मत्ती 20

बाड़ी चे मजदूरा ची मिसाल

1“स्वर्ग़ा चा राज़ कुई खेता चे मालिका आलीकर छै जको सवेले निकड़ला कि आपणी अंगूरा ची बाड़ी मां मजदूरा नु लावे। 2ओणे मजदूरा लारे हेक चान्दी चा सिक्‍का रोजा चा ठहराला ते वानु आपणी अंगूरा ची बाड़ी मां काम करने चे वास्ते भेज़ले। 3बल्ति ओणे सवेले करीब नवें बजे जिसे बेले ओ ब़ाहरु आला, ते नेरा लौका नु बजारा मां बेकार भिले आले ङेखले, जको यूंही बेकार भिलते ले। 4ते ओणे वानु केहले, ‘तम्ही वी अंगूरा ची बाड़ी मां जावा, ते जको कोच्छ ठीक छै, ऊं तम्हानु ङिही।’ बल्ति वे वी काम करने चे वास्ते गेले। 5बल्ति ओणे ब़ारहा बजे आला लारे, ते तीन बजे आला लारे लगभग ब़ाहरु निकलती कर इसड़े ही करले। 6लगभग पाँचे बजे वापिस ब़ाहर निकलती कर ओणे ङुजा बन्दा नु ओठे खड़े ङेखले ते वानु केहले, ‘का तम्ही इठे ङिओ भर बेकार मां खड़े रेहले?’ 7वाणे ओनु केहले, ‘कांकि अम्हानु मजदूरी उपर कोनी लाले।’ ओणे वानु केहले, ‘तम्ही वी अंगूरा ची बाड़ी मां काम करने चे वास्ते जावा।’

8“आथणा चे अंगूरा ची बाड़ी चे मालिका ने आपणे मुनीम नु केहले, ‘मजदूरा नु हकारती कर पिछला कनु लाती आग़ला तक वानु मजदूरी ङिती ङे।’ 9करीब पाँचे बजे आथणा चे समय उपर जको मजदूरी उपर लाले गेलते ले, वे आले ते वानु हेक चान्दी चा सिक्‍का मिड़ला। 10जको पेहले आलते ले, वाणे हा समझले कि अम्हानु याकनु ज्यादा मिली, बल्ति वानु वी हेक-हेक चान्दी चा सिक्‍का मिड़ला। 11जिसे बेले वानु मिड़ला तां वे घरा चे मालिका उपर कुड़कुड़ाती कर किहुं लाग़ले, 12‘यां पिछला ने तां हेक ही घण्टा काम करले, याहनु वी तु अम्चे बराबर करती ङिले, अम्ही जको सारा ङिओ तपते चिटके मां मेहनत करली।’

13“ओणे वांचे महु हेक नु उत्तर ङिला, ‘हे दोस्त, मैं दुधे लारे कुई अन्याय कोनी करला। का तु माये लारे हेक चान्दी चा सिक्‍का कोनी ठहराला हुता ? 14जको दुधा छै, चती ते चाह्‍ला जा, माई इच्छा हा छै कि जितना तनु ङिये उतने ही यां भांसला नु ङिये। 15का हा ठीक कोनी कि मैं आपणे धन लारे जको चाहवे ऊं करे? का माये भले हुवणे चे वजह तु जलन का राखी?’

16 # मत्ती 19:30; मरकु 10:31; लूक 13:30 “यूं करती जको भांसु छी, वे पेहले हुवे, ते जको पेहले छी, वे भांसु हुवे।”

आपणी मौत चे बारे मां ईशु ची तीजी भविष्यवाणी

(मरकुस 10:32–34; लूका 18:31–34)

17यरुशलेम नु जते हुले ओणे ब़ारहा चैला नु हेकले मां गेहती गेला, ते मार्ग़ा मां वानु किहुं लाग़ला, 18“ङेखा, अम्ही यरुशलेम नु जऊं पले, ते मैं इन्साना चा पूत प्रधान याजका ते शास्त्रीया चे हाथा मां पकड़वाला जई, ते वे ओनु मारणे चे लायक ठहरावे। 19ते ओनु नेरीया जातिया चे हाथा मां सोंपे कि वे ओनु ठठा मां उङारो ते कोड़े मारो ते क्रूसा उपर चढ़ाओ, ते ओ तीजे ङिओ जीता करला जई।”

हेकी आई ची बिनती

(मरकुस 10:35–45)

20बल्ति जबदी चे सब पूता ची आई ने, आपणे पूता चे लारे ईशु चे गोढु आती कर प्रणाम करला, ते ओकनु कोच्छ मांगु लाग़ली।

21ओणे वानु केहले, “तु का चाहवी?”

वा ओचे लारे ब़ोली, “हा वचन ङे कि माये ये ङोन पूत दुधे राज़ मां हेक दुधे सज़्ज़े पासु ते हेक दुधे खब़्ब़े पासु ब़ेसो।”

22ईशु ने उत्तर ङिला, “तम्ही ना जाणा कि का मांगा पले। जको मुंगर मैं पीणे उपर छै, का तम्ही पी सग़ा?”

वाणे ओनु केहले, “पी सग़ु।”

23ईशु ने वानु केहले, “तम्ही माया मुंगर तां पीया, पर आपणे सज़्ज़े पासु ते आपणे खब़्ब़े पासु कानु ब़िसाणने माये काम कोनी, पर जाये वास्ते माये ब़ा नरीकारा ची ओर कनु तियार करले गेले, वांचे वास्ते छै।”

24ईं सुणती कर ङस चैले वां ङुंहु भावां उपर गुस्से हुले। 25#लूक 22:25,26ईशु ने वानु गोढु हकारती कर केहले, “तम्ही जाणा कि नेरीया जातिया चे हाकिम वांचे उपर प्रभुता करी, ते जको बङे छी, वे वांचे उपर अधिकार जतावी। 26#मत्ती 23:11; मरकु 9:35; लूक 22:26पर तम्चे मां इसड़े नी हुवी। पर जको कुई तम्चे मां बङे हुवणे चाहवे, ओ तम्चा सेवक बणो। 27ते जको तम्चे मां प्रधान हुवणे चाहवे, ओ तम्चा दास बणो। 28जिंवे कि मैं इन्साना चा पूत, ऐवास्ते कोनी आला कि ओची सेवा-टहल करली जाओ, पर ऐवास्ते आला कि आप सेवा-टहल करो, ते ब़ोहता नु छुड़ावणे वास्ते आपणे प्राण ङियो।”

ङोन अन्धा नु आंखीया चा दान

(मरकुस 10:46–52; लूका 18:35–43)

29जिसे बेले वे यरीहो शहरा कनु निकली पलते, तां हेक बङी भीड़ ईशु चे भांसु टुरती पली। 30ते ङोन अन्धे, जको सड़के चे किनारे ब़ेहले हुते, ईं सुणती कर कि ईशु जाये पला, साङ मारती कर किहुं लाग़ले, “हे प्रभु, दाऊद ची ऊलाद्ध, अम्चे उपर दया कर!”

31लौका ने वानु दड़काले कि चोप रिहो, पर वे होर वी रौल मचाती कर ब़ोले, “हे प्रभु, दाऊद ची ऊलाद्ध, अम्चे उपर दया कर।”

32तब ईशु ने खड़े हुती कर, वानु हकारले ते केहले, “तम्ही का चाहवा कि मैं तम्चे वास्ते करे?”

33वाणे ओनु केहले, “हे प्रभु, ईं कि अम्चीया आंखी खुलती जाओ।”

34ईशु ने तरस खाती कर वांचीया आंखीया नु छूले, ते वे तुरन्त ङेखु लाग़ती गेले, ते ओचे भांसु टुरती पले।

Currently Selected:

मत्ती 20: ODR

Highlight

Copy