उङारती नाखला। 48ईशु ने वानु केहले, “का तम्ही ङाकु जाणती कर मनु पकड़ने वास्ते तम्ही तलवारा ते ङांगा चती कर निकड़ले ? 49#लूक 19:47; 21:37मैं हर ङिओ मन्दरा मां तम्चे लारे ब़ेसती कर उपदेश ङिता, ते तब तम्ही मनु कोनी पकड़ले, पर ईं सब ऐवास्ते हुले कि पवित्रशास्त्र चा बाता पुरीया हो।”

50ऐचे उपर सारे चैले ईशु नु छोड़ती कर द्रोड़ती गेले।

51हेक जवान शरीरा उपर सेर्फ चादर लपेटती कर ईशु चे भांसु आवे पलता, लौका ने ओनु पकड़ने चाह्‍ले। 52पर ओ आपणी चादर छोड़ती कर उघाड़ा नासती गेला।

महा पंचेती मां ईशु ची पेशी

(मत्ती 26:57–68; लूका 22:54,55,63–71; यूहन्‍ना 18:13,14,19–24)

53बल्ति वे ईशु नु महायाजक चे गोढु गेहती गेले। ते सब प्रधान याजक ते बङके ते शास्त्री ओचे इठे भेले हुती गेले। 54पतरस दूर ही दूर ओचे भांसु-भांसु महायाजक चे बेहड़े चे भीतर तक गेला, ते पाहरेदारा लारे ब़ेसती कर जाखते सेकु लाग़ती गेला। 55प्रधान याजक ते सारी महासभा ईशु नु मारती नाखणे वास्ते ओचे विरोध मां कूड़ी ग़वाही ची खोज मां हुते, पर कोनी मिड़ली। 56कांकि ब़ोहत से ओचे विरोध मां कूड़ी ग़वाही ङी पलते, पर वांची ग़वाही हेक जिसड़ी कोनी हुती।

57बल्ति कोच्छ लौका ने खड़े हुती कर ओचे विरोध मां हा ग़वाही ङिली, 58#यूह 2:19“अम्ही ऐनू ईं केहते सुणले, ‘मैं ऐ हाथा चे बणाले आले मन्दरा नु ढाती नाखी ते तीन ङिहां मां ङुजा बणावी, जको हाथा लारे ना बणला हो।’ ” 59ते यांचे महु वी वांचीया ग़वाहीया हेके जिसड़ीया कोनी हुतीया।

60तब महायाजक ने बीच मां खड़े हुती कर ईशु कनु पूछले, “तु कुई उत्तर ना ङी? ईं लौक दुधे विरोध मां का ग़वाही ङी पले?”

61पर ईशु चोप रेहला। ओणे कुई उत्तर कोनी ङिला। महायाजक ने ओकनु बल्ति पूछले, “का तु परमधन्य चा पूत मसीह छी?”

62ईशु ने केहले, “मैं छै, ते तम्ही मैं इन्साना चे पूता नु सर्वशक्‍तिमान चे सज़्ज़े पासु ब़ेहले ते आसमाना चे बदला लारे आते ङेखा।”

63तब महायाजका ने आपणी ओढ़णी फाड़ली ते केहले, “हमा अम्हानु ग़वाह ची नेरी का जरुरत छै? 64तम्ही निन्दा सुणली। तम्ची का राये छै?” वां सब ने केहले कि हा मरणे चे लायक छै।

65बल्ति कईयां ने तां ओचे उपर थूकले, ते कईयां ने ओचे मुँह ढकले ते ओनु मुक्‍किया मारलीया, ते ओनु किहुं लाग़ले, “भविष्यवाणी कर!” ते पाहरेदारा ने ओनु पकड़ती कर थप्पड़ मारले।

पतरस ने ईशु नु इन्कार करले

(मत्ती 26:69–75; लूका 22:56–62; यूहन्‍ना 18:15–18,25–27)

66जब पतरस तले बेहड़े मां हुता, तां महायाजक ची दासीया महु हेक ओठे आली, 67ते पतरस नु जाखते सेकते ङेखती ओनु बङे ध्यानारीत रीत ङेखले ते किहुं लाग़ली, “तु वी तां ईशु नासरी चे लारे हुता।”

68ओ मुकरती गेला ते केहले, “मैं ना ही जाणे ते ना ही समझे कि तु का किही पली।” बल्ति ओ ब़ाहर पोड़ीया मां गेला, ते कूकड़े ने बांग ङिली।#14:68 कोच्छ हस्तलेखा मां ईं ना मिली कि “कूकड़े ने बांग ङिली”

69वे दासी ने ओनु ङेखती कर वानु जको गोढु भिले हुते, बल्ति किहुं लाग़ली, “हा वांचे महु हेक छै।” 70पर ओ बल्ति मुकरती गेला।

थोड़ी देर बाद वाणे जको ओठे भिले हुते बल्ति पतरस नु केहले, “सच्‍चमां तु वांचे महु हेक छी, कांकि तु गलीली वी छी।”

71तब ओ कोसणे ते कसम खऊं लाग़ला, “मैं ओ इन्साना नु, जाई तम्ही चर्चा करा पले,ना जाणी।”

72बल्ति तुरन्त ङुजी वारी कूकड़े ने बांग ङिली। पतरस नु वा बात जको ईशु ने ओनु केहली हुती याद आली, “कूकड़े चे ङोन वारी बांग ङेणे कनु पेहले तु तीन वारी माया इन्कार करे।” ते ओ ये बाते नु सोचती कर रोऊं लाग़ला।

Currently Selected:

मरकुस 14: ODR

Highlight

Copy