लूका 9
9
ब़ारहा प्रेरितां नु भेज़ले
(मत्ती 10:5–15; मरकुस 6:7–13)
1बल्ति ईशु ने ब़ारहा प्रेरिता नु हकारती कर वानु सारीया दुष्टात्मा ते बिमारीया नु दूर करने ची सामर्थ ते अधिकार ङिला, 2ते वानु नरीकारा चे राज़ चा प्रचार करने ते बिमारा नु ठीक करने चे वास्ते भेज़ले। 3ओणे वानु केहले, “मार्ग़ा चे वास्ते कहीं ना चवा, ना तां ङांग, ना झोली, ना रोटी, ना रुपये, ते ना ङोन-ङोन चोले। 4जिसे कुई घरा मां तम्ही जावा, उठी रिहा, ते उठु विदा हुवा। 5#प्रेरि 13:51#लूक 10:4–11जको कुई तम्हानु ग्रहण ना करो, ओ शहरा महु निकलते हुले आपणे पग़्ग़ा ची धूड़ झाड़ती नाखा, कि वांचे उपर ग़वाही हो।”
6वे निकलती कर गांवा-गांवा सुसमाचार सुणाते, ते जिठे-किठे लौका नु ठीक करते हुले, फिरते रेहले।
हेरोदेस राजा ची परेशानी
(मत्ती 14:1–12; मरकुस 6:14–29)
7देशा ची चौथाई चा राजा हेरोदेस ईं सब सुणती कर घब़राती गेला, कांकि कईयां ने केहले कि यूहन्ना मरला आला महु जीता हुती गेला। 8ते कोच्छ ने ईं कि एलिय्याह ङिसला, ते नेरा ने कि पुराणे भविष्यवक्ता महु कुई जीता हुती आला।
9पर हेरोदेस ने केहले, “यूहन्ना चे तां मैं ठोङ बढवाले, हमा ईं कूण छै जाये बारे मां इसड़ीया बाता सुणे पला?” ते ओणे ईशु नु ङेखणे ची इच्छा करली।
पाँच हजार मर्दा नु खुलाले
(मत्ती 14:13–21; मरकुस 6:30–44; यूहन्ना 6:1–14)
10बल्ति प्रेरितां ने वापिस आती कर जको कोच्छ वाणे करले हुते, ओनु बावड़ती ङिले, ते ओ वानु अलग़ करती कर बैतसैदा नांवा चे शहरा सनु गेहती गेला। 11ईं जाणती कर भीड़ ईशु चे भांसु टुरती पली, ते ओ खुशी लारे वानु मिड़ला, ते वांचे लारे नरीकारा चे राज़ चीया बाता करु लाग़ला। ते जको ठीक हुवणे चाहवी ले वानु ठीक करले।
12जिसे बेले ङिओ ढलती गेला, तां ब़ारहा प्रेरितां ने आती कर ओनु केहले, “भीड़ नु विदा कर कि आस-पास चे गांवा ते बस्तीया मां जती कर टिको ते खाणे चा इन्तजाम करो, कांकि अम्ही इठे बरब्यान जग़हा मां छिऊं।” 13ओणे वानु केहले, “तम्ही ही वानु खाणे वास्ते ङिया।” वाणे केहले, “अम्हा कनु चा पाँच रोटीया ते ङोन माछलीया नु छोड़ती कर नेरे कोच्छ कोनी, पर हव्वे, अगर अम्ही जती कर यां सब लौका चे वास्ते खाणे मोल गिहुं, तां हो सग़े।” वे लौक तां पाँच हजार मर्दा चे लगभग हुते। 14बल्ति ओणे आपणे चैला नु केहले,
“वानु पंजहा-पंजहा करती कर पंगती मां ब़िसाणती ङिया।” 15वाणे इसड़े ही करले, ते सब नु ब़िसाणती ङिले। 16बल्ति ओणे वे पाँच रोटीया ते ङोन माछलीया चलीया, ते स्वर्ग़ा सनु ङेखती कर नरीकारा चा धन्यवाद करला, ते भान्ती-भान्ती कर चैला नु ङिता गेला कि लौका नु खाणे वास्ते ङियो। 17तब सब खाती कर रज़ती गेले, ते चैला ने बचलीया आलीया रोटीया लारे ब़ारहा टोकरे भरती कर चले।
पतरस चे ईशु नु मसीह मनणे
(मत्ती 16:13–19; मरकुस 8:27–29)
18जिसे बेले ईशु हेकला प्राथना करे पलता ते चैले ओचे लारे हुते, तां ओणे वांचे कनु पूछले, “लौक मनु का किही?”
19 #
मत्ती 14:1,2; मरकु 6:14,15; लूक 9:7,8 वाणे उत्तर ङिला, “यूहन्ना बपतिस्मा ङेणे आला, ते कुई-कुई एलिय्याह, ते कुई ईं कि पुराणे भविष्यवक्ता महु कुई जीता हुती गेला।”
20 #
यूह 6:68,69 ईशु ने वांचे कनु पूछले, “पर तम्ही मनु का किहा?”
पतरस ने उत्तर ङिला, “नरीकारा चा मसीह।”
आपणी मौत चे बारे मां ईशु ची भविष्यवाणी
(मत्ती 16:20–28; मरकुस 8:30—9:1)
21तब ओणे वानु चिताती कर केहले कि ईं कानु ना केहजा। 22बल्ति ओणे केहले, “मैं इन्साना चे पूता चे वास्ते जरुरी छै कि ओ ब़ोहत ङोख चाओ, ते बङके ते प्रधान याजक ते शास्त्री ओनु तोच्छ समझती कर मारती नाखो, ते ओ तीजे ङिओ जीता हुती जाओ।”
ईशु चे भांसु टुरणे चा मतलब
23 #
मत्ती 10:38; लूक 14:27 ओणे सब नु केहले, “अगर कुई माये भांसु आणा चाहवे, तां आपणे आप कनु इन्कार करो ते हर ङिओ आपणा क्रूस चती कर माये भांसु टुरती पड़ो। 24#मत्ती 10:39; लूक 17:33; यूह 12:25अगर जको कुई आपणी जीन्दगी बचावणा चाहवे ओ आपणी जीन्दगी गुंती ब़ेसी, पर जको कुई माये वास्ते आपणी जीन्दगी गुंवी, ओ विनु बचावी। 25अगर इन्सान सारे संसारा नु हांसिल करे, ते आपणी जीन्दगी गंवाती ङियो, जा विचा नुकसान चवे, तां ओनु का फायदा हुवी? 26जको कुई माये कनु ते माया बाता कनु लज़ावी, मैं इन्साना चा पूत वी, जिसे बेले आपणी ते आपणे ब़ा नरीकारा ची ते पवित्र स्वर्ग़दूता ची महिमा लारे आवी, तां ओकनु वी लज़ावी। 27मैं तम्हानु सच्च किहे पला कि, जको इठे भिले, वांचे महु कोच्छ इसड़े छी कि जब तक नरीकारा चे राज़ नु नी ङेखती गिहे, तब तक मौत चा स्वाद नी चाखे।”
ईशु चा रुप बदलना
(मत्ती 17:1–8; मरकुस 9:2–8)
28यां बाता चे कुई आठ ङिहां चे बाद ईशु पतरस ते यूहन्ना ते याकूब नु लारे गेहती कर प्राथना करने वास्ते पहाड़ा उपर गेला। 29जिसे बेले ओ प्राथना करे ही पलता, तां ओचे चेहरे चा रुप बदलती गेला, ते ओची ओढ़णी चिट्टी हुती कर चमकु लाग़ली। 30ते ङेखा, मूसा ते एलिय्याह, ये ङोन मर्द ईशु लारे बाता करी पलते। 31ये महिमा समेत ङिसले, ते ओची मरणे चे बारे ची चर्चा करी पलते, जको ईशु यरुशलेम मां पुरी करने आला हुता। 32पतरस ते ओचे साथी गेहरी नीङे मां पलते, ते जिसे बेले आच्छी तरह जाग़ले, ते ओची महिमा ते वा ङुंहु मर्दा नु, जको ओचे लारे भिलते ले, ङेखले। 33जब वे ओचे कनु जऊं लाग़ले, तां पतरस ने ईशु नु केहले, “हे स्वामी, अम्चे इठे रेहणे आच्छे छै, तां अम्ही तीन मण्डप बणाऊ, हेक दुधे वास्ते, हेक मूसा वास्ते, ते हेक एलिय्याह वास्ते।” पतरस ना जाणता कि का किहे पला।
34ओ ईं किहे ही पलता कि हेक बदला ने आती कर वानु घेरती गेले, ते जब वे ओ बदला लारे घिरु लाग़ले तां ङरती गेले। 35#मत्ती 3:17; 12:18; मरकु 1:11; लूक 3:22#2 पत 1:17,18तब ओ बदला महु हा अवाज आली, “हा माया पूत छै, ते माया चुणला आला छै, ऐची सुणा।” 36हा अवाज हुते ही ईशु नु छोड़ती नेरे कुई कोनी मिड़ले, ते वे चोप रेहले, ते जको कोच्छ ङेखले हुते ओची कुई बात वां ङिहां मां कानु वी कोनी केहली।
दुष्टात्मा आले ब़ाला नु ठीक करले
(मत्ती 17:14–18; मरकुस 9:14–27)
37ङुजे ङिओ जिसे बेले वे पहाड़ा कनु उतरले तां हेक बङी भीड़ ओनु आती मिड़ली, 38ते ङेखा, भीड़ी महु हेके बन्दे ने धाड़ मारती कर केहले, “हे गुरु, मैं दुधे कनु बिनती करे पला कि माये पूता उपर कृपा कर, कांकि ऊं माये हिकड़ाता चे छै। 39ते ङेख, हेक दुष्टात्मा ओनु पकड़ती गिहे, ते ऊं अचानक धाड़ हकले, ते वा ओनु इसड़े मरोड़ती ङिये कि ओचे मुँहा महु झग़ आऊं लाग़ती जाये, ते ओनु अधमरे करती कर मुश्किल लारे छोड़े। 40मैं दुधे चैला कनु बिनती करली कि वे विनु काढ़ती ङियो, पर वे काढ़ ना सग़ले।”
41ईशु ने उत्तर ङिला, “हे अविश्वासी ते हठीले लौक, मैं कब तक तम्चे लारे रिही, ते तम्ची सेहता रिही? आपणे पूता नु इठे गेहती आ।”
42ऊं आवे ही पलते कि दुष्टात्मा ने ओनु ढाती कर मरोड़ले, पर ईशु ने अशुद्ध आत्मा नु दड़काले ते छोरा नु ठीक करती ओचे ब़ा नु सोंपती ङिले। 43तब सारे लौक नरीकारा ची बङी सामर्थ कनु हैरान हुले।
आपणी मौत चे बारे मां दुबारा भविष्यवाणी
(मत्ती 17:22,23; मरकुस 9:30–32)
पर जब सारे लौक, वे सारे काम जको ओह करता, हैरान हुते, तां ईशु ने आपणे चैला नु केहले, 44“तम्ही यां बाता उपर ध्यान ङिया, कांकि मैं इन्साना चा पूत बन्दा चे हाथा मां पकड़वाला जाणे नु छै।” 45पर हा बात वांची समझी मां कोनी आली, ते हा वाकनु लुकली रेहली कि वे यिनु ना जाण सग़ो, ते वे ये बाते चे बारे मां ओकनु पूछणे कनु ङरते।
सब कनु बङे कूण
(मत्ती 18:1–5; मरकुस 9:33–37)
46 #
लूक 22:24
बल्ति वांचे मां हा बहस हुं लाग़ली, “अम्चे महु बङे कूण छै?” 47पर ईशु ने वांचे मना चा विचार जाणती गेला, ते हेक ब़ाला नु गेहती कर आपणे गोढु खड़े करले। 48#मत्ती 10:40; लूक 10:16; यूह 13:20ते वानु केहले, “जको कुई माये नांवा लारे ऐ ब़ाला नु स्वीकार करे, ओ मनु स्वीकार करे, ते जको कुई मनु स्वीकार करे, ओ माये भेज़णे आले नु स्वीकार करे, कांकि जको तम्चे महु सबकनु छोटे महु छोटे छै, ओही बङा छै।”
जको अम्चे विरोध मां कोनी, ऊं अम्चे लारे छै
(मरकुस 9:38–40)
49बल्ति यूहन्ना ने केहले, “हे स्वामी, अम्ही हेके बन्दे नु दुधे नांवा लारे दुष्टात्मा नु काढ़ते ङेखले, ते अम्ही ओनु मना करले, कांकि ओ अम्चे लारे हुती कर दुधे भांसु ना टुरती पड़ी।”
50ईशु ने ओनु केहले, “ओनु मना ना करा, कांकि जको तम्चे विरोध मां कोनी, ओ तम्ची तरफ छै।”
सामरी लौका चे तरफु ईशु ची खिलापत
51ईशु चे उपर चवणे ची ङिहें पुरी हुवणे आली हुती, ते ईशु ने यरुशलेम जाणे चा विचार करला। 52ते ओणे आपणे आग़ु दूत भेज़ले, वे सामरिया लौका चे हेक गांवा मां गेले, कि ओचे वास्ते जग़हा तियार करो। 53पर सामरी लौका ने ईशु चा कद्दर कोनी करला, कांकि ओह यरुशलेम जाये पलता। 54ईं ङेखती कर ओचे चैले याकूब ते यूहन्ना ने केहले, “हे प्रभु का तु चाहवी कि अम्ही आज्ञा ङिऊं कि आसमाना महु जाखते ढेती कर वानु भसम करती ङियो?”
55पर ओणे वानु दड़काले ते केहले, “तम्ही ना जाणा कि तम्ही किसड़ी आत्मा चे छिवा। कांकि इन्साना चा पूत लौका ची जान नाश करने वास्ते कोनी आला, बल्कि बचावणे वास्ते आला।” 56ते वे किसी ङुजे गांवा मां चाह्ले गेले।
ईशु चा चैला बणने चा मोल
(मत्ती 8:19–22)
57जिसे बेले वे मार्ग़ा मां जई पलते, तां किह्णी ईशु नु केहले, “जिठे-किठी तु जाये, मैं दुधे भांसु टुरती पड़ी।”
58ईशु ने ओनु केहले, “लोमड़ीया चीया घौरा ते आसमाना चे पखीयां चे बसेरे हुवी। पर मैं इन्सान चे पूता वास्ते ठोङ मेहलणे ची वी जग़हा कोनी।”
59ईशु ने ङुजे नु केहले, “माये भांसु टुरती पड़।” ओणे केहले, “हे प्रभु, मनु पेहले जऊं ङे, कि आपणे ब़ा नु दफनाती ङिये।”
60ईशु ने ओनु केहले, “मरले आला नु आपणी मुड़दी दफनाऊ ङे, पर तु जती कर नरीकारा चे राज़ चा हर जग़ह प्रचार कर।”
61हेके नेरे ने वी केहले, “हे प्रभु मैं दुधे भांसु आवणे चाहवे, पर पेहले मनु जऊं ङे कि मैं आपणे घरा चे लौका कनु विदा गेहती आवे।”
62ईशु ने ओनु केहले, “जको कुई आपणा हाथ हल उपर मेहलती कर भांसु ङेखे ऊं नरीकारा चे राज़ चे काबिल कोनी।”
Currently Selected:
लूका 9: ODR
Highlight
Share
Copy
Want to have your highlights saved across all your devices? Sign up or sign in
CC BY-NC-ND 4.0
